12月19日，周二。恒生指數跌228.36，收18964.55；成交五百四十四億四千五百多萬元。期指收18984點，跌238點。國壽（2628）一度跌6.6％，收市只跌2.9％，見二十二元零五仙，相信係過去三天上升20％所引發嘅獲利回吐。
新地（016）以十八億元購入山頂地皮，較分析界事前估計嘅十一億九千萬元多一大橛，即平均每呎樓面地價四萬二千一百四十九元，係1997年1月時嘅 一倍；今天新地股價跌1.7％，見八十七元八角。長實（001）跌1.3％，見九十一元三角五仙。中海油（883）跌1.4％，見六元八角五仙；中石油 （857）跌2.3％，見十元二角，因原油價回落1.9％，見六十二點二一美元。中電（002）跌2.6％，見五十四元八角。TOM在線（8282）升 14％，見一元七角二仙後停牌。中煤能源（1898）上牌後較招股價升13％，見四元五角六仙。
接近全民就業刺激薪金上升
泰國政府宣布流入泰國嘅外資如超過二萬美元，三成外滙必須留喺泰國一年，否則罰款10％，令泰國股市今天一度急瀉19％。印度股市亦跟隨下跌2.9％、雅加達股市回落2.9％，恒生指數亦跌1.2％，MSCI指數跌1.3％。
香港9至11月失業率只有4.4％，係2001年以來最低，估計仍會進一步下降，但學IQT好耐好耐以前話齋，重返1997年前只有2.2％嘅機會不復 存在矣。因為香港經濟結構已改變，呢類全民就業嘅情況香港唔會再出現。香港失業率跌至4.4％，已接近全民就業，開始刺激薪金大幅上升。
2003年4月開始嘅升市，到2006年11月23日後已係老牛！因此宜好好绩實，而非猜測2007年股市方向。至今為止，大市上升軌仍然良好，美元今年6月後已停止加息，未來三個月股市相信仍係反覆市而非回落市。
1929年至今七十七年，响12月13至31日，股市皆反覆上升，只有十三年係唔升，其餘六十四年皆上升。1934至53年呢二十年係年年皆升，平均 升幅3％。去年12月13至31日回落1.4％，2006年又如何？睇番過去歷史，12月13日至12月31日上升機會超過80％。睇好後市嘅投資顧問佔 59.8％、睇淡者佔23.9％，差唔多三比一。但道指10月至今同MACD已出現三浪背馳，美股進入夕陽無限好、只是近黃昏嘅階段。今天恒指下跌228 點，到底係另一次震盪抑或同11月23日嘅19404點形成下降軌？11月起恒生指數同RSI亦出現背馳，到12月港股傾向亂炒一通，長線投資者宜減持及 小心，恒指上升軌支持點18600點若失守，便加入睇淡行列。美沙關係倒退股市江河日下
每年最尾兩個月，美元滙價例淡，相信係受各國將資金滙回本國嘅影響。12月15日之後美元又轉強，相信今年亦唔例外。拋售美元賺錢嘅機會應係2002年，唔係2006年12月。
沙地阿拉伯股市今年4月至今大幅回落；周一沙地駐美國大使費薩爾親王辭職，理由係要多D時間陪家人喎……，令人擔心華盛頓與沙地皇朝嘅關係係咪在倒退 中！費薩爾去年6月接任駐美大使，理由係前駐美大使班德爾親王亦以私人理由離開美國，回國後出任沙地國家安全部長。該部門由近年繼位嘅阿卜杜拉國王新組 成，作為沙地政府嘅智囊團。反之費薩爾王子與阿卜杜拉一向面和心不和，更因為今夏以色列進軍黎巴嫩，阿卜杜拉派班德爾與以色列方面接觸，而雙方互有心病。
最近美國開始討論應否從伊拉克撤軍，令美沙關係進一步惡化。沙地皇朝過去一直依靠美國軍隊阻嚇伊朗軍事擴張，如美軍喺伊拉克駐軍，可令沙地十分安全；一旦 美國減少喺伊拉克嘅軍力，有可能令伊拉克境內嘅親伊朗力量增強，對沙地不利。今年11月阿卜杜拉訪美，同美國副總統切尼曾洽談此事，而身為駐美大使嘅費薩 爾當時卻缺席，可見雙方不和已表面化。最近切尼辭職，而沙地支持OPEC明年2月石油減產，再加上呢次沙地駐美大使換人，沙地與美國關係恐怕已陷入低潮。 費薩爾回國後與班德爾嘅不和會否進一步激化，而影響沙地皇朝嘅穩定性？其次，誰會替代費薩爾出任駐美大使？上述疑慮皆令沙地股市江河日下【圖】。
泰銖出現去年4月以來最大跌幅，因政府要求銀行將儲備金提升至30％，引發股市出現十六年來最大跌幅。泰銖今年上升14％，令泰國出口商壓力好大，並 要求政府協助。泰國軍政府決定打擊短期投機者，宣布今天開始投資泰國嘅外資只能收回70％，其餘30％存入銀行一年後才可收回。如流入資金少於十二個月便 撤走，上述30％資金中將有33％作為罰款，相等於變相抽稅10％！
日經平均指數今年5月起開始回落，印度股市今年12月亦跌穿上升軌；至於中國股市，短期仍然上升，但不穩定因素已在增加中。至今為止，我老曹仍相信美國 明年經濟會軟着陸，對於明年許多分析，都係建基於上述假設，但個別地區、個別行業、個別股份嘅升跌便難估計。上市嘅工業股、資源股及本港零售股，我老曹較 為睇淡，而內地金融股、保險股，卻似乎太貴。明年响股市搵食，必須學曉精挑細選，估計上升機會落喺二線股身上。
相信明年上半年利率回落機會唔大，因為美國經濟下調幅度極之有限；加上勞工市場緊絀，工資上升速度係近三年內最大，而勞工成本上升，大大影響核心指數。估計明年美國GDP增長率2.7％（今年估計增長3.3％），後市應該冇乜問題。
我老曹相信，美元回落期今年12月結束，明年上半年美滙變化唔大，因為減息心理一直影響美元滙價。
觀察2004年打後嘅恒生指數上升趨勢，一般只維持數月便調整。6月13日開始嘅上升估計於11月23日結束，調整完成後，才再形成另一上升軌。因為 2004年5月起港股已進入高啤打（beta）系數，走勢變成「行三步、扭兩扭，望吓前、望吓後」。中國進入工業產品通縮繁榮期
2003年第三季開始至今年第三季（香港第三季GDP上升6.8％），本港再次出現連續十二季上升，係1997年8月以後第一次有咁長日子嘅上升，證明香 港經濟已擺脫1997年8月嘅影響，呢次係復甦唔再係反彈。2003年5月開始至今，恒生指數走勢係一浪高於一浪，未有改變，每次回落只係因為股市偏高， 而非另一跌市開始。
明年嘅疑惑係今年5月及7月金屬及能源價格回落係咪中期調整？如係中期調整，唔排除明年進入另一上升周期。如今年5月及7月金屬及能源價格係見頂回 落，明年亦將見到金屬及能源價格大幅回落。金屬及能源價格由1980年起計經歷二十一年熊市，牛市2001年才開始，會否咁短命？如貝南奇嘅「目標通脹政 策」成功，恐怕呢次金屬及能源價格上升係短命牛市；反之，如明年金屬及能源價格重拾上升趨勢，代表貝南奇政策失敗。上述答案响明年才知道。
人生際遇，有時事後才知好壞。我老曹父親早死，1967年香港暴動，我老曹因家貧只有留喺香港，我老曹叔父便移民加拿大。結果我老曹經歷香港經濟三十年 黃金期（1967至97年）；反之，加拿大經濟一直都只係低增長。1997年亞洲金融風暴香港打擊唔細；反之，中國經濟由1998年起全面復甦，一次由出 口產品帶動嘅經濟繁榮期1998年開始，至今仍然不衰。中國係咪自1998年起進入黃金三十年，而香港1997年起卻進入類似加拿大式嘅GDP低增長期？ 1998年中國進入一次由生產力上升帶動嘅「工業產品通縮繁榮期」，例如今天汽車售價唔及1998年一半，令更多人可擁有汽車，汽車業因此出現一片繁榮； 上述情況喺電視機、電冰箱、空調亦出現。今天中國人喺衣、食、住、行方面，只餘下住嘅問題未解決！依家只有40％人口住喺市區（拉丁美洲係75％）； 2003年起內地房地產價格升完又升，如參考香港過去例子，中國房地產仍有二十年繁榮期，每一次樓價調整都係入市時機。
日本股市表現全球包尾
去年中國只有7％人口擁有銀行戶口（香港差唔多所有成年人都擁有），由此可見未來內地金融業發展有幾大！記得1968年我老曹為投資股票，好希望擁有 一個支票戶口。滙豐要有一位太平紳士介紹才可開戶、東亞銀行當年要求有舖保；永隆銀行好D，只要求我老曹五千元開戶，由此可見當年响香港地開一個私人支票 戶口幾咁困難（1968年五千元相等於普通打工仔二十個月薪金）。到咗1978年，申請信用卡必須符合第一個條件係年薪十五萬元（當年香港月入萬餘嘅人極 少），第二個條件係响銀行有存款超過一百萬元。我老曹兩個條件都唔符合，最後由一位銀行經理做我老曹私人擔保，才取得一張信用卡去美國！今天聽起來上述似 係天方夜譚，卻係我老曹親身經歷。今天內地情況又點？我老曹唔了解，相信同六、七十年代香港差唔多。
仲有旅遊業，OECD國家每年有25％人口每年旅遊一次，中國只有2％人口每年旅遊一次。估計未來二十年中國旅遊業嘅規模係依家十倍，為內地酒店業提供大量發展空間。
作為本欄長期讀者，應該知道由1990年起至今我老曹一直睇輕日本，1997年起我老曹亦開始睇輕香港；2002年至今一直睇重內地上市國企股。我老 曹認為，日本經濟已步入老年期，香港經濟已進入黃金歲月，只有中國經濟仍年輕力壯。日本股市唔係冇上升日子，但往往係最遲一個股市上升，亦係最早一個回 落。香港股市亦只能做到同世界同步升降，只有中國國企股別人未升佢先升，別人回落佢仲要再升多少。不過，新興市場亦有缺點，就係波幅通常好大，例如今天泰 國股市。
至今年11月底，股市表現最好係秘魯，第二係中國、第三係委內瑞拉……新加坡排第十九、香港排第二十四、英國排第二十八、台灣排第三十、加拿大第三十 一、美國第三十七、日本第四十（全球四十大股市中，日本排最尾！）。香港年輕一代，你地嘅將來唔喺美國、加拿大、澳洲及英國，而喺中國！八十年代香港廠商 北望神州，九十年代係香港房地產開始北上；踏入二十一世紀，係香港專業人士返回內地執業嘅日子。
1978年鄧小平提出改革開放政策，令中國共產黨採用資本主義制度去營運經濟，引發全球變天。今天除咗古巴及北韓仲實行共產主義制度外，連越南亦捨 棄，引發全球繁榮與興盛，亦令全世界政治趨向和平與穩定。共產主義國家及第三世界國家一個接一個加入自由經濟體系，令一個真正環球化嘅經濟體系在建立中。 發展過程當然一定經過強烈嘅反撲力（backlashes），每個國家嘅反撲力唔同，但大方向係全球經濟朝一個真正環球化嘅經濟走，最後全球經濟一定變得 較平衡。中國比較幸運係1980年興起之時，全球經濟由高通脹期走向低通脹期、由高利率期走向低利率期。近年非洲興起，係原材料價格進入上升周期……，二 十一世紀人類已天涯若毗鄰，新嘅合作出現，舊嘅壟斷一一被打破。人類自工業革命後，經濟向西方國家傾斜維持咗二百五十年；1978年鄧小平嘅改革開放政 策，引發全球經濟重新走向平衡。中國GDP由1978年佔全球GDP 4％到今年佔全球GDP 9％（工業革命前中國GDP佔全球GDP 36％），二十年後中國佔全球GDP 18％，十分合理，打破過去全球GDP由美國、日本及歐洲壟斷嘅局面。九十年代開始，日本同歐洲佔全球GDP嘅百分比在下降中，估計到二十一世紀連美國亦 唔例外。未來中國、印度同非洲佔全球GDP比重上升，上述才係大趨勢。
沒有留言:
發佈留言