三Ｃ值得學習

　　7月1日，周日，回歸十周年。市傳7月5日英國加息至五厘七五，刺激英鎊升至2.0068美元。美國消費者消費升幅較預期細，加上受倫敦發現炸彈，兼且美 亞證券、美林證券及雷曼兄弟等股價回落，令道指下跌13.66，收13408點。由於周一本港冇市，周二如何？睇周一美股及內地A股表現係點才可決定。

下半年應該係上落市

　　美國GDP增長率由2001年第四季開始到2006年第二季見高潮，受樓市及次級債券影響而回落。今年第一季GDP增長率見0.7％，完成中期調整， 第二季開始進入另一上升期，估計高潮喺2009或2010年。過去股市走响經濟之前，呢次卻走响經濟之後，例如美股2002年10月才回升，落後GDP增 長率一年；道指喺今年6月1日見13692點後進入上落市，亦落後經濟一年。技術上睇，道指下半年以上落市為主，明年係總統大選年，理論上經濟差唔得去 邊。我地要知道由2001年第四季到去年第二季經濟繁榮期只有四年半，由去年第三季至今年第一季只有九個月中期調整，理論上今年第二季起踏入另一個四年繁 榮期，才完成一個上升周期（九年）。呢次股市落後經濟一年左右，理論上今年下半年係上落市，明年才進入另一升市，整個上升周期才完成。

　　唔似2001年第四季至去年第二季，當時有財政赤字、減息以及美元貶值等協助，加上股市喺低潮，所以2002年10月起嘅回升強而有力。依家面對環球 化經濟，競爭壓力好大，加上財政赤字進入收窄期，利率2004年6月起回升，去年8月重返合理水平，美元貶值期已完成，股市則處於略為偏高水平；加上油價 及金融唔平衡、中國股市偏高等，形成今年起股市難玩。炒股唔炒市，個別投資者喺stock picking方面表現一向遜色，例如喺地區性方面、行業性方面經常都選擇錯誤。

　　上周利率維持不變，5月份核心通脹已回落到1.9％嘅目標水平（2月份係2.4％）。Freddie Mac三十年期樓按利率六厘六七，繼續對樓市產生壓力。5月份收入上升0.4％，令消費上升0.5％，繼續支持經濟增長率回升。

恒指過去十年回報跑輸定存

　　回歸十周年，煙花亦燒過啦，呢十年內香港經濟出現「V型」反彈（前六年係衰退，後四年係上升）。恒生指數21772點，較1997年8月7日高點 16820點高29.4％，即跑輸定期存款。至於樓價1997年第三季中價樓一萬二千元一呎，今天六千元一呎，兩者差距仍達50％。至於社會有八萬七千人 （或家庭）擁有一百萬美元或以上（唔計自住物業），卻有一百二十萬窮人，富人同窮人數字皆上升，中產階段人口略為下降。至於政治接近原地踏步，冇差到，亦 唔見得進步。

　　西方社會值得東方人學習嘅地方，主要係三「C」。第一個「C」係資本主義（capitalism），一種保障生產、貿易、產權嘅制度。由私人擁有財富 可自由買賣、唔受政府干涉、容許自由競爭，係能者居之嘅制度。第二個「C」係憲法、法律或政治體制（constitution），由英國嘅君主立憲到美國 大憲章、法國嘅自由民主博愛。透過立憲，政府有Ｄ事可以做，有Ｄ事不能做，因為違憲。人民之間爭拗由法律去解決，政府透過立法規限，人民有Ｄ事可以做，有 Ｄ事不能做，因為違法。即政府與人民嘅關係由憲法規定，人與人之間受法律規限，政府不能違憲，人民不能違法。第三個「C」係基督精神 （Christianity），即對社會嘅回饋、對窮人嘅幫助、對真理嘅追求，所以各位見到外國許多大富豪將自己大部分財富回饋社會幫助窮人，就係發揮基 督精神。

中國已接受第一個C

　　1978年中國政府實施改革開放政策後，對西方社會第一個「C」（資本主義）愈來愈接受，只係美其名為「市場經濟」。但對第二個「C」即憲法、法律及 政治體制嘅接受仍然唔順利，政府（尤其地方政府）往往有法不依，人與人之間講人情、講面子而少講法律，無論政府或普通人，喺守法方面較西方社會仍差得遠。 至於第三個「C」所謂基督精神似乎剛開始，中國人嘅捐錢文化仍未普及，香港係中國社會中最有基督精神嘅地方，但同西方比較仍差很遠。

　　香港欲在政制上有突破，必須中國政府漸接受第二個「C」，即政府不再違憲、人民人人守法，做個「文明政府」、做個「文明人」才可。至於第三個「C」更加難求，只有寄望我地下一代。

港人內地置業高峰近在眼前

　　據《南方日報》報道，自廣州樓市開始進入個人購房時代後，港人便成為廣州樓市置業嘅主力軍。港人喺深圳置業數量排第一、喺廣州排第二，佔港人內地置業 17％，近年每年約四千套房子被港人買走。香港地產中介機構2000年估計，港人喺內地購入物業數量高達一百四十六萬至一百五十五萬個單位，2006年港 人喺內地置業投資房地產單位達到二百二十五萬至二百三十六萬個，數字極大！

　　喺廣州置業嘅港人分四種：一、喺廣州經商或工作，喺假日才回港；二、退休老人，喺廣州置業安度晚年；三、喺香港工作，到廣州度假；四、投資客到廣州置業，博樓價攀升者。

　　換言之，今天港人喺內地擁有嘅物業較响香港仲要多。香港私人住宅單位不外百多萬個，在內地已多達二百二十多萬個（唔少响香港居住公屋嘅人士亦喺內地有 物業）。香港二百四十多萬個家庭，可能90％左右喺內地有物業（當然上述係平均數，不乏有人喺內地擁有大量物業）？如上述數字準確，港人內地置業高峰期可 能已近在眼前。