7月17日，周二。恒生指數升103.36，收23057.30；成交七百八十億二千七百多萬元。7月期指升99點，收23074點。中海油（883）升 3％，報九元零七仙，德意志提高目標價至十元一角七仙；工商銀行（1398）升2.1％，報四元七角九仙，摩根大通推介；理文造紙（2314）上升 11％，報三十元一角，德銀推介目標價三十三元；太平洋航運（2343）升9.1％，報十一元七角二仙，因瑞銀推介；上海實業（363）升3.9％，報三 十三元七角五仙。港股日好日淡，完全冇大方向。
滬深A股今天亦上升。深圳發展銀行升9.8％，報二十九元一角五分，因估計上半年利潤上升145％，而且高盛推介；興業銀行升9.6％、招商銀行升 6％，前者純利估計可上升90％，後者純利升一倍；萬科升10％，見二十二元六角二分；保利地產升9.8％，見五十三元六角八分。
本周內地將公布敏感數據，以及再將加息放入議事日程。7月18日內地公布第二季GDP增長率及6月份CPI升幅，估計前者升幅11％，後者可能高於4％，因此唔排除周末宣布加息。內地股市日好日淡，但6月份開始，大方向係反覆向下。
英鎊存在加息壓力
英鎊已升至二十六年內最高，見2.046美元，係1981年6月以來最高。6月份英國CPI上升2.4％（5月份升2.5％），超過目標通脹嘅2％，令英鎊繼續有加息壓力。
2002至06年因美國樓價上升，為過去五年創造咗一萬億美元嘅消費力，相等於過去五年新增個人消費力45％。上述資金來源今年起開始乾涸，根據 Case-Shiller數字，過去六個月美國樓價較去年同期平均回落5％（較去年下半年平均回落2.7％），係近十六年內最快嘅跌速。空置等候出售房群 單位共二百四十五萬四千間，較1994至2004年平均數每年一百萬間上升超過一倍。新屋建造合約亦跌至十年內新低，據ABA資料，第一季樓按延期率達 2.42％，係2001年經濟放緩以來最差嘅一季，已有對沖基金因此而摺埋，約一萬八千億美元次級按揭受影響；次級債券利率與一級債券利率差由2004年 點零點九一厘擴闊到2006年四厘二一，今年進一步擴闊。
短期股市因上升而上升
美國GDP 11％來自出口、68％來自個人消費，因美元弱勢而刺激出口上升所帶來嘅好處，係無法抵銷個人消費增長放緩。據世界銀行資料，今年維持高GDP增長率嘅係 四大金磚國（BRIC），低GDP增長國係日本同美國（美國係新加入）。日本GDP佔全球GDP 14.1％，對全球GDP影響力唔大；但美國GDP卻佔全球GDP 31％，兩國加起來佔全球GDP 45.2％，而四大金磚國只佔全球GDP 10％多DD。最後係由四大金磚國繼續上升而將全球經濟向上推嘅力量大，抑或日本加美國GDP增長率放緩將世界經濟增長拖慢嘅力量大？
金融方面，各國已提升利率，只有日本同美國例外。美國揸住嘅外國資產十三萬八千億美元、外債十六萬三千億美元（或淨負債二萬五千億美元）。美國海外投 資賺取4.7％回報，而外國人喺美國投資回報只有3.7％，因此雖然負債較資產大，美國仍有淨收入二百五十五億美元。美國不但係全球最大負債國，亦係全球 最大投資者，其影響力可以想像。
外國人對美國債券市場利率嘅影響唔大。去年中外國私人投資者只佔整個美債市場3.1％，外國官方機構亦只佔8.6％，即大部分美債係美國私人及美國機構持有。所謂中國人行拋售小量美債令美債息率上升，乃誇大嘅說法。
組成國際指數（International Index）嘅世界十大股市，自2003年年中至今表現不俗，大部分創新高，部分已進入拋物線上升，即所謂blow off。短期股市因上升而上升，長期而言卻進入夕陽無限好時段，冇人事前知道呢個上升周期幾時真正結束，總之小心駛得萬年船，比較上危險嘅行業係金融、保 險、地產股。美國經濟放緩，上述行業將首當其衝。美國樓價回落已影響美國銀行去年下半年業績，到底影響有幾深，我地唔係呢方面專家，最好都係避開好D！全 球大部分銀行都做「磚頭當舖」（即樓按生意），1997年7月前香港樓按佔銀行總貸款五成或以上，近十年才逐步減少；美國情況好D，但真正影響係點好難了 解。保險公司一般揸咗唔少債券，此乃1980至2003年表現出色嘅理由；近年美國債券牛市已死，保險業轉向財富管理，業績隨股市波動；地產更唔在講。
食物價格及能源價格繼續困擾貝南奇。新興市場所產生嘅需求，繼續對上述項目產生壓力。美國農業部估計，全球穀物存量已跌至三十年最低。七十年代因食物 價格及能源價格上升，令美國通脹率平均維持7.1％一年（二十一世紀至今平均2.75％一年）。二十一世紀唔少農產品用作生產乙醇，刺激食物價格上升。由 於各國CPI結構唔同，食物同能源價格上升，對中國、印度等國家嘅CPI影響較大，對美國、歐洲、日本等國家影響較少，形成新興國家出現較高通脹率、 OECD國家較低通脹率。香港CPI食品價格所佔比重唔高，亦屬低通脹區。
油價由1999年低於十美元一桶升到今天七十四美元，升幅超過七倍。1973年石油危機，油價上升四倍，全球經濟已大衰退，點解呢次油價上升七倍，世 界經濟仲咁繁榮？主要係世界經濟結構唔同咗。以美國五百間大企業為例，能源只佔總成本7％，勞工成本卻佔總成本70％。不但係咁，美國20％高收入群消費 佔全國總消費40％，最低收入20％消費只佔全國總消費8％；高收入群擁有房地產同股票，過去五年財富效應令佢地增加消費；至於能源同食物，佔年收入十萬 美元以上嘅家庭支出幾多百分比？反之，最低收入20％雖然因能源同食物價格上升而可能減少其他消費，但佢地只佔美國總消費市場8％，即使佢地減少消費，對 消費市場嘅影響細到甚至無法用數字顯示出來。換言之，社會愈富有，樓價同股價影響GDP升降嘅幅度愈大，能源及食物價格對GDP升降嘅影響力愈細。亦即係 話，次級債券對股市嘅影響力較油價大。
隨着投資知識普及，人人皆知「太早睇淡係死罪」，因此人人都?實個EXIT位，一旦有風吹草動便走頭。有人問到時止蝕沽盤能否生效？木宰羊。最先受影 響應該係債券市場，如十年期債券息率升上五厘二五呢個關口位便要留意。其次係日圓滙價，如連升三天亦應小心。2003年牛市剛開始時長揸非常有效，到今年 7月恒指23000點，應否長揸則見仁見智，理論上應學習利用波幅去搵錢，再唔係抱長揸冇衰嘅心態。日圓有乜依郁可大可小
展望未來，世界經濟逐步由低通脹、高企業純利增長期，進入較高通脹及較低企業純利增長期。未來股市應作何反應？滙率與商品價格近年影響力好大， 2002年起美元弱勢，加上商品價格強勢，形成股市大牛市。美元快接近1.4美元兌1歐羅及2.05美元兌1英鎊（上述較索羅斯响1992年攻擊英鎊 ERM制度水平時仲高，當年英鎊失守後，兌美元一直回落到接近一算），加元亦好快同美元睇齊！唯一輸畀美元嘅係日圓，因為只有半厘息；日圓滙價有乜依郁， 真係可大可小。
OPEC嘅7月份石油報告估計，明年全球石油需求增加一百三十四萬桶一天或1.6％，至八千六百九十四萬桶（今年增長一百三十四桶一天）。國際能源組 織估計，二十六個工業國明年增加需求二百二十萬桶一天，因而要求OPEC增加石油供應，9月11日OPEC將開會決定（以前決定係2008年三千零七十一 萬桶一天、2007年三千零七十八萬桶一天），過去OPEC以減產去對抗生物能源產量上升。高盛估計，今年秋季油價可見九十美元、年底九十五美元（如 OPEC唔增產）；如9月OPEC增產，可令油價回落五至十美元一桶。因此，9月油價係升係降，將由OPEC開會決定。
美元弱勢繼續推高美股，因美國企業45％純利來自海外；另一方面，次級債券又令美國信貸市場減慢增長。如明年民主黨得勢，相信美國政府又會重返增加稅收、減少財赤期。
股市有冇泡沫？答案係肯定嘅，不過股市仍處於否認泡沫期（negativity bubble）。當一個人九成醉之時，一定話我冇醉；同樣道理，泡沫將爆未爆之前，有唔少人會出嚟否認佢有泡沫，通常泡沫喺爆破後才會被承認。1997年 上半年有邊個認為香港樓市有泡沫？2000年第一季有幾多間大行否認科網股有泡沫？今天內地A股處否認泡沫期，直到爆破為止。
窮大學生搖身變成富甲一方
復星國際（656）喺香港上市後，董事長郭廣昌已成為內地新貴，手上二十九億股復星國際，市值三百億元。郭廣昌1967年生於浙江東陽農村一個貧困家 庭，1989年畢業於上海復旦大學，三年後佢同四個同學用借番嚟嘅三萬八千元創業，並發明一種乙肝診斷試劑，賺得第一桶金，然後再投資房地產、百貨、鋼 鐵、金融，例如建龍鋼鐵、德邦證券、聯華超市（980）。復地集團已係上海最大房地產發展商之一，正申請來港上市，更持有《21世紀經濟報道》股份。由 1989年前嘅窮大學生到今天富甲一方，內地經濟機會之多可見一斑。
中國保監會批准內地保險公司股票投資佔總資產5％上升到10％，包括國壽（2628）及平保（2318），估計可投資多一千億元人民幣响內地股市。根 據標準普爾估計，內地保險公司2005年總資產回報率只有3.6％，較國際標準低許多。內地保險公司資金71％持有國債、現金及存款，2005年2月批准 5％資產可投資股票，係2005至06年內地保險公司純利大增嘅理由。今後可將10％資產投資响內地股市，係好係壞木宰羊，因為今年7月內地A股水平同 2005年2月已相差好遠。估計最終當局會批准內地保險公司將資產15％投資內地股市，內地保險公司未來純利受A股升降影響十分大。日本保險公司過去因日 經平均指數大跌，令九十年代至今業績令人失望；反之，美國保險公司過去因美股上升，股價則升完可以再升。今時今日睇內地保險股，隨咗睇市場佔有率外，其次 係公司嘅財富管理能力，如理財一流，未來純利自然升完可以再升；如理財水平低，都幾濕滯。投資內地保險股前，最好先了解一下內地A股市場。
沒有留言:
發佈留言