7月16日，周一。恒生指數跌145.35，收22953.94；成交七百五十八億五千多萬元。平保（2318）跌3.5％，報六十一元四角，因瑞銀將評 級由「買進」降至「中性」。中石化（386）跌2.2％，因紐約原油期貨今年已上漲21％，中石化加工原油70％來自進口。復星國際（656）掛牌升 12％，報十元三角四仙，招股價九元二角三仙；時代零售（1832）升14％，報四元七角五仙，招股價四元一角八仙。中煤能源（1898）漲2.7％，報 十四元九角八仙。中國遠洋（1919）跌5.4％，報十一元五角二仙，高盛將評級由買進改為中性。中國林大資源（910）漲11％，報二元零三仙，德意志 銀行給予「買進」評級。招商銀行（3968）下滑3％，報二十七元三角，瑞信評級由跑贏大市降為中性。吉利汽車（175）跌6.9％，報一元三角六仙，公 司以每股一元二角五仙向母公司發行十二億九千萬股新股收購五家合資公司。中國財險（2328）下滑3.3％，報六元七角一仙，瑞信將評級由「跑贏大市」降 至「中性」。
恒指十年來呈W型走勢
回歸十年，恒生指數形成一個「W」型走勢，由1997年8月7日16820點跌至1998年8月12日6544點，跌幅61%；然後又升至2000年 3月28日18397點，上升181%；又再回落到2003年4月25日8331點，回落54%；再升至上周五略高於23000點，升176%。從技術走 勢睇形成「W」型走勢者，後市牛皮，即大市繼續喺18500至23000點上落機會好大。
內地A股跌3.2％，收3697點【圖】。中信證券跌5％，收五十二元九角八分；長江電力跌3.9％，報十五元二角；興業銀行跌3.7％，報三十六元 六角，瑞銀調降其評級。《第一財經日報》引述北京師範大學金融研究中心主任鍾偉話，如第二季度統計數據顯示經濟過熱，中央政府將下調利息稅及上調存貸款利 率；估計6月份中國CPI升幅喺3.8％以上。央行已發行一千零一十億元人民幣票據去吸收資金。人行進一步抽緊銀根
中國人民銀行已幾次發行央行票據。何謂「央行票據」？央行票據即中央銀行為調節商業銀行超額準備金，而向商業銀行發行短期債務憑證，對象係五十二家交 易商，分為三個月、六個月、一年期及三年期，作用有D似美國聯邦基金，係調節信用規模、貨幣供給量和利率。中國人民銀行1999年開始發行，目的係調控貨 幣供應量、引導利率走勢。呢次發行，代表央行進一步抽緊人民幣銀根。
自5月30日提高印花稅後，滬深指數走勢反反覆覆，上周五成交額首次回落到一千億元以下。6月開始，A股市場震盪好大，開始好難賺錢啦，部分資金開始 撤出股市轉向樓市，形成6月內地樓價大漲。過去一個月買樓人士嘅資金有三分一來自股市，因此購房人群好爽快；7月份內地人賣股買樓者更多，令深圳樓價半年 暴漲逾50％，由九千三百元一平方米漲上一萬五千四百八十七元一平方米！
上海樓價又再上升，上海市政府本月十五日起開徵二手房土地增值稅，稅率為0.5%。由於稅率唔高，影響唔大。何況居住滿三年未滿五年者減半徵收、五年以上唔收。6月份上海二手房指數升4.16％，見1751點創新高，超過七成二手房房價一個月內上升4％。
澳元成日資追捧對象
倫敦金屬交易所銅庫存上升1.4％，係6月25日以來首次增加。供應全球石油三分之二嘅布蘭特原油油價漲至78.02美元，係去年8月9日以來首次。
英鎊升上二十六年高價，報2.036美元，因英國CPI第十四個月高於2％，可能進一步加息。澳元升至十八年內高點，見87.34美仙，係1989年12月以來新高，因基準利率六厘二五，高出美元一厘，成為日資追捧對象。
美國十年期債券息率仍低於五厘二五，日本央行願意繼續以半厘息供應日圓，令日圓兌美元今年跌5％、兌歐羅跌7.5％、兌英鎊跌9％、兌人民幣跌 10％、兌澳元跌11.6％、兌紐元跌12.7％。部分理由係澳元利率有六厘二五，紐元有八厘息。日本繼續充當資金供應國，成為全球股市嘅最大支柱。
中國去年GDP二萬八千億美元，僅次於德國嘅二萬九千億美元；相信今年中國將超過德國，成為世界第三大經濟體系，僅次於美國（十三萬二千億美元）及日 本（四萬四千億美元）。因為今年中國GDP上升11％，德國只升3％。當然，人均收入仲差好遠，因中國有十三億人口，德國只有八千二百萬。二十七個國家加 起來組成嘅歐盟GDP十四萬五千億美元，已超過美國。展望未來世界經濟分為三大體系：一、美國；二、歐盟；三、以中國為核心帶動嘅亞太區經濟，並成為最高 經濟增長區。依家G8組織正考慮邀請中國加入。
假設日本經濟停滯不前，而中國GDP仍以10％速度上升，不出十年中國GDP便可超過日本，到時世界經濟將出現鼎足三立（美國、歐盟同中國）嘅局面。
新都市主義重塑社區文化
新都市主義（New Urbanism）1993年由一群富革命性思想嘅建築師提出，漸成世界主流，改變過去未經深思熟慮便將郊區都市化。作為香港人，呢方面真係感受良多。人 口壓力加上香港人七十年代開始富起來，香港郊區迅速都市化，大量所謂「衞星城市」建立，最典型例子係將屯門發展成為「工業重鎮」，完全忽視八十年代開始香 港工業迅速內移。屯門建立起來後，因冇足夠工作職位吸納屯門人口，令住响屯門嘅市民每天都要逼車逼船到九龍或港島返工，形成屯門公路大塞車。不但係咁，屯 門人口因為從四面八方遷入，唔似黃大仙雖然响五十年代香港貧窮時建立，設施簡陋，卻發展出一種社區精神。黃大仙唔少人遷出後仍重返黃大仙區，理由係五十年 代遷入黃大仙嘅家庭背景近似，好容易發展出一種社區互助精神（Traditional Neighborhood Development,TND）。反而屯門人口嚟自唔同階層，較難建立TND關係……。香港另一重災區係天水圍，都係郊區迅速都市化而冇考慮TND嘅結 果。
新都市主義喺美國將舊工業區重新再用，著名人物有Mark Nikita及Dorian Moore，成功例子有底特津及匹茲堡，喺美國公營房屋區重新建立人類精神（human spirit），重新建立社區互助精神及社區文化。
隨住高油價時代來臨，交通費愈來愈貴，雖然特區政府願意為居住喺偏遠地區嘅市民提供交通補貼，但唔係長遠之計。長遠之計係向美國引入新都市文化，重新 喺新市鎮建立社區文化。近年內地城市亦模仿香港迅速將都市人口外移，將郊區都市化而非社區化。中國應該向底特津或匹茲堡取經，透過重建及改造，讓一個老城 重新恢復生產力及更適合人類居住，而唔係建立一個到處高樓大廈但鄰居互不認識嘅郊區都市。
西方工業革命後，唔少小鎮被放棄，人口湧向大城市，大城市則向鄰近郊區侵佔土地，建成高樓大廈安置入城嘅人，但工作及娛樂集中喺downtown，形 成市區內交通一片混亂。新都市主義主張建立一個又一個小社區，工作及娛樂集中喺小社區內，人與人之間重新建立社區互助文化（TND）。中國改為向呢方面發 展為時未晚，城市發展唔再係吞食附近郊區將之都市化，而係建立一個又一個小社區——一個適合人居住嘅地方，讓社區文化重新抬頭。
廣興國際（1131）、香港建設（190）、上海實業（363）、世茂國際（649）停牌。
沒有留言:
發佈留言