內地股市開始瘋狂

　　 12月20日，周三。恒生指數升275.57，收19240.12；成交五百三十五億三千九百五十五萬元。12月期指高水，升288點，見19269點。

　　今天中聯通（762）升5.8％，見十元三角六仙，係2001年8月17日以來最高。港交所（388）升4.9％，見七十七元八角五仙，係2000年 6 月27日以來最高。新上市嘅株洲南車（3898）較招股價上升74％，見九元二角一仙。青島啤酒（168）升21％，見十三元三角八仙。大唐發電 （991）升9.5％，見七元九角二仙，因A股响上海掛牌上升79％。內地股市收市指數創歷史新高，大唐發電A股上牌升71％，收十一元四角一分人民幣 （香港H股收七元九角二仙），可用「瘋狂」兩個字形容內地股票市場；上述瘋狂情況到底可維持幾耐便木宰羊；不過，本港H股則受A股狂升所刺激。依家內地股 市進入上帝要佢滅亡、必先令佢瘋狂嘅時期。

資金市難估何時見頂

　　上證綜合指數由2001年6月14日2341.02，跌至去年6月6日1047.65，終於喺本周打破2001年6月高點【圖】，今天以2495點收 市，創下歷史新高。四年熊市，响過去十八個月內完全收復失地！今年上海及深圳股市成為全球表現最出色嘅世界主要股市之一，兩市總值已達一萬億美元，直追香 港。中國股市1990年才恢復交易，上證指數喺頭三年暴漲六倍，其後上市公司急於「圈錢」，形成價格操縱及其他醜聞屢屢傳出，到2001年投資者對股市完 全失去信心，引發全面退出。去年5月監管部門宣布股權分置改革計劃，以解決大量非流通股嘅問題（中國上市公司股票中，有三分二係國有股票，不得進入市場交 易，形成上市公司對少數股東利益置若罔聞）。新政策出台後，國有大股東將部分股票分畀小股東交換股票全流通，今後國有股亦可以喺市場上出售，但有禁售期， 以免國有股份一下子流入市場。至家吓為止，約90％上市公司已完成股權分置改革，亦令小投資者重返股票市場（今年11月止新開交易賬戶達三百三十萬）。

　　經過十八個月升市，內地股市平均市盈率已達二十三倍（港股十五點五倍）；雖然進行咗股權分置改革，但仍有半數以上股票由政府控制，並可喺禁售期完畢後 隨時推出市場。去年6月6日至今，上證綜合指數升幅達138％，根據中國證監會資料，9月30日止中國有七千六百萬家庭投資股票，佔中國總人口5％；而個 人儲蓄存款至今年9月止減少七十六億元人民幣，證明今年中國有大量散戶入市。以O計，內地A股又一次進入過熱期，今年下半年打後，以接近火箭速度上升，上 述升幅只有喺牛市第三期才出現，但今年下半年已喺國內重現。呢類資金市事前好難估計何時見頂，例如1973年香港恒生指數曾見過一百倍以上O後，股市才崩 潰。從內地近日股市表現睇，雖然中國恢復股票交易十六年，但市場仍然極唔成熟。呢類股市因投資者投入資金或出售股票影響供求改變，而出現大升或大跌市。

泰國將減息令銖滙回落

　　周二道指升至新高，抵銷泰國周二股市大跌嘅影響，令今天恒生指數上升275.57，收19240.12。至今為止，每次大市出現較大幅回落便吸納嘅 話，仍然可賺到錢，代表恒生指數上升趨勢仍未改變。大市雖然已進入尋頂期，尋頂可以係一星期、一個月甚至一季，而12月13日至31日係傳統易升難跌嘅日 子，唔排除11月23日開始嘅尋頂日子一直維持落去。响一個基礎因素證明股市已偏高及技術上超買嘅環境下，股市繼續保持高位上落，偶然出現技術震盪在所難 免。今天泰國SET指數上升11％，見691.55，係1998年2月2日以來最大升幅；周二跌幅15％，令泰國股市失去二百三十億美元市值，理由係外資 拋售六億九千九百萬美元股票（約值二百五十一億泰銖），係1999年1月4日以來最大嘅一次拋售。今年泰銖升值16％，令泰國出口商面對極大壓力。海外投 資者喺10月及11月只購入八千八百萬美元泰國股票（三十一億三千萬泰銖），並非令泰銖升值嘅理由，泰銖自去年12月13日至今維持利率响五厘才係底因， 相信未來泰國將減息令泰銖回落，到時泰國股市或可進一步上升。

　　歐洲央行主席宣布明年將繼續加息，因為歐洲通脹率仍在上升，令歐羅回升至156.18日圓嘅新高、兌美元見1.3232美元。12月7日歐羅利率見三厘半（本年內第六次加息），仍未能令通脹率低於2％。為壓抑明年CPI進一步上升，歐洲好快出現另一次加息。

　　喺經濟環球化壓力下，冇一個國家希望自己嘅貨幣出現強勢，引發泰國央行做咗一樁傻事，亦可反映市場情緒對股市短期波幅影響有幾大。香港1987年10 月股災，都係情緒突然改變下所發生嘅事。投資便是把辛苦賺回來嘅錢去冒風險，例如投入幾多資金及如何放「止蝕盤」，感覺上有如自己十多歲嘅女兒夜歸而同時 發現佢身上有紋身，但卻要控制自己嘅脾氣一樣。世上許多事皆唔如意但卻要接受，唔係事事可從心所欲。11月23日以後，炒賣二線股嘅情況有如在壓力下做 人，恒生指數不停上下擺動，正好反映投資者十五十六嘅心情。

　　請記住，隨住日曆改變，好多時領袖股亦改變，今年嘅領先股明年可能成為落後股。今年上半年能源股同資源股領先、工業股落後；今年下半年能源股同資源股落後、金融股領先。明年上半年又點？

固定資產投資景氣主宰經濟命運

　　點解周二泰國股市跌幅咁大？理由係對沖基金過分進取，形成股價狂升暴跌；上述情況近日亦喺本港內地金融股身上出現，值得小心，因為股票市場已變得好單薄！

　　2002年下半年中國利用固定資產投資，令經濟衝出谷底；至今已經四年，中國經濟仲奏緊「高歌猛進」。今年固定資產投資佔中國GDP總量45％，雖然 推出宏調，但地方政府為追求GDP增長政績評價嘅體系並冇根本性變化；加上國際收支雙順差格局短期難以明顯改善，流動資金泛濫漸成常態。明年中國固定資產 投資增長率會係點？不但決定明年GDP嘅增速，亦影響明年PPI及CPI運行態勢。換言之，中國明年固定資產投資景氣，主宰經濟景氣周期嘅命運。另一方 面，經過幾年興建，多數固定資產投資已開始釋放產能，明年形成產能釋放高峰期，令產品價格進一步回落、工廠利潤減少及投資退縮。例如去年11月底新開工專 案總投資較2004年同期上升28.1％，今年11月底只增長3.7％，係咪預示經濟景氣周期面臨轉折？

　　今年底好少專家願對明年投資增幅作出「言之鑿鑿」嘅判斷，係近年少見嘅現象。中國出口增長動力下降，但內地轎車及住宅呢類消費性商品需求仍然旺盛，引 發對能源、原材料、運力等投資需求上升。儘管一連串調控房地產舉措頻頻出台，除上海外，其他地方效果並唔顯著；投資增幅喺高位運行，商品房價格漲幅依然好 大，並由東部沿海嘅特大城市向內地二線城市轉移，繼續帶動地產市場及銀行資金需求增長！專家指出，明年製造業可能面對產能過剩，要加快淘汰落後產能，進入 優勝劣汰期，經濟周期轉折點可能喺明年中或下半年出現。另一方面，內地轎車需求及房屋需求又繼續支撑住明年經濟，令明年經濟展望像霧又像花。

　　油價由2001年急升至今年7月，今年下半年起進入油價高原期。高油價已刺激勘探業一片繁榮及其他能源發展去替代石油嘅地位。近期OPEC需要減產去 支持油價，美國政府為咗「能源獨立」，亦大力鼓勵發展國內能源事業及再生能源項目。根據上述種種，相信未來油價喺六十至八十美元之間波動機會極大，時間可 能長達十年，出現所謂油價高原期。

　　中國鋼鐵出口今年供應全球三分一鋼鐵需求。中國鋼鐵業協會估計，隨着出口退稅減少，明年中國鋼鐵出口可能減少23％，由今年嘅五千二百一十萬噸減至四 千零一十萬噸。中國政府9月15日起減少鋼鐵出口退稅，半製成品出口更面對10％抽稅，以便更多鋼鐵產品供內銷。估計明年中國鋼鐵產量上升10％，至四億 六千二百萬噸（今年四億二千萬噸），而今年產量較去年上升19％。

　　呢幾年中國甲醇產業發展速度極快，多個大型甲醇專案相繼開工建設。依家歐美、日本等國家已由甲醇自產自給國轉為主要進口國，加拿大、東歐及中東等國家 亦成為甲醇主要生產國。中國甲醇生產企業約二百家，產能喺十萬噸左右，只有中石化（386）、大慶油田、上海焦化、榆林天然氣化工、長慶油田等幾家。去年 中國甲醇產量五百三十五萬噸，較2004年上升21.6％；進口一百三十六萬噸、出口五萬四千噸，係世界第二大甲醇消費國，估計到2010年需求達九百三 十四萬噸，成為全球最大嘅甲醇消費國。

　　由於利潤可觀，唔少煤化工業企業一窩蜂上馬，估計在建甲醇產能最低達一千三百萬噸，擬建者有二千萬噸，如全部投產，2010年中國甲醇產能達五千多萬 噸。神華寧煤集團專案部總經紀孫照亮估計，到2008年下半年或2009年上半年，中國甲醇供求關係將發生變化，迅速提高產能嘅結果，係好快超過市場需 求，引發甲醇市場競爭異常慘烈及企業虧損。

中日經濟差距達五十年

　　中、日經濟差距究竟有多大？2001年日本經濟產業研究所高級研究員關志雄估計最少四十年；一位日本經濟學教授跑遍大半個中國後，認為差距起碼五十 年。上述係透過GDP、平均壽命、嬰兒死亡率、第一產業佔GDP比重、城市恩格爾系數及人均電力消費等各項資料進行科學分析後嘅結論。有人話，美國人掌握 標準，站喺經濟最高端；日本人掌握技術，站喺中間；中國人有氣有力，只有埋頭苦幹。例如中國準備建造嘅高速鐵路，坊間熱烈討論係引進法國TGV抑或日本新 幹線（日本新幹線係日本1960年代發明嘅技術）。汽車方面，中國將討論引入美國技術、歐洲技術抑或日本技術，而豐田汽車擁有過百種車型技術儲備，近年嘅 燃料電池汽車，更喺耗油及環保方面領先全世界。數碼產品方面，更係日本技術獨步天下，由數碼相機到一百吋液晶電視，都係日本技術完全領先。換言之，呢個世 界產品標準由美國人制訂，技術由美國、歐洲及日本大企業掌握，中國只提供土地及人去生產。中國要喺經濟上追上美國、歐洲及日本，最低限度需要五十年。

　　今天中國再唔缺乏資金，因為中國係世界上儲蓄率最高嘅國家之一，保持喺35％以上，經二十八年儲蓄，手上資金充足，單係外滙已超過一萬億美元。但喺資金運用方面仍十分落後，例如中國人大部分資金存放喺銀行，而商業銀行對風險約束嘅知識仍然有限。

外資進軍中國房地產坐和望贏

　　11月中國七十大中城市房屋售價較去年同期上升5.2％。升幅最大係深圳上升11.6％、北京升9.4％、上海則持平，但同10月份相比已小幅下降。 二手房方面，深圳、大連升幅最大，上升超過12％，北京升9.5％。12月上旬花旗集團旗下房地產投資基金一口氣買下上海徐滙區「漕河景苑」兩幢二百三十 二套高層住宅層。外資進駐內地房地產熱潮不但冇冷卻，反而在升溫，單喺11月進入內地房地產嘅外資已達五十六億八千七百萬美元，較去年同期上升 20.59％，主因除睇好房地產前景外，更期望人民幣未來每年升值5％，形成外資投資中國房地產處於坐和望贏地位。

　　房地產响正常情況下只能用作居住，除咗少數日子例如1967至80年香港人均收入保持年率雙位數速度上升，刺激樓價由六十元一呎上升到一千二百元一 呎，升幅二十倍。第二次係1984年7月至97年7月香港前途問題解決，利率回落兼香港人均收入仍然高速上升，令本港樓價由六百元一呎上升至一萬二千元一 呎，係另一次上升二十倍嘅機會。

　　至於2003年沙士疫症之後，至今升幅主要集中喺豪宅，非一般人可參與。至於普通住宅樓價，由三千元一呎升至四千八百元，升幅60％。要賺錢涉及許多 問題：一、三千元一呎係2003年第二季低價，當時沙士疫症剛過，一般人未必有膽入貨。二、2004年6月至今年6月利率回升，形成不利因素。三、港人人 均收入由2003年第二季至今升幅有限。三年半獲利60％，喺股票市場並唔難，但喺物業市場就好難。短炒樓花或二手樓？除非閣下從事地產業，否則一般人好 難喺六個月時間內透過炒二手樓或樓花獲利（扣除開支後計）。

　　投資房地產與股票唔同，投資物業需要五年至十年時間才可獲利；反之，股票因買賣容易兼透明度高，1997年8月以後已成為最主要投資對象，房地產投資價值則漸漸淡化。至於內地房地產如作投資，更需要呢方面專才，普通人並唔易賺到蚊年。

　　南聯實業（098）撤銷上市地位。

　　興達國際（1899）今天新上市。

　　海天國際（1882）、民安控股（1389）12月22日新上市。

　　銘源醫療（233）、東方電機（1072）停牌。