1月16日，周二。恒生指數跌40.61，收20027.95；成交五百零三億九千三百 多萬元。1月期指回落14點，收20046點。中海油（883）跌1.7％，報六元七角六仙；中石油（857）跌1.4％，報九元八角二仙；國泰航空 （293）跌2.4％，報二十元三角五仙，被花旗降低評級。新華社引述南方航空（1055）董事長劉紹勇嘅講話，去年南方航空已恢復獲利。創興銀行 （1111）否認進行任何被收購談判。
《紐約時報》報道，高盛改變GSCI指數成分比重，主要係能源所佔比重下降50％，睇嚟會對能源股有壓力。根據Bernstein Research報道，過去十二個月鑽探石油嘅鑽井增加64％，而過去二十四個月鑽探石油嘅鑽井增加194％，今年新增嘅鑽井約有一百六十個，未來原油供 應量肯定進一步上升。
北京滿城盡帶黃金甲
油價由去年8月七十八美元一桶，回落到今年1月五十二美元，跌幅約34％【圖】，再唔係類似2001年開始上升期中嘅調整，每次幅度都喺20-30％ 左右。石油牛市係咪已响去年8月結束？油價跌穿四十七美元嘅話才可確認。值得注意嘅係，全球有超過九千隻對沖基金，唔少都喺油市場有倉位，佢地睇好睇淡， 都會喺油市期貨引起短期大波動。相信油價喺五十美元左右有一番爭持，雖然油價由去年8月回落，但可以肯定「低價能源時代」早已結束，中國已將資源性產品價 格改革嘅着力點放喺電力、水、石油、煤炭及天然氣上，漸漸同國際接軌。內地油價與電價漸同國際接軌，但天然氣價格仲大大偏低，未來內地天然氣價格將進入大 幅上升期。市場化後嘅首次電煤訂貨會已近尾聲，合同總量達十二億噸。電煤價格普遍上升三十元一噸左右；鐵路運輸方面，1月18日前完成全部運力落實工作。 從呢點睇，今年中國內地電價上調幅度唔大。
玉米期貨受CBOT價大漲影響而進一步上升。玉米係養殖業中豬嘅飼料，睇嚟下一步輪到豬肉漲價。國際市場中，大米、小麥、玉米、大豆等糧食價格都上漲緊，對中國副食品售價影響係點仍未清楚。
2005年美國新增消費資金，88％來自借錢；去年美國新增消費資金，90％來自借錢。美國樓價已停止上升，美國人能否再借多三千億美元用作消費？去 年第四季美國物業銷售量較高峰期大約減少30％左右，根據歷史，响美國樓價見底期，物業銷售量較高峰期減62％，即美國樓價距離見底期仍遠。
去年10月起，中國全國儲蓄存款出現五年來首次下降，「股改、WTO、奧運效應」，連北京市郊嘅農民都曉講，依家北京市已係滿城盡帶黃金甲，炒股之風 吹遍全市。1月15日貴州茅台股價突破一百元大關，此乃五年內首次有股份股價超過一百元，上一次係2001年億安科技升上一百零九元後，中國股市牛市結 束。呢次貴州茅台股價打破一百元大關，各位又點睇？高盛估計，海外上市嘅中國股票今年有20％總回報率、內地A股總回報率為25％，並估計恒生國企指數年 底見 12000點、滬深三百指數可見2430點；該行睇好消費行業、互聯網╱傳媒品牌、金融服務供應商及房地產公司。
流動性資金過剩情況短期難以緩解。以上海為例，去年存款餘額二萬六千四百五十五億元，較2005年同期升13.4％；貸款餘額一萬八千六百零四億元， 只升10.6％，銀行體系內嘅流動資金過剩問題依然突出；加上產能過剩嘅資金減少流向新建及擴建產能，改為流向物業同股市。
趕住入市年息38厘亦唔理
根據《第一財經日報》報道，近日上海嘅當舖生意大旺！上海友邦典當嘅負責人話，唔少人攞屋契來典當，因為兩天內便可套現，月息三厘二；如借入四十萬元 以上，月息三厘。上海人已來不及將物業攞到銀行抵押（因為需時太久），改為攞去當舖，雖然支付月息三厘二亦唔理，理由係趕住將資金投入股市（月息三厘二， 即年息三十八厘，較銀行利率高好多）！亦有人攞汽車去典當，月息四厘，一般當舖只當車價三成！連上海當舖生意亦大旺，可見內地股票牛市嘅威力。
2006年係黃金歲月（Goldilocks），經濟環境已泡沫處處，例如美國樓市、金市、油價、藝術品及內地A股。出現泡沫後，未必會即時爆破（幾 時爆破冇人可事前知道）。展望2007年，經濟增長率放緩，投資市場玩緊rotating（輪流炒）。例如油價回落不利資源股，但同時令唔少行業受惠；銅 價回落不利江西銅業（358），但同時亦令唔少行業受惠……如此類推。今年中國GDP以年率9％速度上升，絕對唔算慢。中國同印度2007年繼續大量吸納 原材料，將之轉化為消費品，供應全世界，揀股高手今年繼續好恰皮！去年道指上升16％、恒生指數上升34％、內地A股上升130％，已話畀你知呢個世界係 點；資金泛濫所造成嘅資產升值，最狂熱係中國，其次係香港，喺美國因為市場大，反而唔覺得點樣。如果今年出現調整，幅度最大相信係中國A股市場，然後才係 恒生指數，最少係美國。今年資金會否回流美國？木宰羊。
資產泡沫初起之時，通常帶來無限樂趣；爆破之時，卻帶來無限苦楚。情況有如飲酒，淺嘗帶來樂趣，狂飲易失理智。點樣適量地飲酒？人人唔同。响今天投資 世界裏，便宜嘅東西已唔多，今年揀股專家唔易做，但唔代表冇賺錢機會。唔少中價股去年被忽略，今年出現較大升幅唔奇；更多細價股長期被忽略，依家仲好便 宜，部分今年可望有突出表現。作為分析員，依家既不應悲觀亦不宜樂觀，應將真實情況告訴大家，由投資者自行抉擇。
愛爾蘭、澳洲、西班牙，以及香港中價樓（唔包括豪宅）甚至美國樓價，去年已開始冷卻；不過，內地除上海樓價外，去年仍上升6至7％，南韓首爾樓價升幅 更高達19％。今年全球樓市點睇？喺OECD國家（包括香港），70％ GDP同消費有關，消費升降又受財富效應影響；財富效應主要來自房地產、股市及外滙，其中又以房地產影響最大。例如日本同德國自九十年代起樓價牛皮或回 落，令消費不前；香港1984至97年嘅經濟繁榮期及1997年8月至2003年上半年不景氣，亦由樓價升降決定。展望今年香港樓價相信以穩定為主，升降 幅度少於10％。調查所得，三十四歲或以下嘅香港年輕人大部分唔介意返內地發展。過去香港係「富人南下、窮人北上」，1997年後愈來愈多專業人士唔介意 北上，令香港整個中產階級人數比重在縮細中，造成1997年後本港中價樓失去支持者！
日本去年起面對人口減少，六十歲以上嘅人口更以每年一倍嘅速度增加，相信不久將來日本將失去世界第二大經濟體系地位。有人擔心日本將成為軍事強國，我 老曹則擔心日本唔夠老人院。俄羅斯亦唔樂觀，上一世紀兩場世界大戰，令俄羅斯人口減少30％；和平後人口回升，蘇聯解體後年輕人大量離開，老人問題迅速湧 現。普京雖然欲恢復俄羅斯嘅軍事力量，奈何缺乏年輕人當軍，因為近年人口已開始下降。今天開始預測香港人口下降似乎有D危言聳聽，近年如果冇每年三萬六千 多個中國新移民來港，香港人口早已負增長。新移民雖然可保持本港人口繼續上升，但香港中產階級人口自1997年後不斷流失。去年香港中位數收入雖然重返 1997年水平（二萬七千美元一年），但中產階級嘅財富早已面目全非。
今年深圳二手樓價估計繼續上升，一線樓價將突破九千元一平方米；受「90、70」規定影響，九十平方米以上嘅一手樓供應量更出現短缺。過去一季，廣州 及深圳樓30％以上由港人購買。美聯中國廣州區域董事劉志忠話，去年12月港人北上置業較2005年同期升20％，除博人民幣升值外，亦博內地樓價進一步 上升。
太古（019）去年喺房地產上投資九十六億元，其中八十三億元投向中國市場，其餘才係香港；主要投資嘅內地城市有北京同上海。
美聯集團（1200）主席黃建業話，集團响香港嘅分行約二百二十家，香港置業分行約七十三家；集團未來擴充將以內地業務為主。
梁兄哥做主席嘅DTZ控股公司計劃投資四億美元喺內地房地產行業，睇好嘅係上海及北京辦公房屋而非住宅。1993年梁兄哥離開仲量行，創立自己嘅房地 產諮詢公司；2000年1月與英國DTZ公司及新加坡戴玉祥房業諮詢公司合併為戴德梁行。去年12月14日與英國倫敦交易所上市嘅DTZ控股以互換股份及 現金支付方式重組，完成後梁兄哥佔DTZ控股公司4.61％，並出任該公司亞太區主席，協助DTZ集團拓展中國市場，希望兩年內成為全球最大嘅地產諮詢機 構之一。
泡沫市任何事都可發生
去年上海樓市出現「冰火兩重天」現象。住宅市場價格基本上穩定，但寫字樓租金卻大幅上升，商舖方面樓面面積供應量更大幅增加，去年12月底供應量達人 均兩平方米（香港依家係一點二平方米）。2005年內地宏調重點係住宅，形成資金大量湧入商業地產領域，令大批商業項目喺去年完成，去年第三季空置率由 2005年同期1.5％上升至6.4％；最高空置率係松江區，可出租商舖面積二百萬平方米，大約有一半租唔出去。去年海外資本到上海投資嘅，有三成投資喺 商業地產項目上，令依家上海市商舖總量達三千五百萬平方米。清華大學客座教授姜新國估計，未來五年上海商業樓嘅租金將下跌！
深圳寫字樓價已進入快速爬升期，近年售價以年均15％速度上升，中心區寫字樓成交價達一萬八千元人民幣一平方米。中心區寫字樓發展已進入尾聲，未來規 劃供應量只有八十萬平方米左右，其中五十萬供應量進入租賃市場，三十萬進入銷售市場。以去年消化量三十五萬平方米睇，估計明年深圳將進入寫字樓供應短缺 期。今年寫字樓售價進入迅速爬升期，租金已升至每月一百至一百四十元一平方米，高端項目預售均價喺二萬三千到三萬元！
2001年「九．一一慘劇」後，美元利率响三個月內由三厘半降至一厘七五，令美國經濟2002年復甦。由於擔心復甦基礎不穩，聯儲局2002年不但冇 停止減息，更喺2003年6月前將利率推低至一厘！反之，去年8月利率見五厘二五後，明知仍未能阻止通脹率上升，但已停止加息，避免經濟受太大壓力。去年 11月美元滙價跌至近十四年內新低（兌英鎊一度接近二美元），去年8月利率見五厘二五後，已令油價改變方向。不過，中國面對2008年北京奧運；加上銀行 同保險公司上市集資超過五百億美元，令中國金融機構借貸能力增加四千億美元，引發內地A股泡沫。面對泡沫市，任何事都可以發生。1973年我老曹首次面對 股市泡沫，當年決定離開股市去結婚，錯過三個月內恒生指數上升100％嘅機會，亦避過兩個月內恒生指數回落60％嘅噩夢，離開決定係啱係錯？至今仲未清 楚。1973年响短短半年內，眼見恒生指數由800點升至1774點，再跌回700點，幾多財富喺1973年上半年轉咗手？
估計今年上半年中，美國核心通脹率漸漸接近2％，美國或有減息機會。今年上半年內地A股又點？油價佔美國CPI 8％左右；油價由去年8月至今回落超過30％，可令美國核心通脹率响年中回落到2％或以下；如到時美國GDP增長率仍保持2.5％或以上嘅話，今年上半年 股市仍可睇好，但升幅應唔及去年，因今年企業純利升幅已大大放緩至單位數，令揀股更為困難。中國依家嘅矛盾在於：一方面老百姓存在住房上嘅巨大消費需求； 另一方面房價高企令負擔得起嘅購買住房者唔多，情況有如八十年代後期嘅香港。參考香港過去樓房發展史，可更加了解中國房地產嘅未來。相信未來二十五年中國 樓市大方向仍係向上，但升得急之時，出現20-25％或以上調整嘅機會亦好大。
今年春節來港自由行嘅人數估計再多兩成。唔少內地人已趁人民幣好價吸納港元，形成港元喺內地雖然價低，但需求好大，只有個體戶才唔收港元。春節來港嘅 機票及酒店已十分緊張，內地自由行（旅行社代安排：機票加三晚酒店）收費喺三千至四千元；如加迪士尼一晚住宿兼入場費，收費三千七百至四千五百元。香港酒 店春節期間冇漲價，但機票則加價五百元左右。
唔同行業各有分析技巧
我地係咪了解每一個行業？
一、製造業嘅利潤係原材料加工資，再加生財機器嘅折舊率；毛利率來自兩者差價（產品售價減原材料及工資）。影響利潤最大係工廠使用率，如60％開工率，工廠肯定蝕本、70％開工率可打和、80％開工率獲利、90％開工率純利急升。
二、零售業嘅利潤主要係入貨價同零售價之差。工資、舖租係固定成本，即利潤來自產品流轉速度，例如能否大量售出。存貨愈少，利潤愈好。
三、服務業（例如證券行、軟件編寫等）主要由行業盛衰決定。例如港交所（388）去年股價上升一倍，理由係去年證券業興旺，而非港交所職員較2005年勤力咗一倍。
四、Franchising。主要睇企業對品牌嘅品質及服務控制係咪成功。例如麥當勞就係最成功經營嘅franchising公司之一。本港唔少上市 公司近年喺內地亦做franchising，但至今成功嘅企業極少。思捷環球（330）係少數能保持品牌形象嘅企業之一，但市場喺歐洲，一旦品質及形象受 損，可連累整個franchising業務；又例如金利來（533）。近年成功嘅例子有大快活（052），透過將品質及形象重新提升為中產階級服務而令純 利大升，股價亦大幅回升。
五、收購合併。至今為止，香港嘅成功例子主要係銀行業，而其他行業只有利豐（494）等。一次成功嘅收購，可產生「一加一等於二點五」嘅效益；反之，一次壞嘅收購，可以係「木馬屠城記」（即引敵人入自己公司）。
唔同行業，需要嘅分析技巧亦唔同。分析唔係一般人想像咁簡單。
今年內地平板電視價格迅速下滑（去年液晶電視平均售價下跌30％以上），三十七吋或以上嘅大電視售價大幅下降，例如五十吋等離子電視平均售價已接近二萬五千元；反之，三十七吋或以下嘅電視，估計售價下降空間有限。
1992年微軟推出視窗3.1，到1995年才引起換電腦熱潮，高峰期係1998及99年，2000年開始冷卻。Vista 今年1月推出，它不但可以讓你喺電腦睇電視、控制室內所有電器，其中同Windows 3.1嘅最大分別係，你可以自己喺電腦上創造立體圖象版本，將電腦圖象由二度空間轉為三度空間（Three-dimensional moving versions of reality），令今天喺電腦上嘅所有圖象標準改變。過去只有IBM大型電腦才能做到嘅「立體移動畫象」，今年1月利用微軟Vista及新一代個人電腦 （裝上graphics-chip）都可以做到。另一個個人電腦換機熱潮好快出現，因此可重新睇好電腦生產股！
中國工商聯新能源商會發布《中國新能源產業年度報告》，預計2010年中國光伏發電產品產量可能突破一千兆瓦，成為世界上最大嘅光伏電池生產國。 2002年中國光伏組件產能不足三十兆瓦；2005年年底晶體硅、硅片、光伏電池產能分別達到二百兆瓦、二百四十三兆瓦及四百兆瓦；去年有D光伏生產企業 大量投資硅材料生產，响明年將形成一定規模生產能力，相信明年光伏發電產品總量將進入井噴。上述發電產品將用於大中城市嘅道路、公園、車站等公共照明系統 上。
藝術品投資市場變幻莫測，行情消長難料。古人有云：「暴雨不終朝」，2003到05年藝術品市場一路攀升，去年首季見頂，唔少巨頭（或稱莊家）將藝術 品市價一下子炒高咗，但呢種人為地將市場價格抬高，然後將手上存貨大量高價套現嘅行為卻唔成功。例如齊白石、黃賓虹、張大千等大畫家作品存世，唔少一下子 炒高後，便出現大量大畫家嘅作品湧出市場求售，形成有價無市，整個內地藝術品市場又再軟下來。
去年第四季溫州皮鞋出口歐盟三千一百四十一萬對，總值一億四千六百五十萬美元，兩者分別較第三季下跌32.63％及41.55％。面對歐盟反傾銷，中國皮鞋業出口去年第四季急降41.55％。
華寶國際（336）、中華藥業（8120）、首富國際（204）停牌。
■變靚D控股（8079）1月31日公布業績。
沒有留言:
發佈留言