油價回軟股市續睇好

　　11月1日，周三。恒生指數創歷史新高，今天人民幣兌美元升值0.05％，報7.8745，令南方航空（1055）升12％，報二元八角八仙及一度觸及 2005年2月17日以來最高位；控（005）升1.3％，報一百四十八元七角，因加拿大豐第三季獲利較去年同期上升22％；中芯國際（981）股價 再跌1.1％，收九角，係2004年3月18日上市以來最低，較招股價下跌高達67.3％。瑞銀表示，中芯國際不但第三季業績令人失望，估計第四季亦平平 無奇；瑞銀認為，中芯國際技術上已落後國際同業九到十二個月。TCL多媒體（1070）終於決定關閉歐洲電視製造業（2003年收購時主席估計十八個月 內恢復獲利，結果係三十六個月後宣布關閉），市場反應良好，股價升9.5％，證明收購外國公司唔係咁易。馬鋼（323）升2.6％，中國鋼鐵工業協會常務 副會長表示，明年鐵礦石價格可能下跌。中石化（386）升2.6％，證明過去分析建議沽中海油（883）買中石化正確。中國政府宣布11月1日開始成品油 入口稅由6％降至2％，出口原油抽5％，呢個決定對車用汽油（原先抽5％）、航空煤油（原先抽6％）、柴油（原先抽6％）有利，因11月1日起一律只抽 2％稅，即節省唔小。瑞士信貸銀行估計，氧化鋁價格可能降低15.3％，對中國鋁業（2600）不利；國際現貨價格每噸二百四十至二百六十美元，而中國內 地每噸賣二千九百五十元人民幣，估計短期降至二千五百元人民幣。今年8月至今國內氣化鋁減價共四次，跌幅達到55％！國美電器（493）復牌，否認黃光裕 遭調查，但國美股價仍然回落。港股已進入個別發展期，消息利好則升、消息利淡則跌。令人振奮10月結束，11月1日恒生指數升129.30，收報 18453.65；成交三百八十七億七千五百多萬元。11月期指升116點，收報18456點。11月股市能否再創佳績？油價有一定影響，如油價繼續回 落，11月股市繼續睇好。日本首相安倍晉三表示，日本經濟仍未達到擺脫通縮目標，並希望日本央行通過貨幣政策手段支持日本經濟。央行亦10月31日公布 來年度展望報告中估計，明年日本通脹將加速及GDP增長率達2.1％（2006年2.4％），睇日本在可見將來仍擔當全球資金供應國地位。

金價明年底完成第二潮整固

　　美國第三季GDP增長率1.6％（第二季2.6％，後來修正為2.9％），只係因樓價回落，其他方面仍然健康。例如汽車銷量上升8.4％、私人消費上 升3.1％、生產性設備投資上升6.4％；如不計住宅項目，美國第三季GDP增長率2.9％，同第二季一樣。美股因上市地產股唔多，所以至今表現仍十分出 色。美元價受壓，不但歐羅及英鎊上升，同時金價表現亦良好。

　　金價上升可分三潮：第一潮由市場對美元失去信心開始，例如2001年1月美元開始減息到「九一一」事件，引發黃金第一個升潮，至2004年12月金價 見四百五十六美元（即當年強調金價一般人唔信會上升中上升）；買盤主要來自對美元失去信心投資者。2005年美元利率上升支持下上升9％，令黃金受 壓，出現長達十個月整鞏期，到2005年10月因柏克萊銀行發行黃金ETF令大量資金湧入金市，金價升穿四百五十六美元，進入第二潮。過去一年估計約十二 億美元購入ETF，令金價今年5月見七百二十五美元完成第二潮（即一般人開始相信金價會上升期）。今年5月開始進入另一整鞏期，需時多久並唔知道，最後 才進入第三潮，亦即金價瘋狂上升期。如參考七十年代金市，整鞏期由1974年12月二百美元回落到1976年中一百零三美元，然後再上升到1978年二百 美元才出現爆炸性上升，回落期長達一年半。如未來重演七十年代歷史，2007年年底金價才完成第二潮整固，重新開始大升。

原油存貨增減反映差價

　　上周原油存量減少，令油價上升二美元。首先我地要了解原油存貨問題與供求關係，冇期貨市場之前，原油存量反映供求，有了期貨市場便唔再係呢回事。假 設油價六十美元，利率五厘二五，三個月後期油值六十點八○美元（未計存倉量），依家油價六十美元，但三個月後期油成六十二美元，作為石油供應者點解現貨 市場拋售？只要將石油存倉然後拋售三個月期貨便可賺多D，兩美元差價足夠支付三個月利息及倉租。明白兩者關係，便明白原油存貨增減只反映期貨與現貨差價， 唔再係石油供求。今年3月由於市場對後市油價看漲，形成期油較現貨石油昂貴，差價超過利息與存倉費差，形成更多石油存倉而非市場上出售，現貨市場出現人 為性短缺（因為石油都去存倉，現貨市場自然供應緊張）。油價由今年3月六十美元一桶升至8月7日七十八點六四美元，係由於大量原油存倉形成存貨上升現貨 短缺。到今年8月可以存油倉都出現爆滿；加上估計中颱風今年未出現，有人開始獲利回吐。石油期貨唔再較現貨價貴太多，何況美國亦冇倉庫可以再存油。 市場上石油現貨供應量漸增，引發油價下跌。8月7日至9月30日油價由七十八點六四美元回落到六十美元後，傳出OPEC計劃11月1日起減產，上述消息支 持油價五十八至六十三美元上落。由於期貨價格跌幅較現貨大，存貨量開始下降，上周石油存貨減少便是在此情況下出現。

明年原油存貨將減少

　　附圖或有助各位了解利率與油價關係，以10月27日為例，2007年1月油價（加利息成本）應該係五十八點八美元，但2007年1月期油成六十二點 五美元，咁情況下，原油供應商傾向保持存貨而唔市場拋售；反之，日期愈遠兩者差便愈窄。照附圖睇，明年原油存貨將減少，回流市場將增加，因為成本 加利息再加存倉費進一步增加，存油已唔化算。

　　另一影響未來油價因素係從西非或波斯灣買油運往美國，運送途中亦產生類似存倉作用。例如油輪一個月後才運到，變相產生「期油」作用。如運費高便唔化 算，如運費低便幾化算（令期油成本較便宜），油價看升期，唔少人爭訂油輪將原油由西非或波斯灣運往美國（愈遲到愈化算），令油輪租金上升。今年9月起， 油輪因為油價回落令租金回落；因為由西非或波斯灣將油運去美國加上運費已賺唔到多少差價。

　　11月8日中期選舉對油價影響係點？傳統說法共和黨佔據國會對油價有利、民主黨佔據國會對油價不利。油公司傾向支持共和黨，因為民主黨佔優勢後，法例上較不利油公司；上述說法只係過去傳統，呢次係咪咁樣又係另一回事。

　　路勁基建（1098）、中海發展（1138）停牌。

　　衛科創業（8172）11月1日起改名為Golife Concepts。

　　漢傳媒（491）11月1日起每一百股合併為一股。

　　■上海棟華（8251）、交大銘泰（8148）、綠陽國際（8306）、卓施金網（8063）、衝浪平台軟件（8178）、麗新發展（488）11月 10日；中國3C集團（8153）、中國宏達（8117）、中國消防（8201）、第一電訊（8110）、訊通控股（8082）、錦恒汽車安全 （8293）、看漢科技（8175）、李氏大藥廠（8221）、北亞策略（><）、鐳射國際（8173）、思拓通訊（8171）13日；民生 國際（938）14日公布業績。