10月22日，周日。謠傳美國第三季GDP只升2.2%（第二季升2.6%），亦傳9月 份房屋銷售年率六百二十萬間（8月份六百三十萬間）；換言之，美國經濟增長率正進一步放緩，油價繼續向五十美元進軍，一切一切代表股票市場後市繼續玩輪流 炒。1928年至今，美國標普五百指數年升幅喺10至20%者只有十四年，今年至今標普五百指數已上升9.5%，意味現水平更上一層樓已有Ｄ困難；影響之 下，恒生指數喺18000 點附近再升亦有一定困難。相信周三聯儲局決定維持利率不變，仍係五厘二五，主因係日本銀行嘅絲路利率政策已停止，至於日圓利率幾時才見一厘，則木宰羊，因 日本經濟又偏軟。另一方面，英倫銀行11月份加息機會大增（10月議息會議時，已有兩位委員提議加息），今年至10月止英國樓價仍升11.5%。
上海豪宅價格不跌反升
上月瑞安翠湖天地御苑其中一套六百六十平方米嘅公寓以五千萬元人民幣售出，創下每平方米八萬元人民幣嘅新紀錄，本周準備開售八十套翠湖天地御苑，總售 價四億元人民幣，平均每平方米四萬元人民幣（去年10月16日推出翠湖天地御苑，已從香港買主手中收到十二億三千萬元，從台灣買主手中約五億二千五百萬 元）。為吸引高端買家，瑞安將花費一億五千萬元建造佔地七萬四千平方呎嘅會所，供翠湖天地御苑業主享用（同香港唔同，業主如要入會，須付一萬八千元入會 費）。睇嚟上海樓市下調，對豪宅一Ｄ影響都冇，情況同香港相似，中價樓及下價樓開始下調，但豪宅不但冇回落，反而進一步上升。另傳下月人民幣再加息。
美元滙價5月份起轉強，呢個趨勢留意到嘅人仍唔多。任何趨勢，形成初期都十分弱，一如長江源頭必是細水長流，到出海之時才氣勢磅礡。點解美元轉強？理 由係核心通脹率仍係2.9％，即可見將來唔會減息；加上日本經濟好不了、歐洲經濟形成兄弟班（西德人好有胸襟，過去自己努力發達後，1990年起幫助東 德，然後歐盟方面接納東歐各國，依家連土耳其亦想加入；今天嘅歐羅再唔係西德時代嘅馬克矣）。相信美元利率五厘二五將維持好一段日子（例如至明年第二 季），鐘擺才由這一方擺向另一方。歐羅加息期去年12月開始，估計今年12月結束；日本銀行第二次加息則遲遲未出現，唔排除日圓120短期內失守。南非農 業佔南非經濟40％，如政府決定低價向白人農夫收地然後派畀黑人農夫，可以摧毀南非蘭特滙價，投資者短期應遠離南非蘭特。
內地將批准買賣鈀金
上周係印度教中最重要嘅日子。佢地嘅神Rama同惡魔Ravana經過十四年激戰，最後因為人類喺晚上點起油燈照亮大地，令Ravana無法躲避 Rama追殺，最後Rama殺咗Ravana，土地上嘅人便齊齊慶祝Rama戰勝；節日由每年10月19至23日，一連串慶典都要大點油燈，目的係驅走惡 魔、迎接未來一年嘅財富。因此每年10月19日前有蚊年嘅印度人會大買黃金，窮嘅印度人則買白銀，去迎接節日來臨，形成每年10月19日前金價上升。周一 係印度教最後一個慶祝日，來自印度嘅黃金買盤亦差唔多了。今年10月4日來自印度金飾商嘅買盤，將金價由五百五十九點四美元推高至10月20日嘅六百零一 美元，金價可能已完成反彈，本周仍有小量補倉盤，之後就可能係咁先。
上海黃金交易所本月30日將開始買賣白銀，即日後內地可買賣黃金、白銀及鉑金，估計第四種將批准買賣者係鈀金。
歷史告訴我地，黃金同石油有一定關係但非同步。例如去年8月至今年5月金價便跑贏油價；當金價今年5月見頂後，油價雖然仍上升，但到咗7月14日亦止 升回落。10月4日起金價亦反彈，令油價近期回勇，如10月23日前金價見頂，未來油價亦升不了多少（升市強勢先行；2000至05年8月前油價領導金 價；跌市弱勢先行，今年5月金價領導油價回落）。
11月1日起OPEC將減產4.4％，但11月期油上周五回落2.9％或一點六八美元一桶，成五十六點八二美元；12月期油跌1.9％或一點一七美 元，收五十九點三三美元（11月期油合約上周五最後買賣）。油市淡友不但無懼11月1日起嘅減產，連12月再減產嘅警告亦唔理會。12月14日OPEC將 如何決定？四十九位分析員中，有二十一位估計油價進一步回落、十四位認為可回升、十四位認為冇大變化。
1973年11月石油危機後，世界經濟出現大衰退，美國政府利用減息、美元貶值去刺激消費增加，重新帶動全球經濟增長。到咗 1985年美國政府希望改善貿赤，响《廣場協議》上逼日圓同馬克升值，希望由日本人及德國人消費去帶動全球經濟。日圓升值後，日本人卻去咗買樓、買股票， 形成1990年日本樓市泡沫，爆破後日本人又再節儉。西德為重建東德，令德國人稅務負擔大增，自然無力大量消費。冇晒符之下1990年起美國政府又再讓美 元貶值及減息去刺激國人消費，呢次中國成為最大受惠國。今年第二季起美國人消費力漸漸後勁不繼，去年希望人民幣升值由中國人消費去帶動世界經濟，至今為止 中國政府態度仍十分曖昧，人民幣升幅仍十分細。至於今年12月開放嘅中國市場又點？明年便知道。中國人性格同日本人一樣，一直以節儉為主，能否刺激中國人 消費去成為世界經濟火車頭？中國境內財富過分集中响極少數人手中，不利消費市場發展。
中國第三季GDP增長率10.4％，雖然較第二季 11.3％略低，仍是高增長，估計第四季中國GDP增長率進一步放緩至9.5％。繼鋼鐵宣布11月加價後，內地水泥價格亦有所提高，主因係9月同10月係 各類建設工程嘅重要施工期，令水泥行業由歷史低谷走出來。第三季起內地水泥股純利又再回升。前三季度內地三十六個大中城市嘅42.5及32.5強度普通硅 酸鹽水泥平均售價三百三十九元二角八分及三百零五元九分，礦碴硅酸鹽水泥42.5及32.5強度售價三百零二元六角五分和二百六十四元六角九分，較去年同 期分別下降4.36％及5.61％、3.06％和4.24％；但9月份起已止跌回升，售價較今年1月上升1.64％、0.79％、3.77％及 3.34％，10月更進一步上升，主因係高速公路、港口、機場及農田水利等方面需求上升。出口方面，1至8月共二千四百九十六萬噸，較去年同期升 107.4％。另一方面，煤、電費支出（佔水泥成本60％）亦有一定程度上升，亦支持水泥售價9月起止跌回升。
鐵道部計劃2020年前中國將建設客運專線一萬二千公里、客車速度將超過每小時二百公里，並喺全國範圍內建成「四縱四橫」鐵路快速客運通道，總投資超 過三千億元人民幣，主要涉及九條鐵路：武漢至廣州、鄭州至西安、石家莊至太原、合肥至南京、合肥至武漢、北京至天津、溫州至福州、福州至廈門、寧波至溫州 等，共三千二百二十公里，四年內完成，並鼓勵中外合資建路。其他在研究中嘅京滬、京廣、京瀋、哈大及瀋海，計劃2020年前完成「四縱四橫」鐵路快線，中 央及地方政府出資62％、國內銀行貸款佔28％、直接向市場集資10％。
中國鐵路建設去年開始全面上馬，明年1月起鐵路所有客貨運服務全部向外資開放。加拿大國家鐵路局下屬公司希恩國際貨運代理今年10月12日喺上海成立 中國分公司，仲有美國最大鐵路公司BNS亦在上海成立中國辦事處；明年內地鐵路運輸將面對外資企業激烈競爭。依家國際上成熟嘅鐵路公司提供嘅係「多式聯 運」，即鐵路、海運、空運及汽運合成一體，向客戶提供「門到門」服務。例如集裝箱由海上運送到陸上，由火車載運到站後，再用貨車送到各戶門口，明年起亦喺 中國提供呢方面服務。有人擔心咁樣將令整體鐵路運輸盈利下降甚至出現虧損，但大幕已拉開，唔競爭便出局。到2020年，中國鐵路網便可四通八達！
宏調第三季收效機會大
2000年中國「十．五」計劃大量投資固定資產，令金、銀、銅、鐵、錫、石油、煤、天然氣、鈾等無一不漲，能夠捕捉此趨勢者，過去五年無一不賺到笑。 2006年起嘅「十一．五」規劃走節約型經濟，會否上述原材料價格喺今年見頂？機會甚大。戰後最大一次通脹期係1969至79年，主因係日本及西德經濟興 起；對全球原材料產生需求（日本及西德本身擁有嘅資源有限）。至於2000年因中國及印度經濟興起對全球原材料需求嘅刺激，相信唔及日本及西德，因為中國 同印度既係原材料消耗國，同時係原材料生產國，能否維持原材料價格十年上升期有疑問，但個別原材料中國特別短缺者如銅、石油、鈾、鈦等例外。原材料價經過 2000至06年上半年漲價潮後，起碼有一大段日子呈現上落市。
中國宏觀經濟學會秘書長王建認為，宏調初見成效，依家應該係愈往後走、經濟愈會冷卻！國家發改委宏觀經濟研究院投資所所長羅雲毅話，投資增長率下降只 係短期現象，未來一段日子投資總量依然會喺高位運行。中國人行研究局宏觀處副處長閻偉認為，地方投資項目嘅積極性依然好高，一旦放鬆投資，可能迅速反彈。 人行4月加息後，8月第二次加息、9月實行新國八條，才令GDP增長率放緩。固定資產投資開工率今年首五個月係24％、首六個月係22％、首七個月係 19％、首八個月係11％，可以見到6月開始固定資產投資開工率在急跌。王建認為，中國經濟已進入冷卻期；羅雲毅則認為，好多項目在加緊補辦手續，手續完 成後，項目還會繼續上，投資增長放緩只係短期現象。
換言之，中國經濟會否進入冷卻期仍有爭論，未來監管當局會加強調控，絕不會「半途而廢」。
呢次中央首次用經濟政策去調控經濟而非行政手段，國家信息中心經濟預測部副主任祝寶良認為，第四季GDP增長率可能回落到10.3％，明年GDP增長 率回落到9.5％至10％。曹和平教授認為，加入WTO嘅刺激，令2003年中國進出口貿易增長率達37％、2004年35％、去年23％、今年估計全年 20％，明年進一步回落，即外需拉動嘅GDP增長動力在減弱中；再加上國務院嘅宏調，今年第三季起開始收效機會極大。
十六屆六中全會通過「中共中央關乎構建社會主義和諧社會若干重大問題決定」10月18日由新華社全文刊出。近三十年改革開放政策下，產生咗一Ｄ「不和 諧」因素，例如先讓部分人富起來及壟斷行業未有改革形成特殊利益集團，喺改革開放初期有其需要性，但到咗今天，未來改革開放政策應更注重社會公平及加快壟 斷行業改革，鏟除特殊利益集團。未來只有通過勞動及工作、合法經營、發展本身生產力和對社會有貢獻者才能富起來，再不能通過特殊關係謀取個人利益，而形成 官商勾結、權力尋租等方式去達到富有。
上述方向完全正確，至於點樣落實與執行？只有走着瞧。其中一點係必須改變政府職能，取消過多行政審批權。例如將土地公開拍賣、經營權公開拍賣、工程以 競投方式……。只有咁樣做，企業才不會向政府尋租，造成不公平競爭。其次係市場不規範化，例如外資仍享受太多優惠、民企稅項太重，形成稅收分配不公平，但 呢方面估計需時十三年，才能將兩者稅率拉平。
官權?財權?傳媒權
1970年前香港政府亦非常腐敗，經過二十年努力，1990年起香港才成為世界廉政嘅楷模，主要係政府扮演角色不斷改變、管理方式不斷改善，以及社會 整體素質迅速提高嘅結果，形成香港三權分立：一、官權（仍由公務員擁有；二、財權（由大財團擁有）；三、傳媒權（由新聞機構同本港知識分子共同擁有）。例 如2003年反對第二十三條立法，就係傳媒權制衡官權；至於西九計劃推倒重新再來過，係財權對官權嘅制衡；財團曾不理環保團體反對，計劃將新建成未入伙居 屋拆咗建豪宅，結果官權制衡咗財權。有咗互相制衡力量，喺本港做官不能獨大、有錢亦不可話晒事、傳媒亦須自律……。香港喺冇民主政制下達至和諧社會嘅目 的，對中央政府係咪有參考價值？依家內地官權太大、財權在興起中，但傳媒權仍一再受制，未能達致互相制衡嘅力量。如貪污、腐敗不被傳媒廣泛報道，官商勾結 自然大量出現。如欲認真執行十六屆六中全會嘅決定，內地傳媒地位今後二十年必須迅速提升才可。所謂陽光行動，只有增加透明度，貪污、腐敗事件才會迅速減 少。
沒有留言:
發佈留言