1月28日，周日。2006年係泡沫年，泡沫處處，部分可能已爆破，例如黃金、銅及石油；部分仍繼續，例如內地A股。今年 經濟相信唔會陷入衰退，但在放緩中，股市則流行「輪流炒」。過去六年推動全球經濟向上嘅最大力量係房地產價格上升；到去年中，英國、澳洲同美國樓市開始進 入平坦期，去年美國新屋建造合約更出現十五年內最大下跌。
昨天的優勢明天的負擔
過去美元債券最大買家係中國及OPEC，今年兩者嘅購買欲皆下降，令美元長債孳息率上升，但人人仍相信今年中美元短期利率將回落。上述諗法已喺投資市 場上反映，即係話年中即使美國減息，刺激亦唔大；反之，如年中美國唔減息，影響則極大也。上周十年期債券孳息率見四厘八七九、兩年期債券四厘九七五，代表 12月初至今已升咗半厘。分析界認為，上半年美國減息機會只有4％。至於油價，由七十八美元回落至五十美元所帶來嘅好處亦漸漸消失。上周美股回落 0.6％，係12月22日以來最大跌幅。根據Thomson Financial估計，標普五百企業去年第四季純利升幅只有9.9％，結束連續十三季嘅雙位數字上升。
今年蚊型股應較大企業股更有值博率，主要係2003年起蚊型股一直被分析界忽略形成大落後；大企業股則受指數基金捧場而成為大熱。到今年大企業股價已 偏高，同期蚊型股股價卻偏低；反觀2000年蚊型股較大企業股炒得更熱鬧。隨着近日C組經紀買賣量上升，估計今年蚊型股有機會吐氣揚眉。股票市場往往係 「昨天的優勢、明天的負擔」，例如2000年最被睇好嘅TMT股，喺2003年開始嘅升浪中成為大落後；去年資源股同能源股過分吃香，會否成為今年大落 後？今年嘅尋寶遊戲對象極可能係嗰Ｄ市值只有十億元以下嘅蚊型股。四星期後又到咗大企業公布去年業績期，相信大部分業績表現皆不俗，但今年又點？股市係炒 前景，假設今年本港經濟繼續繁榮，大企業今年業績亦冇乜大驚喜，反而蚊型股業績隨時有機會大幅回升。賺大錢嘅項目往往唔喺大藍籌，而喺蚊型股。
去年第四季美國GDP估計可上升3.3％（第三季只升2％）。雖然美國樓市進入overbuilt，上周五美國商業部公布去年12月份新屋銷售升 4.8％（11月份升7.4％），即只要價錢適合，仍有人願意入市買樓。雖然11、12月份表現良好，去年全年銷售量仍減少17.3％，只有一百零六萬 間，係1990年以來跌幅最大嘅一年。12月份二手樓交投減少8.4％，上述消息令周四美股大幅回落，但周五跌幅已經收窄。上周股市波幅甚大，主要受投資 者情緒變化影響，至今未有實質利淡因素。
Ａ股泡沫莫估頂
1999年4月華爾街分析員有72％認為科網股出現泡沫，但泡沫真正爆破日子係2000年3月。點解明知有泡沫，投資者仍然唔出售？因為人人擔心「賣 咗買唔番」。今天人人話內地Ａ股係泡沫，但Ａ股泡沫幾時爆破？冇明確答案。今年內地股市推出指數期貨，而且大型國企大量上市，都可能進一步推高股市。人類 嘅貪念必須達到頂點才會返轉頭。當股市瘋狂上升時，唔好瞎猜幾時見頂，應有「Let it be」（讓它如此）嘅心態，以免被狂牛撞死！1973年本港牛市死亡，理由係外資大量出貨、抽走本港資金所引發；上述情況唔可能喺內地出現。1981年本 港牛市死亡嘅原因係利率，係升至二十二厘，上述情況亦唔可能喺內地出現。1987年香港出現股災，係聯交所前主席忽然宣布停市四天；呢個情況亦唔會喺內地 出現。1997年亞洲金融風暴，外面經濟出問題影響香港；上述係內地股市唯一擔心。如周邊經濟和股市出問題，引發內地投資者失去信心，才會令泡沫爆破。 2005年7月人民幣才開始升值，引發內地股市上升，但至今人民幣升幅只有5.88％。响人民幣未來仍可大幅升值嘅大前提下，內地股市泡沫應會愈吹愈大。 Ａ股後市展望將不斷出現震盪，响出貨訊號未出現之前，唔好估Ａ股何時見頂。
一孩政策子女踏入適婚年齡
依家中國實體經濟已明顯回軟，並唔需要大幅提高利率，但資產升值卻在加速，資金大量由銀行存款流入股市，情況類似八十年代日本。八十年代中國推行一孩 政策，家吓呢一億多個獨生子女漸漸進入適婚年齡，佢地嘅賺錢能力肯定較父母一代高，形成對商品房需求好大；此乃2003年起內地樓價大幅上升嘅背後條件。 去年金融行業高級管理人才年收入一百六十萬元人民幣以上；部門經理收入亦喺三十萬至四十萬元人民幣。證券行今年加薪幅度平均達13.6％，金融業加薪平均 10.4％，甚至基層職員月薪破一萬元嘅亦好多，令到房屋嘅需求保持暢旺。
金融市場內嘅起跌，皆由錯誤觀念引導，所謂「合理價」根本上唔存在。股價起起跌跌因素好多，其中最大因素係1971年前三十五美元兌一盎斯黃金，到依 家六百五十美元兌一盎斯黃金，即過去三十六年美元購買力貶值咗95％。換言之，貨物與服務費上升二十倍，只反映美元購買力下降而已。今天恒生指數二萬多 點，如扣除貨幣購買力下降。相當於1971年9月嘅一千點（當時恒生指數係400點）。由此可見過去三十六年通脹嘅影響力。每一代人都有佢地自以為啱嘅諗 法（fantasy）。例如1969年12月我老曹剛開始喺《明報晚報》寫專欄，解釋何謂「通脹」（即流通貨幣增加），足足講咗三個月，讀者仲唔明白流通 貨幣點解會增加？到咗今天，仍有唔少人將消費物價指數（CPI）當作通脹（Inflation）。理由係五、六十年代香港物價相當穩定，佢地唔明白通脹對 生活嘅影響；到1997年7月亞洲金融風暴出現，我老曹叫大家小心通縮（流通貨幣流失所引發嘅一連串反應）。經歷咗三十幾年通脹嘅香港人唔知通縮為何物。 其後所付代價係負資產。一直到2002年美元又再轉弱、資金大量回流香港，才解決香港嘅通縮問題。
財富轉移速度遠勝創造財富
過去三十 六年，流通貨幣增加咗幾多？以下數字可作參考。1970年美國債券市場總值八千億美元，2006年12月總值六十二萬億美元，增加咗七百七十五倍！ 2006年年底全球衍生工具市場總值三百五十萬億美元，2006年全球GDP只有四十三萬億美元。以香港人為例，辛辛苦苦工作一年能賺取一百萬元已經係高 薪人士；但喺衍生工具市場，得失一百萬元只係轉眼間嘅事。由此可見創造財富速度有幾慢及財富轉移速度有幾快。
1962年美國政府債券息率四厘二五，當年CPI增長率1％。隨着美國參加越戰，到1965年美國財政出現赤字十億美元，1967年越戰高峰期有五十 萬美軍响越南，軍費負擔五十八億美元；到1968年美國財赤一百九十億美元，超過第二次世界大戰時期。世人對美元嘅信心開始動搖，黃金漸被提走。債券息率 由 1965年嘅四厘半，上升至1970年初嘅八厘○五，美國宣布停止兌換黃金，並喺1971年8月15日宣布浮動滙率制度，永久地關掉兌換黃金嘅窗口。 2003年美國攻打伊拉克，當年美元短期利率一厘、債券息率三厘半、CPI增長率1.5％，三年半後嘅今天又點？呢幾年新增嘅美元去咗邊？答案係中國同印 度為主。中國政府話計劃好好運用手上嘅美元，唔再只用作購買美元債券，情況係咪有如1968年歐洲各國將手上美元兌為黃金？所引起嘅美元債券息率長期變化 及CPI增長率變化，不容忽視。
過去二十年，中國成為美元嘅蓄水池。美國新增貨幣從世界各地輸入中國，用作興建工廠、基建等，然後將產品運到美國及其他地區出售，餘下嘅資金回流美國 債券市場，令美元長期利率回落。呢個巨大蓄水池依家開始滿瀉，呢Ｄ資金正轉化成為中國境內嘅流動資金，並湧入房地產市場，去年更流入股市。按照日本及其他 國家嘅經驗，一場資產泡沫遊戲早已開始；由泡沫吹脹到破滅，可引發眼前經濟繁榮及日後嚴重衰退。日本資產泡沫1989年最高峰時，可以買入整個美國房地產 業；泡沫破滅後，日本衰退一直維持到2003年4月，响零利率政策下，才勉強令日本再度出現繁榮。1997年8月香港資產泡沫爆破後，香港亦出現六年衰 退。
中印缺糧全球大件事
中國糧食產量由1998年高峰三億九千二百萬噸，減少至2005年三億五千八百萬噸，共減三千四百萬噸。一直以來，中國政府利用過去大量庫存糧食彌補 產量減少嘅部分，但從2004年開始中國進口七百萬噸糧食。從呢點睇，中國政府糧食嘅庫存量，已不足應付糧食需求按年上升同時產量按年下降嘅情況。印度好 Ｄ，糧食產量仍在上升，但今後幾年來自科技進步令糧食增產嘅效應將消失，到時將一如中國，進入糧食生產下降期。其他國家如阿爾及利亞、埃及、伊朗、墨西 哥、巴基斯坦、中東和北非（例如摩洛哥）等，早已成為糧食大進口國。埃及人口雖然只有七千四百萬，近年小麥進口量已超過日本，成為全球最大嘅小麥進口國， 埃及國內糧食40％來自進口；阿爾及利亞人口三千三百萬，國內糧食一半來自進口。上述小國問題唔大，但中國擁有十三億人口、印度超過十億人口，一旦缺糧真 係大件事。換言之，未來幾年全球隨時爆發糧食價格飛漲事件！
中國鐵道部新聞發言人王勇平話，去年中國以佔全世界鐵路6％嘅營業里程，完成全球鐵路四分一運輸量，係日本嘅二點七倍、美國加俄羅斯嘅三點八倍。完成 貨物運送二十八億七千萬噸，較美國多十億噸，係印度嘅四點八倍。去年中國鐵路運營里程為七萬六千六百公里，人均不到五點九厘米，全年人均乘車次數不到一 次。依家每天只能提供二百四十二萬多個座位；喺春運期間，需求係上述數字嘅兩倍，中國鐵路迫切需要加快發展。
今年喺進口鐵礦石工作委員會全體大會上，明確表示今年新一輪鐵礦石進口企業資質淘汰已展開。2005年擁有進口資質嘅企業超過五百家，去年已減少至一 百一十八家，今年再減至九十家，而且仲未係終點，國家計劃進一步減少進口企業嘅數目。今年進口鐵礦石企業嘅資本由一千萬元提升至二千萬元，以及獲銀行授信 額達四億美元以上，進口鐵礦石總量由三十萬噸提高到七十萬噸，名單月底揭曉。1月份通常係鐵礦石進口嘅淡季，今年淡季不淡，就係因為嗰Ｄ危危乎嘅貿易企業 加快進口鐵礦石造成；船舶卸載礦石須排隊一至兩天，貨主多數係貿易商，好少鋼廠。上述情況令印度供應商將價格上調每噸三十至四十美元，而鐵礦石運費由西澳 洲至寶山由十六點三八美元加多二點八四美元一噸，散貨輪船租亦改為每天九萬美元。擔心呢批貿易商2月份突然放貨造成價格紊亂，將令其他貿易商同鋼廠損失慘 重。
證券分析員係今天風雲人物
美國1％人口擁有一般 美國人一百九十倍財富（1983年係一百三十一倍），代表由1982年起過去二十五年金融資產升值（唔係CPI上升）令富者愈富，但貧者並非愈貧！產生上 述情況嘅理由係全球貨幣平均每年以10％速度上升，而GDP每年升幅只有3％，形成全球資金泛濫。過去巨富嘅財產來自製造業（例如香港五、六十年代），然 後來自房地產（例如七、八十年代）；近年巨富嘅財產來自銳利嘅眼光，例如1989至97年本港樓價上升、1998至2000年 TMT股、2002年起至今嘅國企股狂潮……。响泡沫形成前加入，喺泡沫爆破前退出。其中最出色者有索羅斯及其他對沖基金經理；佢地控制數以十億美元計資 產，但只聘用一百幾十人，每年財富得失卻以十億美元計。現代巨富再唔係克勤克儉嘅廠家，甚至連地產商都唔係（香港地產最賺錢時代係1984至97年），而 係眼光銳利嘅機構投資者。近十年股票市場內財富嘅得失達天文數字，連地產商亦瞠乎其後。今天風雲人物唔再係地產大戶，而係高盛、大摩、UBS、BNP百富 勤、瑞信、滙豐內嘅證券分析員，佢地發言往往成為各傳媒財經版爭相報道嘅新聞。二十五年經濟環球化，加上貨幣寬鬆政策，令財富進一步集中响溫巴仙人口手 中。中國人去年才發現賺錢原來唔係去工廠捱世界，而係去炒股票！此一發現，令去年10月起中國人紛紛將蚊年由儲蓄戶口提出投入股市或基金（自己唔識炒股票 便搵人同你炒），引發A股狂潮，不知如何收拾。
美對沖基金投資者資產要求提高
1982年美國證監會為咗限制一般人投資對沖基金，規定私人銀行只能服務擁有一百萬美元或以上嘅客戶。當年達到上述條件嘅美國人口只有1.87％，美 國以外私人銀行毌須遵守上述限制，但大部分私人銀行喺海外仍以一百萬美元為下限（即閣下擁有最少一百萬美元以上資產，未計自住物業或做緊生意嘅公司價值） 才同你開戶。美國證監會發現，去年擁有一百萬美元以上資產嘅美國人已佔人口8.5％，因此向國會申請修改為二百五十萬美元，以限制投資對沖基金嘅人數，估 計可令投資者減少88％，至只佔總人口1.29％，但有五年過渡期，即2012年4月1日才正式生效。至於新開戶嘅限制，則响今年4月1日起生效。上述法 例修改如獲通過，有助減少資金流入對沖基金。
如根據美國證監會資料，即1982年閣下如擁有一百萬美元或以上（唔計自住物業及所做生意公司價值），就係屬於有銀士；去年如你擁有二百五十萬美元或 以上（唔計自住物業及所做生意公司價值），你才係有銀士及承認你係老於世故嘅投資者（sophisticated investors），可從事對沖基金投資。英國對對沖基金投資者冇限制，如閣下唔係美國人，便唔受上述法例所規限。有人認為上述法例唔公平，令95％美 國人無法獲對沖基金服務，反而令美國1％富人更有優勢。上述見解見仁見智，唔喺我老曹討論範圍之列。
英國消費者對英國最近一次加息漠不關心，而去年12月零售數字係近三年內最好。雖然分析員警告英倫銀行3月份再加息，但今天喺英國已搵唔到十萬英鎊或以下嘅物業了；12月份信用卡貸款數字更減少二億六千三百萬英鎊，代表英國消費嘅資金唔係來自貸款。
去年喺倫敦嘅高盛證券員工平均收入達三十萬英鎊，雷曼兄弟職員去年12月平均收花紅十七萬英鎊！去年英國金牌地產經紀公司完成六十億英鎊嘅買賣合約。响倫敦Savillis區，物業平均售價一百三十七萬英鎊（二千一百二十萬港元），證明全球都係蚊年！
沒有留言:
發佈留言