二線股下周炒落後

　　8月24日，周五。恒生指數跌45.08，收22921.89；成交832.9億多元。8月期指跌28點，收22904點；9月跌46點，收22865 點。當恒指接近7月26日高點23557點，應否再追入？見仁見智。我老曹認為恒指高出23000點應沽貨分析仍然有效。　　好友上周五恒生指數跌穿 250天移動平均線後投降，股市淡友全力補倉下回升。今時今日最大爭拗係恒指見頂未？即7月26日恒指23557點係最高抑或8月17日恒指19386點 已見底？呢段爭拗日子，相信炒賣二線股又再活躍。

　　好多人告訴你2000年科網股泡沫爆破後，科網股跌幅係點。冇人話你知2002年10月10日股市見底後，納指由1108點上升到今年7月15日 2724點，升幅145.8％；同期道指由7197點上升至14021點，升幅只有94.8％，即細價股如反彈，升幅往往較大價股大！2002年10月至 今年7月納指升幅較道指快53％。好奇怪，本星期大價股已重返高位，而二線股卻大落後【圖】。換言之，下周炒落後機會好大。

次按變刺耳字眼

　　花旗建議購入中銀香港（2388），估計今年每股獲利1.38元，上升4.1％，O14.2倍，目標價23元。亦推介中國銀行（3988），估計今年 每股獲利0.22元，上升21％，未來O18.2倍；更加推介工商銀行（1398），估計今年每股獲利0.234元，上升33.3％，O20倍。

　　今天中行股價跌5.4％，見3.87元（一度跌8.1％），理由係公布有次按，上述兩個字近日已變得好刺耳。中銀香港股價跌4.1％，見18.76元。國壽（2628）再升2％，見33.65元，本周共升22％。中國聯通（762）升2.1％，見13.68元。

　　美國次級債券風波、人行加息及9月開放港股自由行試點下，滬深指數不但打破5000點大關，周五更見5125點，有色金屬、地產、銀行、煤礦、藍籌、 二線股繼續輪流炒，而深度挖掘二線股大幅上揚機會，更成為破5000點後主流，例如高檔白酒、水務、高速公路、煤礦、電力等，乳業消費類亦值得關注，被高 吸引力回報吸引。內地投資者暫時忘記風險，上述情況下周會否蔓延到本港，令一度被洗倉二線股又再抬頭？

　　今時今日，全球500萬億美元市值衍生市場已失去15萬億美元市值，數字十分驚人。衍生市場突然消失財富會否影響現實世界，而令美國甚至全球GDP增 長率下降？今時今日財富得失已不在乎閣下點樣勤力，而在乎你係咪錯誤時間、錯誤地點做錯誤決定。現代社會荒謬係有人畀3萬元一呎買豪宅，但建築公司卻負擔 唔起扎鐵工人日薪950元。過去10年本港建築公司除中國海外建築（688）外，有幾多間建築公司建築本業賺大錢？

　　今時今日香港樓價中70％以上係地價，反而建築成本佔好細比例。細個時所讀詩：「織女少有禦寒之衣，耕夫更無隔宿之糧。」古時做得最辛苦一群，往往係 收入最少階層；今時今日資本主義社會下，情況並冇改變，此所以有社會主義及共產主義出現，奈何行社會主義國家GDP增長率都下降（例如1945至80年英 國），行共產主義國家更一塌糊塗（例如1949至78年中國）。全世界工人皆值得同情，佢地為社會付出最多，但收入往往最少，但有乜辦法？尤其係1980 年經濟環球化壓力下，愈係先進社會，工人愈受害；反而虛擬金融世界炒上炒落者，卻成為最大受惠者。呢次次按危機下，單係2007年估計便有美國200萬個 家庭將失去自住物業，同期對沖基金經理繼續世界各地買豪宅，令售價繼續上升。

港元在外國購買力五年剩一半

　　美國銀行用20億美元認購Countrywide優先股後，周四開市前Countrywide股價再升20％。該公司CEO莫茲洛接受電視台訪問，佢 認為信貸環境並未改善，美國樓市亦未見底。此言一出，Countrywide股價又再回落，收市只升20美仙或0.9％，報22.02美元。今天美國金融 市場有如查大俠筆下楊過中情花毒，雖然憑功力壓住，但耐唔耐便發作，痛苦非常。科網股泡沫爆破一直到英隆及世界通訊破產才告終。呢次次按事件又點收科？只 有新世紀申請破產係咪足夠？

　　仲有，日圓利差交易平倉係咪已成過去？過去6年日本銀行零利率（或接近零利率）政策下，日本已成為全球最大廉價資金來源，單係對沖基金便已借入7萬億 日圓（或600億美元）。摩根大通東京分析員Tohru Sasaki估計，單係日本，小投資者涉及利差交易金額已達3500億美元，利差交易係金融市場另一計時炸彈。過去兩個月日圓一度升值10％，近日才回落 多少，已令日經平均指數跌15％。下次日本銀行開利率會議係9月18至19日，到時日圓價又點睇？

　　港元兌英鎊一度跌至27年內最低價。去完倫敦返朋友話，邊D好貴（其實唔係，真正情況係港元太唔值錢，因港元一直追隨美元貶值）。2002年至今港元 率上失去三分一價值，再加上購買力下跌，2007年港元外國購買力只得番2002年時一半，一旦離開香港，港人便覺得D好貴！高盛估計，未來六個月受房地 產放緩影響，美元價仍會進一步回落，因7月份新屋出售年率82萬間，較6月下降1.7％，係2000年以來最細。高盛估計6個月內將見1.43美元兌1歐 羅！

　　紐西蘭7月份貿赤擴大至63.2億紐元（6月份62.2億紐元），因牛油、肉類及鋁出口下降。依家1紐元兌71.6美仙，7月24日係81.1美仙，即至今回落12％。紐西蘭7月份出口跌13％，至26.4億紐元；入口減少7.6％，至34.3億紐元。

內地A股認真好，由2005年7月至今升幅超過5倍，單係今年已上升88％。中國人行今年第四次加息，反而令A股指數創新高。基於配額制度，外資只能持有A股總市值1％。

　　去年11月當A股指數升穿2000點時，外資已認為係泡沫；今年3月再升穿3000點、5月升穿4000點、8月升穿5000點，證明外資對A股冇影 響力。至今A股較本港H股溢價超過50％，9月開始內地實施資金自由行，會否令內地人拋售A股吸納H股？木宰羊。依家恒生國企指數平均O 24倍，已進入偏高水平，純投資角度已唔值得，開始一如內地A股市場，股價由供求決定，而非反映公司業績價值。

　　近期中國政府投資百仕通結果，令領導層明白中國投資技巧上仲好幼嫩，唔夠老練。呢次只批准內地人投資港股而非外國，話到尾香港中國政府眼皮底下（睇到實），相信唔會重演百仕通事件。

純炒AH溢價唔持久

　　摩根大通估計，每年自中國資金約1200億到2000億美元，最終必定推高港股O。另一方面，內地A股仍然咁好玩，點樣吸引內地投資客來港？所謂AH 股差價收窄，家發行A、H股公司不外27隻，依家A股較H股平均有50％溢價（上周五84％），純粹炒A、H股溢價收窄去吸引內地客策略唔長久，應該介紹 D內地冇得投資項目畀大陸客，先至對香港經濟有幫助。一如港人投資美股，第一步自然係道指成分股，然後擴散到標普五百指數成分股，最後唔再局限指數成分 股，而係所有美國上市股份，相信內地客來港投資心態亦係咁。股票市場內充滿一年內升幅三位數字二線股，問題係點樣去捕捉、幾時入市，基礎分析及走勢分析有 一定幫助，但千萬不可盲目入市，亦不可overbuy一隻二線股，應明白二線股升降周期同恒生指數唔一樣。股票市場賺大錢方法仍係購入一隻二線股，耐心睇 住佢成長成為大藍籌股。Bad market, good investing。通常股市最惡劣時刻，亦係入市時刻。

　　據《紐約時報》報道，2000年美國人平均收入55714美元，2005年是55238美元，反而微跌0.85％。《時代》雜誌報道，去年超過30萬 美國人年收入超過100萬美元，人數較2000年上升接近一倍，即過去六年美國情形係富者愈富，但窮者並冇愈窮。有人認為2003年開始美國經濟繁榮期係 借番，主要透過利率減至1厘、政府減稅及美元貶值，因此2005年美國人均收入仍唔及2000年，只有愈借愈多去支持高生活水平，而借錢消費過程中，令小 部分人真正富起來。隨次按出事，美國人能否維持再借貸經濟繁榮？分析界指出，依家美國樓價已令約13％次按出事，如美國樓價再回落10％，估計將有超過 50％次按出事。地產界人士估計，到2009年美國樓價將再回落12至15％。

　　從事信貸評估人士話，分析信貸十分困難，經常存在50％ margins of error。呢句話認真令人印象深刻。隨次按紛紛出事，信貸評估公司計劃收緊尺度，如此一來，會否引發信貸收緊？根據美國按揭銀行家協會資料，過去兩星期 申請按揭者減少5.5％，但仍較去年同期上升14.2％。而國庫券90天期息率已跌至3.7厘；反之，商業票據獲標普A1評級、有資產抵押、30天期票據 利率仍高達6.1厘，兩者利率差係1987年10月股災以來最高。未來90天有1.1萬億美元有資產抵押商業票據到期，如到時商業票據利率仍唔回落，擔心 引發一場信貸收緊潮。

原材料價格去年見高峰

　　根據哈佛大學政治科學教授Jeffery FriedenGlobal Capitalism提及：1870年英國利物浦物業較美國芝加哥物業高出60％，到1913年只高出16％，因美國漸成為世界金融中心，其GDP以雙位 數字上升！呢位教授未能活到2007年，不然佢將見到芝加哥物業較英國利物浦高出60％。利物浦一度係全英國工業中心甚至全球製造業中心，今天世人只知佢 係球隊。兩年前有朋友去過利物浦，根據佢轉述，利物浦失業率好高，到處都係失業漢、醉酒佬。500年前全球金融中心係威尼斯，下周二係威尼斯人酒店澳門開 業。5年前去過威尼斯朋友話，邊扒手甚為猖獗。1990年全球最貴物業東京，1997年香港，2007年在倫敦，未來邊處？

　　1980至2001年原材料價格跌完可以再跌。2001年至今隨中國同印度需求上升，而國內已無法滿足供應，因而從外進口，引發全球原材料價格上升。 另一方面，去年5月至今國際原材料價格出現參差頂，一來因原材料價格升幅已大，出現替代性產品；其次資源價格高企刺激礦產投資，而改變未來供應。值得注意 係，去年5月至今美元價回落，換言之，原材料價格去年已見高峰，完成調整後看跌看升，此乃後話。