A股狂潮無人能阻

　　12月27日，周三。恒生指數升405.21，收19725.73；成交四百八十四億七 千多萬元。恒指創新高但成交額背馳，代表股市仍在尋頂。作為投資者，旺市莫估頂，淡市莫估底；除咗放下「止蝕盤」保護既得利潤外，大家不妨讓利潤往前跑， 睇吓後市仲可升幾多。12月份升市已肯定，至於明年1月又點？今時今日只可見步行步。

內地新股民乏風險意識

　　今年恒生指數上升30％，80％投資者係賺錢嘅（20╱80理論），但呢80％賺錢者中，卻有95％回報率跑輸大市！理由係2006年股市同過去唔 同，進入炒股唔炒市期，升幅集中喺內地銀行股、保險股、鋼鐵股、水泥股、電訊股、造船股等；反之，醫藥股、本港零售股、建築股及部分工業股卻被邊緣化。

　　恒指雖然升30％，但倒跌嘅股份唔少。今年5月4日係港股出貨點，6月13日卻係港股入貨點。如估錯咗，今年投資成績肯定大打折扣；下半年如錯過內地國企股上升浪，回報率亦大受影響。

　　香港股市愈來愈國際化，基金參與度上升，散戶所佔比重日益下降（C組經紀佔成交金額漸少），形成二線股表現並唔出色。展望2007年，由於恒生指數已 創新高，散戶參與度提升，2007年二線股會否有較出色表現？連機構投資者亦被迫向二線股埋手，個別股份升降，可以同恒生指數完全背馳。

　　今年6月起，內地新開戶嘅股民數量大幅上升，呢批新投資者存在一定「盲目性」，好多連投資原則都唔識，情況有如1972至73年嘅香港或1986至 87 年期指剛推出、1996至97年嘅紅籌熱潮及1999至2000年嘅科網股！大量新股民加入股票市場，令股市出現短暫嘅非理性亢奮。新股民未有風險意識， 以為只要買入股票便可賺到盤滿缽滿，而唔明白20╱80理論。佢地帶住發財夢進入股市，自以為有畢非德一樣嘅身手，短期內盲拳又往往打死老師傅。初期老股 民以本身經歷規勸新股民唔好盲動，但因新股民人數眾多（股市短期係投票機器，長期才係評估機器），只要肯買嘅人多，股價即使幾唔合理亦可上升。漸漸新股民 唔再信老股民，變成股價由「新股民主導」。近期A股領導本港H股上升，就係基於上述理由。

　　港股最瘋狂一次係1972年5月至73年3月，恒生指數由400點升至1773點，升幅超過四倍，時間超過十個月。當年我老曹同森池兄喺1200點開 始睇淡，我老曹嘅老闆當年極度不滿，因此派一位唔識投資嘅人接管投資公司，由佢揸弗。公司喺恒指1300點時決定重返股票市場，眼見恒生指數3月9日直上 1774點，我老曹同森池兄成為全港最最斯人獨憔悴者。1973年3月9日後股市狂瀉，同年5月見600點，公司當時已陷入虧損，但係冇人肯止蝕。 1974年12月我老曹服務嘅投資公司宣布結業；我老曹响1974年8月恒生指數450點時入市，一樣損失慘重，兼初嘗失業滋味。從此我老曹離開投資公 司，並以寫文章為生，希望別人唔好再犯相同錯誤。

國企保險及銀行股成狂潮主題

　　1986年10月恒生指數打破上阻力1810點，理由係香港有咗恒指期貨，吸引大量新投資者入市，期指高水帶動套戥行為（拋空期指買入三十三隻成分股 賺差價），引發另一股市狂潮。恒指一直上升至1987年10月3968點，時間一年，升幅超過一倍。當大市開始回落時，李福兆宣布停市四天，令套戥行為無 法進行。復牌嗰日恒生指數直插落2000點，政府動用十九億元外滙基金救市，從事套戥者損失慘重（因部分期貨經紀行結業，無法套現）。狂潮來之時一如海嘯 無法阻止，退之時亦無法留住。

　　第三個狂潮係 1990年波斯灣戰爭，令美國經濟出現軟着陸而宣布減息，香港經濟因內地因素而過熱，本應加息。為阻止港元升值，香港進入負利率時代（即利率低於CPI增 長率），結果引發資產升值狂潮。恒生指數喺1992年再升穿4000點，至1997年16000多點，升幅四倍，時間共五年。

　　1999至2000年首季科網狂潮，比起以上三個大浪只係小兒科。呢次A股狂潮，起因係2002年1月起美元貶值，人民幣跟從，令資金首先湧入樓市， 受政府壓制；2006年開始湧入股市，引發呢次A股狂潮【圖】，交投大增。內地A股12月份打破2001年高點後，相信已無人能阻狂潮發生。

　　每一狂潮必有主題。1973年係置地及怡和做領袖股，1987年係期指，1997年係北控（392）及上海實業（363），2000年係電盈 （008）及中移動（941），今次係國企股中嘅保險股同銀行股。今天恒生指數已超越1997年16000多點，但北控擒日收市係十六元六角（1997年 高峰期六十五元）、上海實業成十六元三角四仙（1997年高峰期六十元）；今天電盈同2000年高峰比較，更係一個天一個地。狂潮有如海嘯，來之時氣勢滂 礴，退之後滿目瘡痍。呢次由內地保險A股同銀行A股所引發嘅狂潮，相信最後結果亦一樣。今天無人能阻止它上升，他日退潮留下嘅亦只係破壞。

　　不讓人民幣升值，令資金轉向房地產發洩。2005年3月26日「國八條」未能阻止樓價上升，今年5月17日推出「國六條」，6月1日起購買住房不足五 年轉手者抽營業稅；7月26日再抽個人住房轉換稅（樓價差20％），然後再推出限制外資購房及提升買樓首期，由樓價20％上升至樓價30％；近期再推出 90╱70方案（新建住房70％單位面積九十平方米以下）。今年除咗上海外，其他城市樓價仍然上升；唔單止咁，今年儲蓄存款開始流入股市，唔少新股民初嘗 甜頭後，漸漸引發A股上升狂潮。

　　利率、滙率、貨幣政策（例如銀行儲備金多少）乃調整經濟嘅工具，亦係聯滙制度（或掛鈎）嘅缺點所在。港元與美元聯滙嘅結果，不但港元滙價跟住美元升 降，同時令利率成為調節滙價而非經濟嘅工具。例如1990至93年港府為阻止港元升值，喺香港經濟過熱期減息，引發資產升值潮。資產價格由回報（例如租金 及股息）決定，回報高低又由銀行利率高低決定；如存款收息無法抵銷通脹率，資金便流向股票市場及物業市場尋求較高回報，引發資產升值潮。

　　我老曹首次感覺其威力係1988至89年嘅日本。G7廣場會議後，美國要求日圓大幅升值，日本政府為拖慢日圓升值速度而減息及濫發貨幣，令日經平均指 數及日本樓價狂升，所造成嘅破壞至今未能恢復。第二次係1990至97年嘅香港，今天恒生指數及豪宅價格雖然已超過1997年8月，但中價樓及下價樓同 1997年8月比較仲差40％或以上。十多年香港所經歷嘅Boom & Bust對全港中產階級所帶嚟嘅影響，已唔使我老曹覆述矣。

政府可藉機減持國有股

　　2002年美元進入貶值期，Boom & Bust喺中國重演，商品價格、物業價格成為先行者，2005年12月股市才加入。由於中國係外滙管制國家，相信所經歷嘅Boom & Bust應較日本同香港溫和。中國政府有日本及香港嘅例子，2005年3月起已壓制內地樓價，雖然未能阻止樓價進一步上升，但一連串宏調應可阻止未來樓價 大幅下調。至於股市，內地同日本及香港唔同，國企股60％或以上仍由政府擁有，正好利用呢次狂潮而減持，不但可增加市場流通量，同時可減少政府財政赤字， 並把呢次Boom & Bust威力大大縮細。

　　值得參考係1991年英鎊受索羅斯狙擊而脫離EMS（即歐羅前身），其後英國政府一連串措施，不但令倫敦保持國際金融中心地位（冇被日本東京取代）， 過去十五年精準而有效嘅貨幣及財政政策，更令英鎊地位不因歐羅出現而下沉，並取代日圓成為主要儲備貨幣。英國所提供嘅高附加值服務業，令英國經濟超越德 國，成為紐約以外世界第二大金融中心（而非法蘭克福）。過去十五年英國經濟成功證明浮動滙率機制較聯滙制度（或掛鈎）好；利率、滙率及貨幣政策只要運用得 宜，係可以避免經濟出現衰退（自格蛇1987年至今，亦成功阻止美國經濟出現衰退）。任何制度都有優點及缺點，兩害取其輕。1971年嘅浮動滙率機制至今 已三十五年，證明較固定滙率更好（背後要有一個獨立能力嘅中央銀行才可），美國同英國貨幣政策便是其中成功例子。

　　隨着如家、錦江酒店（2006）上市，內地經濟型酒店愈演愈烈。航天部中國空間研究院與中信集團攜手合作，成立「神舟商旅」酒店投資公司，2007年 將開放加盟，不但將空間研究院旗下旅館陸續改名為「神舟商旅」，更以上述品牌進行全國範圍大擴張；第一家喺北京共一百五十一間客房，營業額唔錯；第二間喺 上海共一百八十二間客房。神舟商旅英文名為「B & B inn」，即提供睡床及早餐服務嘅旅館，入住每晚收費一百七十八至二百八十八元人民幣。各旅館加盟費三十萬元，管理及經營權由神舟商旅公司執行，2007 年計劃增加十家。依家投資一家一百間客房嘅酒店要符合「錦江之星」之要求，約需資金一千萬元人民幣；如加盟「神舟商旅」，只需五百萬至六百萬元人民幣便 可，因空間研究院旗下唔少賓館透過翻新後，便可加盟「神舟商旅」，大大減低投資成本。國內大型國企旗下都有唔少賓館資產，通常係內部經營，不對外開放，冇 統一品牌；唔少旅館財政狀況不良，大部分係虧損經營。例如中國郵政部旗下二星級至五星級酒店約數百家待售，估計資產值近一百億元，適合投資者購買後加盟各 「經濟型酒店」集團。透過改善管理及品牌效應，達致「雙贏局面」，相信類似「錦江之星」嘅企業响內地將大量湧現，為從事內地商務者提供酒店以外嘅另類選 擇。喺美國及西歐，「B+B」旅館極之流行。各位自己諗吓，你入住酒店後，有冇用佢嘅會議室、泳池、健身室等設施？一般商務旅客需要嘅服務只係「B+B」 （睡床及早餐），相信呢類經濟型旅館喺中國亦大有可為（香港亦唔例外）。

自由行旅客趕來港大購奢侈品

　　財政部12月26日宣布明年1月1日起入境奢侈品進口稅大幅提高。2005年7月1日起旅客從境外（包括港、澳、台）帶回物品，總值超過五千元須抽 稅，包括電子產品、衣物、化妝品徵稅20％；煙、酒稅率50％（按發票抽，如冇發票由海關評估）；明年1月1日起，高爾夫及用品、高檔手表進口稅由10％ 加至 30％，化妝品由20％提升至50％。此舉會否影響自由行旅客來港購物，尤其係高檔手表及化妝品？內地人最近趁新稅制未實施前來港大購高檔消費品，所節省 嘅稅費已足夠支付旅費，形成呢個聖誕節滿街都係內地人。

　　明年1月1日起，不銹鋼錠及其初級產品、鎳初級加工品、未鍛軋錳、鉬、銻、銘等金屬，呢類生產能耗高、對環境影響大嘅產品，將新開徵出口關稅，以保護環境及加強能源節約，並縮減巨大貿易順差。

　　1990年代開始，中國沿海沿江地區掀起一股「石化」風。至今全國石化企業有二萬一千三百一十六家，其中近萬家喺長江沿岸一帶；沿江省市許多城市都將 石化工業列為重點產業去發展，唔少更成為地方經濟支柱，例如重慶利用天然氣資源、武漢依託葛化工集團，長壽、萬州、浴陵等打造天然氣化工及鹽氣化工……， 石化工業响中國已做到遍地開花！1999年中國石化工業廢水排放量佔中國工業廢水排放量32.3％，居第一位，氰化物、揮發酚、硫化物及砷等，將整條長江 污染咗大部分；加上大量小型石化企業及石化園出現，生產力並唔符合規模效益，令環保專家十分頭痛。唔少中小型石化企業所排放嘅廢物，實際上可作為另外一種 產品生產原料，但因為規模細、冇環環相連嘅工廠白白排放掉，既浪費資源又造成環境污染，兼且唔符合成本效益；唔似上海、浙江等大型石化企業有自己嘅水、 電、氣、能、路、通訊，甚至自己嘅網路、寬頻及終端污物處理，既環保又符合成本效益。明年排污費大幅上升後，中國石化工業汰弱留強開始，估計唔少中小型石 化企業將被淘汰出局。反而中石化（386）去年獲國家一百億元補貼，今年再獲五十億元補貼，其他大型國企亦獲類似補貼，競爭力進一步提升。一如其他行業， 喺政府留大汰小嘅政策下，中小型石化企業嘅未來生存空間好窄。2007年大型石化股喺國家扶持下仍可睇好，但中小型石化企業命運便令人擔心，投資石化股買 大唔買細。