12月21日，周四。恒生指數跌17.28，收19222.84；成交四百六十三億八千五百九十七萬元。12月期指跌44點，收19225點。青島市國資 委將青島啤酒（168）全部國家股份無償轉畀青啤集團，共涉及三萬九千九百八十二萬股，佔青島啤酒總股本30.56％，令青啤今天股價回落4.9％，報十 二元七角二仙；該股O已高達四十二點五倍，而恒生指數平均O只有十五倍，美林建議出售青啤，因O太高也。
港燈（006）宣布明年1月起電費加價2.5％（今年已加價7.2％，去年加價6.5％）；港燈今年股價跌2.7％，恒生指數同期上升29％；今天港 燈再跌0.9％，見三十七元三角五仙。中電（002）決定明年唔加價；今年中電股價上升26％，今天再升2.4％，見五十六元九角五仙。中電宣布唔加價反 而受投資者歡迎（因純利與電費加減無關），睇嚟港燈應該好好檢討一下發電效率嘅問題。
入股城市商銀陸續有來
重慶市商業銀行1996年由三十七個城市信用合作社合併而成，估計今年年底有三百六十億元資產、二百八十五億元存款，營業利潤五億元，明年將來港上 市，集資三十億元；凱雷集團宣布購入14％、大新金融（440）宣布入股11％。中國一百一十五個城市內嘅商業銀行，較國有大型銀行更缺乏競爭力，近期紛 紛招股增加集團資本及改善服務，相信上述事件陸續有來。
飛毛腿集團（1399）首天上牌，較招股價升51％，見三元零五仙；但陽光房地產基金（435）掛牌卻跌6.5％，收二元四角三仙，REITs吸引力已大不如前。內地鋼鐵股下跌，寶鋼跌4％、武鋼跌4.8％，理由昨天我老曹已報道，因政府下調鋼鐵半製成品出口退稅率。
香港11月份CPI上升2.2％（10月份升2％），其中食品價格上升3.7％，係二十個月來最大升幅，因中國進口香港嘅食品愈來愈貴；加上許多食品唔符合衞生標準而停止輸港，形成本港副食品價格大幅上升。食物開支佔港人總開支比重唔大，最受影響只係下層社會。
根據過去經驗，股市好少喺12月份出現大跌市。11月23日恒生指數見19404點後，大市便喺18600至19400點上落，直到明年1月才作決定 升降。雖然愈來愈多人加入睇淡行列，但真正沽貨者唔多，佢地如果唔係太早沽咗貨，就係根本上睇錯大市方向。11月起恒生指數與MACD背馳，根據歷史， MACD背馳有正面同負面兩種，例如今年5月嘅背馳曾引發拋售，但今年8月背馳卻冇問題；出現背馳代表買家後勁不繼。如賣家加把勁，可令股市下跌；反之， 如賣家唔進行攻擊，MACD背馳可以只係牛皮市，例如11月23日至今。買家走去炒國企股及申請新股，令恒指成分股買家後勁不繼，出現正面MACD背馳而 非負面MACD背馳機會好大，形成11月23日至今可做trading，例如跌市入貨、升市回吐（講就易做就難）。最常用嘅MACD係十二天與二十六天 線，近日十二天已重返二十六天之上，從呢點睇，經過一輪牛皮市後，明年1月股市再升機會十分大，因此不要加入拋售行列。VIX（Market Volatility Index）過去被視為走喺股市之前三十天，今年VIX創十四年新低，但股市至今遲遲未跌。瑞信銀行研究VIX嘅可信性，發現VIX預測股市準確性達 63％；家吓VIX低於一百八十六天移動平均線21％，係一個幾強烈嘅「小心」訊號。
利率方面，明年1月31日減息機會只有4％、3月21日減息機會14％、5月9日減息機會44％、6月28日減息機會80％，明年減息日子最快亦要喺 第二季。2004年6月30日開始嘅加息潮今年6月完成；減息可能由明年6月才開始，但減息空間好細，估計只有兩次，即聯邦基金利率由五厘二五減至四厘七 五，理由係明年美國面對勞工短缺問題，核心通脹率仍喺2％之上，唔會好似2001年1月至04年6月咁減成五厘半；加上長債息率較短息低半厘左右，減息相 信對長期利率冇影響，只係將孳息倒掛現象改為平息（即短期與長期利率一致）。從呢點睇，明年減息對投資市場刺激極之有限。
美國GDP增長率已由第一季嘅5.6％降至第三季嘅2.2％，主因係樓市放緩。踏入第四季，美國樓市已穩定下來，估計明年全年美國樓價相當穩定，冇大變化。基於上述假設，明年美國GDP增長率估計有2.6％，而唔係衰退。
香港2003年第二季開始嘅經濟復甦期，到今年第二季已差唔多進入高原期，即經濟仍保持繁榮，但唔再係向上升，而係有上有落，又或七上八落；唔同地區、唔同行業、唔同股份有唔同表現，投資者要問︰「What's up！」
有人擔心美國收支赤字令美元滙價轉弱。紐西蘭今年收支赤字接近GDP 10％，較美國嚴重許多，係OECD國家中最大，但紐元今年4月至今卻升15％！收支赤字接近GDP 10％亦唔影響紐元滙價，點解收支赤字接近GDP 7％嘅美國，美元滙價會受收支赤字影響？決定滙價主要因素係資金流向，唔係赤字。
外債唔影響滙價表現
至於外債，1979年鐵娘子取消英鎊嘅投資管制（Investment pool）後，過去二十六年英國外債增加咗二十倍！英鎊又點？過去十六年內，曾一度見1美元兌1英鎊的1993年，但依家1英鎊快值2美元矣。點解英國外 債狂升，英鎊滙價反而上升？其實所謂外債，只係英國人嘅海外投資。英國人喺海外賺到錢响英國消費，令英國經濟八十年代至今大部分日子皆保持繁榮，證明外債 唔影響英鎊滙價。
中國政府唔肯畀人民幣自由浮動，只係逐步取消出口產品退稅及大幅提升最低工資，此舉對境內製造業極之不利。中國政府希望內地廠商因此加強內銷及人民因 最低工資上升而增加消費，協助發展內銷市場，減少對出口市場嘅依賴。上述係新凱恩斯主義，同1970年尼克遜總統提出嘅「赤字預算案」效果接近，係政府對 經濟進行干預，事後一定有後遺症，情況有如香港政府响1990年拒絕港元升值一樣。「干預」乃所有政府都會做嘅事，問題只係多少之分，相較全世界，香港政 府係對經濟干預最少嘅政府矣，希望呢項優點長存！從二千年前羅馬帝國到十六世紀西班牙、法國、德國，到十九世紀英國、美國及二十世紀日本……。各國政府干 預經濟，最後皆付出更沉重代價，歷史已多不勝數，但係仍然無法阻止各國政府官員干預經濟。因為「干預」乃人類天性，「積極不干預」反而係後天學習嘅結果， 有時都幾無奈。
去年第四季貨櫃船租金開始回落，至今跌幅已達50％；反之，營運費卻上升，估計明年進入穩定期。但貨櫃船公司今年純利公布時，對股價仍有一定影響，未到可看好時刻。
另一令人擔心嘅行業係晶片生產。今年產能上升25％後，明年喺呢方面投資全球達四百二十一億美元，其中又以記憶晶片投資最多。明年電子產品需求會否一如今年一樣勁升？估計明年第二季晶片生產已面對供過於求。
香港零售方面，今年聖誕節相信係1997年回歸後最好嘅一年，不但港人消費上升，來自內地，例如深圳、廣州、上海、北京等大城市嘅居民亦來港掃貨，今 年名牌貨極度暢銷，但零售股又點？雖然營業額大升，但租金及薪金升幅唔細，意味零售股純利已見頂（炒股票係睇前景，唔係睇眼前）。
搵工居然要考酒量
REITs（Real-Estate Investment Trust）今年表現出色，尤其係領匯（823），但明年會否同樣出色？房地產嘅基本因素略為改善；加上資金出路有限，係今年推高REITs嘅理由。展望 明年，上述因素仍然存在，但相信房地產唔會進一步改善，令明年REITs上升空間有限，吸引力
遠遠唔及今年。
「你的酒量如何？」上述居然係北京及上海一些大公司面試嘅其中一個問題，部分更當場測試，要求應徵大學生當場飲一杯二鍋頭再問問題，有幾個大學生連飲 四、五杯一D事都冇，便當場錄用！搵工居然要考酒量，相信係中國特有！亦可以反映內地嘅問題：公司一有問題就搵高官飲酒食飯搞掂。希望內地飲酒文化適可而 止，不然真係失禮死人。
內地人做乜嘢也狂！今年股市大旺、樓價不前，唔少內地人開始賣樓去炒股票。從21世紀不動產嘅客戶資料睇，依家上海、北京、溫州等地唔少房主急於將自 己嘅房子變現，不惜售價比同區域同類型房子低5％至10％，條件係買家必須付全款，以便把資金投入股票市場，形成部分房子售價較市場低10％。上述情況更 向其他城市蔓延開去，相信好快形成潮流。中國投資者咁瘋狂，內地A股前景有D令人擔心【圖】！
中日之間經濟此消彼長，從澳洲遊客數字可見一二。日本遊客1996年見頂，共八十一萬三千人次，其後按年回落至今，日本遊客已減少17％；消費更由 2001年起回落，至今已減少25％或十億澳元。反之，中國遊客由1996年至今上升五倍，至二十九萬二千人，依家持續高速增長，相信有一天超過日本遊客 嘅數目及消費金額（今年約二十一億澳元，較2001年二十八億元大減）。影響最大係出售澳洲蛋白寶石（opal）嘅店舖，九十年代其門如市，買家以日本人 為主，今天生意最低限度跌咗一半。隨着日本經濟萎縮，各地日本遊客（包括香港）大減；反之，中國遊客喺世界各地卻高速增長！
喺股市內，炒短線不外「追、揸、沽」，似乎十分簡單。今年5月至今嘅客觀環境咁唔友善，往往可令炒友失去食午餐嘅興趣。短線炒作所產生嘅壓力，並非一 個未受培訓嘅普通散戶可以承受。為協助短線炒友，我老曹提供幾條禁忌，等各位靠鑊剷食飯嘅讀者遵守：一、唔好買入嗰D股價低於十天移動平均線5％嘅股份。 二、唔好買入表現唔及大市嘅弱勢股。換言之，只應追入嗰D喺十天移動平均數之上嘅股份，並以十天線做止蝕位。永遠只炒強勢股，除非技高人膽大，不然少涉足 低成交額嘅股份，呢類股份波幅往往十分大。炒股票不能只憑直覺，應建立一套方法（methodology），然後嚴格遵守。
年輕人致富之道係與父母同住。日本人1990年早已咁做；英國人隨着樓價上升，愈來愈多人與父母同住；甚至美國人一向崇尚獨立自主，亦愈來愈多人與父母 同住。與父母同住可節省租金（或供樓）資金！以香港為例，普通住宅單位每呎二十元計，每月可省回一萬元，仲有電費、水費、管理費開支亦唔細。換言之，與父 母同住者，平均每月可節省一萬五千元，一年十八萬元。大學畢業後與父母同住多五年，你已較其他人手上多咗一百萬元，如好好運用呢一百萬元，好易變成小富， 原來致富之道就係咁簡單！反之，大學畢業後便崇尚獨立自住，你便好難獲得第一桶金，冇第一個一百萬元協助，你嘅一生將好辛苦。大部分父母都唔介意子女與自 己同住多五年（包括婚後），通常有咗第一個孩子後才搬開，何況上述已係世界潮流。日本人早已咁做，英國人已經咁做，美國人亦咁樣做，香港人你有冇咁做？
財富無盡為善最樂
响世界標準人均收入三千美元一年之前，你嘅收入增加可令你更快樂；一旦超過此數，即使你嘅收入增加，快樂指數所受影響遞減。即係話年收入三十萬美元 者，未必較年收入三萬美元者更快樂。以日本人為例，今年肯定較1956年富有許多，但日本人快樂指數由1956年至今變化唔大；今年美國人亦唔見得較一百 年前更快樂。1977年Fred Hirsch寫咗一本書《The Social Limits to Growth》，佢認為人類一旦解決衣食住行，之後所追求嘅快樂係相對性。例如自己擁有嘅車較別人嘅車更豪華；自己子女進入名校而沾沾自喜，因只有10％ 港人子女可進入；或自己住嘅屋較普通人更豪……。為咗呢D抽象嘅東西，可令人類不斷追求甚至忍受因炒股票而帶來嘅壓力。值唔值得？古人有云：知足常樂。請 為自己所追求嘅東西設下底線，一旦達到便好好享受其成果，較永遠追求無窮無盡嘅財富來得更快樂。如能把自己賺回來嘅財富拿出一部分與人分享，你便更加快 樂，因為「為善最樂」！
我老曹唔認為炒股票有問題，只認為一切事物皆「適可而止」，千萬不可過猶不及。恒生指數响呢個水位，各位應該收斂一下自己嘅欲望，而非永遠追求無窮無 盡嘅財富。金錢令人富有同時獲得更大自由，但未必令人更快樂！快樂係另一回事，通常必須限制自己過分嘅欲望，以及學習同別人分享自己嘅財富，才能令自己更 快樂。在此願《信報》所有讀者聖誕皆快樂。
大新金融（440）、大新銀行（2356）、上海青浦消防（8115）、軟迅科技（8182）、龍昌（348）、德信科技（1228）、中新集團（563）、新時代集團（166）停牌。
海天國際（1882）、民安控新（1389）周五新上市。
沒有留言:
發佈留言