代議士大炮打蚊

　　7月15日，周日。恒生指數牛市仍在進行中，過去六星期恒指由5月30日20184點上升至7月13日最高見23239點，升15％，把許多股份股價推至 新高。响一個偏高的股市，選擇投資項目並唔容易，無論航運股、資源股、國企股或者係可以諗到嘅股份，股價都已站在偏高水平，唯一仍偏低嘅係缺乏透明度嘅細 價股，上述項目投資一向只能細細注大大聲。恒生指數現價O十七倍，既不能說貴，亦非便宜，令選股極唔容易。

　　香港豬肉價貴咗，勞煩到本港代議士提出關注。到底豬肉今天佔港人家庭每月消費幾多呢？此乃典型「大炮打蚊」（聲大功效細）。除咗領取綜援家庭外，有幾 多人仍關心豬肉價？一般家庭最大開支係供樓負擔，大部分仍佔總收入30％以上，而非豬肉問題。樓價高，發展商開心、有樓家庭開心，政府亦開心，因賣地收入 上升；但冇物業而想結婚嘅年輕人卻擔心，如果結婚層樓點供呢？樓價回落，發展商擔心、有樓家庭叫苦、政府唔開心……。點樣維持穩定樓價已成為政府嘅責任。 政府政策既不可讓樓價狂升，亦不能讓樓價大跌。至於每斤豬肉貴幾蚊，係咪需要立法會開會討論咁大件事？而香港政府房屋政策一直一塌糊塗，咁樣嘅政府叫做 「強政勵治」嗎？唔好笑甩我老曹棚牙。

出現調整後必再創新高

　　下半年香港經濟係咪放緩？冇人知道（格蛇認為美國經濟有三分一機會出現衰退）。美國消費信心係點、美元滙價係點、美國通脹率係點等等，都有一定影響。 不過，至今為止黃金歲月仍保持，即經濟仍不太熱不太冷。估計美國下半年GDP增長率3％左右、中國GDP增長率11％。中國6月份出口一千零三十億美元 （首次超過一千億美元），7月1日起中國唔少出口項目退稅減少或取消，對內地廠商影響如何？股市最後期嘅上升係建基於「生意淡薄，不如賭博」，即正行生意 利錢薄，不如將D錢入市博一博。

　　上周股市趁低買入及挾淡倉又再生效。大市每次出現較大調整，後市必然再創新高，形成愈來愈多投資者在股市每次回落時吸納，在此情況下，有邊個仍夠吉士 睇淡。隨着2001年起全球央行瘋狂增加貨幣，金錢供應早已進入泛濫期，加上至今日本銀行死不悔改，仍然堅守以半厘息供應日圓……。美債牛市雖然已死，但 美債走勢未預示未來通脹率會惡化（十年期債券息率仍在五厘二五以下），通脹率至今冇加速上升嘅訊號。近日通脹上升集中在能源及食品價格，上述項目非中央銀 行可以控制，核心通脹率仍然十分溫和，主因係製造業及服務業已環球化，令競爭十分激烈。最近我老曹屋企架DVD機壞咗要買部新嘅，十年前賣六千元一部嘅 DVD機，今天多咗許多功能，卻只賣一千八百元，跌幅70％（未計通脹）。去年買咗部汽車，較十年前嗰架加添許多功能，售價二十六萬元；1996年嗰架冇 咁多功能，卻賣二十三萬元，即十年升幅只有13％。物業價格2003年至今升咗許多，但租金升幅有限。上半年用市價五百萬元買入物業，月租只收二萬四千 元；2003年該物業月租二萬元，即只升20％。

　　原材料價由1980年跌至2000年跌足咁多年，最近上升七年後，今年後又點？羅傑斯响呢方面係大好友，但我老曹仍未相信原材料價已進入超級大牛市。 類似1970年至1980年嘅情況唔易在二十一世紀重演；七十年代原材料價出現十一年牛市，背後理由係日本同西德興起成為工業大國，而兩者都唔係原材料生 產國。2000年中國同印度興起成為工業大國，而兩者都係原材料生產國，何況仲有巴西同俄羅斯。因此我老曹只同意原材料只有七年牛市，而唔認同二十一世紀 原材料牛市有十一年咁長。今天全球金融市場唔少資金來自日本（因日圓仍在不斷貶值），至於另一資金來源係美國次級按揭貸款逐漸乾涸，無法再產生新資金矣。 日圓弱勢可維持幾耐？冇人可事前知道，但8月份係一個重要嘅月份。7月金融市場極有可能係夕陽無限好、只是近黃昏。牛雖然仍在跳舞，熊已躲在樹叢中，隨時 準備偷襲。美國RBC Cash Index 7月份跌至76.1（6月份81.4），係去年8月以來最低。呢份由國際調查公司Ipsos做嘅報告指出，歐美消費者信心在迅速回落，雖然道指仍創新高及 失業率仍低，但美國零售市場除沃爾瑪百貨外其他百貨公司6月份銷貨量都在下降。

衍生市場練投機眼光

　　恒生指數由2003年4月8300點升至今年7月13日略高於23000點，升幅180％，雖然升幅咁大，但在過去四年多時間能夠將一萬元變為一百萬 元者仍然唔多（我老曹由1969年至1973年將五千元變成五十萬元，當年恒生指數由不足100點上升至1700點，上升十幾倍，並非我老曹智慧特別高， 而係時勢造英雄。在四年股市上升二十倍嘅環境下，賺大錢嘅機會總較股市在四年只上升180％容易）。用一萬元在四年內賺到一百萬元，只有利用超級槓桿 （Super-Leverage），就係我老曹上周日所講衍生產品。衍生產品最大缺點係時間值。即係必須在佢變成廢紙前賺一倍利潤離開或止蝕離場，而贏家 永遠係少數，約佔總數20％。衍生工具炒賣：一、必須以玩嘅心情，永遠保持平常心，無論輸贏唔應該上心；二、千萬不可感情用事；三、衍生工具如你冇時間? 到實便少玩；四、嚴守紀律，唔好畀貪念及恐懼支配自己；五、狠，止蝕要狠，賺錢亦要狠。只有咁樣，你才可用一萬元在四年時間內變成一百萬元，即使你賺唔到 第一個一百萬元，四年來可以在衍生市場生存，亦可練成精明投機家嘅眼光（唔好抗拒「投機」呢兩個字，成功人士有邊個唔投機？）。衍生市場死亡率十分高，因 此係訓練「狠、忍、準」三大要訣嘅最佳場所。

　　

　2005年下半年至今年上半年呢二十四個月，中國證券市場係製造百萬富翁嘅工廠，「野心、才能、創見」，加上少量資本，在內地金融市場隨時可令你嘅資本 double八次（以一萬元計，第一次double變成二萬、四萬……，連續八次就係一百二十八萬），情況有D似1969年至1973年香港。今天中國製 造百萬富翁嘅地方已唔再係製衣廠、玩具廠、電子廠或手表廠，而係金融市場。但中央政府已三管齊下：提高存款保證金率；發行特級債券吸走游資；利用 QDII洩洪……。今年7月開始，內地證券市場製造百萬富翁嘅能力已大減，今年6月內地股市分分鐘已跳最後的華爾滋（The party is over!）。點樣在泡沫中壯大自己，而唔係一見泡沫便怕得要死。在泡沫過後一定有人得亦有人失，而金錢永遠跟智慧走。當年由於我老曹肯睇外國投資學嘅書 走前別人一步，因此失而復得！智慧唔係天生嘅，而係知識隨日子成長為之「智」，用心記住每一次失敗教訓為之「慧」。人誰無錯？知錯能改，善莫大焉。第一次 出錯人人經歷過，第二次犯錯已係你蠢，第三次仍錯你已冇得教。

風電設備股係未來五年最大賭博

　　按照中國可再生能源嘅中長期規劃，2020年國內風電機總裝機容量可達三千萬千瓦，平均每年上升23.5％，可見呢方面發展嘅商機十分大。2005年 世界主要風電場風電成本為四美仙，已可同唔少其他發電設施爭市場。估計風機單位千瓦成本將由目前九百五十美元下降至2010年六百五十美元、2020年五 百美元。風電30％以上成本係風機，如風電機生產成本下降，未來競爭力將更強。中國去年累計裝機總量達264MW，到2020年可上升到1900MW，投 資一百五十二億元人民幣；目前全球已上市嘅風電儲備製造股O在五十八倍至七十倍之間，可作參考。近二十年風機功率增大一百倍，估計全球風能資源係水能資源 嘅十倍，每年可發電五十三萬億千瓦，目前只開發其中好小部分資源，未來前景十分好。去年中國新增風機一千四百五十四台，裝機容量一百三十三萬KW，較 2005年上升165％；去年底總裝風機共三千三百一十一台裝機，容量二百五十九萬KW，風電市場九十一個，分布十九個省；中國在風機方面發展亦進入高增 長期。雖然國家政策支持風電等可再生能源，但投資風電產業嘅風險十分大。由於設計嘅風電機必須在野外全天候運行二十年，如可靠性能差，在各種極端惡劣天氣 及非常複雜嘅風力受變載荷考驗下，唔係間間公司嘅產品可以過關。

　　以華能集團旗下內蒙能源風力發電公司所生產嘅風電機，已在錫林郭勒盟大草原上具有得天獨厚嘅風力資源，但風力電價為四角二分人民幣，每年只可利用二千 三百小時。上述成本係冇利潤空間嘅，除非日後電價上升或獲國家扶持，才能繼續發展落去。依家國產風電平均電價五角六分（火電平均電價三角六分），仍係蝕本 生意，必須在稅收、信貸、投資、補貼及獎勵並行，才能令中國風電市場發展起來，不然連蒙古風力發電亦蝕本，其他地方可以想像。如政府唔支持，十五年後呢個 風電機市場設備大蛋糕又係畀外國人食咗。

　　內蒙古風力發電總裝機容量超過五十萬千瓦，佔全國風電五分一，計劃2010年達五百萬千瓦。新疆自治區响呢方面亦會急起直追，打造全國最大嘅風電產業基地；新疆羲之翔風能科技公司計劃投資一億三千萬元佔地一百畝，建設四條風電配套設備生產線。

　　風電設備股未來是龍是蛇？將係未來五年最大嘅一場賭博。