低收入港人大舉移深

　　7月5日，周四。恒生指數升34.44，收22252.99；成交八百五十一億二千九百多萬元。7月期指出現低水，跌105點，收22176點。恒指連續 第三天收於新高，主要來自QDII嘅刺激。建設銀行（939）升2.9％，收五元七角七仙；華潤創業（291）升3％，收三十二元二角五仙；港交所 （388）升1.7％，收一百二十七元六角。

A股成交萎縮大跌先兆

　　必美宜（379）大漲81％，收三元一角；寶訊科技（8089）跌5.8％，收十五元三角六仙。必美宜發行六億一千八百六十萬元可換股債券，另加三億 一千多萬 元股份，收購寶訊科技13.3％股權；寶訊科技通過收購一家公司進入中國鐵路物流運輸行業。　　兗州煤業（1171）升8.4％，收十三元四角四仙，因高 盛推介，目標價十七元。中國神華（1088）升5.6％，收三十元二角；中煤能源（1898）升8.5％，收十三元八角四仙。星辰通信（1155）掛牌較 招股價升7.3％，收三元八角一仙，該公司以三元五角五仙發行二億三千八百萬股，集資一億零八百萬美元。光大控股（165）升8％，收十七元四角六仙，因 為佔39.3％嘅中國光大證券上半年純利升十倍；今年光大股價已上升73％。

　　响國家推出一萬五千五百億元人民幣特別國債後，近日內地A股成交額縮減至一千億元以下，成交萎縮乃大跌先兆；加上QFII中規模最大嘅新華富時A50 基金4月遭巨額贖回，令5月A股一度下跌25％。下周四家新股同步上市，包括南京銀行、寧波銀行、四川高金食品、廣東蓉勝超微線材，令內地A股股票供應量 一下子增加。此外，下半年本港上市嘅建設銀行、中國神華、中移動（941）、中石油（857）、中電信（728）等超級大企業亦回歸A股市場，睇嚟A股將 有較大跌幅。今天滬深三百指數再跌5.57％，收3537點。A股股價回落，對本港H股亦有一定衝擊，因本港H股O早已進入偏高水平。

　　歐羅今天升至新高，因歐羅與美元息差收窄至兩年半內最低。英鎊升至近二十六年新高，英倫銀行宣布今年內第六次加息四分一厘，至五厘七五，係2001年 4月以來最高，估計年底可見六厘，雖然上月通脹率已回落到2.5％，但6月樓價仍上升0.4％。歐羅保持利率不變，但9月份可能加息至四厘二五，即歐洲各 銀行仍在加息。澳元亦升至十八年內新高。美元將何去何從？次級債券情況在惡化中（上月美亞證券為次級債券撥備十六億美元），可能令美國十年期債券息率上 升！西班牙最大地產發展商Metrovacesa股價已回落三分一，英國兩大地產公司Land Securities Group及British Land Co.股價亦回落超過20％。西班牙樓價今年起開始回落，英國樓價則在尋頂，滙豐銀行估計，倫敦金絲雀碼頭寫字樓响明年及2009年將回落8.5％、商場 將回落13.5％。美國房地產市道回落逐漸擴散到歐洲，會否影響香港則木宰羊。

美元弱勢帶來經濟繁榮

　　1997年7月亞洲金融風暴嘅成因就係美元轉強，美滙指數由1997年1月2日88.34上升至2002年1月31日120.21，上升咗 36.08％，令所有同美元掛鈎嘅貨幣必須加息去阻止資金流失，觸發股市、樓價下跌。由2003年1月31日起至2004年12月31日，美滙指數回落至 80.39，美元又再到處流竄，令嗰D同美元掛鈎或追隨美元滙價升降嘅國家或地區貨幣滙價回落，經濟因而復甦。2004年12月31日至2005年11月 16日美滙指數雖然升上92點，因時間甚短及升幅細，對2005年其他國家經濟壓力唔大。2005年11月16日起，美元再回落至81.92，帶來去年及 今年上半年經濟繁榮。

　　技術上睇，美滙指數現水平同2004年12月31日80.39形成雙底，未來美元方向係點？2004年12月美滙指數見80.39時，美元利率剛起步 回升（2004年6月起開始加息）；依家卻係美元利率早喺去年8月停止加息。冇一個中央銀行可容忍貨幣出現危機！2005年美元滙價上升，相信只係 2002至04年拋空美元者平倉；2005年至今兩年半時間美元滙價回落，則係因為市場睇淡美元。最終係美元跌穿2004年12月31日低點而引發美元危 機，抑或美元止跌回升，結束過去兩年半嘅弱勢？一旦美元滙價方向明朗，對未來金融市場影響好大。下周森池兄喺研討會上及我老曹同德銀開嘅研討會上，都會就 上述問題作較深入探討，暫時係咁先。

　　流動性資金過剩係近年流行嘅名詞（雖然此名詞由來已久）。乜嘢係流動性資金過剩？根據英國出版嘅《經濟與商業辭典》解釋，流動性資金過剩係指銀行自願 或被迫把資金趕出去，即銀行再唔願吸收存款，理由係銀行吸收到嘅存款好難借番出去，因此銀行唔再積極吸收存款，反而鼓勵貸款（甚至有人利用貸款去投機亦視 而不見）。從宏觀經濟角度睇，係貨幣增長率已超過GDP增長率，存款增長率大大超過貸款增長率，形成愈來愈多資金閒置响銀行。例如中國去年L增長率 16.5％，超過GDP增長率六個百分點；今年第一季L增長率更達17.3％，亦超過GDP增長六點三個百分點，出現較嚴重性流動嘅資金過剩。

　　流動性資金過剩有乜害處？一、過剩資金推動投資過熱（例如1990至97年嘅香港、1985至89年嘅日本及2004年起嘅中國），導致資產價格上 升。一旦流動性資金過剩情況逆轉，又導致資產價格大幅滑落（例如1997年8月至2002年嘅香港、1990年至2003年嘅日本）。二、資源錯配、低效 投資及浪費。大量資金流入股市樓市，但實體經濟卻缺乏資金支持；企業因為較容易獲得資金（透過上市或發行新股）而作出大量投資或低效益投資甚至浪費資金， 並非實體經濟所需，例如內地鋼鐵業、水泥業等已出現上述問題。三、央行貨幣政策有效性及獨立性受影響。例如去年起人行連續六次加息都未見成效。四、商業銀 行過度擴充貸款業務，而放大信貸風險。例如香港銀行喺物業貸款上利率一減再減，而且喺審批貸款過程中寬鬆，都在放大銀行信貸風險。五、最大害處係催生資產 泡沫，大量資金由銀行湧入資產市場刺激投機氣氛，令投資者忽視金融風險加入追逐短期利潤，例如內地A股市場响年半時間上升130％。

　　解決之道：A、減少貿易順差。透過人民幣有秩序地升值、出口退稅逐步減少或取消部分產品出口退稅。B、增加消費刺激入口，經濟增長由出口帶動轉為內部 消費推動；未來積極擴大進口係中國對外經濟嘅工作重點。C、解決商業銀行流動資金過剩問題，包括提高存款保證金率；人民銀行向商業銀行發債；鼓勵及支持銀 行業產品創新；QDII及鼓勵資金「走出去」。D、利用家吓環境提升高科技行業補貼，淘汰低附加值、污染嚴重、耗能較高嘅行業，目的唔係減少流動資金，而 係有效咁疏導資金，令資金轉為有利經濟結構嘅優化方向。今時今日才入市想撈一筆嘅投資者，小心結果變成筲箕打水（辛苦過後唔見水）。

香港返工深圳居住

　　政協十屆全國委員會常委會第十八次會議開幕。國家發改委主任馬凱認為，今年1至5月工業增加值較去年同期上升18.1％，其中高耗能、高污染行業更加 係高速增長，令全國用電量上升15.8％。如果呢種狀況不能及時扭轉，「十一．五」規劃將難以實現。下半年將理順煤炭價格成本機制，推進成品油、天然氣價 格改革；國家將適時出台燃油稅，並研究開徵環境稅及資源稅。

　　中國响四年內建成青藏鐵路，全長六百九十哩，較原定計劃早三年完成。三萬八千個工人一起工作，以每天完成半哩嘅速度進行，跨過冰川、巖石，有D地區氣 溫低至零下三十一度！最高係崑崙山上鐵路，海拔一萬五千呎，進入「缺氧層」（瑞士工程師曾認為唔可能响咁高嘅山上建鐵路！）。呢次打破全球最高地方上建成 鐵路嘅紀錄！今天中國已有三萬二千哩鐵路，每天乘客超過五百二十萬，5月開始提速，二百八十架高速火車頭以時速一百五十五哩行駛。今天由上海到北京坐火車 只需十小時，依家全國鐵路仍在延長中，用作載運煤、農產品、貨櫃，成為陸路上最便宜嘅交通工具，尤其係面對高油價壓力。火車運載能力三倍於貨車，營運成本 較貨車便宜許多。中國超級公路大致上已建立，未來努力建立鐵路網，將令中國境內貨運成本大幅下降。

　　回歸十年，香港能否長期保持競爭優勢？家吓香港嘅交易成本已經好低，可做嘅事已唔多。香港經濟同內地融合中，例如香港人居住响深圳，佢地嘅購買力可立 即上升三倍到五倍，形成低收入港人大量內移深圳。只有咁樣，才可令香港嘅勞動成本進一步下降。為加速香港低收入居民內移深圳，兩地交通必須接軌，上述趨勢 將令本港中下價樓失去上升動力。上述情況响紐約、倫敦及東京早已發生，唔少喺紐約返工嘅人住响費城；唔少喺東京返工嘅人每天坐兩小時火車來回；喺倫敦返工 嘅人每天亦坐火車來回；未來將有愈來愈多香港人住喺深圳，回香港返工！即未來十年香港將面對低收入人口大量流失嘅問題。今天香港嘅強項係國際貿易及金融中 心地位，喺未來五至十年，嗰D跨國公司冇可能轉移到上海或北京，但香港嘅投資銀行員工喺上海或北京停留嘅時間則愈來愈長。當人民幣不可兌換及中國法律體系 唔夠透明等因素逐漸解決，五到十年後香港金融中心地位又點？香港喺世界經濟體系完全融合中先行一步嘅優勢可維持幾耐？今天香港對外貿易總額有一半係與中國 有關嘅轉口貿易，本港上市公司中有一半係紅籌、國企，或係喺內地開廠嘅企業，十年後香港經濟係點？真係木宰羊。

　　1997年7月至今，香港主權回歸十年，香港已分裂成為兩個社會：甲、富人社會；乙、中產及窮人社會。來自唔同階級，心態完全唔同。例如我老曹因 1967年夏天離開學校到社會做事，香港經濟由1967至97年高潮迭起，自然認為「只要你努力，定有美好明天」；反之，1997年夏季才離開學校到社會 做事嘅下一代卻告訴我老曹：任你點努力，明天都唔知會變成點。佢地一離開學校便面對亞洲金融風暴，連「做好呢份工」嘅機會都冇便失業；好唔容易撑過去，再 來一次2000年科網股泡沫爆破；最後有份較穩定嘅工，希望安居樂業時，本港樓價早已上升60％又點供？點叫佢地相信「明天香港更美好」？

　　20％嘅香港富有家庭，佢地實在唔了解窮人點樣生活；同樣理由，要窮人相信香港回歸後更美好，佢地會認為你噏得出就噏。富有階級追求豪宅或到其他地方 打高爾夫球或乘坐郵輪，貧窮階級卻為生活而掙扎求存。咁樣嘅社會點可以和諧？森池兄第二本新書叫《平民資本家》，我老曹所見卻係二元社會。我老曹唔相信 「均富論」。現今社會平民點能變成資本家？能夠成為資本家者，唔會長期係平民也。

摩洛哥潛藏投資機會

　　唔少人希望响股票市場賺錢，但滿意自己成績者少之又少（尤其係今年上半年）。多少所謂理財專家所提供嘅「快富」（get-rich-quick）計 劃，事後皆貨不對辦，可惜消委會唔接受呢方面投訴。對我老曹而言，並冇乜投資祕笈，只係有一句話已講咗幾十年：有智慧不如趁勢！第一戒，唔好以為自己了不 起（股市專收叻仔），所以淡市莫估底、旺市莫估頂。一旦趨勢形成便加入，趨勢結束便離開，就係咁簡單。今年上半年有幾多專家估頂而沒頂？1997年8月至 2003年4月，幾多樓市專家估底而變成負資產？森池兄喜歡食全熟牛排（Second end cut!），佢認為第二塊牛排最好味，因為第一塊通常燒燶咗、第二塊通常最well done！我老曹卻喜歡有血嘅牛排（可能前世係生番），習慣要「中間」嗰塊牛扒。上述亦反映我地兩人嘅性格，我老曹喜歡趨勢形成時加入，係寧買當頭起信 徒；森池兄樣樣事物都要求well done。所以買嘢跟老曹、揸貨跟森池兄，保證你唔撞板。

　　最近資金大量流入摩洛哥，可惜我老曹分身不暇，無法飛去摩洛哥實地觀察，一如2005年最佳投資越南，亦因我老曹分身不暇而錯過機會，但陸氏實業 （366）亦為大家帶來唔少利潤！可惜冇上市公司投資摩洛哥，唯有吞口水算啦。1997年7月起我老曹亦做咗劉乃強兄信徒：就是胸懷祖國，放眼世界！衝出 西營盤，離開鯉魚門。投資早已包括內地及全世界，不但要做個勇敢嘅中國人，亦努力做個成功嘅地球人。近年藝術品有價，可惜我老曹冇藝術修養，例如印章、國 畫甚至近代新作升值，均以倍為單位。換言之，只要open your eyes，到處都係投資機會。做人切忌畫地為牢，明明冇局限，卻自己畫個圈企入去，呢樣又話唔得、嗰樣又話唔敢，然後又嘆社會唔畀機會佢，等佢懷才不遇。 我老曹只相信Seek your fortune，take your adventure（財富要自己去搵）！

　　瑞源國際（476）、新銀集團（988）、保利香港（119）、中國高速（149）停牌。

　　■辰罡科技（8131）7月11日；亞洲資源（899）、莊士機構（367）、鷹美（2368）、結好（064）、大眾金融（626）、新興光學 （125）13日；中大印刷（055）、大昌微綫（567）、理文造紙（2314）、毅力工業（332）16日；東方表行（398）18日；華脈無線 （499）19日；進智公交（077）、中國燃氣（384）20日；上海青浦消防（8115）31日；東亞銀行（023）8月2日；港交所（388）15 日公布業績。