1月7日，周日。上周五卡托研究所中國問題專家詹姆．多恩响「美國之音」廣播中，用「火山爆發」形容2006年中國股市。呢種股市所引發嘅「橫財」來得快去得更快，如不及時抽身，你嘅蚊年走得可能比來時更快！去年內地股市係咪一次火山爆發？只有時間老人才以可告訴大家。
MSCI新興市場指數上周跌2.1％，係去年9月以來首次回落。泰國SET指數急跌7.6％，成為亞太區表現最差嘅指數，相信同元旦炸彈事件有關；南 韓回落3.4％。全球最大礦務股BHP跌4.6％，淡水河谷（全球最大市值資源股）跌5.4％；江西銅業（358）呢隻中國最大嘅上市金屬股跌3.8％； 銅價上周大挫12％，至九個月內低價。日本最大石油及天然氣股Inpex跌6％，中石油（857）呢間中國最大嘅油公司跌5.1％，泰國最大能源公司 PTT 跌8.6％；原油上周回落7.6％，見五十六點三一美元一桶，係2005年4月以來最大跌幅。跌市中亦有大升股份，例如華晨汽車（1114）狂升22％， 收一元六角三仙，中芯國際（981）收一元一角五仙，升22％……。換言之，今年股市唔係冇得炒，只係大換馬。
汽車、電力及公路股抬頭
去年股市大贏家係揀股者，睇落今年亦一樣，玩揀股唔炒市。例如油價回落，汽車股受惠，如此類推。今年能源股同資源股睇跌，銀行股同保險股太Q，但汽車股、電力股及公路股股價紛紛抬頭，仍未到將蚊年存番入紅簿仔嘅時候。
內地A股進入調整期，本港H股無可避免受拖累。人行今年1月15日將加大存款準備金率0.5％，估計第二季人民幣再加息。中石油、國壽（2628）、 中移動（941）喺美國ADR上周五回落，上述股份周一在香港將面對下調壓力。恒生國企指數去年11月升14％、12月升21％，今年1月調整一下好正 常；反之，華晨汽車、中芯國際及華能國電（902）上周一樣逆市上升。喺「五行三保」下調中，一樣有唔少內地國企股可睇好。美林證券策略員Micheal Hartnett話，今天A股較其他新興市場股市高出38％，高盛證券叫各位响今年多Ｄ留意半導體股份，相信將可復甦。
今年能源及資源價格繼續睇跌，油價由去年7月七十八點五美元回落，威爾鑫投資研究中心楊易君話，未來幾個月油價可見五十二美元。代表十九隻商品嘅 CRB 指數上周跌5.3％（去年全年跌7.4％）；銀價上周跌4.7％、金價跌3％，連可可豆亦跌3.1％；上周CRB指數創去年5月以來最大跌幅（去年5月曾 出現一周下跌7.4％）。由去年5月11日高點365.45到上周五291.11，CRB商品指數响半年時間內跌幅達20％。美元12月份喺大部分人睇淡 聲中上升，美國人薪酬向上調整，足以讓消費者喺今年繼續消費，令GDP保持增長。白官估計，美國今年GDP升2.9％、明年升3.1％；OECD組織估 計，美國今年GDP升2.4％，明年升2.7％。美元上周兌歐羅出現去年6月以來最大升幅；不但係咁，美滙已進入第六星期上升，理由係分析界認為今年4月 前美國都唔會減息。上周美元升1.5％，見1.3美元兌1歐羅（最高見1.298美元），係去年11月24日以來最高。去年自美元結束加息後，兌歐羅曾跌 10％，12月就業數據理想令4月減息希望幻滅，令美元滙價急升。至於日圓，相信本月加息機會好大，上周日圓滙價冇進一步回落。
日本十年期債券回落，估計日本1月18日加息機會高達74％，南韓圜回落、新台幣、泰銖、菲律賓披索、印尼盾亦回落。美國就業數字良好，不但令今年上 半年減息機會冇咗；加上亞太區各央行收緊銀根（包括日本、中國同印度），股市面對一次較大幅度調整，亦喺估計之中。新興市場响美元弱勢下通常表現出色，例 如 2002至06年，主要理由係呢Ｄ國家或地區皆由出口帶動經濟繁榮，出口佔呢Ｄ國家或地區GDP 20％或以上，出口興旺帶來就業機會及收入上升，美元弱勢通常亦令呢Ｄ地區利率回落（或偏低），推動資產升值；反之，美元轉強（通常一年後），呢Ｄ地區嘅 經濟便進入回落期。技術上睇，2002年開始嘅美元回落期去年12月結束，中國政府正努力刺激內需，以便由內需逐步替代出口地位，保持經濟繁榮，至於能否 成功？目前難下判斷。
去年係黃金歲月，今年相信係經濟軟着陸期。美國同中國GDP增長率放緩，令去年下半年起睇淡資源及能源價格，今年相信將進一步回落。去年下半年睇好嘅 內地金融股（五行三保），今年則面對獲利回吐壓力。黃金歲月結束，取而代之係經濟軟着陸而非衰退。美國樓價一步步回軟，令美國第二大住宅按揭公司 Freddie Mac去年第三季虧損五億五千萬美元（2005年同期獲利八億八千萬美元），主因係長期利率去年第三季回落半厘，令利息收入大減。上述消息對滙控 （005）股價亦不利，因滙豐喺美國嘅樓按亦唔少。去年12月英國平均樓價回落1％（但全年較2005年上升9.9％），估計今年樓價升幅放緩，只上升 4％，因英倫銀行去年兩次加息及今年可能繼續加息。面對高利率及家庭財政壓力加大，將壓制房價上升，但GDP保持增長及就業率上升；加上缺少房源，令英國 樓價今年仍可上升。
2005年12月中國加入 WTO，至今已超過一周年。流動性資金過剩，推高內地樓價及股市。去年人行三次調高存款準備金，到底作用有幾多？大家心中有數。去年中國經濟兩極化，可以 講「熱嘅更熱、冷嘅更冷」。製造業面對產能過剩及內部消費熱唔起來，但內地同時出現資產升值潮、A股指數升幅超過100％。銅價去年5月起回落、油價去年 7月起下跌，反映中國製造業進入不景氣，但信貸擴張令人行今年1月15日再上調存款準備金0.5％，至9.5％（去年三次上調，令一千六百億元人民幣回 籠，仍無阻內地信貸繼續膨脹）。估計今年中國貿易順差達二千五百億美元或每月二百億美元，只憑上調存款準備金率0.5％，作用唔係咁大？即使加上「個人外 滙管理辦法」，個人可滙出外滙每次由二萬美元升至五萬美元，幫助又有幾大？甚至國家大購飛機，又可減少貿易順差幾多（內地航空公司早已面對飛機太多，獲利 能力存疑）？今年中國GDP增長估計9％、城鎮登記失業率估計2.5％。香港去年第二季GDP上升5.5％，第三季增長加快上升6.8％，主要來自內部需 求及內地經濟加快增長，估計第四季數字更高。今年香港市場流動性資金過剩嘅情況將漸消失。去年大量國企IPO後，已吸走香港唔少流動資金；加上估人民幣升 值，亦令唔少港元流向人民幣，因此今年本港GDP增長率肯定放緩，但失業率可進一步下降至4％。恒生指數理論上亦將面對一次較大調整。
美股今年展望先跌後升
道瓊斯交通平均指數由去年5月13日5013點起反覆回落，道瓊斯工業平均指數去年7月起卻上升，最高係今年1月3日嘅12580點；經歷長達八個月 嘅背馳，美股會否今年1月3日開始進入調整期？去年道瓊斯工業平均指數已上升16.3％。根據《商業周刊》數字，展望今年，美國企業純利只上升7％到 7.5％，如今年企業純利升幅只有單位數，O將回落（美國企業去年第一季純利上升19％，第二季上升18.5％，第三季上升30.6％，第四季純利升幅估 計只有8％）；一次中期調整隨時出現。今年美股展望先跌後升機會甚大。
美國紐約聯邦儲備銀行估計，去年全球石油美元總額達九千六百八十億美元，較2002年嘅三千億美元增長兩倍以上，估計有四分一回流美國，但更大筆油元 流向歐洲同中國，成為呢Ｄ地區資本市場升值下嘅得益者。隨着油價由七十八點四美元回落，估計今年石油美元流入歐洲及中國嘅數量將減少，而流向美國嘅油元因 為以購買債券為主，則唔會減少。
股聖畢非德話過：「要達到非凡回報，毋須非凡努力。」過去十年只要喺1997年上半年賣掉你嘅住宅、2000年唔跟別人炒科網股，改為揸黃金或資源 股，已達到畢非德嘅境界。1999年油價十美元一桶時冇人睇好，但去年7月有幾多所謂「大經紀行專家」睇油價可見一百美元一桶?!依家油價較去年7月已低 30％。當對沖基金唔再「對沖」，佢地便一如普通投資者一樣追求高回報率，結果亦犯上普通投資者相同錯誤：高追低沽。由於佢地涉及嘅金額巨大，形成股市短 期大幅波動。例如去年5月8日恒指由17328點回落至6月13日15204點，跌幅12.25％；去年炒聖誕節反彈，恒生指數由12月4日18587點 升至今年1月3日 20554點，上升10.58％。新年開始嘅獲利回吐潮，恒指短期跌幅有幾多？
去年12月4日開始炒「五行三保」，升幅之大令人咋舌。例如中國人壽由12月5日十八元四角五仙升至今年1月5日二十八元八角五仙，一個月內升 56.1％，正式「大笨象」會跳舞。上述股價長期可支持得住咩？炒上理由有：一、兩稅併軌，今年如立法通過，明年才實行，估計可令內地國企純利多6- 10％。二、人民幣升值，估計今年人民幣升幅約5％左右。三、基金年終粉飾窗櫥，踏入1月3日已完成。四、今年內地推出期指，令重磅股受惠。五、博呢類國 企股入恒生指數成分股。
五行三保難再炒上
「五行三保」經歷去年12月大升後，今年1月後表現又如何？擔心無以為繼。滙豐銀行經濟學家屈宏斌及德意志銀行首席中國經濟分析員馬駿都話，內地準備 金率上調，壓縮咗銀行嘅利率差，亦減少咗放貸資金，對銀行股有一Ｄ負面影響。雷曼兄弟經濟家孫明春及摩根大通經濟學家龔方雄估計，今年人行仲會三次上調準 備金，年底可能達11％，以控制信貸擴張，尤其係今年中國通脹率抬頭，估計年中CPI升幅可達3％，人行响今年第二季再加息零點二七厘機會好大。
去年人行兩度加息、三次調高存款準備金率、四次發行票據及公開加大市場操作力度，都未能控制信貸膨脹，今年又會點？外貿順差、人民幣升值速度太慢造成 嘅流動資金過剩，不但繼續推高樓價，去年更推高股市。喺外滙儲備打破一萬億美元嘅壓力下，銀行面對資金空前泛濫，如果唔借出去，只會白白損失利息；加上內 地金融股IPO後股東資金大增，借貸能力進一步加強，即使存款儲備金率上調至11％，相信仍無法阻止銀行過度借貸（唔信？可參考八十年代日本嘅例子及 1990至97年香港銀行嘅例子）。提升準備金率去限制信貸，有如杯水車薪。
馬駿話，內地徵收物業稅嘅政策快將出台，北京更首當其衝，估計稅率喺1％至3％之間。去年內地政府禁止公司喺住宅內辦公，令北京住房租金回落4％到 5％，一房一廳月租由二千五百至三千元，降至二千四百至二千八百五十元；兩房一廳月租由三千七百五十元，降至三千六百五十元；三房一廳跌幅最大，平均下跌 五百元一個月。房租下跌加上物業稅負擔，如銀行物業按揭利率再上調0.7％，至一厘，「以租養樓」嘅如意算盤便打唔響嘞。馬駿話，今年不但北京將最先實行 物業稅，廣州及南京等主要城市亦將推行。為進一步解決居住問題，內地限價商品房（類似本港居屋）今年响各大城市計劃增加興建，進一步增加供應量。今年上海 樓市估計走向買方市場。去年上海樓價開始調整，但業主堅拒唔賣，開發商唔降價。由於樓價唔跌，形成新政策大量出籠及落實，甚至直接插手監管；加上上海經過 一年唔賣情況下，存貨大量上升，隨着社保基金監管加強、銀行收緊房地產開發借貸嘅政策延續，今年上海開發商嘅資金鏈將面對嚴峻考驗，最後會否全線崩潰？走 着瞧。
電力股有機會成新領袖
股市調整並唔可怕。今年上半年「五行三保」估計進入調整期，同時電力股、高速公路股又接力。上周五內地股市，工商銀行、中國銀行一度跌停板，但華電及 國電漲停板。估計今年煤價小幅回落，為電力股提供有利環境。今年電力板塊有機會成為新領袖股。過去五年中國用電需求保持10％以上增長。去年1至10月全 國社會用電係二萬三千一百八十三億二千四百萬千瓦時，較2005年同期上升14.05％。其中工業用電係一萬七千二百零八億八千九百萬千瓦時，佔總數 74.23％，較2005年同期上升14.30％；輕、重工業用電量升幅分別為10.56％及15.22％。按「十一．五」規劃，未來五年中國GDP保持 8％增長，全國用電需求2007、08、09年估計增長分別12.9％、11.5％及9.9％。過去煤電聯動、競價上網及限制電價，對電力股純利構成負面 影響。家吓內地電力股O喺十三、十四倍左右，全球電力股O卻喺十五、十六倍，即內地電力股至少偏低20％，加上內地電力股未來幾年純利高速上升，O較外國 電力股高亦合理，加上明年兩稅併軌至25％，令內地電力股現價吸引力好大。此外，新年第一周，交通運輸股表現亦不俗，深圳高速（548）已連日大幅上漲。
沒有留言:
發佈留言