8月15日，周三。恒生指數急挫631.6，收21375.72；成交778億元。8月期指跌515點，收21388點。技術上睇，最強大支持係250天線，依家响19790點；另一支持位係前低點，即5月30日嘅20184點。
今天滙控（005）跌2.4％，收報137.9元；中銀香港（2388）跌3.1％，收報18.62元；利豐（494）跌4.6％，收報24.95元，半年獲利10.5億元，上升38％；裕元集團（551）跌3.5％，收報23.65元。
滬深指數微升0.07％，收報4798.75，成為全球跌市嘅避難所。
80％投資者喜歡「Buy and hold」策略，呢招响升市中好好用；只有20％投資者採用「Jumping」策略，佢地回應市場，知所行止，更重要係佢地知道幾時應無所事事、幾時應全 力進攻。佢地係精明嘅策略投資者，反而熱愛波幅（Volatility）。兩類唔同嘅投資者，都有成功同失敗者，分別在於揀股能力。以森池兄為例，佢係 Buy and hold投資者中嘅成功者；我老曹因工作崗位方便，比較上喜歡做Jumping（每年由一個行業跳去另一行業）。响1967至97年大牛市嘅表現， Jumping成績唔及Buy and hold；1997年至今10年，Jumping成績應較Buy and hold優勝。
歐美經濟已見繁榮高峰
展望未來，一個23億人口嘅市場（中國加印度）正走上香港戰後到1997年五十年經濟繁榮之路（由貧窮到小康，再由小康走向富裕）。香港經濟一如其他 OECD國家，社會進入二元化，即20％家庭富有，其餘80％家庭小康或貧窮。中國經濟剛走完貧窮到小康之路（印度仍在努力中），開始由小康走向富裕（大 約需時20年）。唔少國企、紅籌股股價响未來隨時上升100％或以上，但風險亦好大。各位不妨做中國經濟號快車上嘅搭客，2001年起投資策略向中國股份 傾斜；反之，歐美經濟相信今年年中已見另一繁榮高峰期，係咁先。
自從有《聖經》以來，便有人預測世界末日。二千年過去，人類仍活得相當愉快。所謂盛世危言，唔係預測呢樣產品短缺，就係預測嗰樣產品供應不足，正是憂 慮千年無米煮、又憂無命等千年。我老曹睇法係，事物離唔開盛衰循環。戰後金價穩定咗20年，1968年起金價蠢蠢欲動，1971年8月利用美元滙價浮動， 引發10年牛市，然後又回落20年到1999年（或2001年），牛市又再出現，係咪响2006年結束？未敢肯定，但有咁嘅可能。過去黃金係美股死對頭， 1966年美股見頂、金價蠢蠢欲動；1982年美股見底，金價响1980年見頂，1970年代投資策略係棄股從金，1980年代又轉為棄金從股。自從黃金 證券化（發行ETF）後，上述情況已出現改變，例如2001年金價上升、2002年10月美股上升；去年6月金價見頂，今年7月美股亦見頂？透過ETF， 證券投資者持有600噸黃金，令黃金變成另一種證券，失去過去股市避難所嘅地位。金價表現似股票多於似貴重金屬。油價1980年見頂回落，到2000年見 10美元，過去7年升上80美元，去年同今年形成雙頂回落。今天油價隨咗係能源外，亦習染咗對沖基金嘅性格，成為另一炒賣工具。對沖基金一旦面對大量贖 回，未來油價有下跌壓力。油價一如黃金，亦擁有雙重性格。
美消費力下降逐步浮現
香港住宅從前只作居住用途，踏入1980年代轉為投資（或投機）工具，大量炒家入市，將樓價由1984年每呎600元推高至1997年每呎1.2萬 元；可憐白眉董唔明白香港物業已變成炒家手上嘅籌碼，真係以為出現短缺而推出「八萬五」錯誤政策。今天香港物業除豪宅外，變回只有居住用途，只有豪宅仍可 作投資（或投機）用途。受經濟景氣影響，豪宅升降幅度可以好大，其餘樓價升降幅度好有限。
美國嘅問題係金融機構把樓按證券化，令次按資金來源充足，出事後金融機構再不能無止境地將樓按證券化後出售，即美國物業市場面對信貸萎縮。呢段日子由 今年4月New Century Financial出問題開始，到底維持幾耐？冇人知道，但唔係短期內可解決。次按危機開始影響到沃爾瑪百貨及Home Depot今年第二季業績。沃爾瑪第二季同店銷售只升1.9％，係1980年以來最細升幅；Home Depot更減少5.2％，係4年來第一次出現營業額下降（美國家庭用品需求下降中）。從沃爾瑪及Home Depot表現睇，擔心美國樓市回落影響零售業純利。高油價、樓市疲弱、信貸收縮，令美國人消費力下降，上述影響正逐步浮現。
美國全國建屋商協會周三公布8月份住宅市場指數，相信可進一步確認美國樓市進入1989至91年式衰退。上一次係1989年10月，上述指數跌至48 點（低於50點代表市場十分差），1990年1月更跌至20點，到1992年10月才重返54點，前後共三年。1990年第四季美國GDP係負3％， 1991年第一季GDP係負2％，連續兩季GDP負增長，確認衰退。呢次住宅市場指數最高係2005年6月72點，去年5月首次低於50點，見46點，今 年7月見24點，估計8月份可能低於24點，代表美國樓市進入回落期已超過一年。參考1989至92年例子，估計最快2009年下半年，指數才重返50點 以上並擺脫樓市衰退期，即需時兩年。
珠海市海珠區濱江東路一處名叫金海灣嘅豪宅，計劃以每平方米4.2萬元人民幣出售，每戶面積300平方米以上，即每單位售價1260萬以上。買家以香 港人或華僑為主，最大面積2000平方米，約售8000萬元人民幣。2004年最初出售時，每平方米1萬多元，去年2月仲係2.5萬元，今年7月3.5萬 元，今天係4.2萬元，升勢之快、升幅之大，令人咋舌。
深圳2003年房價平均每平方米5000元，2005年度漲到1萬元，去年關外1.4萬元、關內2萬元，今年豪宅為每平方米3.5萬至4.5萬元。
廣州今年6月房價平均每平方米8000元，中心區達1.1萬元，較5月上升1000元，係近年單月升幅最高嘅一次。
杭州房價普遍喺萬元以上（年初才8000元）。南京70多平方米二手房售32萬元，平均每平方米4570多元。重慶市去年賣緊2700元一平方米，今 年6月已漲到3055元。成都2000年仍售3000元一平方米，2002年已漲至4000元，去年突破6000元，最近6900元，市中心豪宅售1萬元 以上一平方米。
內地資金由股市回流樓市
21世紀不動產資料顯示，資金已由股市回流樓市，推動房價上漲。二手房價以上海升幅最慢，成1.165萬元一平方米，較1月份升3.6％；杭州升幅最 大，升14.35％，平均成交價9923.55元；成都平均成交價5283元，升4.2％；天津平均成交價4407元，升5％；北京平均成交價8960 元，升6.2％。
天津今年6月一手樓銷售價5819元一平方米，較去年同期上升16.4％。
香港家吓最便宜嘅房價（俗稱上車盤）1.5萬元一平方米，大部分喺元朗、屯門、天水圍一帶；普通50至80平方米住宅樓係2萬到3萬元，豪宅每平方米 10萬元以上，半山豪宅更達20萬元以上。香港人均收入3.8127萬美元，深圳8619美元，係香港人嘅22.6％，但房價係香港45％。
瑞安房地產（272）宣布以8547萬美元增持上海創智天地，由佔70％增至86.8％股權。
近年中國乳品市場一片漲價聲中但收購牛奶卻冇乜點加，每公斤仍係2.6元人民幣，每頭奶牛要生產15公斤才能收支平衡。全國40％奶牛養殖戶出現唔同 程度虧損，因飼料成本不斷上升，但鮮奶收購價一直低企，理由係市場被少數大企業壟斷，壓價現象十分普遍。幾家大乳品企業一年賺幾億元但奶農卻沾不到一DD 好處，理由係冇議價能力。中國太多奶農令佢地所生產嘅牛奶只有乖乖咁賤價出售畀加工企業、製成奶製品後加工企業卻可賺取豐厚利潤。
中國啤酒行業生產商太多；過去30多年產能上升30多倍，去年全國產量3500多萬升。1970年中國生產啤酒企業只有8家，年產量100多萬噸，至 今產能上升35倍。今天一瓶普通啤酒只能賺2分錢，一瓶啤酒低檔者只值7、8角，高檔亦只係2元。中國啤酒70％係低檔，高檔仍以外國品牌為主，形成啤酒 生意賺唔到幾多蚊年。
粗放型企業重新洗牌
中國勞動和社會保障部部長田成平估計，過去30年有超過2億農村勞動力實現咗向非農領域轉移。為進一步拓展農村勞動力轉移就業空間，中央政府將提供就 業服務及在職培訓，為農村勞動者提供多種形式職業訓練體系，取消農民進城務工限制，完善農民工參加醫療保險，努力解決農民工工資偏低、子女上學難嘅困難 （我老曹資助嘅北京農家女職業培訓學校早已喺2003年開始為中國農村婦女提供職業培訓，依家中國政府亦重視就業培訓，可喜可賀）。我地一味批評貧富懸殊 現象係冇用嘅，社會富裕階層應向貧窮階級伸出援手，才係資本主義嘅最高成就。
中國「加工貿易限制類商品目錄」將於8月23日正式施行，將大大收緊加工貿易公司「銀根」，令珠三角長三角製造業加速結構調整。因土地資源、環境限制，勞動人口不足轉型係必需，呢次透過加工貿易限制令粗放型、勞動密集型、產業鏈低端企業面對重新洗牌，短期壓力好大。
改變經濟增長方式可緩解環境壓力，中國石油儲量佔全球1.8%、天然氣佔0.7％、鐵礦石佔9%、銅價佔5%、鋁土等不足2%，房地、草資源、水資 源、森林資源都不足、1990年起至今中國石油消費上升超過100%，天然氣92%、鋼上升143%，銅上升189%，鋁上升380%。鐵礦石消費佔全球 總量40%，水泥佔全球50%，電力僅低於美國，油氣資源不足應付未來十年需求，如果唔加快經濟轉型，依家嘅優勢好快便消失，到時會更麻煩。
8月16日起中國再發行280億元人民幣20年期國債利率4.52厘，進一步吸收銀根。
8月14日中國國務院參事、中國可再生能源學會理事長石定寰認為，經過10多年努力，去年中國可再生能源年利用量總計為2億噸標準煤，佔一次性能源消 費總量8％。依家小水電、風能、生物質能、太陽能、地熱能中，以風能利用進入快速發展期。去年風能裝機容量已超過前20年加起嚟嘅總和，太陽能熱水器已有 1000幾萬家庭裝咗，近2億人用太陽能熱水器，成為全球最大嘅太陽能熱水器生產國及使用國。世界太陽能會今年9月响北京召開，估計未來風電及太陽能熱水 器喺中國大有前途。
世紀城市（355）同中國輕工業集團中國原子能工業公司合作，响蒙古及其他國家開發鈾資源，估計2020年核電總裝機容量達4000萬千瓦，以後每年 再建設二至三台100萬千瓦嘅核電機組。過去3年鈾價上升2倍，達每磅48.1美元，美林估計未來5年價格可再升1倍。整項投資1億美元，估計2009年 開始有回報。
東西方盛衰亦不離循環，只係周期長達510年。西方崛起自14世紀文藝復興開始，至今已超過500年，代表西方經濟力量盛極而衰；中國經過百年苦難， 國共戰爭完畢後，正進入長達500年嘅崛起期。1950年開始中國進入國運興隆期（呢個觀點過去幾十年我老曹一再強調）。只係興起嘅第一個100年仲係好 混亂，情況如15世紀歐洲十分動盪不安。中國真正大治要2050年後才開始，到時我老曹已冇命睇到矣。
對沖基金贏得大輸得杰
大量事物盛衰形成趨勢，此所以我老曹一再強調「有智慧不如趁勢」。我老曹有位親戚1967年响香港暴動時去咗加拿大，1997年才回香港。香港30年 變化，對佢嚟講恍如隔世，因為佢完全錯過咗香港經濟30年繁榮周期。類似周期1980年响深圳重演一次，估計深圳高潮喺2010年；上海起步遲咗D，高潮 期亦可能推遲D。重慶、武漢起步冇耐，往後嘅好日子仲好長。香港2003年經濟復甦其實借力於中國，而非自發性。
槓桿有如雙刃劍，响升市中可以升得較別人快，但喺跌市中亦跌得較別人速。過去五年被視為投資界天才嘅對沖基金經理，其實只係利用槓桿將純利擴大；同樣 理由，槓桿作用亦令近日對沖基金大跌。關於呢方面嘅討論，好多投資者亦耳熟能詳，真正長期能跑贏大市者寥寥可數。剎那光輝唔代表永恒，短期跑贏大市可能只 係槓桿所起嘅作用。過去Drexel Burnham Lambert（末日博士過去曾服務嘅公司）最終申請CII（破產），近年有老虎基金……。其實佢地只係賭得大、贏得大，一旦手風唔順時亦輸得大。大如花 旗集團，响1989至91年美國房地產衰退潮中亦曾面對危機。我老曹對所謂大行推介通常都Take with a grain of salt，喺牛市中唔少人係投資天才，一旦轉為熊市，卻輸到一隻狗咁，而忘記畢非德教訓─—投資第一條：唔好輸錢；第二條：唔好忘記第一條。因此投資必須 切記保本第一、賺錢第二，此所以我老曹反對buy and hold策略，幾時都要用止蝕盤保護。訂立止蝕位亦要一定技巧，trading非我老曹所長，我老曹投資策略一向以中長線為主，一年之內搵一至兩個大趨勢 唔難，一旦趨勢形成便加入，餘下便係耐性，等佢開花結果，但不忘利用止蝕盤保護上述投資。
投資策略中最重要兩句：一、溝上唔溝落；二、止蝕唔止賺，運用得宜已可成為小富。至於day trade，我老曹所見，10個之中9個輸。
中達威生物（8019）、北亞策略（8080）、華夏醫療（8143）、上華控股（371）、順昌集團（650）停牌。
沒有留言:
發佈留言