「七」的疑惑已破解

　　7月8日，周日。上周六2007年7月7日平穩度過，冇乜大件事發生，證明「七」的疑惑只係茶餘飯後傾閒偈得啖笑而已，千萬唔好認真。如果風水大師真係咁 靈驗，佢地都唔需要為各位睇風水啦；俗語有云：「風水佬呃你十年八年。」亦有人認為「發達去燒香、落難才去睇相」，如非運滯而去睇相咁就陸雲亭睇相（唔衰 攞嚟衰）。至於行衰運不妨去睇吓，以尋求心靈安慰。「七」的疑惑上周六已破解，下半年股市繼續木宰羊。

太多人追逐短期利潤

　　今年股市難玩嘅理由係現價已反映企業2007年度純利，依家好難發掘未來大升或大跌嘅股份（二線股例外，因為大部分證券公司研究不足，可能仍有滄海遺 珠）。上半年股價因應消息或中央政策改變而波動，令價值投資者（Value investors）難展所長。大部分投資者熱中於找尋短期內可能上升20％嘅股份，好少投資者喜歡投資長期股價可上升十倍甚至一百倍嘅股份，呢個係金融 市場最大嘅弱點，太多人追逐短期利潤形成股價不斷出現波動。

　　每年年初時我老曹都有預測今年睇好乜嘢行業及邊類股份，但今年例外，咁並非我老曹睇淡2007年金融市場，而係當全世界都充斥大量資金到處尋找回報之 時，令普通人喺金融市場尋找到值得投資嘅機會愈來愈困難。今天金融市場已非公公婆婆可以應付得來，其快上快落嘅特性一唔小心好易便被套住。响逞現泡沫嘅金 融市場，甚至強如美亞證券，其屬下兩大基金亦被次級按揭債券套牢。前者High Grade Structured Credit Strategies Fund成立只有三年多，首四十個月個個月都賺錢然後……。後者High Grade Structured Credit Enhanced Leverage Fund去年8月才開始……。前者用九億二千五百萬美元做本錢，購入九十七億美元次級債券，同時拋空四十億美元次級債券，槓桿比率六倍；後者到今年3月 31日止有資本六億三千八百萬美元，並借入六十億美元，購入一百一十五億美元次級債券及拋空四十五億美元次級債券，槓桿比率十倍。借錢成本係五厘三六加零 點二五厘即五厘六一，透過購入次級債券同時拋空估計會回落嘅次級債券可獲八厘回報利差交易二厘三九，再透過槓桿比率十倍一年回報率可達二十三厘九（未計使 費）。如一切冇事，的確係唔錯嘅投資。問題出在CDO組合上（你購入嘅次級債券真係唔會出事嗎？你拋空嘅次級債券真係會出事嗎？）如你購入的次級債券出 事，你拋空的次級債券卻冇事，咁你就大件事。今年美亞證券及其所屬公司响聖地牙哥已接管最少五十三間房屋、阿里桑那州四十八間、俄亥俄州四十間；ＪＰ摩根 及大通今年响密芝根州接管最少一百九十四間；美林响加州接管八十七間；花旗集團响內華達州接管四十七間……。世上不如意事十常八九，呢類大對沖基金一旦 Unwind，影響會係點？投資界形容有人從帝國大廈跳下來，雖然已跌至第八十七層，有人用無線電咪問佢有冇事？佢話So far So good，因為未跌至地面前，佢仍然係冇事。未來十八個月美國將有二百萬間房屋低息貸款合約到期，改為高息（六厘七五），影響係點？木宰羊。今年第一季有 三萬間屋無法應付供樓而被接管，較去年同期上升23.9％，未來十八個月又會點？

商品及A股都形成泡沫

　　另一泡沫喺商品方面，家吓有唔少人睇好商品價格，並唔認同商品價格自去年5月起陸續見頂，資金仍然大量湧入資源股。

　　當然仲有內地A股泡沫，支持呢次A股牛市最大理由係流動性資金過剩，2006年5月至今年4月內地居民從儲蓄戶口中取出約八千五百億元人民幣投入股票 市場，近月來QDII、大型IPO、特別國債等加起來已可扭轉流動性過剩問題，只係中央做得好技巧、有秩序咁安排A股軟着陸。內地A股已出現「天花板」阻 力，估計上半年A股純利平均上升60％，全年純利上升45％到35％（即下半年A股純利升幅大減）。下半年純利升幅下跌後，能否支持A股平均O四十五倍將 成疑問，因為全球新興市場O只有十八到二十五倍。今天金融市場真係泡沫處處，我老曹主張沖個泡泡浴，即用有限資金繼續玩落去；林森池兄周末喺香港大學亦教 人點樣响泡沫中生存。逃避唔係辦法，點樣應付泡沫始係積極態度。例如有人估計未來兩年銅價同鎳價可能回落50％，我地又點睇江西銅（358）？1997年 上半年香港亦係泡沫處處，如果你跟大家炒紅籌股如北控（392）、上海實業（363）等，至今仍被套牢；反之，如果1997年8月吸納思捷環球 （330）、利豐（494）等，十年後今天一樣賺到笑。1997年第三季如果你投資香港房地產，除豪宅外，至今仍被套牢；反之，如果你投資倫敦物業，至今 不但賺樓價，同時賺滙水。投資三大「W」（when：何時買賣。what：買賣何股，where：何處投資），請常記於心。

性格決定最後輸贏

　　正面估計（Positive expectations）一旦出錯又點應付？如何喺制訂最好嘅計劃同時作最壞嘅打算？一旦事與願違又點樣應付？此乃止蝕唔止賺理論。請不要學香港電台台 長因飲大咗而神志不清，任何時刻應保持理性。拿破崙天資聰敏，所以經常打勝仗，一生人只打敗兩次，一次係進攻莫斯科時貪勝不知輸，令七成軍力失去；第二次 係滑鐵盧一役，更係全軍盡墨。因為佢只知如何打勝仗，一旦打敗仗，便唔識點處理。反而英國軍隊當年經常打敗仗，因此連撤退都井井有條，經常以保存實力為 主，最後機會來啦，只打咗一次勝仗，就係同普魯士軍隊聯手一前一後將拿破崙軍隊全部消滅。有好多投資者喺1997年8月前贏過無數勝仗，卻响亞洲金融風暴 中因不肯撤退而全軍盡墨；有好多投資者喺1997年8月前表現並唔出色，但係因為行使止蝕而保存實力，2003年4月東山復出，依家變得好威風。贏八次輸 兩次，你可能係拿破崙；輸幾次贏一次，你可能係威靈頓。金融市場最後誰贏誰輸？就係由性格決定。

　　今天全球經濟處於低利率、高GDP增長率，係戰後少見連續四年美國GDP保持4％以上增長率而利率仍只有五厘二五（雖然今年第一季美國GDP增長率已 大幅放緩），最大理由係日本不斷向全球提供廉價資金，日圓利率只有零點五厘；加上日圓弱勢令日本資金湧向全球。有咗大量廉價資金支持，全球股市欲跌無從 （隱憂係日圓滙價如果突然轉強就大件事）。今天雖然泡沫處處，但至今冇人知道邊一天會爆破。你可以唔玩，亦可以沖個泡泡浴，但千萬唔好睇淡而拋空。值得留 意嘅訊號係：一、日圓滙價轉強；二、美國十年期債券利率企於五厘二五之上。今時今日投資股票寧短勿長及唔好忘記訂下止蝕盤。家電股今年業績看好

　　連日持續高溫天氣令內地電風扇、冰箱、空調熱賣。夏季空調用電量佔內地居民家庭用電量70％以上，節能空調銷量較去年同期增長近三倍。海爾、美的、 TCL、三菱實業等內地家電幾個品牌暢銷型號幾近缺貨，睇嚟今年家電股業績因內銷成績好而上升。家電熱賣但CRT彩電繼續走低。傳統顯象管電視已面臨淘 汰，因為超薄CRT問世。2005年傳統CRT電視市場佔有率43.6％，2007年上半年已跌至11.3％，早已淡出大城市消費者視線，只能喺二三線城 市尋找市場。今年上半年銷量三百八十五萬台，較去年同期下跌18.2％；金額十五億二千六百萬元，較去年同期下降28.09％。喺二三線城市仍有市場理由 係因為二三線城市仍然睇唔到高清電視節目。新品種超薄CRT今年第一季銷售一百三十萬台，較去年同期上升二倍多，估計全年可打破四百五十萬台。如無意外， 明年傳統顯像象CRT電視將被淘汰出市場。