2月7日，周三。恒生指數升24.49，收20679.69；成交四百九十億九千六百多萬元。期指跌22點，收20682點。東亞（023）升 2.2％，見四十六元二角，周四公布業績，預計去年純利上升21％，見三十三億元。恒隆地產（101）跌2.8％，見二十二元三角，瑞信估計純利跌3％， 因去年缺乏售樓收益。聯想（992）升1.3％，見三元二角四仙。永義實業（616）升26％，見二元零二仙，公司宣布與Wits Basin Precious Minerals Inc.合併。二線股嘅吸引力係隨時可以大升或大跌，投資呢類股份宜特別小心。
內地新批股票基金A股反彈
滬深三百指數第二天上升，漲53.75或2.3％；中信證券升4.3％，見三十四元七角九分；萬科升5.3％，見十五元三角六分。中國證監會批准五隻 新股票型基金發行，計劃籌集唔少於三百億元人民幣，用作投資股票。內地去年12月份宣布禁止新基金出售限制，今年2月5日取消，令內地A股出現反彈。
平安保險（2318）上海路演後再去北京，同時結束咗廣州、深圳兩地路演。完成北京路演後，2月8日晚便宣布定價、2月9日公布發行A股股價，估計超 過四十元一股。去年內地A股指數上升130％，開戶總數打破八千萬戶，投資基金吸收咗超過八千億元人民幣資金，愈來愈多國人認為股票應成為個人資產嘅一部 分。展望今年，海富通證券估計，上市企業去年純利升幅30％，今年純利升幅超過20％，股權分置改革及管理層激勵機制完成，市值考核機制逐步引入，使大股 東、小股東與管理層利益趨於一改。上市公司更努力增加盈利及注入優質資產，甚至整體上市，因可觀嘅淨利潤有助股價上升；新會計準則出台及實現，將令今年成 為業績提升年（物業價值按市值入賬，產生嘅升值視作純利計）；加上所得稅併軌，稅率由依家35％降至25％，有助提升整體業務9％以上。人民幣持續小幅爬 升，喺升值過程中會繼續吸引資金流入資本市場，令人民幣升值對實體經濟影響有限，但對資本市場則有利。
中國1月份外貿盈餘估計達一百五十五億美元，令更多資金流入中國；出口較去年同期升25％、入口升16.4％，估計今年中國外貿盈餘達二千億美元（去年為一千七百七十五億美元）。2005年7月至今，人民幣只升值4.3％，對中國出入口未見有重大影響。
香港旅發局估計，今年訪港遊客增長率只有4.6％，因亞洲其他地區大力吸引大陸遊客。估計今年來港遊客人數只有二千六百四十萬人次（去年升幅為8.1％）。面對其他地區競爭，香港計劃將注意力放喺商務訪客上。
任何謬論都有大量支持者
高盛睇好東方海外（316），目標價七十四元；大摩給予廣船（317）目標價三十元二角，評級為增持。連大行亦開始推介二線股啦，以廣船為例，其市價 已較我老曹2005年年底推介時上升十倍以上，能否更上一層樓？花旗認為，航運股近期上升只係反彈，而非再度形成上升趨勢，我老曹接受花旗嘅睇法。運費經 過 2005年第四季及去年第一季回落後，去年第二季及第三季貨櫃運費回升；加上去年下半年油價回落，為航運業提供有利環境。今年及明年又點？隨着大量新船落 水，歐亞航運費今年上升空間有限，明年仍面對壓力。至今運油輪租金仍乏起色，更多新船訂單轉向其他船種，未來航運股應否睇得咁好？見仁見智。各位宜養成獨 立思考能力，大行推介可以參考，但不宜盲目接受。
去年6月「黃金十年牛市論」，證明呢個黃金牛市只有五年壽命（2001年10月至06年5月）。去年7月唔少大行睇見油價一百美元一桶，今年1月油價 曾見五十美元才反彈。今年1月內地A股「牛市十年論」，結果將會點？投資市場充斥着大量謬論。有趣之處係任何謬論都有大量支持者，最緊要故事講得動聽，甚 至英隆股價亦可炒到半天高！2000年TMT泡沫就係由大行大力推介所引發，事後部分大行被美國司法機構起訴，而且要向投資者賠償損失。
根據殊仔昨天所提嘅財政預算案，未來兩年美國國防開支每年增加六千二百四十六億美元。今天蘇聯已解體，「中國威脅論」係搵嚟講，美國大量增加國防預 算，目的何在？就係所謂「反恐」。响咁嘅環境下，美國政府債券孳息率遲早升穿五厘甚至更高；美國長債利率分別喺2003年年中見四厘一三五及2005年年 中見四厘一五一，形成雙底。如升穿五厘，即1987年股災後所形成嘅利率長期下降軌失守，代表由1980年起長債孳息率由十五厘開始回落，喺2003及 05年形成雙底結束，未來利率恐怕非大行估計咁回落，而係剛剛相反向上升！
格蛇最叻發「I.O.U.」
1987年格蛇出任聯儲局主席後，開始咗全球資金泛濫期，隨着格蛇2006年2月退任而結束。任內佢濫發資金所造成嘅全球泛濫局面仍然存在（尤其係內 地 A股市場）。今天提出「撞毀預警」（Crash Alert）似乎係癡人說夢，理由係群眾係盲目嘅，大部分人睇相同嘅電視節目、分別唔大嘅報章評論、聽相同嘅電台，得出大同小異嘅想法，直到災難發生之 後。
1987年10月美國出現股災後，格蛇為刺激經濟重新活躍起來，便大量發行I.O.U.。銀行體系吸入大量政府票據後便增加信貸，資金流入資本市場及 物業市場，經濟更繁榮起來。自從中國改革開放政策落實後，中國成為各種消費品嘅廉價加工區，大量廉價消費品响中國生產，然後運到美國，令美國CPI升唔起 嚟。每次有危機，格蛇便大量發行I.O.U. 去刺激經濟，令佢任內做到美國經濟「冇衰退」（包括2001年「九．一一慘劇」後）。問題係1987至2006年濫發嘅美元喺全球流竄，金價2001年 10月開始上升，2004年6月聯儲局必須加息去增強別人對美元嘅信心；去年10月起，即使L增長率亦要放緩，令美元滙價恢復強勢。去年5月後，全球廉價 資金供應來源已唔再係美國而係日本。由於日本經濟似好非好，日本銀行1998年起至今大部分時間都採用絲路利率，結果令日圓滙價十分疲弱，最近歐洲央行已 表示不滿，日本央行嘅廉價資金政策亦面對壓力，即使2月份唔加息，恐怕3月亦會宣布加息。
趁Booming Time養肥自己
歐洲央行本周開會討論貨幣政策，估計3月份利率將升至三厘七五，6月份利率上升至四厘（係2001年9月以來最高）。最後輪到中國，中國人民銀行為阻 止人民幣升值，唯一辦法係「強行吸納」流入嘅美元，令人民幣以年增長率16.5％嘅速度上升。濫發人民幣嘅結果造成樓價同股價狂升，人行種種措施出台未能 收效，理由係因為貨幣仍在高速上升。資深分析員已指出中國經濟正面對「Boom & Bust」威脅，但係冇乜用。九十年代初期，《信報》曾反對聯滙制度，擔心香港經濟Boom & Bust，結果反被別人指為「唱淡」。2002年起眼見同類事件喺中國重演，便鼓勵大家從國企股身上獲利。既然明知中國無法避過Boom & Bust命運，點解唔喺經濟迅速增長期（Booming Time）養肥自己，去應付未來泡沫破裂期（bust）？大部分人learn the lesson the hard way！例如1997年7月後香港嘅負資產時期……。一個泡沫可以維持幾耐？最少三年，一般五年，最長七年，因此要等到泡沫爆破後，別人才會認同泡沫論。 响泡沫未爆破之前，一如《聖經》內嘅約瑟，應努力為埃及法老王儲糧，以應付未來出現嘅「七隻瘦牛」。由2002年起計，今年係泡沫進入第六年，泡沫會否在 喺今年爆破或2008年？亦要事後才知。近日大量「不良訊號」已出現，不過只有清醒嘅人才收到，其他人都在醉生夢死。夏蟲不可語冰，非無冰也，其未見冰 也。我老曹講極都冇乜人信啦！
標普五百企業經過連續十八季（四年半）純利雙位數字上升後，到今年1月31日止，57％企業已公布第四季業績，純利平均升幅只有8.1％（第三季升23％），小心！
澳洲儲備銀行宣布利率保持不變，此乃去年11月隔夜錢提升至六厘二五後至今未有改變。油價同生果價回落，令澳洲CPI升幅減慢（油價跌12.4％，生 果價跌5.2％）。去年全年通脹率3.3％（第四季3.9％），核心通脹率2.9％，仲喺係儲備銀行目標通脹率2％至3％之內，因此暫停加息。
去年上海GDP達到一萬零二百九十六億元，較2005年升12％。浙江省GDP達一萬五千億元，升13.5％；江蘇省GDP有望見二萬一千三百億元，升15％。長三角地區去年首三季GDP達二萬八千二百零九億元，較2005年同期升14.3％。
長三角經濟轉型見效
十六個城市之間嘅多層次格局依然冇改變，仍分四個層次。第一層係上海市，GDP達七千億元；第二層係南京、無錫、蘇州、杭州及寧波五城，GDP總量响 一千九百億元以上；第三層係常州、南通、嘉興、紹興、台州五市，GDP總量响九百億元以上；第四層次係揚州、鎮江、泰州、湖州及丹山五市，GDP總量响九 百億元以下。首三季度長三角地區實現工業增加值一萬四千四百一十一億元，升15.5％；工業利潤總額二千五百一十三億元，升25.8％。十六城市城鎮居民 人均收入一萬三千一百三十七元，較2005年同期升12.8％，CPI升1.2％；實現社會消費品零售總額九千零五十四億元，升14.8％。
以增長率計，上海開始減速，其他城市反而增速，主要係農村市場消費增長率快於城市。長三角一帶去年開始見到經濟轉型成效，就係固定資產投資整體下降、 消費市場增長率上升，一度被外界稱為「天價」嘅長三角房地產去年整體降溫，商品房空置面積上升73.9％；消費仍然上升，上海升幅為13％，農村更達 16.3％。長三角一帶經濟漸由出口及製造業帶動，轉型為內部消費帶動型。
油價見100美元係危言聳聽
風險與報酬，唔少人誤解以為高回報項目必然風險大，其實剛剛相反。如你响別人極度睇淡某行業或某隻股份時吸納，可能吃眼前虧，但因為入市時風險已唔 大，一旦潮流改變便可獲利。反之，喺火紅火綠之時入市，除非可及時賣掉（貴買貴賣），不然最終會吃虧，因為入市之時已係高風險期。
喺恒生指數10000點時，投資風險唔大，因為下支持係8500點，跌幅亦只有15％；反之，喺恒生指數20000點之上投資風險大增，以上望 23000點計，升幅亦不足15％，一旦下跌可以好大件事，因為唔知邊個水位才係真正支持位。挑選一D風險只有20％、報酬率80％嘅項目去投資，避開風 險高達80％、報酬率只有20％嘅項目。「富向險中求」係講畀無知嘅人聽，事實說明80％炒家係愈炒愈少。
2005年美國國會通過法案，要求到2012年美國替代能源生產達七十五億加侖，今年1月殊仔演說中要求2017年美國替代能源達三百五十億加侖；美 國正逐步減少對入口石油嘅依賴。歐洲煉油商已把大部分污染物由柴油（Diesel）中清除，令汽車亦可以使用柴油，污染程度唔較汽油多（雖然柴油車售價較 汽油車昂貴，但節省油價後反而有着數，愈來愈多歐洲私家車以柴油推動）。其他例如汽油及電池共同推動嘅環保汽車（Prius）亦可節省用油。但以美國油價 計，要行駛十萬公里才節省九千美元，油價相對所多付嘅車價並唔划算，因此仍未流行。相信最終全球汽車係用氫氣燃料電池推動，而唔再使用汽油或柴油，但上述 情況出現前，必須氫氣燃料電池喺技術上有所突破才行（依家生產氫氣燃料電池推動嘅汽車成本，較普通汽油推動者昂貴十倍）。其次係一如加油站咁樣，响世界各 地建立大量加氣站。我老曹只係想話畀各位知，我地响二十五年後唔會出現冇油用嘅情況，一百美元一桶石油只係危言聳聽。
煙民應有「選擇的自由」
今年1月1日起香港全面禁煙。首先申報利益：我老曹唔係吸煙者。經常鼓勵認識嘅朋友唔好吸煙，因為吸煙所付出嘅代價都幾大（肺癌如發現得早仍可割掉， 如發現得遲你冇得救，因為肺癌係最難對付嘅癌症之一）。但我老曹同時係佛利民信徒，同意「自由選擇」（freedom to choose），同意政府無權禁止別人吸煙，除非危及第三者！因此亦反對全市禁煙。
政府應該容許食肆喺安裝足夠抽氣系統後，發出特別牌照，成為吸煙食肆（一如發酒牌方法）。如你喜歡吸煙，可幫襯領有吸煙牌照嘅食肆，唔吸煙者如我老曹可幫襯不准吸煙嘅食肆，較家吓隨街有人吸煙情況更好。全市禁煙係特區政府剝奪咗市民選擇嘅自由。
政府不能以「為你好」為由而奪去市民選擇嘅自由，除非未滿十八歲，因未成年佢地未擁有選擇嘅自由。凡滿十八歲嘅人，只可勸告而不可禁止佢做任何唔傷害別人嘅事，因為責任自負，不然香港便漸漸失去自由港地位。
2月7日文中提到「Adidas表示會增持至25％」並唔正確。根據公告，資料應為永嘉日前提出透過旗下全資附屬公司，增持嘉運體育用品有限公司25％股權；收購完成後，集團所持有嘉運體育嘅股權，將由家吓嘅50％增至75％，合此更正。
139控股（139）停牌。
山東墨龍（568）、阜豐集團（546）新上市。
新宇亨得利（3389）股份拆細。
■天業節水（8280）2月16日公布業績。
沒有留言:
發佈留言