11月7日，周二。恒生指數一度見19161.38，收市跌回18939.31，微升 2.76；成交五百一十七億二千一百多萬元。11月期指升5點，收18923點。信置（083）升8.18％，見十五元零八仙；新地（016）升 3.3％，見九十一元三角；中移動（941）跌2.47％，見六十七元零五仙。今時今日，投資態度係追隨趨勢，但不忘放下止蝕沽盤保護；股市再上升固然高 興，萬一所投資股份由高價回落10％便得小心，如跌15％便行使止蝕。好友氣焰正在加強，部分人今時今日才改行做好友宜三思。6月份恒生指數15200 點之時感到害怕，今天恒指見19000點才耀武揚威，直頭當投資者失憶？我老曹策略係恒生指數高於18000點後，便讓利潤往前跑，冇做。萬聖節已過 去，感恩節仍未來臨，更加唔好提聖誕節。道指連跌七天後，周一才大幅上升，有乜值得高興？
油價靠OPEC減產支持
周三係美國中期選舉，結果周四才知道，到時如民主黨控制國會，美軍會否提早由伊拉克撤軍？未來聯儲局對付通脹態度會否變為強硬？
OPEC威脅下月減產，令油價重返六十美元之上，下次會議係12月14日，到時將檢討11月起石油每日減產一百二十萬桶，係咪足夠支持油價企於六十美 元水平？至今為止，OPEC十一個成員國中，只有五個真正減產。如12月14日前油價無法企於六十美元以上，或須進一步減產，上述消息對油價表面上係好消 息，其實係壞消息，意味住油價六十美元以上需要OPEC減產才能維持。當OPEC減產，非OPEC成員國自然增產，以便高價出售石油，以免一旦OPEC 支持唔住加入增產時，油價會進一步下跌；即使OPEC支持得住，亦代表油價唔能夠高出六十美元以上幾多矣（因OPEC仍有未用盡生產力）。
礦務及能源股2000至03年已大幅上升，只係當時只有專業者留意，一般人仍少留意。到2004至06年普通投資者才加入，今年專業投資者已紛紛減 持，令礦務股及能源股由強者手中轉到弱者手中，之後有乜事發生？冇人知道。所有牛市都以狂熱結束，例如2000年科網股。今年5月金價、7月油價算唔算 狂熱？依家未有肯定答案。近期股市亦有D燥，但未致狂熱，因此只宜放下止蝕盤保護既得利潤，暫時未需行動，但警戒性應進一步提升。
今年道指創新高，但納指升唔上，代表資金愈來愈集中大藍籌身上。後市展望：一、納指後來居上；二、道指回落。過去三年由萬聖節至聖誕節皆係上升日子，今年又點？
成功投資策略係每年令資金升值25％，而非追求短期利潤。如你能保持25％年增長率，你財富便差唔多以每三年上升一倍速度增加，遲早變成小富（大富由天，冇得教！）。如你只能每年升值5％，除非你早已係小富，否則以普通打工仔而言，你永遠無法變成小富。
移民加國合法避稅之法又少一瓣
全美房地產協會（NAR）已動用四千萬美元全國報章刊登廣告，游說人們相信美國樓價唔會崩潰，聲稱依家應該係入市買樓時候了。NAR代表美國一百三十萬名地產經紀及代理，上述廣告能否扭轉美國樓市劣勢？
上周加國財長弗萊厄蒂宣布，信託基金唔再享有稅務豁免地位。以前容許加拿大信託基金將現金派畀投資者而毋須付加國稅，稅務由收取現金者負擔。好多移民 加國人士移民前成立信託基金，以避免日後繳付加國稅率高達35％，多倫多大學羅特曼學院稅務專家Jack Mintz估計，上述豁免將令個人減少繳稅十一億加元、企業減少付稅十八億加元。企業信託有超過二百五十間上市，佔多倫多交易所市值11％。消息一出，多 倫多股市一度下跌3％，似乎過敏D，因為豁免失效日子係2011年（今年10月30日後成立信託唔再享受豁免權）。今後移民加國，合法避稅之法又少 一瓣（利用信託基金避免交稅）；美國及澳洲早已取消上述優惠。
外國投資者持有加國上市股票五分一（估計約值九千億加元），上述消息令加元上周曾跌超過1％，因為擔心外資因此減少投資加國，尤其係能源股。分析界 話，今年購買加拿大能源股資金有60％（或二百二十七億加元）自海外，依家加國能源公司超過一半由外資擁有（利用信託基金持有公司佔加國石油總產量 14％），而且為加拿大提供唔少就業機會。至於真正影響係點，仍有待觀察。
過去五年加元兌美元升幅超過50％【圖】，近期1.1至1.15加元浮沉。信託基金地位改變，令加元前景多添不明朗。雖然估計將繼續1.1至1.15加元之間上落，但長期睇淡，因上升軌已失守，短期建議沽售加元。
中國「十一．五」規劃大方向係：穩政策、推改革；降能耗、調結構；重民生、促和諧。估計今年全年中國GDP增幅10.5％以下，明年將繼續加強對 固定資產投資調控，利用土地及信貸呢兩個閘門，以及提高市場進入標準門檻；加大向科技、教育、文化方面投入，引導私人資金投資節能、環保等設施建設。隨 WTO過渡期結束，中國將加快實現利率浮動及自由化，由市場決定債券價值，令明年中國GDP增長率重返單位數。
過去五百年，中、日友好日子少，對抗日子多。中國強大時，如元朝曾派出五百艘戰船欲一舉佔領日本，可惜遇上海上颶風而損失慘重，日本人認為係「神 風」救佢地。明朝之時中國國力漸衰，日本海盜經常到浙江、福建一帶搶掠，所謂倭寇為患，猛將戚繼光曾給予迎頭痛擊。到清朝，政府斬腳趾避沙蟲，下令沿 海居民向內陸後退十里，漁民子孫不得考取功名。一百多年前甲午戰爭一役，中國北洋艦隊全軍覆沒，更割讓台灣予日本，中國人認為係奇恥大辱，支持孫中山推翻 滿清政府。
中日外交面和心不和
第二次世界大戰結束後，在美國協助下，日本經濟迅速興起；反之，中國因為打內戰及戰後實行共產主義，經濟落後，令日本人根本上就睇唔起中國人。時移世 易，1978年中國實施改革開放政策，八十年代日本企業只肯出售二流技術畀中國，反而南韓公司願意將高新技術賣畀中國，形成中韓關係發展迅速、中日關係一 直停滯不前；加上李登輝做國民黨總統後，台獨問題進一步阻礙中日關係發展。
1990年日本經濟盛極而衰，中國經濟仍大步向前。去年中國已取代美國，成為日本產品最大出口市場。最近日本新首相上台後，希望同中國改善關係，主觀 願望能否扭轉客觀形勢？今年日本在美國支持下欲加入聯合國做常務理事，中國反對下告吹；南海離岸石油主權之爭，因中、日兩國都極需石油，而令關係進一步 惡化。中日貿易上，日本出現巨大順差，日本係咪願意將本土市場向中國產品開放？一旦開放，中國廉價產品大量入口，可令日本經濟再次陷入通縮。日本係咪願意 將高科技出售畀中國，協助中國發展高科技產品，讓中國產品國際市場上搶去日本高科技產品市場？何況美國極需要日本去抗衡中國興起，近年中國影響力日益 強大，對太平洋地區國家影響力已漸顯，威脅美國太平洋地區勢力。
國之相交，利字先行。客觀因素令中日友誼停留面和心不和階段，何況未來趨勢仍係此消彼長。
去年日本成年女性生育率只有一點二五個嬰兒（2004年一點二九個嬰兒），日本成年女性必須每名生二點一個嬰兒，才可令依家一億二千七百萬人口唔減 少。日本生育率OECD國家中最低，令日本今年開始進入人口減少期！加上政府負債高達九萬億美元，係OECD國家中最大。日本係典型「國窮民富」國家 （中國係國富民窮）。七十年代日本經濟繁榮期出生者，已進入二十到三十歲賺錢期，卻要面對經濟泡沫爆破後日本；加上人口在減少中（估計到2050年日本 人口少於一億），未來誰去交稅協助政府減債？中國雖然1978年起實行一孩政策，令中國近年亦開始面對廉價勞動力減少問題（1980年起出生率下降，加上 父母有較多蚊年負擔子女教育），但中國總人口仍在增加，要到2028年人口才開始減少。從呢點睇，中國經濟仍有二十年繁榮期而日本經濟硬係好唔起！ D經濟繁榮期社會做事、早已進入退休日本人，經過四十年努力賺錢，退休後印印腳享受生活，會否仍大量投資？反之，今天二十到三十歲日本人卻搵唔 到好職位，想投資亦冇蚊年。日本經濟自1990年起開始衰退，至今為止仍係有反彈冇上升。
隨年底中國金融業全面對外開放，上海寫字樓市場再度成為焦點。仲量聯行報告指出，浦西甲級寫字樓第三季空置率只有4.7％（第二季5％），浦東空置 率更降至3％；浦東寫字樓租金升9.4%，由每天每平方米八十八美仙升至九十七美仙，浦西由九十一美仙升至九十五美仙。估計2009年將出現供應高峰期， 將有一百一十七萬平方米新增供應，到時空置率將升至10-15%；但2007及08年上海甲級寫字樓無論租金及售價皆看漲。
香港禁賭無形損失大
澳門人口五十萬、香港人口六百九十萬。9月份內地遊客到澳門數字係四十二萬七千零九十七人次、香港四十二萬七千零二十七人次；澳門吸引內地遊客數字 首次超過香港，理由係澳門賭場迅速發展。現代社會觀念，賭場只係旅遊娛樂一部分，澳洲、馬來西亞、南韓、英國、美國、加拿大……連新加坡亦開賭，只有香港 仍禁賭，白白錯過繁榮經濟機會。將賭業拱手讓予澳門問題唔大，但全球賭博合法化下，香港呢方面無形損失才大。賭博事業不但為中下層社會提供大量就業 機會，由酒店到餐飲到各種各類服務業，同時令會議展覽、購物消閑業亦受影響；加上政府冇賭場博彩稅收而加重其他稅收，令人人受害。
世紀建築（079）二十股合併為一股。
高陽科技（818）、眾彩股份（8156）、問博控股（8212）、恒隆集團（010）、恒隆地產（101）、中華國際（1064）、勞氏環保（309）停牌。
■華普智通（8165）11月13日；會德豐地產（049）16日；積華生物醫藥（2327）12月11日公布業績。
沒有留言:
發佈留言