等內地同胞接火棒

　　8月26日，周日。恒生指數繼續向7月26日高點進發，一旦完成V型反彈後會點？上周反彈係建基於7月26日至8月17日大幅回落，完成反彈後，相信一切 如常，但次按風暴並未過去。對銀行而言，3000億美元次按問題仍未處理，未來方法有二：一、照市價（低於市面10-12％）拋售畀機構投資者止蝕；二、 繼續持有，希望明天會更好。如此一來，9月結時必須喺賬面上作撥備，一如上周公布業績嘅中國銀行（3988），6月30日結時為上述撥備一樣，兩者似乎都 未喺股價上反映出來，即未來金融股繼續受壓機會好大，直到上述項目處理為止。危機之後，無可避免出現兩種心情：A. 醒目者在7月26日前減持，喺8月16日增持。B. 在7月26日前飄飄然，喺8月16日怕得要死。醒目者在今周可享受策略成功所帶來嘅利潤及滿足感，失敗者只有舐自己傷口上嘅血，你信唔信失敗者會即時重返 市場？因此，當恒指接近23500點時，相信股市將靜下來，因為痛定才會思痛。經此一役，CDO呢個名詞又成為金融市場家喻戶曉嘅英文字。聯儲局減貼現率 後，CDO利率仍然高企，即使獲AAA評級嘅CDO，仍較票面值低10％。


信貸評級公司成代罪羔羊


　　美國信貸市場次按部分仲未解決，加上上周油價又急升，聯儲局喺貨幣政策上必須小心謹慎，因為全球投資者已能作出迅速反應，例如上周美股上升、美元匯價 下跌。過去15年利用樓按證券化，令美國物業市場獲得唔受限制嘅貸款支持，而出現1994至2006年嘅上升潮，亦同時產生大量問題CDO，部分理由係信 貸評級公司對MBS（mortgage-backed security）嘅風險評估無先例可循，因而評價不足，今天對信貸評級公司苛責並唔公平，有啲搵代罪羔羊嘅感覺。現實問題係，過去由CDO產生嘅樓房信 貸泡沫，未來即使唔會乾涸，起碼亦唔泛濫，大量信貸突然從市場消失，你話毫無影響？CDO有如武俠小說中嘅楊過，身上嘅情花毒耐唔耐便發作一次，雖不致 死，但痛苦非常。ARM利率重整明年才係高潮，貝南奇可作嘅選擇有： 放棄支持美元匯價，全力阻止樓價下沉； 維持美元匯價，讓樓價有秩序咁回落。

　　上周好友出番晒嚟，係咪代表8月17日19386點已見底？四叔話係，而且帶頭入市，並提出上望25000點。不過，任何人嘅預言都同我老曹唔預測一 樣（時準時唔準）。短期分析，後市會在框框內活動。四叔8月17日主動出擊，反映咗超級富豪嘅投資策略——Bad market, good investing，亦即我老曹一再強調嘅「你驚我唔驚，你唔驚我先驚」策略。

　　信貸市場驟變，會否已令美國利率改變方向，同時令歐洲唔再加息，但全球通脹率卻唔下降？未來情況都幾尷尬。美國今年有1970億美元ARM貸款利率要 重新洽商，明年數字更升到5210億美元，喺咁嘅情況下，美國經濟又可以好得去邊？日本經濟則極之依賴出口（包括向美國同中國出口），日圓一旦升至111 水平，出口便受壓，令日本家庭若有似無嘅GDP增長率隨時消失。歐洲呢次亦受美國次按危機波及，令歐洲各銀行純利升幅收窄，影響股價。形勢較好係亞洲地 區，尤其係中國企業今年上半年純利表現十分出色，加上中國政府外匯儲備充足，可應付任何來自海外嘅突變。只係高質素股份O已偏高，由現水平上望，未來升幅 有幾多？香港經濟背靠祖國、面向世界，來自祖國嘅支持能否應付來自海外嘅風浪？過去一年由貝南奇努力營造嘅黃金歲月相當成功，但今年7月起受次按風暴打 擊，未來日子嘅黃金歲月係咪仲可維持落去？
　　美國聯儲局由12位成員組成，佢地來自美國12個主要大城市，每位代表該城市地區嘅經濟利益，任期14年，不得連任；每個大城市不得委任超過一個成 員。至於主席及副主席由總統委任，並須獲參議院同意，任期4年，但可連任。至於聯儲局公開市場委員會由12人組成，負責貨幣政策，7名官方委任、5名由聯 儲局成員中選出（其中1位一定來自紐約），每人任期只有一年。過去習慣，聯儲局主席必然係聯邦公開市場委員會主席，來自紐約聯邦銀行主席係必然副主席，後 者決定美國貨幣政策。聯儲局控制貼現率同聯邦基金利率，貼現率可自行決定，聯邦基金利率必須獲聯邦公開市場委員會同意才可實施。公開市場委員會每年開會8 次、每次2天，會後向大家發布貨幣政策目標；但亦可隨時召開，例如1987年10月股災及2001年「九．一一慘劇」之後。換言之，減貼現率只反映聯儲局 成員嘅睇法，減聯邦基金利率才反映政府態度，因此聯邦基金利率增減較貼現率更有代表性。呢次減貼現率成功阻止美股進一步下沉，目的已達，至於官方係咪同意 通脹率（CPI）升幅已受控制？9月18日可明朗。道指由7月17日14021點回落到8月16日12517點，如反彈前跌幅61.8%，可回升930 點，即係在13447點再遇阻力，令人擔心呢次反彈已近尾聲。港股因為有北水南流支持，唔排除指數有創新高嘅條件，不過當恒指接近23500點時，都係小 心啲好，千萬唔好一時極度悲觀、一時又極之樂觀，上述係散戶常犯嘅錯誤。

聯儲局減息空間唔大

　　作為策略投資者必須進退有據。如你7月26日前唔肯離場、8月17日卻騰雞，有邊個可以幫到你？次按問題我老曹已講咗一年，而你仍未做足防風措施，抵 你「濕身」。今天海嘯雖然已過，但滿目瘡痍有排執，相信2009年前仍未得執掂，咁快又想有歡樂時光？由於美國70%家庭係小業主，如樓價只調整10%， 估計有15%次按債券出事，以依家情況睇嚟影響有限；如樓價下沉20%，估計有50%次按出事，咁就大件事。至於呢次美國樓價下調幅度有幾大？請唔好扮先 知。次按問題唔在次按本身，而係美國房價將下調幾多？隨著ARM大量到期，美國人供樓開支上升，會否影響消費？加上聯儲局減息空間唔大（不然美元匯價將崩 潰，估計最多只會減0.75厘），何況如減息能治百病，又點解釋日本1990年至今嘅衰退？上周股市上升嘅理由只係因為No news is good news，唔係真係有乜好消息。本周以後係咪真係無晒壞消息？

　　我老曹1967年暑假剛離開學校到社會做事，已希望自己有一天可以成為百萬富翁。不過，40年後今天，百萬富翁都幾悲哀，因為今天港元購買力只相等於 1967年嘅3.3%。根據美國CPI數字，自1966年美元兌黃金出現不穩至2006年，過去40年美國CPI上升咗4倍（由50點升至200點）。根 據SGS另類CPI指數（由俄勒岡州立大學嘅Robert Sahr教授製作），SGS CPI指數由1966年50點升至去年500點，上升10倍。過去40年美國通脹率係美國立國以來從未出現過，理由係美元唔再兌現黃金。由於港元同美元掛 鈎（1982至83年兌美元更貶值），所以本港通脹率較美國有過之而無不及，由此可見貨幣同黃金唔再掛鈎後過去35年各國央行濫發貨幣情況。

　　今年夏季你必須擁有3000萬元或以上，才相等於1967年百萬富翁嘅購買力（唔計住宅）。40年光景金錢購買力縮水情況可見一斑。1980年中國改 革開放政策下，全球輕工業產品生產工序向中國轉移，利用中國廉價勞工、廉價土地、廉價資源，過去20年令全球輕工業產品無法漲價。2001年起原材料方面 中國已無法自給自足，必須向外入口、令全球原材料價格大升；然後係中國土地亦無法滿足需求，最後連廉價勞工供應亦不足。過去7年中國仍勉強保持住工業產品 出口唔漲價，但過去27年中國無法生產嘅產品喺全球都漲價。

中國基建項目進入高潮

　　1980年開始經濟環球化，跨國資金不斷向落後地區投資製造業，令落後地區大量人口脫離貧窮（1981年全球有40％人口每日依賴1美元生活， 2004年只餘下18％），但1980年代起OECD國家工人卻受害，因當地工序外移；90年代開始連中層管理人員亦受害（例如匯豐銀行等金融機構亦將部 分後勤工作移去廣州同印度做）。上述係本港建築工人必須面對嘅問題——香港建築高潮在1994年結束，其後本港地產資金大量進入內地，對建築工人嘅需求過 去10年一落萬丈，今年連本港建築師亦開工不足，有啲去咗澳門、廣州、上海等地開工，有啲去咗中東、有啲去咗印度等地區搵食。經濟環球化對資本家而言卻極 之有利，例如1980年本港工廠用300工人、年賺300萬，移到內地後用3000工人，年賺3000萬元。內地工資近年貴咗，又可移去越南、柬埔寨、孟 加拉……。二元社會唔係香港獨有，在全球任何地方都成為普遍現象。　　中國基建項目進入高潮，估計明年後退潮。今天中國路網快建成，大城市房屋亦已差唔 多，資金正進入二線城市甚至三線城市；反之，印度基建開始全速上馬，計劃喺2012年前投資4500億美元在公路、港口、電力廠上，估計可令印度GDP增 長率由過去4年平均8.6％上升到未來年率10％（反而中國GDP增長率將由依家11.5％下降至未來8％）。中國大興土木喺原材料價格偏低期，成本便宜 好多；印度基建項目近年才上馬，原材料價格唔便宜、建築成本自然較中國貴好多。除上述外，中國資金主要來自外貿（自己賺回來），印度資金有賴外資流入，情 況有如1990至97年時東南亞國家，印度後市點睇？

錢未到影響力已達

　　內地銀行今年上半年純利急升，主要受惠於證券市場整體收益水平提高及央行不斷加息將息差擴闊，令各商業銀行出售嘅理財產品數量上每月以逾30％速度上 升。以中信銀行（998）為例，上半年出售理財產品共233.31億元，來自呢方面收益令上半年純利大大提升，加上央行不斷加息令利差擴闊；房地產就無咁 幸運，喺中央一再打壓下，房貸業務升幅漸受限制。上半年來自出售理財產品而令純利大幅提升嘅情況到底可維持幾耐？來自息差擴闊所造成嘅純利上升相信下半年 仍可繼維，但明年又點？咁內地金融股能否更上一層樓，仍係未知之數。　　今天中國真係財大氣粗，一聲開放個人資金自由行，已令港股上周連升五個交易天。錢 未到影響力已達，你話威唔威！周一開始中國銀行（3988）天津4家支行可代內地同胞直接投資港股，日後上述服務可能向其他銀行及大城市擴散（此乃後 話）。由開戶到直接投資港股只需5天時間。換言之，內地資金正式來港係9月份嘅事，內地一般散戶用作投資股票嘅資金係20萬元人民幣左右，加上只有中國銀 行天津4間支行接受辦理，真正來港嘅資金有人估計一天約20億元左右，起不了乜嘢大作用，相信係雷聲大雨點小；有A、H發行嘅17隻國企股上周在本港已上 升唔少，等候內地同胞來港接火棒？


投資內地房產走向三線城市


　　1980年代2元人民幣兌1美元。1989年六四事件後中央為刺激內地經濟，放手讓人民幣貶值，到1993年12月10元人民幣才兌1美元。上海朱 1994年1月決定8.7元人民幣兌1美元，今後許升不許跌。2005年7月起宣布升值，到今天係7.6元人民幣兌1美元，如重返1980年代初2元人民 幣兌1美元，即係話仲有排升。反而港元無多大升值空間（不然將引發另一次1997年8月至2003年7月式通縮，上述亦係我老曹反對港元同人民幣掛鈎嘅理 由）。內地同胞來港投資，必須面對匯率風險，例如中央加快人民幣升值去壓抑內地通脹。

　　深圳唔少大銀行近日紛紛收緊房貸，把首期付款比例由三成提高到四成，甚至暫停二手房按揭。例如深圳發展銀行、華夏銀行、深圳建行等普遍只提供六成按揭，如超過三套住房者唔提供貸款。雖然係咁，深圳商品房價仍較去年同期上升14.3％。

　　兩年前投資中國房產要去北京、上海、深圳、廣州，依家呢啲城市房產已太貴了，好多轉向二線城市例如昆山、蘇州，去年至今已漲咗一倍多，升幅較上海大， 杭州升幅亦超過上海，其他如徐州、天津、成都、桂林都漲起來了，有人已向三線城市開發。今天一線城市地價佔樓價50％、二線城市地價佔樓價30％至 40％、三線城市地價只佔20％，亦係發展商漸向三線城市進軍嘅理由。二線城市漲起來另一理由係交通改善，從前上海開車到昆山要一個半鐘頭，依家係18分 鐘；到蘇州要兩小時，依家30分鐘；以前到杭州要三小時，依家一小時。今天住在昆山透過高速鐵路到上海返工完全可行，連住在蘇州嘅人到上海返工亦可以，情 況有如今天喺台北上班而家在板橋、永和一樣。

　　戴相龍出任天津市長後，更將天津停用半世紀嘅地鐵重新改造，到2010年將有共七條地鐵全長約130公里全部通車（其中六條係新建造嘅），加上一條高 速直達北京公路，再加京津城快速列車明年7月全線通車，令天津出現翻天覆地嘅改變。二線城市樓價急升，亦有其本身條件也。