1月18日，周四。恒生指數升212.94，收20277.51；成交六百四十二億四千四百多萬元。1月期指升288點，收20320點。股市繼續其鋸齒形走勢，代表踏入今年1月出現好淡雙方爭持，最後由贏出嘅一方話事。
國期持倉上限放寬有利交投
證監會與港交所研究放寬國企指數期貨持倉上限，由依家單一機構最多持六千張，上調到一萬二千張；如順利嘅話，今年上半年可放寬。上述限制係1998年 特區政府面對亞洲金融風暴後制定，目的係限制恒指嘅拋空數目。2003年12月國企期指推出時亦制訂上限，以免受外資證券行衝擊，當年每日成交只有三千一 百九十六張，今年1月每日成交已達三萬零五百三十三張，响投資界要求下放寬上限，一旦放寬，相信可進一步刺激國企股交投。
國際油價由七十八美元下降至五十二美元，但內地航空油價仍然高企，雖然年初兩次減價，共降二百七十元人民幣一噸，仍較國際航油價高出一千元一噸，令航 油佔國內航空公司營運成本40％（外國航空公司佔30％）。為補貼上述損失，中國政府容許國內航空公司繼續保持燃油附加費，直到國內航油同國際接軌為止。 今天內地航空公司股價十分波動。面對航空市場開放，內地航空公司嘅高航油價問題，令佢地喺競爭上處於劣勢。
今年投資策略係玩sector rotation，例如去年下半年由能源股、資源股，轉向航運、汽車、航空、水泥及電力股等。最近油價响五十美元進入支持區出現反彈，厄爾尼諾天氣令北美 洲呢個冬天不太冷，估計油價反彈幅度有限，相信喺五十至六十美元之間上落。响呢段日子，消費性電子股能否抬頭？對沖基金大玩「愛你╱恨你」遊戲，令不同行 業股份唔係大升就係大跌。我地可利用對沖基金過分嘅愛或過分嘅恨，從中取利。例如中國人壽（2628）由1月3日至今已回落9.2％，理由係該股去年股價 上升三倍，股價炒得過高而令人不安，去年中國保險市場擴張速度只及三年前一半；家吓國壽股價已係資產淨值八點五倍！
轉向防守性強股份
去年首十一個月中國保費收入只增加14％，唔似2001至03年年增長率達27％至45％。國壽股價上升理由係1月9日返上海發行A股。國壽2005 年獲利十一億四千萬美元，AIG同期獲利一百零五億美元；國壽市值一千四百五十億美元、AIG市值一千八百五十億美元，條數點計？瑞信亦將中國財險 （2328）及平安保險（2318）評級由中性降至跑輸大市。股票市場從來冇大戶散戶之分，只有贏家同輸家，去年贏家係中移動（941）嘅投資者。中移動 佔中國流動電訊市場66％，並每年增加二千五百多萬個新用戶，但去年股價已由三十五元升至七十元，升幅100％，今年才購入中移動，贏面有幾大？
今年股市充滿波幅與調節，一隻股份可無端端上升20％或回落20％，情況好似玩搖搖。我老曹意見係，任何股份升幅一旦達到80％至100％便沽出，如再上升亦留番D畀別人賺，將資金轉向升幅仍唔算大嘅股份。今年投資策略以防守性強嘅股份為主。
中國政府重提土地升值稅，令周二內地地產股價平均下跌10％。响上海，DTZ戴德梁行嘅Theodore Justin Novak認為，中央如嚴格執行土地增值稅法例，代表中國房地產企業暴利時代結束，但唔代表樓價會下跌（反而可能上升）。去年內地地產股指數上升 159％，今年年初繼續上揚。
國內發展商暴利時代結束
1993年國家就開始徵收土地增值稅，據了解係採取「預徵」制度；即係房地產開發商樓盤基本上蓋好取得預售證時，由稅務局按照一個評估嘅稅率來徵收。 具體計算辦法係房地產項目發售收入扣除土地成本、建築成本及裝修成本後，所剩下嚟嘅價值增長部分為應付稅額。响咁情況下，該樓盤項目公司喺註銷時才須結算 土地增值稅，如房地產企業將一D賺錢嘅房地產項目故意留低部分房子唔賣，便無法結算土地增值稅；有D冇賺錢嘅房地產項目急賣後，又可搵稅務局退回土地增值 稅。過去常用嘅辦法例如只售住宅、留下商場唔賣，令收入資金未夠支付開支，便唔使畀土地增值稅；或物業分幾期進行，當收入已夠支付開支，餘下物業只租不 賣；又或者住宅部分出售賺回來嘅蚊年用於建酒店……。總之，收入唔超過開支便唔使畀土地增值稅。
呢次土地增值稅措施已作修改：一、如整個項目面積已售出85％以上，便必須支付土地增值稅。二、售出未足夠85％但部分建築面積留作收租或自用，亦須繳付。三、取得銷售證（預售樓花）後滿三年仍未銷售完畢者。四、納稅人申請註銷稅務但未辦理土地增值稅清算手續者。
增加上述規定後，希望利用土地升值去賺取差價嘅地產發展商所受嘅影響較大，尤其係過去靠關係而取得土地者，因土地成本太便宜了，將面對「重稅」！例如 2004年前北京土地價值至今已上漲100％，上述土地嘅擁有者，所賺嘅錢將有一半以上交土地增值稅。由於新規例係取得銷售證後滿三年仍未銷售完畢者都須 付稅，今年2月1日起所有2003年或以前取得預售樓花者，都必須喺今年內交稅！上述規定亦令地產商取得預售證後三年內必須將物業大部分出售，以支付土地 增值稅，亦可減少地產公司囤積物業去獲利。
日本銀行獨立性受質疑
一般而言，成本上升會帶來房價上漲。呢次追收土地增值稅，令房企綜合所得稅可能由25％調升至47.5％、55％、62.5％甚至70％（視土地升值 幅度如何而定）；亦令物業成本上升3％至6％。上述成本能否轉嫁畀買家？便睇物業市場點樣而定。不過，可以肯定嘅係房地產暴利時代已經終結！
股市同房價有冇關係？2004及05年上海及北京商品房皆上升，但內地股市卻下跌。去年上海商品房價回落，但上海股市卻上升。去年北京房價仍上升，照 形勢睇，起碼繼續維持埋今年，明年下半年才回落。內地股市同房價升降冇必然關係。繼土地增值稅後，仲有乜嘢政策未出台？喺商議中嘅有房地產物業稅及央行第 二季加息等。
格蛇曾警告美國地產界：「歷史唔會賦予所有事件以圓滿結局」。今年內地房地產價格可能仲會上漲，直到有一天高處不勝寒而跌番落嚟。中國房地產最終都係 逃唔出Boom & Bust命運。花旗銀行認為，呢次內地地產股價急跌只係一次過敏反應，不但不應拋售，反而應該吸納。中國流動資金過剩問題仍未解決，內地股市及房地產價格 係無法回落嘅；政府一再出招，效果係點令人存疑。
日本銀行宣布唔加息，令日圓跌至十三個月內低點。日圓由去年6月至今一直回落，今天兌澳元見十年新低，兌歐羅更係歷史低點。分析員估計，2月9日至 10 日喺德國埃森召開嘅財長會議，日本可能面對歐洲及美國財長批評，因此唔排除日本官員入市干預日圓滙價。日本銀行唔敢加息，相信係來自政府壓力。分析界估 計，日本2月份加息機會高達68％，不過日本銀行獨立性已受到質疑。
雖然依家日本銀行唔敢加息，但去年5月至今商品價格回落幅度唔細，嗰D睇錯市嘅對沖基金已損失慘重。中東國家股市唔少已回落50-65％（因油價下 跌，中東國家來自出售石油盈餘大幅減少），最終都係睇美股動向。今年華盛頓嘅人事變化十分大，對股市影響係點？殊仔上台後，白宮一再宣布減稅，令美國經濟 由 2002年復甦；但民主黨嘅議長卻相信加稅可減少美國雙赤。民主黨答應畀美國一個新方向（A New Direction For America），到底點搞法？依家美股創歷年新高，新方向係唔係要美股改變方向？而失業率二十五年新低，新方向係唔係要美國失業率止跌回升？美國稅率係 二十年新低，新方向係咪代表加稅？
美流動資金過剩在改善中
再講番流動資金過剩問題。美國2005年6月至去年6月已逐步抽緊銀根（美國三十年期債券孳息率由四厘一五一，上升至近日五厘三○七），引發去年6月 至今金價急跌。隨着金價回落，各國央行去年6月起又再放寬銀根（透過買入債券，令資金回流市場）。去年12月三十年期債券見四厘五二五，資金供應又再回升 （相信同美元滙價太弱有關）。今年1月17日三十年期債券息率已見四厘八八一，流動性資金過剩情況在改善中。由美國抽緊銀根到股票市場有反應，一般係六至 九個月之後嘅事，2005年5、6月嗰次，令去年夏季全球股市一度下跌20-30％；呢次由去年12月起抽緊銀根，到今天股市未見有反應。
中新集團（563）、合生創展（754）停牌。
■中國資源開發（661）1月29日；新醫藥（8085）2月2日；財華社集團（8317）9日；宏利金融（945）13日公布業績。
沒有留言:
發佈留言