銅價將反覆回落

　　1月24日，周三。恒生指數升51.35，收20821.05；成交五百八十五億三千五百多萬元。1月期指低水，跌12點，收20757點；2月期指跌15點，收20816點。

伏達風傳係中移動神秘賣家

　　中移動（941）因不知名賣家延遲出售，股價今天再升2.4％，見七十七元五角，係2000年3月7日以來最高，當日中移動見七十九元七角五仙。美林 認為，中移動十二個月內可見一百元。伏達風2000年10月以二十五億美元購入2.18％中移動，2002年6月增持至3.27％，謠傳佢就係呢位神秘賣 家。依家中國流動電話用戶四億六千一百萬，佔中國人口35％，中移動佔其中三億零一百二十萬；估計2010年中國流動電話用戶達七億五千萬，由此可見中移 動未來增長率。

　　中石油（857）去年獲利一千八百五十六億元人民幣，今天收九元八角五仙，相信只係反彈。

　　歐盟威脅向中國鋼鐵產品採取反傾銷訴訟。去年中國鋼材出口歐洲三千萬噸，較2005年上升50％；美國鋼廠亦向政府申請要求對中國鋼鐵出口實施特保措施及反傾銷調查。傳中國政府可能進一步減少鋼材出口退稅去減少國際磨擦，睇嚟鋼鐵股反彈已差唔多。

　　新加坡《海峽時報》報道，麗星郵輪（678）將喺澳門建設並經營一家賭場，計劃投資四十七億元，將透過發行債券、股票及貸款為項目融資。去年第四季澳 門博彩稅收入一百六十六億三千二百萬澳門元，較2005年第四季升43.09％。其中最多來自百家樂，佔一百零六億五千九百萬元，升52.44％。以博彩 稅計，澳門已超過拉斯維加斯，成為全球最高博彩稅收入嘅城市。

　　兩極化情況不但喺本港住宅市場出現，喺寫字樓市場一樣出現。例如IFC租金已升至每呎一百四十元，中區甲級寫字樓平均租金六十六元一呎，較去年1月嘅 五十二元一呎，上升12.7％。不過，除咗中環、灣仔、銅鑼灣及尖沙咀區外，其他地區受惠唔大，例如觀塘區、九龍灣、鰂魚涌及西九龍，部分理由係呢D地區 供應量上升，真正理由係金融公司唔會响呢D地區開業。估計核心寫字樓租金今年仍可上升10％至15％；反之，非核心區寫字樓租金可能回落3％至5％，令兩 極化情況更明顯。

日本料下月加息圓滙止跌回升

　　日經平均指數開始挑戰去年4月7日高點17563.37，能否打破，好影響分析界對國際股市後市嘅睇法。由於日圓利率仍低，相信唔少人借日圓拋空去投 資其他項目，未來日圓滙價升降，對投資市場影響甚大。今天日圓滙價止跌回升，見120.91（1月22日係121.8日圓），相信下月日本會加息。

　　大摩建議吸納中小型工業股及嗰D因油價及金屬價上升而自2003年起表現失色嘅股份，同時建議減持國壽（2628）。油價及銅價回落，相信可改善未來 工業股邊際利潤。國壽股價雖然已由高價回落17％，不過仍然太貴，估計仍有25％下跌空間；另建議吸納平安保險（2318），作為國壽嘅「換馬」對象。大 摩美股策略師建議，美股持有比重應由70％降至65％、現金由5％上升至10％、債券仍佔25％。　　今年美國GDP增長率估計只有1.5％至2％，美元 利率有可能年中開始回落，減幅係半厘至一厘，即今年底利率可能係四厘二五至四厘七五。我老曹唔相信上述利率變化會為股市及樓市帶來乜嘢重大影響。

　　美國樓價進入穩定期，過去五年來自樓價上升所產生嘅財富效應响今年消失，喺上述環境下作投資選擇絕對唔易。過去五年美國樓市興旺，加上中國基建項目大 增，曾令銅價升完可以再升。隨着美國樓市放緩、中國基建項目增長率下降，銅價由去年5月四美元一磅回落至近日二點五美元，跌幅38％，近日出現反彈並進入 上落市。2000年中國「十．五」計劃利用固定資產投資去拉動中國經濟增長，引發中國對原材料及能源嘅強大需求，銅價喺中國強大需求下上升（美國一間房屋 需要用銅四百磅左右，2001年起減息潮亦刺激美國對銅需求）。初期因黃銅存貨充足，影響唔大，到2003年年底當銅價打破二千美元一噸，開始大幅上升， 2004年年底見三千美元以上，到2005年再升穿四千美元，並喺去年5月12日見八千八百美元一噸。經過大幅上升後，近日銅價已回落至2004年至去年 5月升幅嘅50％，喺五千六百美元水平牛皮【圖】。

精銅首現供過於求

　　2003年當年全球精銅產量一千五百二十五萬五千噸（其中一百六十九萬五千噸來自再生銅），2003年需求已達一千五百六十九點一噸，即需求已大於供 應。2004年精銅供應一千五百八十二萬三千噸（包括再生銅．下同），需求一千六百八十六萬五千噸，第二年仲係供不應求；2005年精銅產量一千六百五十 四萬六千噸，需求一千六百八十五萬五千噸。連續三年供不應求，令國際存銅跌至危險水平，引發去年上半年銅價狂升。去年精銅供應一千七百四十三萬七千噸、需 求一千七百六十六萬一千噸，仍係供不應求。去年新需求主要來自歐洲，如德國上升24％、意大利上升14.4％；反之，美國減少0.9％、南韓減少 4.1％；中國需求去年亦只升5.6％（2005年中國需求上升9.1％），主要係銅價大升後，代替產品如金屬鋁、不銹鋼、塑膠等大量取代銅嘅地位。今年 估計精銅產量一千八百零二萬一千噸、需求一千七百八十八萬六千噸，出現五年內首年供過於求。從呢點睇，近日銅價完成反彈後，今年大方向係反覆回落，短期回 升只係一次技術反彈，各位應利用銅價反彈期減持江西銅業（358）等資源股。

今天經濟可承受高油價

　　加拿大艾伯塔省嘅油砂生產近年已增加五倍，即每日產量可達五百萬桶，相等於美國四分一消耗量或入口量一半。來自加拿大嘅石油大增，可減少美國對中東石 油依賴度，亦令美國政府欲努力支持油價响較高水平（因油砂生產石油嘅成本高達二十五美元一桶）。加拿大油砂進入大量生產期，可確保全人類石油供應喺可見將 來唔會短缺。受環保條例影響，從油砂中抽取石油嘅成本，較由地底抽取嘅石油貴好多，因此油價最好保持响五十美元或以上一桶。美國嘅石油策略係喺今年前改變 美國原油入口75％來自中東嘅情況，包括刺激生物能源（如乙醇）及其他方面嘅原油來源。去年7月油價升上七十八美元一桶，未見經濟出現衰退，代表今天經濟 可承受高油價，未因汽油價格上升而減少其他項目開支。油價回落，其他方面開支可略增，再唔好似1974及81年嗰陣時，油價上升引發衰退。

　　殊仔希望未來十年美國汽油用量減少20％，未來二十年將戰略石油存量增加一倍。去年响美國操作中嘅乙醇蒸餾廠共一百一十間，年產量五十三億九千萬加 侖，計劃幾年內上升至一百一十四億加侖一年，消耗全美20％玉米產量；上述因素令玉米價格升至十年新高。美國戰略石油存量由依家六億九千一百萬桶，計劃上 升至 2027年嘅十五億桶，即由家陣相等於五十五天入口量，上升至2027年相等於當年一百天入口量。

　　中國2005年GDP達二萬億美元，已超過英國，世界排名第四；估計明年可超過三萬億美元，超過德國世界排名第三。一如美國、日本同德國經濟發展，大 量農業人口轉為製造業及投資基建，可令經濟保持增長。由1978年改革開放至今，中國GDP平均每年上升9.8％；雖然係咁，中國人均收入家吓仲係不足二 千美元一年（美國四萬二千美元、日本三萬五千美元）。更何況仍有一半人口响農村，即使中國GDP媲美美國，由於中國人口達十三億，人均收入仍未能打入全球 一百大。過去二十八年經濟發展，喺國內已產生貧富懸殊及不平均，今年起着重建立和諧社會大於GDP增長率。

　　國家發改委員會秘書長韓永文話，今年政府將進一步加大對房地產市場嘅調控力度。

　　2004年中國玻璃及玻璃製品企業工業總產值累計一千一百零一億九千萬元（人民幣．下同），較2003年升35％；累計資產一千四百八十八億二千九百 萬元，升20.88％；利潤七十七億五千五百萬元，升71.32％。2005年玻璃及玻璃製品企業工業總產值累計一千四百九十三億七千萬元，升29％；累 計資產一千八百五十二億一千四百萬元，升24.44％；利潤八十三億九千多萬元，升8.2％。去年中國平板玻璃產量三億九千萬重量箱，較2005年上升 21.8％，由於重油、純碱、電力、運輸等價格居高不下，而產品售價不升，造成2006年前九個月全行業一直處於淨虧損狀態，產能過剩問題十分明顯。

　　今年1月稀土價格較去年12月升40-50％。稀土氧化釹售價十六萬至十七萬一噸、金屬釹及金屬鐠更達二十二萬元一噸；主要係國家規定入冊嘅企業減為 三十九家，較去年少八家。去年5月國家發改委公布六項稀土行業標準，今年1月1日起生效，開始價格管制及資源控制，稀土生產商去年5月開始已向下游客戶採 限量供應，今年1月1日起大幅加價，形成短期需求急降，但稀土生產商可把產品儲起來，直至市場適應為止。天氣反常冬裝滯銷

　　全球天氣反常，突顯全球氣候變暖嘅趨勢。受厄爾尼諾現象及溫室效應影響，今年將有可能打破1998年嘅氣象紀錄，出現有記錄以來最暖嘅一年！至今為 止，上海零下四、五度嘅現象至今未有出現，依家距離春節只有三個多星期，冬裝市場不但去年第四季度業績慘淡，而且至今仍未售出存量三分一，未來三個星期再 賣唔出就慘矣。不但如此，北歐國家亦應冷未冷，歐洲方面冬裝亦一樣滯銷。今年冬裝賣唔出去，未來訂單會係點？

　　往年冬季，亦係上海菜價大漲之時；今年反常，菜價郁都唔郁，全國種植區擴大，令生產成本下降供應充足，加上天氣唔凍，上海今年菜價好便宜。

　　仲有取暖用電器、圍巾、暖水袋嘅銷情亦令人擔心，踏入1月已紛紛大減價促銷，未來三個星期賣唔出去便成月下貨。

去年上海人均收入達二萬零六百六十八元人民幣，較2005年上升10.8％；農村居民人均收入達九千二百一十三元，升10.4％，係連續第十五年雙位數上 升。上海GDP上升12％，達一萬零二百九十六億九千七百元人民幣（香港係十四萬億港元，不但係上海GDP十倍，人口亦只有上海嘅一半）。

有乜嘢較蚊年更重要？我老曹唔係叫各位變成拜金主義者。我老曹童年嘗過「枱上冇牛油」嘅日子（雖然不致冇麵包），明白「日做夜做才搵夠兩餐」嘅滋味，所以 絕唔會假裝「金錢唔重要」，亦唔鼓勵「知足常樂」嘅諗法。我老曹明白靈性生活好重要，但首先要衣食足然後知榮辱。今天中國政府開始強調環保、和諧社會，理 由係絕大部分中國人已達致溫飽。今天香港嘅貧富懸殊，唔再係貧無立錐之地，而係財富點樣更公平地分配。香港人均收入已達二萬七千美元一年，收入進一步上升 後又點？相信新增收入主要用於購買服裝、出外用膳、珠寶及名貴手表、旅行甚至藝術品身上……。事實上，90％以上香港人早已解決衣、食、住、行問題，所謂 貧窮只係相對性（因人家較自己富裕），而唔係欠缺基本生活條件，再唔係五、六十年代式貧窮（病咗冇錢睇醫生、白飯有得食但冇錢買餸）。今天人人希望賺多 D，目的唔係解決基本生活，而係提升自己生活質素，上述要求係推動整個社會發展嘅原動力，但不應向政府要求太多，而應該憑自己努力去達到。政府嘅責任係為 社會提供一個安全網（即人人基本生活唔欠缺），超過安全網以外嘅生活享受必須憑個人努力去爭取，1997年前打劫中產階級去補貼中下階層嘅做法已行唔通， 因為1997年7月主權回歸後整個香港中產階級80％人口已貧窮咗唔係富有咗。1997年7月主權回歸後嘅大風大浪，先有樓市回落期，再嚟一個TMT股泡 沫爆破，失業、離婚、陷入財困，令每年破產人數高達二萬。以本港一百萬中產階級家庭計，平均每年有2％中產階級破產，數字唔可以話細；反之，中下階層住响 公屋，既唔受樓價下跌影響，亦唔受TMT股泡沫爆破影響。

買樓唔一定發達

　　好多人以為買樓可以發達，事實並非如此。由1945至70年買樓，同期樓價只上升一倍（由每呎四十五元升至每呎一百元），平均每年上升3％。香港樓價 升幅最大係1970至97年，呢二十七年內樓價上升一百多倍，由一百元一呎升至1997年約一萬二千元一呎。第一潮由1970年升至81年，樓價由一百元 一呎升至一千一百元一呎，回落至1984年六百元一呎後，第二潮由1984年六百元一呎升至1997年8月一萬二千元一呎。1970至81年樓價上升十 倍，理由嚟自金錢購買力下跌，例如同期金價由四十五美元一盎斯升至1980年嘅八百五十美元一盎斯，上升十八倍，以金價計，本港樓價不但冇上升，反而回落 （1970年二百二十五両黃金換一間五百呎住宅，1980年一百一十八両黃金換一間五百呎住宅）。至於1984年起樓價上升，理由係利率回落，利率由 1981年二十厘半回落到2003年6月一厘，樓價由1984年6月起上升至1997年8月，升幅亦接近二十倍。至於2003年9月起樓價上升，係本港社 會走向兩極化，豪宅重返1997年水平，而中價樓只及1997年樓價嘅50％，至於往後本港樓價點睇則木宰羊。