內地股份玩晒

　　4月23日，周一。恒指跌10.02，收20556.57；成交五百零五億四千七百多萬元。4月期指升24點，收20583點。國壽（2628）停牌，傳 母公司打算整體上市。聯想（992）升5.1％，見三元零七仙；中國遠洋（1919）升3％，見七元二角二仙；哈爾濱動力（1133）升4.5％，見九元 五角一仙。中移動（941）跌2.8％，報七十二元八角；江西銅業（358）跌3.7％，報十一元三角二仙；中遠太平洋（1199）升4％，報十九元一角 二仙；滙源果汁（1886）升6.24％，收九元三角六仙。喺今時今日港股，內地股份已經玩晒！

滬深股市進入阻力區

　　3月份香港CPI上升3.4％，主因係私人住宅租金較去年同期升5.3％，創七個月最大升幅。

　　滬深三百指數再升4.32％，報3431.32，開始進入3400至3600點阻力區，又睇吓點！

　　亞洲地區金融股面對兩大因素：一、今年第一季無論中國及印度金融行業估值水平皆過高，我老曹因此建議減持。二、但長遠而言，亞洲金融股係值得睇好嘅。 自2003年4月開始，中國經濟進入轉型期，過去製造業才係利之所在，但2003年起面對三高問題（即高原材料價、高工資及高地價）；反之，金融股卻成為 受惠行業，例如中國從最初存款利率不變、貸款利率上調，令息差擴闊，為銀行帶來更大利益；到房地產熱潮出現，刺激物業貸款需求；及至最近股市狂熱所帶來嘅 商機。中國銀行業未來有巨大增長潛力，呢點可以肯定，但因為睇好者太多，加上近年信貸高速增長，形成金融股高O嘅現象。印度去年信貸增長32％、中國 16％，上述升幅令人擔憂，點樣評估短期因素同長期因素及如何作出取捨，則見仁見智。例如2005年中國銀行業非利息收入只佔總純利6.7％，反觀美國同 業佔38％、歐洲佔25－35％之間，即未來中國銀行業來自非利息收入嘅升幅將好大，例如信用卡業務、代客理財方面、保險代理等。

　　去年初我老曹曾大力推介內地金融股，到今年首季面對嘅困惑係，雖然內地金融股長線睇好，但短期升幅咁大，係咪應該忍吓手？投資成敗，時機 （timing）好重要。例如1973年3月喺恒指1700點時入市，要到1986年才打和（雖然香港經濟由1973至97年皆向上）。年輕人應返國內闖 一番事業

　　八十年代我老曹鼓勵本港廠家北上設廠，1997年後我老曹鼓勵年輕人北上搵機會……內地過去十年GDP已翻兩番，去年香港人均收入才重返 1997年水平。以往具備香港嘅經驗喺內地極之吃香，到今天香港經驗响內地已唔值錢。1967年我老曹因家貧而無法到外國讀書，部分中學同學家境較富有， 到外國讀書兼移民。1997年佢地回港之時，卻認為我老曹成就超越佢地！唔係我老曹叻，而係呢三十年香港經濟提供咗天時、地利、人和嘅環境；反之，佢地去 外國雖然讀到碩士或博士，但受環境所限，喺外國亦只有「做好呢份工」。1967到97年香港恒生指數由64點升到16800點，上升二百六十二倍；樓價由 六十元一呎升至一萬二千元一呎，上升二百倍。1967年如你投資一萬元喺股市或物業，到1997年你最少擁有二、三百萬元；反之，1967年如投資一萬元 喺道指或美國物業，至2007年才擁有十四萬元。1997年後內地經濟相當於八十年代嘅香港，正由製造業轉型至內部消費。香港年輕人應返內地闖一番事業， 有如六十年代部分外國人離開本國來港闖一番事業一樣。

人民幣升值令企業重新定位

　　中國係貿易大國，但唔係貿易強國，出口商品仍以初級商品及勞工密集度為主。產品附加值較低、企業喺國際市場上係價格接受者而非價格決定者。人民幣升值 往往令內地出口企業同製造業利潤下降（因買家唔肯加價）；加上中國企業已太習慣固定滙率制度，唔習慣考慮滙率因素，只努力生產及銷售，忘記外滙嘅風險，中 國貿易順差大增但唔代表內地製造業純利大升，因為收益被進口原材料、零部件價格上升及中國勞工成本上升吃掉。改革開放二十多年，中國出口仍以加工貿易為 主，未能建立自己嘅品牌，依賴低廉勞工成本而非技術含量去爭取訂單。人民幣升值令呢D企業不得不重新為自己未來定位。

　　1949年4月25日，日本政府決定1美元兌360日圓，令日本嘅產品可以低廉成本大力開拓國際市場。1971年因美元宣布浮動，日本政府响 12月宣布日圓升值16.8％，即1美元兌308日圓，以及上下浮動2.25％。十五年時間，日圓共升值50％，呢段日子係日圓緩慢升值期。1985年喺 《廣場協定》下，日圓加快升值，到1995年見78日圓兌1美元，即十年內日圓再升值150％，而引爆日本資產泡沫。

　　中國1978年改革開放初期，曾透過人民幣不斷貶值去增強產品出口競爭力，至1994年1月1日上海朱宣布1美元兌8.7人民幣，今後許升不許跌。 2005年8月起人民幣採取小幅升值，情況同1971年12月至1985年嘅日本相似。由於升幅有限，出口成本上升壓力較易轉嫁到出口商品上，並令出口產 品結構出現調整。日本經濟嘅致命傷係1985至95年十年升值150％，雖然日本產品出口仍能適應，同期卻引發信貸膨脹而帶來災難。吸收日本經驗後，中國 政府不應過分抗拒近期人民幣升值，反而要好好管好中國金融業信貸問題，將泡沫成分從經濟體系中擠走。日本1990至2003年經濟低潮嘅罪魁不在日圓升 值，而係1985年起信貸膨脹失控，呢點可由瑞士法郎大幅升值並冇令瑞士出現泡沫經濟證明。依家中國經濟正處於「日圓升值」嘅第二階段，宜好好處理，以免 重複日本嘅錯誤。

　　中國今年第一季GDP上升11.1％，到底係過熱抑或仍受控制？3月份CPI上升3.3％，已超過人行上限3％。未來中國GDP增長率如下降至9％，係中國經濟軟着陸（或安全着陸）；如一下子回落到6％，已經係一場小災難。

　　四大外資（滙豐、渣打〔2888〕、花旗、東亞〔023〕）本周一開始全面攻勢。滙豐宣布不足十萬元人民幣嘅賬戶每月收取一百五十元賬戶管理費，代表 滙豐主要吸收十萬元以上嘅客戶。東亞銀行則大力拓展個人住房貸款及信用卡業務，並宣布一筆房貸業務只需七天便可完成（花旗、滙豐、渣打大約八天或以上，中 資銀行需時更長）。渣打推出「一對一」貼身服務，客戶電話不設語言系統、全人手接聽及即時處理，唔使排隊。睇嚟內地銀行業務競爭將白熱化。

　　東亞、渣打本周開始喺北京推出二手房外幣按揭業務。1995年我老曹投資英國物業時已接觸到有各種外幣貸款可揀。當年我老曹揀咗借日圓，其後日圓由 90兌1美元跌至110兌1美元後轉回英鎊貸款，即滙率上先賺一筆。基於人民幣有升值壓力，喺北京做按揭最好揀港元貸款，如此一來，不但可賺北京樓價上 升，亦可同時賺人民幣升值嘅利潤。退而求其次，美元貸款亦不俗。

　　中資銀行將面對好大壓力，因人民幣公寓房貸利率係五厘七四，寫字樓利率更高；外資提供外幣貸款中，最低係日圓，只有二厘半，港元四厘七五亦可借到；年 期更由八年到三十年（中資銀行八年到二十年）。光大銀行已推出固定利率房貸（即使銀行加息，樓按亦唔加息）。深圳發展銀行提供「雙周供」（即兩星期供一次 款，利率可以低D）以及存抵貸（即存款可抵銷貸款）。中國銀行（3988）提供「直客式房貸」（即自住者利息特低）。買二手房者，二十五至三十五歲嘅年輕 人所佔比重已由 2004年佔38％，上升到2006年56％，其中75％需要貸款。呢個市場愈來愈大，同時競爭亦愈來愈白熱化。

中國有錢人廣東省最多

　　中國除香港外，最多有錢人嘅地方喺邊度？以個人所得計，2006年收入十二萬元人民幣以上，全國共一百六十三萬人：廣東省佔二十八萬三千人、北京二十 五萬五千人、上海二十三萬三千人、浙江省十八萬五千人。廣東省有錢人集中喺廣州及深圳，其次係珠海、佛山、東莞、中山、惠州及江門；深圳佔十一萬三千人， 喺廣東省排第一；廣州九萬六千人居次。再以全國四百名富豪計，六十六位來自廣東省，浙江省只佔四十七名。

　　改革開放二十八年，中國愈來愈多有錢人好正常，中國有錢人到底係點嘅？例如某煤礦礦主，父親穿得非常簡樸，兒子卻非常奢華，例如揸二百幾萬嘅跑車。有 次去澳門賭場，見唔少內地中年人穿得好簡樸，但賭起錢來卻十分狠，五萬十萬元照擲落去。同外國唔同，可以從行為、修養、禮貌及舉止上一眼便看出邊個有錢 人，中國富人仍然好神秘，而且經常有驚人之舉，例如某富商為睇電影而將整間電影院包咗，只供自己同女朋友兩個人睇；亦可以花二十萬元請別人吃一頓飯，十分 嚇人，甚至花一百萬元買一隻手表。中國人仍未學曉享受生活樂趣，只係享受花錢所帶來嘅虛榮。

　　過去D人話「富不足三代，未有品味」。外國亦有Old rich與New rich之分；Old rich喺言行舉止上十分優雅，newrich卻周身名牌、揸跑車、買豪宅，過炫耀生活。香港人富起來已有幾十年、愈來愈多香港人成為Old rich，內地市場上則充滿Newrich。所謂暴富難睇，例如講嘢大大聲、喺高級餐室內呼呼喝喝，或到名牌店趾高氣揚。例如我老曹兩年前到巴黎所見，上 述都係Oldrich唔會做嘅事，Old rich明白自己嘅財富來自社會，而將部分回饋社會；Newrich認為蚊年係自己賺番嚟，喜歡點樣花便點樣花。可能佢地未富之前曾受過別人氣，所以好喜 歡畀氣人受。今天中國人已富起來，卻未學曉何謂品味、未培養社會責任、未明白取諸社會、用諸社會嘅道理，停留在暴富難睇階段。2005年調查數字，擁有一 百萬美元以上、三千萬美元以下嘅中等富人，中國已有三十二萬，擁有上述財富喺外國亦只算中上階層，但喺中國卻可以買超級別墅，過令人側目嘅奢華生活。中國 人需要學習係點樣做個有銀士，喺外國有錢而唔做善事，會畀人家睇唔起；喺外國戴名表、揸跑車、住超級豪宅、講嘢冇禮貌，只會令人側目而非令人尊重。中國人 應該學習點樣有意義地用錢，而非亂花錢，不然只係一個冇品味的「有錢人」，而非一個富人。「富」應該富在心中，對社會感恩與奉獻。

　　七十年代如你擁有一百萬元已可退休（當年定期存款利率高達十六厘，買樓收租回報率十三厘）。一百萬元一年回報十六萬元，每月開支一萬多元，生活都幾豐 裕。2007年你擁有一千萬元退休，生活亦唔見得富裕（銀行定期存款利率不足四厘，買樓收租回報率亦不足四厘），一千萬元家財一年回報率只有三十六萬元， 即每月開支三萬元，只算中產家庭。

　　1997年起香港經濟已進入滯脹期，即金錢購買力仍在下跌，而GDP增長率卻慢下來，情況有如1966至82年嘅美國。香港2004年開始嘅經濟繁榮 由內地經濟推動，同內地經濟冇關係嘅行業至今仲係死氣沉沉，例如建築業。香港呢段滯脹期喺可見將來亦唔會結束，因為本地嘅經濟活動能力好弱。

「四二一家庭」問題將拖垮經濟

　　中國一孩政策所帶來嘅良好影響，過去二十年多已浮現，但隱藏嘅不良影響卻喺未來才出現。隨着人口老化，「四二一家庭」數目激增（即四個老人、兩夫婦加 一個孩子）；加上中國退休計劃仍未完善，呢個獨生孩子長大後面對嘅係五十五歲已退休嘅父母及七十多歲爺爺婆婆、公公嫲嫲！據調查，北京、上海乏人照顧嘅老 人比例已分別達34％及36.8％，估計到2030年「四二一家庭」問題將拖垮中國經濟！依家中國養老機構所能提供嘅服務佔老年人口比重0.84％（即一 千個老人只有八點四人獲政府老人服務）；中國人習慣養兒防老，面對「四二一」家庭，問題點樣解決？

　　近期電視台許多時播放「明星」到落後地區嘅節目，睇到貧窮國家嘅小孩，認為佢地十分快樂，而認為香港小孩「身在福中不知福」。

　　心理學家通過試驗，發現長時間保持高興心情係非常困難嘅事。物質所帶來嘅快感可令情緒瞬即高漲，但呢種感覺卻難以持久，好快我地又回復到正常心境。

　　七十年代有機構研究彩票中獎者嘅心情；研究結果發現，彩票頭獎中獎者一年後嘅快樂程度甚至唔及一個冇中獎嘅人。換言之，加薪、結婚、居住環境改善，只 能帶來眼前快樂，好快又回復正常。調查更發現，50％快樂與基因有關（即天生樂觀），同物質無關；40％才同客觀環境有關；10％則無法解釋。換言之，派 D糖果或禮物畀貧窮國家嘅小孩子所睇到嘅快樂，只係物質刺激所帶來嘅短暫快感，可令情緒瞬間高漲，但好快又消失。如明星留多一天，第二天必定發現獲派糖果 嘅窮國小孩子仍然一樣，有D快樂（因天生性格樂觀），有D唔快樂（因性格上較悲觀），同佢派糖前冇兩樣。

物質刺激快樂難持久

　　要保持牛市，必須繼續物質刺激，一旦停止，投資者情緒便好快由十分快樂回復到正常，便會引發大跌市！情況有如窮國小孩，第一天幾粒糖可令佢快樂，第二 天必須加大物質刺激，佢才感到快樂，如果再係幾粒糖已不能令他快樂。換言之，股市一旦出現狂升，最後結果一定係暴跌，唔可能停留喺半空中！因為冇人可以持 久地感覺快樂，因為所有物資刺激只能帶來短暫快樂，人好快又再悶悶不樂，除非改變人生觀，才能出現較持久嘅快樂（例如知足常樂）。只有知足及常做善事，才 能令人有較持久嘅快樂，物質刺激只能帶來短暫快樂。　　亞洲衛星（1135）、中國高速（149）、大福證券（665）、百盛集團（3368）、太平洋實 業（767）、Nam Tai EEP（2633）、雅域集團（1229）、中國人壽（2628）停牌。

　　新焦點（360）更改董事會會議日期，由4月23日改為4月25日。

　　■星美出版集團（8010）5月3日；星獅地產（535）4日；中遠威生物製藥（8019）9日；新宇國際（8068）10日公布業績。