美國史上最大接管潮？

　　7月18日，周三。恒生指數跌215.38，收22841.92；成交八百四十億七千二百多萬元。7月期指低水，跌275點，收22799點。中移動 （941）跌1.3％，報九十元二角，因今年內已上升36％；中石化（386）跌3.8％，報八元三角五仙，係5月30日以來最低價；中信泰富（267） 跌3.7％，報三十九元二角五仙，今年內已上升52％。

　　花旗推介工商銀行（1398）、建行（939）、中海油（883）及富力地產（2777）。估計工商今年每股獲利二角二仙，升24.5％，O二十一點二倍；建行每股獲利二角四點六仙，升19.3％，O二十三倍；中海油每股獲利六角六仙，減9.2％，O十四倍。

　　礦產資源稅8月1日大幅上調，令本港資源股下跌1.5至5.7％不等，金融股亦普遍下調，但工行及招行（3968）逆市上升；招行估計上半年純利升100％。後市展望，繼續以個別發展為主。

唔再便宜波動難免

　　今天股票已冇四年前咁便宜，但唔代表冇上升空間，因此波動（Volatility）難免。由於估計未來五至十年將有四千五百億美元資金由內地流出，其 中大部分投資香港，根據香港金管局資料估計，流港金額最高可達三千四百億美元，理論上未來港股抗跌力特強。除資金流向外，亦要睇上市公司純利增長率。恒指 平均O十七倍唔算貴，問題喺「G」（增長率）方面，估計今年上市公司純利升幅18.2％，即可支持現水平O，但無法支持更高O。恒指23000點係可接受 嘅水平，再高便木宰羊，呢方面只有依賴非理性亢奮去支持。再睇遠D，例如2008年又如何？估計2008年上市公司純利升幅反而唔及今年。理論上，明年恒 指O炒落唔係炒上，唔係話恒指今年喺23000點附近見頂，但的確有咁嘅可能性存在。唔係年年都可以up, up and away嘅。

　　作為一位成功投資者而非一位相信運氣者，性格上通常略帶保守，以克制霎時衝動。呢種性格可能令你一再錯過機會，但同時卻可避免犯大錯。1974年我老 曹曾失去80％資本，今時今日自己已接近退休年齡，係咪承受得起財富再一次失去80％嘅打擊？年輕時要博（唔博何來世間財，冇財講乜嘢理財？），年老時要 守（因為已輸唔起）。投資市場係冇耳朵嘅，佢聽唔到任何投資專家嘅說話，因此佢嘅表現往往令大部分專家失望（1997年睇好紅籌股及地產股嘅投資者失望， 2000年亦令睇好科網股投資者失望，咁今年呢？）歷史永遠唔會重演，但經常雷同（History does not repeat itself but it often rhymes）。

　　美元滙價去年至今，响十八個月內失去30％價值，理論上月入五萬元者必須變成六萬五千元，才可抵銷港元追隨美元貶值。恒生指數由去年1月14843點 升到23239點，升幅56％，超過一半升幅其實嚟自港元貶值。中國持有一萬億美元外滙儲備，過去十八個月無形損失超過三千億美元；今年OPEC國家拋售 9.4％美元外滙（約一百零一億美元），中國亦減持美元，令美國十年期債券孳息率今年6月一度見五厘三，引起恐慌，雖然今天已低至五厘〇二。今天紐元利率 七厘二五、澳元六厘二五，甚至英鎊亦有五厘七五，都較美元利率吸引，何況英國打算進一步加息？會否引發更多人拋售美元債券，而令十年期債息再次高出五厘二 五？格蛇預言美國經濟有三分一機會衰退係咪危言聳聽？索羅斯認為，依家前99％股票都冇投資價值（99％ of all investments today to be garbage, he wouldn't touch with a ten foot pole！），點樣找尋餘下溫巴仙仲有投資價格嘅股票？邊D股票仍係Apple in your eyes？

美樓按斷供人數增逾八成

　　美國三十年代大衰退，前因係美國財富集中喺少數人手中，例如Vandebilts、洛克菲勒、卡內基及福特家族。今天《時代》雜誌統計，美國一萬五千 個家庭收入佔全國5％，即每個家庭每年收入九百五十萬美元。三十年代美國大富豪將大部分家財用於公益事業，今天美國超級富豪卻用作買豪宅、靚車及私人飛 機。今年6月美國樓按斷供人數上升87％，至十六萬四千六百四十四宗，又以加州、佛州、俄亥俄州及密芝根州最多，即6月份有三百六十億美元物業斷供，估計 金融公司响呢方面損失約九十億美元（只係一個月已經咁樣），上述情況何止美國？只係美國社會透明度高，一切有資料支持。美國一方面有一萬五千家庭年入九百 五十萬美元（七千四百萬港元一年），另一方面每月有十六萬四千個家庭因無法負擔供樓而失去居所，美國經濟係咪到咗衰退邊緣？2001年美國聯儲局對付科網 股泡沫爆破而減息，令美國樓價一升再升，估計2001至06年美國樓價升值五萬億美元，因此而產生二千五百億美元消費，令美國GDP增長率多2％一年。樓 價回落後，已有六千九百三十億美元樓按資不抵債，今天浮面嘅次級按揭問題，只係冰山一角，有人擔心係美國史上最大一次接管潮。家吓美國人仲繼續借錢消費， 5月份消費信貸上升6.4％，其中信用卡貸款上升9.8％。

新首相推英式「八萬五」？

　　上周英國新首相答應英國人未來十年興建新屋三百萬間！六、七十年代英國亦曾每年建屋二十八萬間，當時英國樓價係點？起屋容易供樓難，當大量單位湧入市 場，到時英鎊利率又點？係咪大部分人能以依家樓價買得起超貴英國樓？呢招係咪英式「八萬五」？據《金融時報》計算，英國政府如欲將CPI增長率撳低至2％ 以下，今年12月前英鎊利率可見六厘二六，怪唔得英鎊兌2.05美元仍被睇好；根據分析，英鎊利率在明年才見頂。貝理雅上台十年，英國樓市好足十年；依家 佢拍拍籮柚，英國樓價後市點睇（雖然豪宅價格仲上升緊，但一百萬英鎊以下嘅物業已好滯銷）。

　　大家都知道，支持全球股市上升嘅力量係日圓利差交易，日圓兌歐羅响過去十八個月內回落22％！日圓弱勢令日本經濟保持增長，一旦日圓滙價轉強，日本 2003年4月起嘅經濟復甦會否又再完蛋？過去由對沖基金不斷借入日圓拋售轉為美元投資各種各樣項目，只要日圓保持回落，資金來源不絕，呢種日子可以維持 幾耐？今年1月至今，私募基金（Private Equity Firms）喺股票市場共收購六千七百億美元股票，但最近最大嘅私募基金百仕達（或黑石）亦上市，私募基金係咪已見高潮？國會亦打佢地主意，稅率由過去 15％提升到34％（至於點樣提升法，因美國稅例好複雜，我老曹難以解釋），未來私募基金活動會否減少？

日圓利差交易者開始平倉

　　日圓已升上121.86兌1美元（或者係美元弱？），兌歐羅亦見168.32，即日圓在轉強中；甚至兌紐元亦見96.47，從二十一年低位回升；兌澳 元106.65，亦從十六年低位回升。响東京嘅Okasan Securities Co.分析員認為，日圓unwind行動開始，因為美亞證券事件及其他對沖基金响次級債市損失，令利差交易者開始平倉，而唔等8月份日本銀行加息才行動！ 美亞證券宣布旗下一隻對沖基金已蝕清晒，面對貸款人接管資產，第二隻仍有足夠資產去抵銷十四億美元欠債，但相信剩番畀股東嘅資金已所餘無幾！美亞證券今年 股價已回落14％，一無所有嘅基金係High-Grade Structured Credit Strategies Enhanced Leverage Fund ，3月結時資產淨值六億三千八百萬美元。仍有D渣剩嘅基金叫High-Grade Structured Credit Strategies Fund ，3月結時資產淨值九億二千五百萬美元。前者借入一百一十億美元，後者借入九十億美元；前者如今已一無所有；後者損失91％。上述情況令蚊年慌失失流向十 年期政府債券，令孳息率跌至五厘○二。

　　油價喺紐約商品交易所見七十五美元，係去年8月OPEC宣布唔會增產之後最高。OPEC產油量佔全球40％，去年曾削減一百七十萬桶一天去支持油價由 六十美元回升，至今已升咗十五美元，9月會否宣布增產？利比亞石油部長認為油價上升係政治原因，同供應不足無關；伊朗石油部長認為，供應並唔短缺，不應增 產。據倫敦Man集團分析，估計八十美元一桶油價將喺短期內出現！但亦有睇淡者如美國賓州嘅Schork Group，認為現價美國應拋售儲備油獲利回吐；英國巴克萊資本認為，油公司應趁機鎖死油價。邊個睇法正確？

　　滬深A股係全球最超買嘅主要市場，正面對一次中期調整，將部分泡沫（froth）剔走，整固後或有力再升，此乃後話。內地股市即6月開始嘅調整繼續。

內地股樓相互刺激周而復始

　　深圳市地稅局副局長章家壽話，深圳將加強房地產業中嘅個人所得稅及土地增值稅，去減少地產投資商嘅利潤，從而減少投資及遏制個人炒樓，降低需求、調低 房價。上述稅項9月前實施，普通住宅土地增值稅係房價0.5％，非住宅係房價1％；二手房土地增值稅以成交價0.5％抽取，一般估計影響唔大。《中國證券 報》分析，喺人民幣升值大前提下，中國概念成為炙手可熱嘅投資品，外資蜂擁進入內地市場，唔係去股市就係去樓市，情況有如戰後資金大量流入美國，形成股市 樓價輪流升。上述情況今天中國亦要面對，當股市進入消化期，內地樓價又再上升，係人民幣升值壓力下嘅必然結果。外資進入中國，喺在人民幣升值未見頂前唔會 輕易撤出，結果自然搵嘢炒！

　　股市牛市令更多人可以買得起樓，造成中國地產進入短缺時代；樓價上升又刺激地產股上升，周而復始，直到人民幣升值告一段落為止。　　由於日本唔接受別 國移民，所以最早進入「老人期」。香港一直接受來自中國新移民因此衰老來得較日本慢許多，但2007年起香港亦面對戰後嬰兒退休潮。戰後嬰兒買樓兼買股 票，令樓價同股價長期向上；但1997年後戰後嬰兒開始喺內地置業，令本港買樓人數下降、樓價回落。2007年起戰後嬰兒投資股票嘅能力（未來十年）喺上 升抑或下降？將左右未來港股大方向。

　　雅域集團（1229）7月25日；成功控股（288）、玉皇朝集團（970）、信星集團（1170）、港台集團（645）、日東科技（365）、德發 集團（928）、榮康控股（745）、特速集團（185）26日；華基光電（155）、香港體檢（397）、達成集團（126）27日公布業績。