銅價表現令人擔心

　　12月18日，周一。恒生指數升82.26，收19192.91；成交四百九十二億一千三百七十八萬五千元。期指升103點，收19222點。新股熱潮仍未冷卻

　　蒙牛（2319）今年股價升幅已超過一倍，今天停牌，宣布與全球最大優酪乳生產公司達能建立合資公司，達能佔49％股權，發展中國奶粉及其他乳產品業 務。建行（939）呢間中國第四大銀行股價升1.4％，見四元三角三仙；工商銀行（1398）升2.7％，見四元二角六仙；中國銀行（3988）升 1.9％，見三元八角四仙。國壽（2628）升10％．見二十二元七角五仙；平安保險（2318）升9.2％，見三十六元一角；國壽獲批喺內地發行A股。 網通（906）出現獲利回吐，跌1.9％，見十八元八角；廣深鐵路（525）升3.3％，見四元四角四仙，理由亦係發行A股。新上板嘅安莉芳（1388） 較招股價升41％，見五元一角，證明新股熱潮仍未冷卻。

　　遠東發展（035）以三千七百八十萬美元出售美國一批寫字樓物業部分權益畀鄭家純，估計獲利二億二千五百三十萬元，目的係精簡公司業務。近年遠展減持海外物業，集中力量喺澳門及中國內地房地產，策略運用上正確。

　　2007年經濟展望：世界經濟繼續快速增長，但主要國家貨幣政策保持緊縮！美國GDP增長率由今年第一季5.6％下降至第三季2.2％，相信第四季反 彈；歐羅區GDP第三季增長率只有0.8％；英國第三季GDP增長率2.8％，已高於第二季2.6％；日本第三季GDP增長率0.4％，亦較第二季 0.2％為高。

　　貨幣方面，美國6月29日利率升至五厘二五後一直維持；歐羅區12月份加息至三厘半，明年仲會加息；英國利率喺8月3日加息至四厘七五後，加息周期並 未結束；日本7月14日將利率推高至四分一厘後，估計明年第一季再加息四分一厘。2007年投資策略就係喺銀根稍緊而世界經濟保持較快增長下找尋獲利項目 去投資，難度較2006年高。

　　隨着中國經濟對外貿易快速增長，石油、鐵礦石、煤炭、糧食等物資海運量及集裝箱貨運量高速增長，但中國運力卻嚴重不足。以石油為例，只有15％進口石 油係國內船隊承擔（日本係80％），未來中國航運公司必須大量添置船隻以應付未來需求。「十一．五」期間國家將大力支持國內造船業，形成今年造船股股價大 幅上升。中國造船產能由2000年五百萬噸提升到去年一千二百萬噸，並成功進入大型液化天然氣船市場；「十一．五」期間中國造船業肯定一片興旺，因造船股 今年股價上升唔少，明年可否繼續投資？我老曹木宰羊。

化纖產品有跌價壓力

　　上周半光聚酯切片價格回落，半光長線級聚酯切片報價一萬零四百五十至一萬零五百元一噸；江浙一帶成交價一萬零三百五十至一萬零四百元一噸，最低曾見一 萬零三百元一噸。上周有光長線大小聚酯切片價格亦下跌，江浙一帶報價一萬零六百至一萬零七百元（三個月內交貨），成交價一萬零四百至一萬零五百元；陽離子 切片成一萬一千二百至一萬一千三百元（三至六個月交貨）；連續聚合和間歇聚合切片成交價一萬一千一百至一萬一千三百元（三至六個月交貨）。其他如切片絲 POY75D、100D及150D分別成一萬一千八百元、一萬一千六百元及一萬一千四百元；加上企業庫存壓力唔細，睇嚟聚酯切片價格仍有下跌空間。至於 PTA產品報價九百一十美元一噸，但有消息話供應商喺八百八十美元一噸都肯賣，因為現貨只售八百七十美元一噸。

　　寧波三菱年產六十萬噸一年PTA裝置12月8日投產，而且前期停產維修嘅項目亦復產，皆對PTA不利；加上紡織品市場進入淡季，PTA行情回暖乏力。至於MEG產品亦難獨善其身，往後睇化纖產品仍有下跌壓力。

　　金屬價經過五年狂升，冇人相信明年仍可保持過去五年每年平均升幅，雖然商品大王羅杰斯一再強調商品牛市唔會咁短癮。繼糖價回落後，銅價表現亦令人擔 心，今年5月銅價由四美元一磅一直回落到近期三美元【圖】。ABN荷銀金屬分析員Nick Moore估計，銅由今年供應短缺五萬噸改為明年供應過剩十萬噸，估計價格將由依家三點〇一美元回落到明年二點六一美元，2008年甚至見二點一美元。該 行對鋁同樣睇淡，估計明年供過於求十五萬噸；鉛及鋅甚至鎳亦進入供過於求期。ABN荷銀認為，明年及2008年全球金屬供過於求，礦務股今年5月以後吸引 力在下降中。日本第二大貿易公司Mitsui Bussan Commodities Ltd.主席Mo Ahmadzadeh亦擔心明年金屬價格易跌難升，唔同意羅杰斯認為短期回落係吸納時機嘅分析。中國第三季GDP增長率10.4％，已較第二季11.3％ 放緩，相信明年增長率進一步放緩；加上金屬價格已連升五年，明年底進入調整期。今年用於金屬勘探嘅投資較去年上升47％，達七十一億三千萬美元，將令未來 金屬供應量重返回升期。喺美國，一間房屋興建平均用銅四百三十九磅，而美國房屋興建今年第二季起放緩。鋅主要用於鋼鐵防銹方面，估計價格上升空間亦有限。

　　明年油價展望，喺全球對石油按年率3％上升嘅環境下，明年油價最大可能性係响五十至七十美元上落，並有機會轉為响六十至八十美元（如有政治因素涉及在 內）。新科技深海採油技術將令石油供應上升，但開採成本最少上升25％；至於油砂亦令石油供應量倍增。種種因素將令油價喺五十至七十美元之間穩定下來（大 部分時間係六十美元），見四十美元一桶嘅機會漸漸唔存在，反而擔心未來油價喺六十至八十美元之間浮動。

電子產品年半便「一代」

　　明年比較令人擔心係內地製造業。一間工廠60％使用率同90％使用率基本開支相差唔大（除咗原材料及增加多一D人手外），但60％使用率令工廠陷入虧 損，90％使用率工廠便賺大錢。明年內地工廠面對使用率下降問題。當然，唔同行業、唔同工廠，情況亦不盡相同，明年大趨勢對製造業仍然不利。例如手機生 產，近期流行薄如朱古力嘅手機，生產呢類超薄型手機可賺大錢，但生產傳統較厚型手機便面對激烈競爭。相機亦一樣，最近新款1.3 megapixel及附有數碼自動快速對焦者大行其道，令型號唔夠新嘅同類數碼相機大受威脅。遊戲機方面，3D遊戲機圖像質素一流者已雄霸市場；最新 iPod晒士亦只有信用卡咁大，卻可載超過一千首歌！今天做電子產品生產必須追趕潮流，較炒股票更難。近年電子產品壽命周期愈來愈短，去年熱賣嘅產品今年 可能已經過時。例如最近3G手機發展神速，引入WiMax寬頻，令3G手機成為一個無線收發站，差唔多所有無線電子產品功能都包括喺一部3G手機內，而體 積漸漸接近一塊朱古力咁薄，同時售價大幅下降。今天做電子產品嘅工廠應變能力差唔多每十八個月便係「一代」，咁快速嘅轉變，有幾多工廠跟得上？

　　上海今年GDP將首次突破一萬億元人民幣，實現連續十五年雙位數增長！今年首十一個月第三產業已佔全市GDP 50％以上，消費品零售總額首次超過投資增幅。國際金融中心、航運中心建設捷報頻傳，洋山港二期工程完工啟用，令集裝箱吞吐量突破二千萬標準箱，估計全年 達二千一百萬標準箱。上市公司市值超過五萬億元人民幣，縮小與亞洲區其他金融中心例如香港嘅差距。其他先進製造業如轎車、發電機組、四十七吋高清電視液晶 屏等，都在快速發展。拉動上海經濟發展「三頭馬車」：航運、金融及先進製造業都急速發展，令上海GDP保持雙位數年率速度上升。上海追得香港好緊噃！

　　內地買賣二手房，要繳邊D稅？一、營業稅，係轉手房價5％（持有超過五年免交）。二、城市建設維持稅，市區稅率7％；縣城、鄉鎮稅率5％；其他地區 1％。三、教育費附加稅，稅率3％。四、印花稅，樓價萬分之五，由買賣雙方共同繳納。五、土地增值稅，係轉手房所取得增值差價，稅率由30％到60％，分 四級超率累進稅率。六、個人所得稅，按樓房轉手價值減除樓房原值及其他費用後嘅餘額徵收，稅率20％；如不能準確計算房屋原值者，按轉售收入1％繳納；如 果係家庭唯一住房及住滿五年後才出售者免交；出售後一年內重新購入新房子者亦可免交。七、契稅，係成交價3％（如自用減半，如果係房改房及經濟適用房按 0.75％徵收）。換言之，喺內地買賣二手房（擁有少於五年），費用係成交樓價嘅18％，另加所獲利潤30％至60％；如果係個人，再加所獲利潤20％。 假設內地樓價五年內升幅不足25％，扣除各項稅項開支後仍然冇錢賺，除非樓價升幅達到100％才有可觀利潤。至於內地樓價能否喺五年內上升100％？我老 曹木宰羊。喺內地炒樓唔易賺到錢，理由係稅費太重。

　　中國建設部副部長劉志峰透露，建設部、國稅總局、財政部喺研究徵收住房保有環節稅費，向面積偏大嘅房子收取一定費用，鼓勵購買中小戶型住宅，引導合理住房消費。就好似汽車一樣，大戶型住宅要負擔多D。

　　中國四十個重點城市住宅，平均套型面積為一百一十三平方米，其中十六個城市超過一百二十平方米，北京待售住宅平均套型面積已達一百四十三點九平方米。 呢種「超大建設、超前消費」嘅現狀唔值得鼓勵。中國住宅主導型應該喺九十平方米以下嘅中小戶型，依家宏調政策要求70％新建房屋在九十平方米以下，係符合 國情。國家將用稅收、土地、金融等政策鼓勵中小型住宅開發，限制大型住宅建設，並計劃向大型住宅抽「住房保有環節稅」。

對沖基金回報未必出色

　　年底又到咗交功課時刻。唔少人以為由大證券公司管理嘅對沖基金今年表現出色，答案剛剛相反。根據芝加哥Hedge Fund Research Inc.統計，今年首十個月美國對沖基金平均回報率只有6.5％，由大證券行管理收取資產總值2％及分純利20％嘅對沖基金，則連6.5％回報都冇，再一 次證明機構投資者投資水平唔見得特別出色，賺大錢係證券公司內嘅職員，唔係對沖基金投資者！有人質疑投資者應否付出資產2％作為管理費及將純利20％畀證 券公司做花紅，而只賺取6.5％回報率（存九十天國庫券回報率已經五厘二五，而且無風無險）。我老曹再一次強調，投資市場只有贏家同輸家，冇大戶散戶之 分。無論大戶或散戶，如不嚴守紀律，一樣可以成為輸家；小投資者只要嚴守紀律，表現往往較大證券公司更出色。各位仲有冇興趣留意所謂「大戶動態」？大戶今 年只有6.5％回報率咋！

　　新宇國際（8068）股份合併。

　　南車時代電氣（3898）新上市。　　上海策略置地（164）、泛海酒店（292）、麗星郵輪（678）、英發國際（439）、蒙牛乳業（2319）、大中華實業（431）停牌。