4月4日，周三。港股連續第三天上升。長實升2.3％，報一百零四元八角，因李實發以三億八千一百萬元增持三百九十萬股，現佔39.17％。利豐 （494）升3.2％，報二十五元八角；工行（1398）跌2.1％，報四元三角一仙。華能國電（902）升9.4％，報七元五角六仙；大唐發電 （991）升8.4％，報八元六角五仙，因花旗集團與德意志銀行齊齊推介兩隻電力股。南方航空（1055）宣布投資七億二千萬元人民幣購入重慶航空60％ 權益，股價升3.65%，見三元六角九仙。
但求活得開心有乜好笑
不幸消息係龔如心女士周二逝世，享年七十歲。1972年「置牛」之戰（置地公司強行收購牛奶公司），周錫年爵士邀請王德輝夫婦出資，協助對抗置地公司 強行收購牛奶公司，牛奶係父親生前服務嘅公司，當年亦係牛奶公司其中一位小股東，因而認識佢地。當年龔如心紮兩條孖辮，已有「孖辮女」之稱。世事無常，王 德輝1990年4月被綁架，王太今年4月逝世，以現代人而言算短命。佢地由內地來港，加上係外省人（五十年代香港歧視外省人），以勤儉起家，捱過唔少鹹 苦，七十年代才富起來，但因作風不改，被其他人笑孤寒成性。其實勤儉有乜好笑？難道發達之後一定要過奢華生活？我老曹認為，衣食住行方面嘅追求應適可而止 （我老曹如果只有自己一個人，仍然會食碟頭飯），但求活得開心便可以，有乜好笑？
本周淡友提早放假，大市連升三個交易天；另一理由係油價一如估計隨着伊朗局勢緩和而回落，令航空股及其他股份皆上升。加上2月份美國二手樓銷售成績理 想，刺激美國消費股上升，令好友本周八面威風，將恒指推高至20209點，收市升207點；成交五百一十六億七千九百多萬元。4月期指升210點，收 20265點。不過，5月期指仲係低水，收20126點。升市會否响5月結束？
工行去年純利上升31.2％，並表示有信心喺未來三年內將不良貸款比率控制响3％之內（去年為3.79％，2005年為4.69％）。相信工行正進入穩步上升期。
北美至亞洲廢紙運費5月1日起調高，每個標準櫃加一百美元，9月1日起再調高一百美元。上述形勢對玖龍造紙（2689）不利。 TCL股價喺深圳下 跌4.7％，見四元六角六仙人民幣（一度跌5.9％）。TCL通訊（2618）喺香港跌4％（一度跌5.2％）。公司4月27日公布業績，昨天發盈利警 告。TCL集團國際化太快，結果欲速不達。
巴克萊估計，第二季日圓將再貶值5％，係1989年以來最差，估計最低可見125日圓兌1美元，為2002年12月以來最低。換言之，第二季日圓利差交易仍有利股市。
全世界出現回報率飢餓症
2001年1月起，格蛇將利率由六厘二五降至2003年6月嘅一厘，整個世界便出現回報率飢餓症（hungry for yield），不但推高債券、股票及房地產價格，同時亦推高原材料價格。利率雖然由2004年6月起逐步回升到去年6月五厘二五，但至今為止，尋找回報率 三厘或以上嘅穩健投資項目仍有困難，即2001至03年所製造嘅回報率飢餓症感覺仍未消除。理由係日圓利率仍然只有半厘，日本投資者仍須到全球尋找較高回 報（對沖基金借日圓資金，亦到處尋找投資機會）。
今年首季MSCI中國A股上升36％，但MSCI中國指數卻回落2.3％，代表中國內地人仍睇好內地股市，而外國投資者則獲利回吐中。今年首季約有十 六億七千萬美元資金由各新興市場股市淨流出（去年同期淨流入二百三十二億六千萬美元）；不過，3月下半月又見資金回流新興市場，代表機構投資者今年對新興 市場睇法已非一面倒。例如沽出認為太貴股份，改為吸納仍算便宜嘅股份。依家MSCI中國指數平均O十九倍，MSCI中國A股指數平均O二十四倍（較A股O 便宜）。由於外資只佔A股買賣極小部分，相信唔影響A股表現，只係上述兩個指數出現背馳現象（MSCI中國指數回落而內地A股繼續上升），最後喺邊個跟隨 邊個？
澳洲決定維持利率不變，仍係六厘二五。二十五位分析員中，有十三位事前估計利率不變，但大部分認為5月份仍會加息。去年第四季澳洲通脹率3.3％，今 年第一季通脹率4月24日才公布。公布唔加息後，澳元從十年高價回落。美國2月份通脹率2.4％，利率五厘二五；英國2月份通脹率2.8％，利率五厘二 五，因此5月份英鎊加息機會極大。
恒生指數由2003年4月25日低點8331.87，上升至今年1月26日嘅20974.46，完成四年上升。通常經過四年上升後，股市要進一步上升 比較困難。以技術分析，2003年4月至04年3月係從低點反彈嘅信心恢復期；2004年3月至06年6月反覆上升，2006年6月至07年1月上升主因 係炒人民幣升值，令資金流入推動港股上升，即全賴對前景有所憧憬，之後又點？則木宰羊。
繼美國住宅市場出現疲態後，今年首季美國企業資本支出較2006年第四季跌4.8％，又一利淡因素出現。美國企業第一季純利升幅估計只有8.7％。經 過四年美國企業純利雙位數字增長後，今年跌至單位數，上述數據話畀各位知美國經濟正在放緩中；至於短期表現則神仙難測。趨勢係投資者最佳朋友，可惜踏入今 年1月後，趨勢變得極唔明朗，恒生指數可以忽然回落又可以忽然上升，因睇好睇淡都有理由。淡方代表係格蛇（估計年底出現衰退機會高達三分一），好友係貝南 奇（美國經濟可維持黃金歲月）。甚至美國樓市，密歇根州樓價由2005年第四季起回落至今，跌幅已達15-20％，因汽車業不景氣；但夏威夷樓價卻創近十 年新高，日本資金再次湧入，令夏威夷住宅樓價上升交投暢旺。即美國下價樓回落，同時高價樓卻上升。
九十年代邊D國家或地區股市表現最出色？答案係香港、台灣、南韓、新加坡同馬來西亞，佢地嘅指數紛紛喺九十年代見頂，雖然恒指、新加坡海峽時報及南韓 股市今年仍創新高，但同九十年代高點比較差距唔大；至於台灣同馬來西亞，至今未破九十年代高點。 踏入2000年，邊D國家或地區股市表現最出色？答案 係印度、中國、印尼及菲律賓，其中又以印度及菲律賓最先起步及升幅最大；中國股市到2005年年中才起步，相信同中國外滙管制有關。
香港家庭走向二人世界
九十年代亞洲四小龍（包括馬來西亞）股市情況，會否同樣响上述四個國家股市上出現？印度及菲律賓最先起步，相信近日已見頂；至於印尼同中國亦在尋頂 中，理由係美元利率由2004年6月回升到去年6月，加息所產生嘅壓力今年開始喺上述股市反映出來。印度及菲律賓股市相信已進入回落期，資金已回流美國及 其他OECD國家。上述國家股市係咪由2007年前跑贏其他國家股市，漸漸變得表現一般？
日本家庭結構正走向二人世界（Double Income No Kids），因生孩子已唔符合經濟效益。香港家庭早已係三人組合（兩夫婦加一個孩子），睇嚟亦正步日本後塵，走向二人世界。因為冇時間生仔（我老曹一位朋 友嘅兒子結婚已四年，但媳婦仲唔肯生仔；因為佢從事證券業，呢四年股市興旺，晚晚忙到十二時才回家。生仔？即係要犧牲嗰份年薪百幾萬嘅工？制唔過。我朋友 已威逼利誘，包括送豪宅交換媳婦生仔……但仍然唔成功）。香港家庭人口正由三人家庭走向二人世界，而非佘當奴所希望生三個嘅五人家庭。換言之，香港人口雖 然步入低增長期，但香港家庭數目仍有上升，未來「細單位豪宅」有一定需求。今天二人世界唔少係無飯夫妻（太太唔煮飯），卻好注重健康，因此豪宅必須擁有健 身設施係優先考慮，面積介乎七百五十呎到一千呎、有一廳三房（其中一個係電腦房）嘅迷你型豪宅，極之適合呢類二人世界兼無飯夫妻。廚房最好係開放式，以便 興之所至撚番幾味，但大部分時間屋企唔煮飯。
九十年代日本進入非工業化，以2004年為例，約有七萬三千人搬到東京居住，即人口繼續向市區移動，因為市區有更多工作機會及可享受城市生活。上述情 況日本由1994年開始，過去因市區樓價太貴，人口外移郊區；1994年起隨着市區樓價回落，人口重新由郊區向市區移動，到1996年起出現淨流入（即流 入市區人口較流出多）；2004年淨流入人口達七萬三千人。
2005年日本人口一億二千八百萬，2006年起進入負增長（死亡人數較出生者多），2020年人口將降至一億二千四百萬，2050年只有一億人。 2000年六十五歲以上嘅日本人口已佔17.4％、2020年佔27.8％、2050年佔35.7％。日本正步向老人國，亦係人口由郊區回流市區嘅理由 （老人家住喺市區比較方便）。
香港非工業化1980年已開始，相信早已完成。隨着樓價上升嘅壓力，人口向郊區移動，刺激郊區樓價上升。1997年8月起香港樓價回落，相信到 2002年（即五年後）喺日本出現嘅情況响香港重現，即因為市區樓價回落，住郊區嘅人重返市區，形成2003年起市區樓價平均升幅60％以上（指中價住宅 樓），但郊區樓價平均升幅只有30％。香港一樣面對人口由郊區回流市區嘅問題，係過去四年郊區樓價升幅較細嘅理由，符合Spill over（溢出）原理：漲價由市中心開始，然後向外擴散；跌價由郊區開始，漸漸影響市中心。至於深圳及上海樓價，好快亦面對非工業化問題。隨着國內製造業 向中部及西部地區轉移，製造業所提供嘅就業機會減少，令人口湧向市區，形成市區與郊區樓價差距拉闊。例如港島半山區住宅樓動輒過一萬元一呎，而天水圍住宅 樓只係一千七百元，一呎港島半山住宅樓可換六呎天水圍住宅樓。上海浦西住宅樓每呎售價五千元，浦東住宅樓每呎售價一千二百元，如以香港標準，浦西住宅樓仍 有上升空間，即上海區內豪宅仍然看漲（或浦東郊區樓價睇跌）。深圳則分特區內與特區外，特區內住宅樓價仍看升，特區外住宅樓價相信已差唔多。咁即係話，樓 價兩極化應將喺國內大城市出現。
樓價跌令郊區人口回流市區
參考日本情況，再分析本港樓市，有如下結論：一、本港豪宅發展下一步將傾向微型化，以符合二人家庭需求，即七百五十至一千呎嘅豪宅進入吃香期。二、人 口向市區回流，太古城等中價樓同天水圍等下價樓差距進一步拉闊。繼2003年超級豪宅同普通住宅樓價差距拉闊後，下一步發展係市區嗰D七百五十呎或以上嘅 中價樓同郊區中下價樓差距拉闊。過去五年香港樓價係富者愈富，未來五年發展係貧者愈貧。香港社會結構繼出現20╱80後，下一步出現20╱60╱20，即 有20％人口經濟情況愈來愈差而陷入貧窮，低收入家庭正由香港內移到深圳，形成香港低價樓需求進一步下降。
上述只代表我老曹個人睇法，真實情況係點？有待時間證明。不過我老曹擔心二百萬元或以下住宅投資價值唔大。
上華控股（371）、新怡環球（1094）、聯泰控股（311）、北京控股（392）、豐采多媒體（764）停牌。
奧普集團控股（477）、銀河娛樂（027）、金鷹商貿集團（3308）、白花油（239）、時捷（1184）、爪哇控股（251）、北京北辰 （588）、瑩輝集團（1163）、中建科技（261）、中建電訊（138）、中國稀土（769）、東風集團（489）、安寧控股（128）、海升果汁 （359）、亨達國際（111）、亨亞（428）、合豐集團（2320）、合富輝煌（733）、華凌集團（382）、交大科技（300）、僑威集團 （1201）、聯華超市（980）、自然美（157）、駿新集團（091）、軟庫發展（648）、創科實業（669）、天津港發展（3382）4月18 日；中國糧油控股（606）、大同集團（544）、廣益國際（530）、合興集團（047）、澤新遊樂（703）、利星行（238）、慶鈴汽車 （1122）、和寶國際（039）、正興（692）、中國糧油國際（506）、高力集團（1118）、新奧燃氣（2688）19日；廣東科龍（921）、 上海實業（363）、招商局中國基金（133）、綠色能源科技（979）、東方娛樂（009）20日公布業績。
沒有留言:
發佈留言