逆市而行必先有銀

　　4月3日，周二。恒生指數重返二萬點之上，收市報20002.7；成交四百億一千二百多萬元。4月期指升184點，收 20055點。有趣嘅係，5月期指卻收19910點，出現大低水，係咪話畀大家聽應該Sell in May and walk away？至今未能解決嘅問題係，3月5日恒生指數由18659點嘅回升，到底係反彈抑或另一上升浪開始？我老曹意見係唔好估，只要等。今天中信1616 （1883）上板後，較招股價升67％，報四元三角一仙（最高升76％）。新濠國際（200）升7.1％，見十四元九角；金榜集團（172）升161％， 見七角三仙。

理性分析員常錯過最燦爛一刻

　　股票市場短期係投票機器（由供求因素決定），長期才係評估機器（反映公司真正價值）。北京控股（392）剛宣布去年獲利減少41％，只有三億三千九百 萬元。北控1997年5月來港上市時，連申請表格亦炒到五百元一張，投資者對北控上市陷入完全失控境界，北控上市後喺1997年8月創下六十五元高價，十 年後今天值幾多？答案係二十元【圖】。1997年8月投資北控持有十年，代價係損失投入資金嘅三分二。今天內地A股嘅問題亦一樣，短期因內地投資者嘅無 知，A股股價升完可以再升，所以旺市莫估頂；但因股價早已偏離合理水平，長期而言喺高價追入者，最終必付出沉痛代價，但唔好扮先知（因為冇人知道A股何時 才見頂）。面對呢類情況，見好即收嘅人永遠唔會破產。理性分析員經常都錯過股市最燦爛一刻，例如1973年1月至3月我老曹同森池兄成為香港股票市場內斯 人獨憔悴，全城人人高興，我地兩個因太早睇淡，成為兩名傻佬而做咗好朋友。1996年我老曹賣香港物業去倫敦買樓時更加孤獨，因為極之少人咁做。2000 年睇淡科網股、睇好原材料股而叫人買金及原材料股之時，我老曹更加孤獨。今天睇行止兄文章〈逆市而行不容易〉，深有同感。1967年夏季，香港遍地菠蘿 （土製炸彈），我老曹離開學校搵事做，誤打誤撞入咗證券呢一行。1967年親戚朋友紛紛移民加拿大，認為我老曹留喺香港必定死梗無疑（當年唔係自己眼光 好，真正理由係家貧無蚊年移民）。到1997年，卻眼見自己嘅中學同學由美國回來香港買樓，我老曹曾努力勸阻，但差D連朋友都冇得做。群眾常常做錯事係好 無奈之事。

伊朗緊張局面暫時紓緩

　　工商銀行（1398）呢間全球第二大市值嘅銀行宣布去年純利上升31％，至四百九十三億元人民幣或每股一角八分。工行A股去年10月响上海上板後，股 價已上升80％；高盛、 Allianz AG及美國運通銀行去年1月才入股7.28％，一年後今天投資已升值三倍，約值一百億元！工商A股市價係賬面值二點七九倍，滙控（005）係一點七倍、花 旗一點九四倍。工行股價已略為偏高，但唔代表短期股價會調整，因為內地A股隻隻都偏高，並非工行獨有。

　　花旗推介網通（906）、華潤置地（1109）及信義玻璃（868）。華潤置地睇十一元三角三仙，因估計今年純利可升67％，見每股三角二仙；信義玻 璃睇五元三角五仙，估計今年純利上升 31.7％，見每股三角二仙。美林看好內地基建概念股，包括道路、港口、鐵路、航運碼頭及發電廠股份。

　　New Century兩年前每股見六十六美元高價，一年前仍值三十美元，停牌前值一美元，依家申請破產保護令。喺一個Get-Rich-Quick嘅經濟，一唔 小心便會全軍盡墨。同英隆事件唔同，英隆事件曾令美股大跌，但今天一間按揭公司破產已非乜嘢大件事，只有揸咗New Century嘅投資者獨自垂淚，冇人陪佢地一齊喊，因為人人忙於找尋其他搵銀機會，大量對沖基金繼續願意承擔巨大風險（反正係OPM）。

　　日圓估計將跌落120兌1美元，繼續成為環球資金嘅提供者（上月兌澳元回落5％）。油價一如估計出現回落，因伊朗政府就扣留英軍事件尋求外交途徑解決 問題。全球四分一石油須經荷莫茲海峽運出中東，呢條十分狹窄嘅水路，由伊朗及阿曼各佔一方。如伊朗禁止運油輪進出該海峽，全球石油供應立即減少四分一；由 此可見伊朗响地理上嘅重要性。因英兵承認誤闖伊朗水域，相信伊朗事件嘅緊張局面進入鬆弛期。

　　美國今年第一季嘅訊息係：一、無論次級按揭或銀行按揭市場都在轉壞中。二、道指由2月20日12795點回落至3月14日11939點後反彈。三、房 地產市場發展進一步令人擔心，新屋存量升至八點一個月，二手樓未能售出單位升至六點七個月。四、市場繼續擔心CPI惡化。五、美國GDP增長率在放緩中， 去年第四季增長率修訂為2.5％。六、股市技術分析仍冇方向感，繼續係上落市。