10月19日，周四。恒生指數跌61.12，收17986.97；成交三百二十九億六百 五十多萬元。期指低水，跌71點，收17964點。華創（291）升4.5％，見十七元七角六仙。新上市嘅金界控股（3918）較招股價升20％，見一元 七角二仙。瑞信推介馬鋼（323），因內地鋼價止跌回升，並估計明年純利可達今年嘅一倍；馬鋼公布第三季純利較去年同期升5.3％。花旗集團推介PC製造 股，並出售手機製造股，主要係微軟今年3月已為Window Vista訂下標準，令全球個人電腦明年進入棄舊迎新期。中遠太平洋（1199）跌2%，見十五元三角二仙。
內地銀行股跑贏國內地產股
發達之法有二：一、傳統方法。努力增加收入、節省開支，克勤克儉，從冇到有，然後漸漸富裕；此法喺低通脹期好成功，例如本港五、六十年代。二、買樓或 買股票。喺物業價上升及股票價上升期中獲取利潤，呢招喺高通脹期亦好管用，例如1967至97年香港黃金三十年。可惜，1997年8月起香港經濟由高通脹 期重返低通脹期，即第二種方法失效，重返第一種方法期（樓價自1997年至今，豪宅打和，普通住宅樓價仍較1997年時低40％，恒生指數較1997年8 月高出不足 10％。要跑贏大市，必須精於選擇包括行業及邊隻係龍頭股，唔係人人可以做到）。恒指見18000點後，投資者宜更加謹慎。2003年中開始嘅通脹回升 期，只係2003年6月利率降至一厘所造成，當利率重返五厘二五後，明年通脹率漸受控制機會好大。恒生指數過去七年每年平均只升1.5％，呢種情況下要每 年喺股市賺取資金20％回報，需要好大勇氣同運氣，缺一不可。最佳投資策略係2000年3月退出、2003年4月全身投入，上述只係事後「謊言」，相信冇 一個投資者能真正做到！
幾乎所有人都同意：甲、中國喺全球經濟扮演嘅角色愈來愈重要。乙、2004年開始中國國有商業銀行股份制改革，令建設銀行（939）、中國銀行 （3988）和工商銀行（1398）先後上市。工商銀行喺中國係最大、城市網絡分布最佳、淨利息收入最高、長期從事工商業令人際網絡最廣嘅內地銀行。上述 因素令工商銀行喺內地處於領導地位，上市後爭取成為國際一流金融機構嘅成功率最高。工行完成招股後，公開認購部分超額認購七十六倍，凍結資金達四千一百八 十三億元，國際配售熱烈得要提前截止，A股凍結資金更達九千億元人民幣，打破歷年紀錄。丙、「十一．五」規劃下，中國經濟面對轉型，由過去二十八年出口帶 動轉向內部消費帶動，情況有如八十年代香港。如果時光可以倒流，相信唔少港人必會搭上金融同房地產呢兩列特別快車。今天中國同八十年代香港十分相似，所不 同者，1984年7月香港有每年賣地五十公頃限制，令地產股1984年7月至97年8月跑贏銀行股，1997年後銀行股後來居上；反之，中央政府目前在壓 抑內地地產業發展、支持銀行業，未來十年內地銀行股應跑贏內地地產股。
特區政府應增大學學額
有D數字好有趣。例如一個國家或地區人均收入少於一千美元時，只有極少人擁有彩色電視機；人均收入一旦高於一千美元，差唔多家家戶戶都擁有電視機，家 電企業急速成長期便喺人均收入由一千美元以下進入一千美元以上。至於擁有汽車欲望，喺人均收入五千美元以下時只有5％家庭擁有汽車，人均收入一旦達到一萬 美元，便有60％家庭想擁有汽車，除非政府制定政策去阻止，不然道路上遲早塞滿汽車，搞到「無路可走」！中國依家正由人均收入一千美元一年走向五千美元， 對彩電呢類電子消費品及其他電器產品需求高增長期已過，進入deflationary boom時期，即「賤物鬥窮人」日子，產品必須透過減價去將別人市場搶過來才能生存。至於汽車則進入高增長期，即由5％家庭共二千一百六十萬家庭擁有汽車 嘅時代；未來中國如達致60％家庭擁有汽車，汽車數量將走向二億五千萬輛，睇數字都嚇死人也。
中國幅員廣闊，各地人均收入差距很大。目前內地工資係點？喺上海做經理月薪八千二百七十八元（人民幣．下同）、北京做經理七千八百八十八元、深圳做經 理七千二百七十五元、廣州做經理六千三百二十二元。專業人士又點樣？石油行業專才月薪七千九百四十九元、金融係七千四百五十七元、物流七千二百六十九元、 電訊七千二百四十六元、電力七千一百四十一元、建築六千五百元、醫療六千三百五十九元、互聯網六千零一十二元、消費業五千九百三十元、汽車五千七百二十七 元、廣告五千四百八十七元、批發或零售管理人員五千二百五十二元（上述已包括獎金、津貼在內）。即內地大城市中級管理人員已進入年收入一萬美元嘅水平，大 城市嘅汽車需求亦進入高增長期。
响外國，當人均收入超過二萬美元時，大部分家庭皆送子女入大學。香港人均收入已達二萬六千美元，卻只有17％中學畢業生可以入本港大學而非50％，唔 少家庭只有送子女出國留學，造成外滙流失。特區政府應大量增加大學學額，才符合社會需要；理論上每兩個中學生應有一個可以讀大學。
波士頓諮詢公司今年全球財富報告指出，台灣富有家庭共擁有一千四百二十一萬億美元財富、中國內地一千三百三十五萬億美元，估計今年中國內地將超過台 灣。所不同者係台灣5％家庭擁有台灣50％財富，中國一百五十萬家庭擁有全國財富70％，佔總人口0.46％，係全球財富最高度集中嘅國家之一，其中 90％中國百萬美元富翁分布喺東南沿海幾個大城市（波士頓諮詢公司1963年創業，喺全球六十二個城市有分支機構，調查都應該幾準確）。
深圳直接利用海水減淡水消耗
目前海水化淡技術達二十多種。主要分為電滲析法、蒸餾法和反滲透法三種，以後面兩種最具競爭力。先講蒸餾法，適用於水質較差嘅海水，通常同發電廠相互 結合；以色列、沙地阿拉伯及中東國家嘅淡水資源，有70％嚟自此法，就係喺沿海地區興建發電廠推動發電機後嘅蒸汽輸入海水，把海水加熱蒸發、冷卻，造水能 力達到「蒸汽一淡水十」嘅比例，成本雖較自來水價高，但已到達可接受水平（因發電後蒸汽接近零成本）。聽講深圳能源環保有限公司已與一家發電廠合作興建一 間日產十萬至二十萬噸嘅海水化淡廠，供建築業用水，另有兩至三個海水化淡技術專案在研究中。
深圳規劃初期並冇將水問題加入考慮之列。例如全港廁所用水都係海水，而深圳卻係食水。今後深圳新建嘅工業區、度假村、賓館及住宅小區，工業冷卻用水及廁所用水改為海水（舊區已無計可施也）。計劃2010年深圳直接利用海水每年九十億立方米，減少淡水嘅消耗量。
內地二手房政策相繼出台：個人轉讓自用五年以上並且係家庭唯一生活用房，免徵個稅。出售自住房者一年內購入另一住房自住者，先徵後退。喺出售時先交樓價1％作個稅，購回住房後可申請退回。先買後賣視個別情況，一般情況仍先徵1％樓價，然後申請退回。
中國改革開放後，第一次經濟過熱係1984至89年，以固定資產投資增長率而言，1984年係28.2％、85年38.8％、86年22.7％、87 年21.5％、88年25.4％，89年上半年仍十分熱，但六四事件後一下子冷卻下來。當時政府讓人民幣喺外滙調劑中心貶值，重新刺激經濟。
第二次過熱係人民幣貶值後，1992年固定資產投資上升44.4％、93年61.8％。94年1月上海朱宣布人民幣同美元掛鈎，停止人民幣貶值。雖然係咁，94年固定資產投資增長率仍達30.4％。
第三次過熱由2003年開始。1997年亞洲金融危機，東南亞各國貨幣貶值，令人民幣滙價偏低優勢漸減。為重新啟動中國經濟增長，1998年中央決定 實施出口退稅，令中國產品競爭力一下子番晒嚟。不過，2003至05年能源消耗平均每年升13.6％、GDP增長率保持10％或以上，造成資源大量消耗及 環境污染嘅惡果。今年「十一．五」規劃下，決定固定資產投資增長率由25.7％降至18％、GDP增長率由10％降至8％、能源消耗降至4％、排污減少 2％。由於係「規劃」唔係「急煞車」，相信要一段時間效果才浮現，再唔會好似之前兩次咁狂升暴跌。
旅遊已成為大眾娛樂；加上今天到外地做生意嘅中小商業機構大增，產生對經濟型酒店（Budget Hotel）嘅需求，條件係服務標準化、環境舒適清潔、價格相對低廉，而非五星級服務。呢種經濟型酒店喺外國已十分流行，一般收費一百美元或以下一晚，只 提供早餐及執房服務（即Breakfast+Bed，B+B），並以連鎖式經營，冇豪華大堂、宴會廳、泳池、健身室等設施，只提供早餐及執房服務。呢種B +B酒店喺美國及歐洲好普及，中國亦開始發展。其實旅客及做中小型生意嘅人士，有幾多人真正需要酒店泳池、健身室及豪華飲宴服務？單係B+B服務已經足 夠。
南非土地改革令資金撤走
中國改革開放後，出現大量「386199」部隊。38（代表婦女）、61（代表兒童節）、99（代表重陽節即老人）；至於村中壯丁都跑去城市打工，結 果婦女負起照顧兒童及老人兼下田耕種嘅責任；丈夫逢五一、十一及春節回鄉，一年見三次，其餘時間不相見。中國到底有幾多386199部隊？南京師範大學社 會學系研究生魏翠妮通過一年調查，發現數字驚人，接近五千萬！今天農家女已視出嫁為畏途，因為出嫁之後，日常事務係照顧丈夫留下嘅兩老、送孩子上學、下田 耕種及回家燒飯，然後每年見丈夫三次，每次五、六天，唔少農家女四十多歲已十分蒼老。中國有五千多萬家庭係咁樣生活，所以農家女一聽到要結婚唔係高興，而 係諗辦法逃跑。幾年前我老曹曾睇《Runaway Bride》，原來真實個案每天都喺中國上演！
1999年當曼德拉從白人手中取回南非政權，唔少人十分鼓舞，認為係民主另一勝利。七年過去了（同期資源價格大幅上升），南非經濟又點？今年8月南非 農業部長Lulu Xingwana強調，白人農夫應喺政府六個月最後限期內同意出售農地價，以便政府收回將30％農地分派畀黑人農夫！2008年將係最後期限，以便 2014年達到30％農地由黑人擁有！根據《Farmer's Weekly》雜誌報道及本周三彭博轉載，呢個將係辛巴威（非洲中南部一個國家）模式，即由政府決定售價，強逼白人農夫接受上述方式嘅土地改革結果。辛巴 威通脹率曾因此達年率1204％、失業率一度達70％，理由係政府大量增加貨幣向白人低價收地，白人農夫將資金滙走及離開，引發該國貨幣暴跌；而黑人農夫 又不善經營，結果令農場荒廢，造成大量人口失業！上述消息透露後，南非蘭特周三開始回落，已有大量資金拋售蘭特購入英鎊，資金正由南非流向英國，南非白人 農夫已有撤離南非嘅打算。由政府低價徵地，媲美五十年代中國政府土改（沒收地主嘅土地），結果係點？答案係引發六十年代中國大饑荒！耕者有其田係咪正確？ 至今為止中國農業未上軌道，就係五十年代土改時將農地分得太細，令農夫每年只需工作三個月（春耕一個半月、秋收一個半月），餘下九個月點算？由於耕地太細 收入唔多，結果中國農民生活係吃唔飽餓唔死。反之，七十年代台灣政府土改卻好成功，政府以市價向農民收地建廠房，地主紛紛變成廠家，為農民提供大量工作 （因有工廠建成）。南非政府呢次向白人低價收地分派畀黑人絕對係錯誤，因為係種族歧視，只係呢次被歧視對象係白人。利用政治力量去解決經濟問題，後遺症往 往一籮籮，政策制定者必須小心！
最低工資須立法係僱主之恥
聽講喜瑪拉雅山嘅挑夫，人人孔武有力，挑行李日行十里亦唔會疲倦。一天有位旅客喺半途中見到一位挑夫停下來休息，便上前問佢點解？嗰位挑夫答曰：「擔 心自己行得太快，自己靈魂跟不上，所以停下來等佢！」相信大部分本欄讀者一如我老曹係財富追逐者，有時會否自己「行」得太快，而令靈魂追唔上？耶穌曾說： 當你賺得整個世界卻失去自己嘅靈魂之時，你又得到乜嘢？西方資本主義制度所以成功，背後包括基督精神，即兩個「C」（Capitalism加 Christianity），缺一不可。極端資本主義同極端共產主義同樣可怕。社會上永遠有20％人跑得較一般人快，另有20％人係落後者；如跑得快嘅人 唔願同情跑得慢嘅人，反而睇唔起佢，社會漸趨兩極化，最後結果係動亂與不安。天道必定削有餘而補不足。今年中央政府已推出「和諧社會」作為「十一．五」規 劃思想指導，香港何嘗唔需要？最低工資如須立法，不但無法執行（因規避方法極多），亦係港人僱主之恥！另一方面，僱主們應否細想喜瑪拉雅山挑夫嘅說話：自 己行得太快令靈魂追唔上？及早執行天道：削有餘而補不足。公司賺少10％純利，令低薪員工生活好D，係所有做老闆嘅社會責任。
毅興行（1047）、天鷹電腦（1129）停牌。
■Prime Invest（721）10月23日；常茂生物化學工程（8208）11月3日；雅高企業（8022）6日；玖源集團（8042）、先進半導體（3355）10日公布業績。
沒有留言:
發佈留言