11 月28日，周二。恒生指數大跌564.48，收 18639.53；成交五百八十八億六千八百多萬元。11月期指跌528點，收18647點；12月期指跌544點，收18680點。一天大跌唔代表趨勢 改變，尤其近日恒生指數同RSI背馳咁明顯，調整無可避免。今年6月開始嘅上升軌支持位喺18500點【圖】，响恒指未低於18500點前，只視作一次調 整，唔使大驚小怪。建行（939）下調6.42％、華創（291）下調6.63％，係調整幅度較大嘅熱門股；國企指數下調4.47％。
美元轉弱實有利股市
今午賣地，馬鞍山一幅一點六四公頃嘅土地以三十二億四千萬元售 出，九龍塘住宅用地面積零點六一公頃，以十九億四千萬元售出，分析者唔係幾滿意，令長實（001）股價跌5.1%，信置（083）股價跌3.9％，令地產 分類指數回落4.8％，但唔少二線股繼續逆市上升。今天可能係11月份表現最差嘅一天，主要係沃爾瑪對11月份銷情唔樂觀；加上油價回升到六十美元以上， 引發美股獲利回吐。油價上升令能源股再度吃香，美元弱勢則有利工業股抬頭，大市仍走唔出行業盛衰嘅框框。美元滙價轉弱其實對股市有利，只係市場心理好奇怪 （情況一如減息令股市跌一樣），理由係投資市場一向係半理性、半非理性，所以會計師同經濟專家投資股票嘅成績唔一定較普通人好，反而心理學家經常有出色表 現。恒生指數今天出現6月14日以嚟最大單日跌幅，從RSI同恒指背馳呢點睇，11月中開始股市已進入派發期，恒指表現卻愈派愈高，直到有一「點」股市承 接唔住而回落，呢一「點」又往往非事前可以估計到。過去一星期我老曹一直強調「睇淡仍早，但小心謹慎需要」，就係咁解。睇落後市短期有較大調整而非大跌， 理由係市場資金仍十分充沛。
貪念與恐懼常常係股市嘅統治者。上升之時，唔少人擔心錯失機 會；跌落之時，唔少人又擔心股市進一步回落；呢類人通常只適宜做大鱷點心。6月14日至11 月23日恒指上升27.62％，如調整升幅三分一，即恒指可回落9.2％，正常過正常，即使由11月23日19404點回落至17619點（下跌 9.2％），亦冇乜大不了，只係一次技術調整。喺升市中不乏回落股份，跌市中亦不乏逆市上升股份，精明分析員應可找到淡市之花（今年投資策略不應再被恒指 牽着鼻子走了）！作為active trader，自然要求高一D，已不能只睇好睇淡咁簡單，例如睇好邊個行業甚至特別睇好邊類股份，才適合依家嘅股市要求。
建築股當頭起
有D好古老嘅格言仲十分有用，例如寧買當頭起，莫買當頭跌。哪 些行業近日當頭起？哪些行業近日當頭跌？任何股份由低價回升10％或以上便應該留意，如分析後市前景良好，便可成為買入對象。恒指經過五個多月上升後，出 現較大波動無可避免，因為太多人喺度走鋼線（唔嚇得），只要少少風吹草動，短期跌幅往往會好大。大量衍生工具出現後，長期波幅反而收窄，今年起股市波幅好 少大於10％。大市經調整後，哪些股份抗跌力強（出現水落石出局面），將係下一輪當炒股。那些响過去五個多月升市中備受忽略嘅二線股，喺今天跌市中唔少表 現十分硬淨，甚至不跌反升，值得留意。後市展望轉向二線股尋寶。
貝南奇已訂下未來核心通脹率只可1％至2％，喺上述條件下，美 國GDP自然唔可能保持高增長，GDP增長率放緩今年第二季已開始，亦冇乜大不了；即使美國樓價下調，相信亦有如黑夜中嘅狗吠聲，雖然令人不安，但殺傷力 有限。唔好被危言嚇壞！宏觀D睇，11月23日開始回落，只係反映經濟進入整固及放緩，而非衰退。
美國10月份核心通脹率上升 0.1％，係去年8月以來最低，雖然年率仍達2.77％，但貝南奇有信心明年第二季重返1％至2％水平。換言之，未來美國貨幣政策唔會進一步收緊，亦代表 未來股市唔會大跌（調整則隨時出現），即經濟出現Boom & Bust機會已唔大，取而代之係個別行業嘅Boom & Bust。有如花朵隨着季節花開花謝，春天有迎春花、夏天百花吐艷、秋天有菊花、冬天有寒梅，唔同季節都有唔同嘅花開及花謝。依家經濟已踏入秋季，起碼有 菊花可賞，甚至進入冬季，仍可踏雪尋梅。原材料價格上升潮今年5月至8月見頂，未來只係上落市，即後市資源股同能源股只宜炒上落而不宜長揸。美元滙價回落 令減息期延期，而非引發另一潮加息期，呢點要搞清楚。上周因恒指同RSI背馳已適當地減持者，感恩節後聖誕節前可重返市場揀花（甚至冬天亦有梅花可採，何 況依家只係秋天）。股市雖然已度過百花盛放嘅夏季而踏入秋季，但唔代表冇花開，問題係你能否找到？尤其香港如此鄰近中國，內地經濟仍係熊熊烈火。澳門大興 土木，已令本港建築業復甦。本港建築業由1994年走下坡，至今已十二年，如今因澳門興建賭場酒店而受惠。日後港珠澳大橋上馬、西九龍項目動工及內地經濟 房大量興建，唔排除本港建築公司純利進入上升期，因為實在已沉咗好耐！建築股嘅吸引力係價低，未來下跌空間有限（因為已衰咗十二年），一旦經濟情況改善， 上升空間唔細。近期唔少建築股已出現超過10％升幅，成為近日當頭起嘅股份。上述投資方法叫做「逆市思維」。
以水泥股為例，今年首三季度產品銷售收入二千二百四十億九千五 百萬元，較去年同期升24.55％；平均售價較去年同期上升4％；加上生產成本下降3至 5％，令利潤率回升30％左右，今年首三季實現利潤總額八十二億九千八百萬元，較去年同期上升135.83％。其中又以福建省升幅最大，水泥價上漲 30％；上海區上漲最少，每噸只漲十五至二十元（浙江省水泥每噸平均價二百八十元，較去年同期上升三十至五十元）；福建省9月份42.5標號水泥售價由每 噸三百七十元升至四百元，至今已三到四次提價至四百八十至四百九十元。好多工地負責人拿茄殊到其他省份買水泥運往福建省，理由係「十一．五」規劃建議加速 城鎮化，係未來五年嘅重要發展方向，令水泥需求响今年回升，估計將會有五年或以上好景。本港建築公司亦紛紛回內地尋出路，相信係近日建築股價止跌回升嘅背 後理由。
相同消息可造好造淡
資產升值推動經濟增長，有異於收入上升推動經濟增長。1984 至97年香港經濟增長動力嚟自市民收入上升產生需求，呢類型經濟繁榮期通常好長；資產升值推動嘅經濟增長一般較短，例如1998至2000年因科網股價上 升推動經濟增長，只維持咗十九個月。呢次由自由行推動嘅香港資產升值潮由2003年4月至 06年11月，已維持咗四十三個月，應該算係不俗。資產升值推動經濟繁榮主要嚟自財富效應，令消費者增加消費，一旦財富效應消失，消費立即回落，例如 2000年3月科網股泡沫爆破後。呢一次嘅優點係2003年7月開始嘅自由行絕對唔係泡沫而係十分實在。恒指過分偏離二百五十天線（例如今年5月8日）， 難免調整，11月23日呢次亦唔例外，中國概念亦唔係泡沫。今天恒指回落，理由係偏高。
美元滙價回落始於2002年2月，並唔係乜嘢新鮮事件，近期卻 用作造淡藉口。相同消息可以造好亦可造淡，換言之，95％消息本身係中性，股市反應同消息本身無關。除非美元回落演變成危機，聯儲局必須加息去阻止美元下 跌，才另作別論。但依家金價距離七百三十美元頂部仍遠，未見美元陷入危機中。
今年接近尾聲，中國經濟今年係咪過熱？市場仍爭論不休。國家統 計局總經濟師姚景源用「增長快、質量高、運行穩」嚟概括2006年，並預測GDP增長率喺 10-10.7％之間，未來若干年中國GDP增長率仍可保持9％或以上。換言之，明年中國經濟不但唔會出現下滑，甚至唔係軟着陸，只係略低嘅「高增長」！ 上述係中國經濟體制改革基金會秘書長、國民經濟研究所所長樊綱所畀嘅判斷！理由係中國儲蓄豐富；加上企業大量上市融資，擴大喺中國嘅資本，呢幾年過熱投資 所造成嘅過剩生產力正在逐步消化，因此中國唔會出現通貨收縮。2006年首十個月中國CPI增長率只有1.3％（去年係1.8％），可以話中國亦冇通脹威 脅！
中國經濟進入「三頭馬車」期
依家中國經濟正在解決結構不平衡問題，由工業、出口帶動轉向消 費及服務業。中國服務業發展仍相對滯後，但呢次經濟轉型，唔係八十年代香港方式（棄舊揚新），八十年代香港經濟轉型係放棄製造業、發展服務業。樊綱認為， 中國仍擁有大量勞動人口，因此毋須放棄製造業，只須發展服務業，製造業在中國仍唔係夕陽產業，只係未來增長率減慢，因為中國仍未走到充分就業嘅階段，製造 業响中國仲有幾十年可發展。中國喺製造業減慢嘅同時，亦加大力度發展服務業，此舉可令未來若干年中國GDP保持8-9％增長率。製造業喺中國優勢未失，仍 係解決中國就業問題嘅優勢行業，只係今年加大力度發展服務業而已。有D專家擔心2002 年以來持續四年高增長形勢可能喺明年終結係唔啱嘅；更有專家預測中國房地產市場明年大幅下滑及就業方面出現問題亦係唔啱嘅。2007年係中國經濟進入「三 頭馬車」期，拉動力嚟自：一、製造業加出口；二、固定資產投資；三、消費及服務業興旺。前兩頭馬車跑咗四年，可能有D疲倦而慢下來，另一頭馬車卻起步冇 耐，由消費及服務業去拉動經濟，估計明年中國經濟增長率只會慢DD，但絕對保持高增長！明年中國出口增長率可能慢D，尤其係勞動密集型加工貿易及中低端消 費品，比較優勢在減少中，令出口增長率放緩，但並非冇增長。固定資產投資增長率前三季係27.4％、21.5％、23.6％，10月份係16.8％。投資 增長率回落嘅理由係中國唔再片面追求GDP高增長，明年固定資產投資呢頭馬車進入減速期，但消費及服務業呢頭馬車卻在加速中。上半年中國消費品零售額上升 13.3％、10月上升14.3％，明年進一步加速。樊綱認為，2007年中國GDP增長率只會略少一個百分點，回落到9％，唔係下滑甚至唔係軟着陸，而 上述情況估計可保持若干年。
上周我老曹叫人唔好睇得太好，今天開始叫人唔好睇得太淡。後市展望仍係上落市，玩個別行業升降。
萬能國際（2988）股份合併。
中國鋁業（2600）、聯康生物科技（690）停牌。
■莊士中國（298）12月5日；廸生創建（113）、瀚智集 團（516）、中港照相（1123）、香港興業（480）、大昌集團（088）、星美出版集團（8010）7日；開明投資（768）8日；香港通訊國際科 技（248）、邦盟滙駿（8158）、百富國際（8272）11日公布業績。
沒有留言:
發佈留言