當熱錢遇上冷鋒

　　12月13日，周三。恒生指數跌188.98，收18718.19；成交四百零七億五千 五百多萬元。12月期指跌198點，收18735點。中聯通（762）跌4.1％，收九元三角；中移動（941）跌2.9％，見六十一元一角五仙；網通 （906）跌1.7％，見十七元九角；受內地3G將發牌刺激，上述股份近月升幅唔細，出現獲利回吐好正常。UOB分析員認為，投資者漸漸意識到中國政府可 能唔會咁早發放3G牌照，上述股份早已炒過籠（根據外國及本港 3G表現，3G流動電話起步初期只會帶來虧損而非利潤）！

恒指下試50天線

　　中國鋁業（2600）跌3％，報六元零六仙，公司宣布以換股方式將內地兩家上市子公司山東鋁業及蘭州鋁業私有化，較兩公司收市價高出25％，涉及金額八十一億七千萬元人民幣。

　　林麥集團（915）宣布私有化，股價升11％，見一元零三仙。

　　恒生指數開始下試五十天移動平均線支持力【圖】，守得住仍可睇好；反之，一次較大幅度嘅調整短期內將出現。

　　人民幣上升，主要因為美國財長及代表團周四喺北京會晤中國官員。去年滙率改革以來人民幣升值5.7％，中國方面暗示每年升值5％已係中方可接受嘅極限，上述條件如不為美國方面接受，會否引發美國國會通過懲罰性關稅對付？

　　聯儲局公開市場委員會利率會議後，股票市場好友突然變得內向，引發港股上午一輪拋售；不過，上升軌支持點18500點未破，暫時有驚無險。11月23 日之後股市牛氣漸漸收斂，近日新股上市嘅走勢都係高開低收，代表資金後勁有D不繼，日後如有一兩隻新股上市跌破招股價，由6月14日開始嘅上升潮便正式結 束，進入一次中期調整。從嗰D高啤打系數（beta）股價表現睇，代表進取投機者（或投資者）戒心開始上升，依家好友只係輕傷未致重傷，相信舔完傷口上嘅 血絲，好快又再衝上去搏殺（直到18500點失守為止）。

明年出現1月效應機會大

　　今天港股表現一如天氣。熱錢（hot money）遇上冷鋒南下落咗一場雨，冷卻投資者嘅熱情，亦令恒生指數最低曾見18623點，由於18500點支持位未破，下午股市反彈，以18718點 收市，下跌188.98。今天落咗一場雨後，氣溫開始下降，聽講周日將跌至攝氏十二度；港股今天落咗一場雨後又會點？作為Momentum players，通常先行沽售再問理由，11月23日前我老曹已叫大家咁做，然後搵出價值投資者（value investors）喺邊個水平重返市場，5、6月份嗰次調整係恒指略破二百五十天線才完成。12月股市仍受獲利回吐籠罩，二線股有暗湧。

　　去年10月28日恒生指數由14189點起步上升，响今年5月8日嘅17328點結束，時間係六個月多DD，升幅22.12％。今年6月13日恒生指 數由15204點起步，會否止於11月23日嘅19404點？時間上已五個多月，升幅27.62％，雖然唔及去年10月28日至今年5月8日嗰次長，但升 幅已有過之而無不及。睇嚟大藍籌股上升軌已危在旦夕。傳統智慧，12月同1月係二線股跑贏大價股嘅日子，例如今年1月美國羅素二千指數（主要由細價股組 成）上升8.9％，上述情況明年1月會否重演？以羅素二千指數睇，最近剛升穿今年5月高位，技術上二線股仍可睇好。上一次二線股炒賣期由去年10月開始、 今年 5月結束，連升六個多月。呢次二線股炒賣期由8月才開始，至今只有四個多月，理論上12月同1月二線股仍可炒上，即明年出現1月效應機會好大。

發掘二線股力不到不為財

　　今年唔少二線股响一般人唔留意嘅情況下已上升唔少。例如聯洲國際（048）由年初一元五角升至近日四元，升幅166％，分析界仍繼續睇好後市。又例如 大快活（052）將快餐店「中產階級化」，呢個策略證明成功，股價升幅大於對手大家樂（341），但家吓面對租金上升及薪金上升壓力，相信明年表現唔及今 年。仲有更多二線股喺明年有上升潛力，有待分析界去發掘。呢類股份大經紀行推介唔多，理由只有一個，因賺唔到幾多佣金，因此必須自行發掘。力不到不為財。

　　投資講趨勢。趨勢形成時加入，趨勢完成便離開。二線股上升趨勢今年8、9月份才形成，依家仍在進行中，潮流不可抗。大部分互惠基金及對沖基金 經理都係趨勢追隨者，11月起開始減持大藍籌，加強二線股投資，形成恒生指數11月23日起開始回落。基金11月起開始鎖住大藍籌股利潤，轉向二線股搵機 會，點解錯過另一個獲利20％至30％機會？不要理會恒生指數，將注意力轉向二線股。適量地減持大藍籌股，將股票投資佔整個投資組合比重下降，但應撥少量 資金去炒賣二線股，賺取經濟上升周期中最後嘅忌廉（Cream），美股如此相信港股亦係咁。今年1至5月唔少投資者曾錯過升市中最後上升浪（雖然嚟得快去 得快，但好和味）。

　　呢次恒生指數由2003年5月開始嘅上升，我老曹一再強調呢回股市係玩「行業性盛衰」（sector rotation），而非全面上升。香港股市已變為綿綿不絕（secular）及周期性（cyclical），即升市變成一個浪接一個浪，每一個浪有唔同 行業及股份輪流做領袖。响呢類股市中，賺錢完全靠閣下嘅認知能力。請唔好再問「股市點睇？」，改為問「呢個浪炒邊類股份？」例如8至11月揸能源股者完全 落後大市；反之，航空股到航運股、鋼鐵股到水泥股卻跑贏大市。因為2003年5月開始嘅升市已同過去嘅升市唔同，唔再係牛市或熊市，而係一浪接一浪，每一 個浪由唔同行業、唔同股份做領袖，理由係太多世界級互惠基金及對沖基金來港投資，令香港股市國際化，令玩法亦國際化，唔再受牛熊框框所限制。　

　打高爾夫球有90％講心智，其餘10％才係體力，因此年長者通常較年輕者打得好。股市亦一樣，1973－74年我老曹擁有90％勇氣及10％智慧，結果 損失慘重；2005至06年我老曹勇氣只餘下10％，智慧則增加咗許多，明白Lose your head before you lose money（失去金錢之前，你首先失去理智）。老生常談：一、溝上唔溝落。如你手上嘅投資已略有損失，千萬不可加注。二、學習「無良」嘅外籍僱傭兵（只幫 打贏嗰邊去打仗），如趨勢向上便做好友，一旦趨勢向下便做淡友，唔好立場死硬。三、資本分兩種，有形嘅一種係金錢，無形嘅一種叫智慧。如你只擁有金錢而冇 智慧，遲早喺投資市場輸死；如你只擁有智慧而冇金錢，你只係一名好好嘅講者。成功投資者不但擁有金錢，同時擁有智慧，缺一不可。世上金錢易得，智慧難求。 四、唔好希望低價買入、高價賣出，上述方法冇人可以做得到，應該係「高價買入，低價賣出」！（高價係指股價由低位上升10％到15％之後，即寧買當頭起； 低價係指股價由高價回落10到15％之後，即賣出當頭跌嘅股份）。

股市應該鋤弱扶強

　　五、升市莫估頂，跌市勿猜底，因為你永遠唔知頂喺哪裏及底响何方。六、永遠買入強勢股、沽出弱勢股。喺股市中應鋤弱扶強，唔係鋤強扶弱。七、利用基本 因素去分析事物，利用技術分析去決定買賣時刻。八、盛衰循環乃不易道理，經濟周期進入興盛期，不妨大手D吸納；當經濟上升周期進入尾聲之時，小注可怡情。 九、了解群眾、追隨群眾，最終係同群眾對着幹。當群眾哭泣、上街抗議之時，乃入市時機；當群眾歡呼之時，乃出貨時機。當中區大塞車之時，亦係出貨好日子。 十、福無雙至，禍不單行。跌市來之時往往狂風掃落葉，唔會陰風細雨（It never rains but pour）！十一、止蝕要快（例如虧損10％或以上立即行動），有錢賺不妨滋油淡定慢慢來，賺盡佢，只有年輕人才慌死賺唔切。十二、紙上談兵易、行軍遣將 難。嗰D教你「如何賺取一億元」嘅書千祈唔好睇（通常都係紙上談兵）。

　　昨天我老曹剛好遇上一個人願意出一百萬元請森池兄教佢炒股票！森池兄微笑不語。能夠賺取超過一億元以上（應該係幾億元）嘅人，已經唔使再賺呢一百萬！ 森池兄所出嘅第一本書銷量已超過兩萬本，相信係全港金融分析書中最暢銷者（如你去年冇睇，今年喺股票市場肯定賺少許多）；近日再埋首寫第二本，明年出版， 到時肯定洛陽紙貴。森池兄肯寫書，反而應多謝我老曹，因為係我老曹游說佢唔好埋沒自己嘅分析能力。

　　畢非德、Mario Gobeli、林治三位投資界名人，皆喺年輕時已對投資着迷。老虎活士兩歲開始便接觸高爾夫球……。今年你送乜嘢畀仔女做聖誕禮物？最實際係教曉佢地對金 錢嘅正確態度。每天節省十元好好運用，三十年後係六百五十二萬二千五百二十元（以每年上升20％計），小小水滴真係可變成汪洋大海，小小沙粒組成神州大 地。一切從小做起！七歲開始教曉佢投資之道及世界第十一大奇迹（複利率），協助子女建立負責任嘅性格、對財富嘅靈敏觸覺。讓每一個孩子皆有權知道每天十元 並以年率20％增長，三十年後可變成六百五十多萬元嘅事實。如兩歲開始佢地嘅父母每天幫佢地儲起十元，到佢地三十二歲已擁有六百五十二萬元，而且喺財務問 題上絕對聰明！上述才係最佳嘅聖誕禮物，保證佢一生受用；而非過分滿足於物欲，咁做只會害咗佢一世。

　　中國每年有一百五十萬畝農地被城市化，2002年至今中國5％農地消失，更多農民變成冇技術嘅工人，即耕田嘅人少咗、食飯嘅人多咗，下一潮係咪輪到農 產品漲價？農產品漲跌極之受天氣影響，唔似工業原材料有趨勢可跟。但以中國每年流失一百五十萬畝農地嘅速度去減少可耕地，或遲或早引發全球農產品漲潮卻可 以預卜。

　　改革開放政策最初幾年，農民係受惠者；自1982年國家政策傾向支持工業而非農業後，內地農民成為改革開放政策下嘅落後者。城市人均收入過去二十年以 雙位數速度上升，農民收入升幅卻有限，形成農民流向城市搵出路。工業化所帶來嘅污染問題更影響農民收入，城市化令佢地失去可耕地，農民對改革開放政策漸由 支持變成不滿，抱怨政府冇好好照顧佢地。隨着農民減少及可耕地流失，最終中國會否引發一次農品漲價潮？一個十三億人口嘅國家，如10％食物依賴入口，可令 全球農產品價格翻天覆地。何況2002至 06年人民幣跟隨美元貶值，令內地農產品價格相對其他國家大大偏低。最近為阻止食物價格上升，政府已大開糧倉去壓抑食物上升……。2007年都係小心D 好。

伊朗成中國汽車出口市場

　　明年8月起伊朗街道嘅計程車（的士）將全部採用中國東風汽車生產嘅得利卡汽車，共八千部，由伊朗政府訂下2007－08年計程車置換計劃，取代街頭嘅 「老爺車」，呢D車大部分車齡喺二十五年以上，有D更高過四十年，造成嚴重空氣污染及用油量大（由政府提供補貼）。家吓嘅計程車由伊朗自己設計，發動機由 法國入口。中國奇瑞集團今年9月與伊朗最大汽車集團霍德羅集團合資興建組裝廠，生產三萬輛奇瑞A15型車，售價每輛六千美元。2003年5月一汽集團與伊 朗伊斯法罕建立年產五萬輛轎車嘅生產線，2004年7月中國東風向伊朗出口商用車四百輛。今年中國汽車進入伊朗嘅數目已大幅上升，唔少人相信伊朗將成為中 國汽車另一出口市場。

　　大摩前亞太區首席經濟師謝國忠响「財經年會2007」估計，明年中國房價將進入調整期，2008或09年才進入谷底。不過，渣打直接投資董事總經理陳 凡唔同意，認為中國房產格價仍將保持上升，因2003年起出口以逾30%速度上升，資金大量湧入中國，令銀行存款以15－20%速度上升。中國人害怕投資 股市，形成大量資金湧入樓市。兩種睇法完全相反，各位點睇？