驚餐死又冇大件事

1月30日，周二。恒生指數升223.78，收20460.46；成交三百七十五億九千三百多萬元。1月期指升75點，收20295點；2月期指升254點，收20520點。

恒指上升空間有限

　　今天長實（001）升1.6％、和黃（013）升0.3％，兩公司以二十二億元收購上海市普陀區一幅一百九十萬方呎土地。中移動（941）升 3.1％，報道指沃達豐拒絕香港投資者出價六十億美元收購手上3.3％中移動股權。香港中旅（308）升22％，見三元三角六仙，摩通大幅提高其目標價， 由三元改為四元六角。重慶鋼鐵（1053）升9.5％，公司計劃下月5日發行三億五千萬股A股。領匯（823）升2.2％，因主席鄭明訓大拜拜也。花旗認 為中電（002）現價已偏高，建議減持。後市展望，恒生指數上升空間有限。

　　內地股市回落1％，報2551點。民生銀行跌5.2％、招商銀行跌2.9％、萬科跌6.3％、保利地產跌8.3％；銅價下跌令江西銅業跌3.1％、安徽銅都跌3％；中國石化則上升7.3％，因油價下跌2.5％，至五十四美元。

　　中國人民銀行行長周小川避談利率問題，只係話密切關注房地產價格。

　　下周G7會議，各國關注日圓弱勢，認為日本正利用日圓弱勢去增加出口；過去一年日圓已貶值10％。

油價無力見60美元

　　根據「1月效應」，即1月係點，全年亦係點嘅機會甚大。今年1月將過去，大部分日子令人感到擔心，但又冇大件事發生；2007年會否全年皆令人擔心， 但結果又冇大件事發生？恒生指數整個1月份响不足5％波幅內上落。油價由五十美元反彈，似乎亦無力見六十美元，只係喺五十╱六十之間上落。金價情況亦一 樣，喺框框內炒上炒落，無大作為。恒生指數下支持19300點，上阻力相信唔易打破22000點，代表「limit upside」。

　　瑞銀集團响上海嘅中國證券主管袁淑琴話，依家A股仲未係泡沫，只係唔好過分追捧嗰D高估值嘅股份便可。可利用參與IPO申請新股去獲利，喺較動盪嘅股市中，選擇防禦性比較強嘅行業作為重點投資，如運輸、通訊等。瑞銀對A股長期走勢保持絕對信心咁話。

　　標普證券研究總監兼副總裁陳麗子話，原先估計今年A股市場升幅可達25％，但今年1月升幅已達該行預期目標，近日出現調整係好事，有利日後發展。

　　建行研究部認為，A股市場今年將繼續上演「牛」行情，股價响震盪中上升。

　　富國基金認為，A股漸入佳境，雖然去年已強勁上升，但今年A股唔會出現類似1993年同2001年嘅大幅調整，因為企業盈利持續增長、人民幣升值及股權分置改革完成，三大因素繼續支持A股上升。

　　我老曹有時見到唔少「老」嬉皮士仍「紮辮」！佢地腦海中仍停留喺六十年代自己年輕時；紮辮子、反越戰、反傳統……，忘記今天自己已經五張幾，即使紮辮 子、穿奇裝異服，亦唔再係叛逆青年，而係行為古怪嘅老頭子。有幾多投資者犯咗相同錯誤？1997年決定瞓身房地產之時，但佢地想像中嘅時代剛剛過去； 2000年認同科網時代來臨之時，泡沫卻已爆破。我地常用剛剛過去嘅時代去想像未來，以為只要紮根辮子，別人便以為自己仍係六十年代嘅嬉皮士，忘記咗依家 係2007年，唔係1967年！趨勢隨時開始，亦隨時結束，冇永恒不變呢回事。今天嘅「是」可能係昨天嘅「非」；今天嘅「非」可能成為明天嘅「是」，任何 事物都有「止蝕」（stop losses）時，理由係趨勢已改變。

龐大日圓拋空令人不安

　　美國豪宅似乎進入回落期，億萬富豪Kirk Kerkorian去年將自己响比華利山嘅豪宅放盤，叫價二千五百萬美元，等咗半年仲未有買家，今年已降價為一千八百萬美元。上周末美國公布數字，去年約 有一百二十萬個住宅單位因抵押人未能償還貸款而被金融機構接管，較2005年上升42％……。大部分人去年預測美元死亡（End of the US Dollar），但美元滙價去年12月卻靜雞雞地回升。當每一個人都認同一項「預測」之時，呢項「預測」往往唔會實現。令人擔心嘅係對美元嘅減息預測，已 由最初估計係今年年初改為第二季，依家再改口為今年年中。去年第四季美國GDP增長率可能回升至3％，就業情況改善、勞工成本上升（12月份上升 4.2％）；失業率只有4.5％，係近五年內最低，都令聯儲局憂慮通脹率有惡化機會。現水平利率不能阻止工商界借錢投資，根本上毋須減息去刺激經濟，甚至 有可能加息。

　　自從1987年出現股災。美國聯儲局每次遇上經濟放緩便大開水喉放水，包括1990年波斯灣危機、1993年墨西哥危機、1998年俄羅斯危機、 2001年科網股泡沫爆破到「九．一一慘劇」。經過二十年大量放水後，已造成全球資金泛濫，泡沫處處。每一次收緊銀根，股市立即有強烈反應（例如去年5 月）；信貸過分膨脹，令風險成本被過分低估，上述情況並唔健康。情況有如我地食抗生素醫感冒，有一天真係大病之時，卻發現抗生素冇效。問題係我地應否趁經 濟仍好之時，讓泛濫嘅資金逐漸退卻；定係保持充足資金供應，令經濟仍保持繁榮？否則日後出現大件事便有如日本，即使將利率降至絲路亦無法令經濟復甦（日本 12月份失業率上升0.1％，至 4.1％；日圓已跌至四年低點122.19兌1美元、158.6日圓兌1歐羅新低。雖然係咁，2003年4月開始嘅日本經濟復甦期能否維持落去，令人擔 心）。投機者拋空日圓去投資其他項目已達新高，估計約二千億美元，咁巨大嘅日圓拋空情況令人不安，一旦投機者改變睇法為日圓平倉，便會再次出現類似去年5 月嘅事件。下周G7其他國家將逼日本銀行加息。

內地股市暢旺可推動樓價

　　本月至29日止，廣州地產市場成交共六千三百七十八套，已超過去年12月份嘅總數。一手樓價平均達七千五百九十六元；天河區維持喺一萬一千元一方米， 較去年12月回落二百八十九元。主要樓盤有滙景新城、尚東美御、時代花生、僑英花園及沁馥佳苑等；除時代花生、僑英花園以低於一萬元一方米成交外，其他都 超過一萬元一方米。其中滙景新城上城勛堡二期以一萬三千元成交；尚東美御更達一萬五千元；最低係時代花生，成七千五百元（毛坯）。海珠區成交一千二百七十 二套，平均價八千九百一十七元一方米，較去年12月升三百元。

　　從1月份廣州樓市成交價睇，今年內地樓價應平穩發展。以香港經驗，股市上升有力進一步推高樓價。

　　雅域集團（1229）、鈞濠集團（115）停牌。

　　武夷藥業（1889）2月1日新上市。

　　新怡環球（1094）延遲董事會會議日期。

　　確利達國際（1224）由2月1日起名為中渝置地。

　　恒隆集團（010）、恒隆地產（101）、一創科技（8111）、天時軟件（8028）、神州數碼（861）2月8日；富麗花譜（8176）、中國豐 達（8220）、FlexSystem（8050）、流動電訊（8266）、萬佳訊（8279）9日；百齡國際（8017）12日公布業績。