7月11日，周三。恒生指數跌278.82，收 22607.02；成交一千零九億元。7月期指跌216點，收22601點。新濠（200）與滙盈控股（8101）聯合公布，滙盈將以每股二元二角的作價 配售五千零六十八萬股，所得資金將用作收購澳門華人銀行。新濠股價跌4.2%，係6月20日以來最大跌幅；滙盈則急升51.9％。中信資源（1205）上 升2.4％，United Star出售十一億四千萬元中信資源股份，買家可能係淡馬錫。吉利汽車（175）大升9％後停牌。
內地A股窄幅牛皮，中國銀行估計央行最快本月底加息，6月份CPI可能有4％增幅，年內人民幣將再升值4-5％。
八十年代日股上升最大理由唔係企業賺錢能力上升，而係透過「金融工程」。何謂金融工程？由於日本企業互相持有其他企業股份，如其他企業股價上升，便可 變成自己公司嘅純利（投資利潤）。只要股市年年升，企業純利便自動年年升。上述虛假純利在股市大跌後消失於無形。近年香港響新會計制度下，本港地產公司唔 少純利來自物業重估，在樓價按年上升的時期，人人賺大錢，如果有一年本港樓價唔升又點辦？或有一年樓價不升反跌又點算？上述雖然唔係「金融工程」，但過分 受本港樓價升跌所影響，其純利嘅可靠性令人擔心。
道指受次級債券信用被降級影響而回落148.27，收13501點。瑞銀策略員Bill O'Donnell認為，今次只係市場另一次告訴各位，美國房屋泡沫爆破仍在發展中，問題並未解決！雷曼兄弟股價跌5％、美國運通跌3.4％、美亞證券跌 4.1％。零售股Sears發盈利警告後，股價跌10％；美斯百貨跌3.7％、Target跌2.9％。
歐洲及英倫銀行計劃9月再加息，令歐羅由2000年10月低點82美仙升至1.3716美元最高價，英鎊亦見2.023美元嘅二十六年新高。美元固然 不濟，日圓仲差，過去十八個月兌美元回落15％，兌其他貨幣更加唔使講，理由係日圓只有半厘息，全世界都向日本借錢作投資用途，形成日本大量資金外流，日 圓人為性轉弱，此乃利差交易。一旦日圓滙價轉強，全世界投資者便會紛紛拋售投資項目清還日圓負債，由此可見日圓滙價對全球投資市場嘅影響力。
呢次美元弱勢，係自從浮動滙率機制以來第三次。第一次係1971年至1978年，美元弱勢引發全球通脹，剔除1973－74年石油危機，全球經濟欣欣 向榮，只有美國經濟停滯不前。第二次係1985年至1995年，全球通脹率未見回升，連美國在內都係欣欣向榮。第三次係2002年1月起至今，除刺激通脹 率微升外，全球經濟復甦，證明美元弱勢對經濟而言唔係壞事。
恒指開始糾正嚴重超買
日圓最近兩天轉強，成121.3兌一美元，成166.61兌一歐羅，令人擔心。三十四位分析員中，有二十一位估計8月份日本將利率加至零點七五厘。
標普公司周二將一百二十億美元次級債券信用降級，因擔心未來美國樓價可能再跌8％（即超過1991－92年嘅跌幅6.5％）。上述一百二十億美元次級 債券只佔總數五千八百五十三億美元嘅2.13％，穆廸早在6月27日發出上述警告，惠譽則在6月22日，呢次只係輪到標普發出而已。
Home Depot周二亦就今年盈利發警告，估計將回落15％至18％，但股價冇太大變化。美國房地產面對戰後嬰兒退休潮，今年美國每五個打工仔就有一個已退休， 靠社會福利金及醫療保險生活；到2030年美國每三個打工仔便有一個已退休，靠社會福利金及醫療保險生活。大量在大城市的房屋將被沽售，改為到鄉村或近郊 生活以節省開支，而且更適合老人居住，擔心呢次美國房地產回落期十分長。瑞信估計，CDO虧損可達五百二十億美元，未來十二個月次級債券市場將進一步惡 化。
今天恒指開始糾正嚴重超買（7月10日恒指最高見22889點，拋離二百五十天線19231點19％）。如參考上一次由1月24日至3月5日調整幅度 11％，即極限係20371點，至於能否見到呢個水平又係另一回事，因為影響因素太多。例如中國經濟仍然壯旺（估計下半年GDP增長率只係放緩），美國經 濟唔會陷入衰退，但唔再擔當世界經濟增長引擎；貿赤及財赤問題漸成結構性，對白宮嘅管治能力構成一項威脅，不時成為國會嘅討論話題。美國房屋泡沫及次級按 揭唔會形成巨大災難，但有如舊患，耐唔耐便隱隱作痛，糾纏將以「年」為單位。我地必須學習點樣同美國房屋泡沫爆破共存而不受威脅！今天我們生活在一個「容 忍的社會」。許多事物不能盡如人意，但必須忍耐，例如容忍傳媒所製造嘅嘈音，因為最恐怖嘅世界係鴉雀無聲的世界，而非吵吵鬧鬧的世界，我地即使唔喜歡嘈 音，亦須容忍。例如容忍別人的無禮及無知，社會上充斥著唔少無禮兼無知的人，如吓吓同人爭，便連自己亦變成無禮兼無知，好多時只能一笑置之。更要容忍自己 的孩子及下屬犯錯，只要唔係無可挽救嘅大錯便可，有時明知自己的孩子及下屬咁做一定錯，亦只有容忍，因為人係從犯錯中學習，不跌倒過的孩子係唔會跑嘅。冇 犯錯經驗嘅下屬最可怕，因為下一次佢可能犯下彌天大錯！世事無完美，許多事物我地都必須容忍，例如我地嘅祖國、今日嘅香港政治氣候、目前嘅香港股市。內地 零售股逃不出薄利多銷
中國政府面對國際批評時回應話，單係藥物打假亦需要五年，至於食物方面需更長時間。中國法律在打假方面已足夠，奈何一直執法不力，加上中國人習慣臭屎 密冚，令假藥、假食物充斥市場，不但害死人，更害死貓、狗（連寵物飼料亦有假）。假奶粉害死中國嬰兒唔算大件事，因為中國人命一向唔值錢；但食死美國人嘅 寵物就大件事。美國政府已透過奧委會向中國政府施壓，要求中國政府在奧運會中所提供食物嘅安全標準符合國際標準。連南美洲國家亦出來指證中國生產嘅牙膏有 工業用冷凍劑及有毒溶劑diethylene glycol，擦得多有損健康，真係唔到中國人牙擦。去年有朋友來電話要求我老曹在港代買奶粉寄到上海。我老曹當時十分奇怪。在六十年代中國大饑荒，我老 曹曾經寄油、糖、奶粉給親戚，舊年上海冇理由出現奶粉短缺？後來才知道，朋友係信唔過我地偉大祖國嘅產品，才託我老曹代寄奶粉畀個孫飲，唔知今年係咪需要 替朋友寄牙膏？其實，上海亦有唔少外國品牌奶粉及Heinz嬰兒食品，點解一定要到香港買？有時真係唔明白內地人心態，或者此乃香港值錢之處，因為我地信 用好！
在一個over-analyzed嘅股票市場找尋有真正價值嘅股份，你必須擁有森池兄嘅分析能力才可。上述能力非普通投資者能短期內學到，通常只能在 被遺忘行業中才能找到真正價值嘅股份，例如2001年資源股。石油由1980年起一直低沉，到1999年衰足十九年，影響之下，其他資源股亦相差無幾。在 上述客觀因素下，資源同能源股在2002年才能大翻身，今天成為當炒股。又如內地五行三保，國家為開放金融市場，為內地金融公司注資再注資，養到肥肥白白 才上市。上市後的2006年業績表現自然出色，2007年表現亦應該不俗，但2008年或以後又如何？近日內地零售股不但以高O上市，同時上市後股價繼續 受追捧，只因外國零售公司未在中國發動攻勢，長遠結果係點？可參考本港零售市場，最後必逃不出薄利多銷嘅結局。在近日高O下應否高追內地零售股，便見仁見 智。如何挑選優質股票？實在係一門高深學問。
表面上人人反對投機，其實心底裏95％所謂投資者都心存投機，只係唔肯承認，結果往往將失敗嘅投機項目變成長線投資，令自己一敗塗地。反而老老實實承 認自己想投機，一旦投機失敗有乜大不了？不如意事十常八九，即十單投機八到九單係損手離場，只要每單損失小小（例如10-15％），有何不可？其餘一、兩 單贏就贏大大，例如十倍甚至一百倍，咁就一鋪返晒嚟！能夠咁瀟灑，就有條件玩輪。衍生市場十單中贏兩單輸八單十分正常，問題係點樣將贏兩單嘅回報盡量放 大，將輸八單嘅損失盡量減少，呢方面學問唔少，本周日就有專家教你點玩。甚至你自己唔玩輪亦應學習，因為係訓練個人分析力及應變力嘅最好場所。學曉玩輪後 再玩股票，無論分析力、應變能力都提升咗許多。我地不應視輪為洪水猛獸，雖然在輪場不如意事十常八九，此事實無可改變，只有嚴守紀律的trader才能在 一個volatile市場有令人驚喜嘅成績。在輪場利用技術分析大於基礎分析，因為需要在最短時間內達到目的，絕對唔係長線投資嘅地方，狠、忍、準係必需 功夫。在輪場，基礎分析用途唔大，因為係利用Super Leverage去達致Getting Rich Quick，情況有如摣一級方程式，唔係普通人可以達致嘅境界。周日盛會人數已達三千多人，盛況空前！請各位提早到場，方便安排座位。再提大家一次， Limited your risk, unlimited your gains！
玩輪第一步學睇圖型，例如陰陽燭、點數圖、柱狀走勢、MACD、RSI等已係必備。第二步係入市心態，應該係一蚊博兩蚊，如果冇上述估計利潤，不如唔 玩。玩輪目的係以小本博大利（博唔到又係另一回事）。第三步每周玩一次到兩次已足夠，千萬不可密密炒。做人言多必失，炒輪做得多亦必失。第四步，永遠不可 因便宜而買入，尤其末日輪更加不宜沾手。第五步，千萬不可貪勝不知輸，一旦形勢不利，先行鎖住利潤，雖然入市前係希望一蚊博兩蚊，入市後一旦形勢不利便三 十六著走為上著。第六步，不可動用太多資金（一般情況係動用所有用作投資資本嘅15％）。第七步，千萬不可溝落，蝕本便計數。如你投入一萬元，一旦損失二 千五百元應考慮止蝕，千萬不可在虧損形勢下加碼！只能在賺錢環境下加碼，即溝上唔溝落。第八步，經常上網睇各銀行及大證券行所提供嘅資料，然後加以研究。 第九步要相信科學分析，不要信運氣，以堅強嘅分析力去作出正確判斷，千萬不可憑第六感或心存僥幸，在輪的世界，運氣絕對唔重要。第十步，輪絕對唔係洪水猛 獸，亦非發達捷徑，如自己功夫唔夠便出嚟行走江湖，自然打死多過病死。反之，如功夫到家，便隨時空手入白刃。世上冇不敗的投資系統，但可以制訂輸少贏多策 略，然後嚴格執行既定策略。
不同年紀相同問題相反答案
三十歲以下同五十歲以上嘅投資者，策略上絕對相反。三十歲以下年輕人應多學習技巧，策略上宜進取不宜保守（我老曹在二十二歲嗰年將本金95％輸掉，然 後又賺突；二十六歲嗰年亦曾再將本金80％輸掉）。五十歲以上嘅投資者則宜保守不宜進取，因為面對退休問題。因此，三十歲以下嘅投資者絕對應涉足輪場；反 之，五十歲以上嘅投資者都係保守D好。年輕人應有失去一切嘅勇氣，只有如此，才能學曉投資技巧。反之，五十歲以上仍咁博，小心臨老唔過得世！不同年齡做不 同的事，年齡在投資市場絕對有影響。年輕時不妨博，因為輸完又嚟賭過，有的是時間，千金散盡還復來，有的是青春與膽識。例如由一萬元開始，贏盡又如何？輸 清又如何？甚至十萬元又如何？隨時可東山再起。每天花一小時在學習投資技巧上，做個「拚命三郎」。但如五十歲後仍把命博便幾失敗（如果到五十歲嗰年仍只得 一條爛命，過去二十多年你的投資成績一定唔見得人）。年輕時宜以小博大，五十歲後便以大博小。
換言之，不同年紀的人，問相同問題極有可能得到兩個相反嘅答案。本人近年亦有為老人中心寫文章，一直主張佢地要保守（因為佢地輸唔起）；反之，到大學講嘢面對年輕人，我老曹主張炒輪，因為佢地有本錢博！
沒有留言:
發佈留言