1月25日，周四。恒生指數跌151.22，收20669.83；成交五百一十七億六千五百多萬元。1月期指跌72點，收20685點，主因係內地A 股出現調整。滬深三百指數年初至今已升20％，今天出現調整，跌3.3％，市場消息傳人行短期內加息，國企指數受影響回落1.5％。中銀香港（2388） 跌2.6％，港交所（388）跌2.5％、中移動（941）跌1.7％。凱基亞洲研究主管Ben Kwong話，投資者响當前高位要小心審慎，可試圖鎖定部分利潤。中國財險（2328）跌7.9％，美林將其評級由「中性」下調至「拋售」。江西銅業 （358）升1.2％，見八元一角九仙，公司計劃將精銅產量由去年嘅四十四萬公噸增至今年嘅五十五萬噸，以滿足國內需求。海爾電器（1169）宣布十股合 併為一股。
電訊股面對獲利回吐
去年電訊股表現不俗，今年電訊股面對大量獲利回吐，投資者正從升幅已大嘅電訊股身上獲利，並投資嗰D被忽略嘅股票；唔少電訊股2000年3月至今已完 成「V」型反彈。另一方面，晶片生產股表現仍然不濟，相信今年上半年仍未能擺脫困境，但經過幾年回落，亦到咗尋底期。換言之，港股仲玩緊個別發展，唔似內 地 A股狂態畢露。
內地A股市場重新抓回每個人嘅眼球，辦公室裏、銀行裏、飯桌上，人人都在談股。文員、售貨員、農民甚至老大爺都對股票發生興趣。喺上海證券行內，唔少 投資者都响大廳內互相交換炒股心得，連食晏亦唔想離開，人人攞住個飯盒，以免浪費交換炒股心得嘅時間。記得1973年我老曹曾經同人湊仔嘅經驗。當年我老 曹响證券公司當投資顧問，公司大堂內坐咗幾十個客仔（當年俗稱金魚缸，因為有大量電視機睇住個別股份嘅股價變化），收市後客人散去，職員通知大堂內有一個 手抱嬰兒喊緊，立即諗到唔知係邊位太太留低，滿以為好快回頭搵仔，於是叫女職員照顧。點知到夜晚七點仲未見人返來搵仔，女職員亦要放工，我老曹只好未結婚 先學人湊仔，到晚上九點才接到一位女士電話，問見唔見佢個仔？原來股市收市後，佢同朋友去打牌兼食晚飯，返到屋企至醒起自己唔見咗個仔；結果我老曹仲要負 責將佢個仔送到府上……。由此可見，炒起股票上嚟可以連仔都唔要，估唔到今天上海小投資者可以連飯都唔食。
內地分析員推算五年十年純利
滬深股市指數喺十八個月內，便由1000點之下升至2900多點。自2001年股市崩潰至今五年時間，內地新開戶投資者2004年只有一百六十二萬一 千六百戶，較2000年少80％；本周一天已有二十萬人開新戶口。自從2001年內地股市崩潰後，國企、紅籌股都跑晒去香港上市，呢類H股唔少升幅已達十 倍，然後又回歸A股市場上市……。內地A股由2005年6月略低於1000點，共用咗十五個月才爬升到1800點。去年10月銀行儲蓄存款出現五年來首次 下降；同月證券公司客戶保證金較9月上升二千一百六十一億元，較2005年10月上升182.9％；然後短短三個月A股指數再升多1000點。去年12月 北京同上海市居民把房產證拎到當舖去當（因為銀行做抵押貸款太慢，趕唔切！）。到咗上周，上海市內嘅當舖已唔做生意（因為所有資金已借出），如要當房產 證，必須坐五個小時車去蘇州或杭州，嗰邊嘅當舖仍有小量餘錢可借。更多人將錢投資基金，例如去年12月7日嘉實策略增長基金集資，一天便獲四百一十九億元 認購，炒股基金規模目前已達八千億元人民幣（其中一半响去年集資）。內地分析員開始睇唔起本港分析員，認為香港分析員都係膽小鬼，眼光唔夠長遠（佢地推算 上市公司嘅純利係五年、十年後賺幾多）。北京、上海已進入「我為股狂」。
家吓滬深股市總值十一萬多億元，但可流通股份市值只有三萬多億元，每天成交額有一千五百億元。香港股票市值十三萬多億元，除H股有非流通股外，其餘都 係全流通股份，但每天成交額亦只有五百億元。香港股市流通市值係滬深股市加起來全流通股份嘅四倍多，但成交額只及滬深股市三分一。從呢個簡單對比，可見滬 深股市炒作程度有多高。
以國壽（2628）為例，去年營業額一百三十六億美元，但市值卻較營業額高達一千二百八十億美元嘅ING更高；工商銀行（1398）去年營業額二百三 十二億美元，但市值已超過營業額六百三十七億美元嘅滙控（005）。再睇散戶人數今年1月9日共七千八百九十二萬戶，較去年初多五百八十四萬戶，最近以每 天約二十萬戶嘅速度增加。內地A股已出現泡沫，呢點好肯定，餘下問題係呢個泡沫能吹得幾大、A股牛市可持續幾耐？儘管上述兩大問題未有答案，但有一點可以 肯定，就係泡沫總有一天會破滅（參考過去香港資料，1996至97年紅籌股泡沫共維持咗十九個月）。
出現泡沫嘅理由，同香港九十年代一樣。1990年因波斯灣危機油價上升，令美國經濟增長開始放緩，為阻止美國經濟出現衰退，聯儲局宣布減息及增加貨幣 供應，令美元滙價轉弱；美元到處流竄尋求獲利機會，唔少流入香港，推動1990至97年本港樓市及股市，最終形成泡沫。1997年8月亞洲金融風暴，資金 大量從亞洲區流失，泡沫爆破。呢一次2001年起美國經濟開始放緩，聯儲局又再減息，「九．一一慘劇」後，聯儲局瘋狂減息兼增加貨幣供應，去阻止美國經濟 出現衰退。2002年起美元又到處流竄，而呢次主要對象係中國、印度、巴西及俄羅斯（俗稱BRIC）。1990至97年8月香港嘅情況，2001年1月起 喺 BRIC重演，最後幾時爆破？冇人知道。
越南政府開始為股市降溫
過去十六年，全球貨幣以年率超過10％嘅速度上升，但全球GDP平均年增長率只有 3％，形成貨幣泛濫嘅局面，所到之處皆造成泡沫。Boom & Bust已喺唔少地方一再出現，內地A股依家已進入「悲傷的傳奇」時段（先狂升後暴跌），短期泡沫愈吹愈大，直到有一天爆破為止。越南股市去年暴漲 144％後，今年不足一個月再升30％以上，係唯一股市較中國A股更癲嘅市場。越南政府開始為股市降溫，越南央行向國內銀行發出指令，唔准向自己嘅證券子 公司發放貸款，防止國內投資者借錢買股票；並利用政策措施遏制外資進一步流入股市；而今年內有一系列新股招股活動。家吓越南股市總市值一百四十六億美元 （去年初只有十億美元，市值─年內增加十四倍）。
中國國家統計局局長謝伏瞻响回答記者問題時話，中國去年第四季GDP增長率已回落至10.4％；11月份CPI增長率係1.9％、12月份係 2.8％。人民幣2005年7月21日起兌美元升值，但中美貿易差額並冇減少，滙率係影響貿易差額嘅重要原因，但唔係唯一因素，以未來人民幣滙率睇，好難 改變貿易差額也。日本1971至94年兌美元由360日圓升至79日圓，升幅達78％亦未能改變日美貿易差；何況人民幣每年只以3-5％速度上升？
去年中美貿易盈餘達一千四百四十三億美元；中國去年全年外貿盈餘高達一千七百七十五億元。上述資金令內地政府無法控制信貸膨脹，令經濟進入過熱期。
發改委認為廠商唔夠節約
雖然中國出口旺盛，但2002年起製造業面對嘅困境係原材料成本及工資不斷上升，但產品價格反而下跌嘅「剪刀差」問題，形成生意愈做愈大、邊際利潤愈 來愈窄，甚至陷入虧損。國家發改委今年深化資源性產品價格改革方案，更加入「資源節約」及「環境保護」意見。發改委認為中國資源產品價格長期被低估，導致 大量工廠冇採取節省原則，因此把環境治理成本及資源枯竭後嘅退出成本計入石油、天然氣、水、電、煤及土地價格，令製造業百上加斤。以廣東省為例，每噸油上 升二百元，負擔便多四十億元人民幣；電價每漲一分錢，全省支出多三十億元。去年燃料及動力價格上升10.9％，而工業產品出廠價只升1.2％，製造業利潤 空間受到進一步逼壓，唔少企業出現效益下降、虧損增加等情況。 原油由七十八美元跌至五十美元，跌幅達35％。但內地汽油價格每噸只降低二百二十元人民 幣、航空燃油跌幅每噸低九十元，真正受惠者係國內煉油廠，由原來虧損轉為獲利；反之，汽油用家、航空公司受惠極少，主要係國家發改委要深化資源性產品價格 改革嘅結果。
人行貨幣政策委員會委員樊鋼話，中國經濟高增長格局至少仲可以持續二十年左右，响呢段期間，人民幣有望保持小步上升嘅趨勢，即未來二十年人民幣極有可 能保持每年上升3-5％。貨幣政策係另一對製造業不利嘅因素，八十年代至1993年人民幣不斷貶值，對製造業十分有利。1994年1月至2005年7月人 民幣同美元掛鈎，2005年7月起按年上升3-5％，一直維持落去……。
除上述外，另一個影響因素就係稅率。八十年代為吸引廠家回國設廠，國家提供兩免三減（兩年免稅、三年付稅率嘅50％），然後稅率為15％；加上各種優 惠，實際稅率好少超過10％。1997年亞洲金融風暴後，1998年起再提供出口產品退稅優惠。不過，近年不但出口退稅逐步減少，而且已討論緊兩稅合一。 國內企業稅率係33％，五年後稅率逐步劃一為25％，即國內企業稅率由33％降至25％，近日已刺激部分H股股價上升；反之，外資企業（主要係廠商）稅率 由依家 15％逐步升至25％，上述稅率不但較香港高，甚至較新加坡高，只係較歐洲等國家低，相信仍有外資工廠移向中國；至於香港同新加坡，相信搬得者早已搬晒。 換言之，中國政府由八十年代倒履歡迎廠商，到九十年代盡量協助廠商，自2005年起政策上已唔再歡迎外地廠商嚟中國設廠嘞（除非係高科技工廠）。五年後稅 率上升至25％，中國對外地廠家嘅吸引力已唔大。此乃本港上市工業股自2003年4月開始嘅股市牛市中表現一直落後大市嘅原因。
武漢將實行「住宅禁商」
喺中部崛起政策強力支持下，武漢經濟發展已逐步駛入快車道。武漢工商行政管理局開始拒絕以「住宅」為註冊地嘅企業進行工商登記，可以判定武漢市全面實 行「住宅禁商」只係時間問題，為武漢寫字樓提供有利環境。而武漢甲級寫字樓租金仍大大落後天津、成都、西安等同級城市，呢D地區每平方米月租過百元，武漢 卻不足八十元。依家北京、上海等一級城市嘅優質寫字樓投資回報率超過6％，接近8％，相信武漢亦應有咁嘅回報。
商場方面，2002至05年武漢每年新增商舖面積五十萬平方米左右，平均租金一千元一平方米一年，即每年租金收入新增五億元。假設租金佔總營業額 15％，即每年武漢需要嘅新增營業額三十五億元，係咪太樂觀？換言之，武漢房地產正面對寫字樓供應不足，而商場卻供應過剩。
名家國際（8108）股份拆細。
沒有留言:
發佈留言