樓市投資者買少見少

　　10月13日，周五。恒指一度升越萬八點，升115.77，收市報17988.86；成交四百零一億八千六百多萬元。期指升51點，收17998點。港股係2000年7月以來首次重見18000點【圖】，利豐（494）升1.2％、中移動（941）升1.6％。

　　南方航空（1055）升0.8％，公司宣布今年1月至9月獲利大幅增長（去年同期獲利九百萬元人民幣）。北京首都機場（694）宣布9月份旅客人數四 百四十三萬人次，頭九個月三千六百二十萬人次，升20％。東方航空（670）宣布由曹健雄出任總經理，以取代羅朝庚，公布並冇講明原因，我老曹亦木宰羊 也。

　　中國9月份轎車銷量升28.7％，創五個月來最大升幅，因新車款及降價刺激買車欲；產量升28％，達六十三萬五千輛。

　　9月份中國外滙儲備九千八百八十億美元，較去年同期升28.5％，估計10月份可達一萬億美元！

珠三角貨櫃碼頭勢掀減價戰

　　世界黃金協會發行嘅交易所買賣黃金基金（ETF），10月11日起喺新加坡股票交易所掛牌，最少投資十股，每股持有十分一盎斯黃金。目前該基金管理資 產達七十億美元，已喺唔少交易所買賣，投資者毋須費心點樣存取金條金塊，股價緊隨金價升降。ETF最先2004年11月喺紐約交易所掛牌，依家每日平均交 易額四億美元，今後亦可以喺新加坡交易所買賣。

　　香港貨櫃碼頭隨着珠三角一帶愈來愈多貨櫃碼頭建成而喪失優勢，競爭已唔再局限於深圳嘅蛇口、鹽田港、馬灣等，而係2008年落成嘅南沙貨櫃碼頭。估計 2008年珠三角一帶將面對貨櫃碼頭服務過剩，各碼頭為咗爭生意而進入減價戰，因為大家貨源相同，都係嚟自珠水三角洲一帶嘅工廠。

　　隨着 2006年快結束，地產發展商必須面對現實。長期持貨不賣（有價無市）唔係辦法，已決定貨尾減價，實行八折酬賓；但去年入市嘅投資者唔少仍未套現，形成樓 市投資者買少見少，目前主要依賴用家接貨。冇投資者參與嘅物業市場，成交量唔易暢旺，估計完成清貨尾行動後，明年樓市仍相當平靜。至於明年到期嘅勾地政策 會否改變？暫時未有消息，即麵粉貴過麵包情況持續，但麵包又缺乏市場承接力，明年情況改變機會唔大。今天地產發展商都係財雄勢大，相信明年取態和今年一 樣，繼續持貨等客上門，直到年底才清貨尾。

　　台灣近期受倒扁事件影響，消費市場表現令人失望。香港唔少零售商喺台灣生意做得好大，恐怕會被波及，間接影響本港零售股下半年業績；加上「十．一」黃 金周冇帶嚟驚喜，睇嚟本港零售股未能擺脫反覆向下走勢，响大市上升中成為落後股，除非股價跌至認真吸引嘅水平，不然值博率唔高。

　　大成生化（809）經本報「每日一股」推介後，股價表現不俗，公司新嘅生產方式，估計可增加產量3-5％，但面對嘅困境未變，就係玉米因可用於生產乙 醇而漲價，估計將令大成生化今年玉米成本上升6-9％，但產品售價不變，因而令邊際利潤下降。大成生化股價經半年回落，O已到咗合理水平，反彈一下合理， 但係咪扭轉大方向？言之過早。

　　美國2005╱06年度財赤減少40％，但8月份貿赤進一步擴大至六百九十九億美元，較去年同期升19％，包括入口原油二百七十二億美元，以及向中國 入口電腦、消費品等進一步升至二百六十七億美元，對美元滙價構成短期壓力；但因油價已回落，因此9月份美國貿赤減低機會好大。

美貿赤有機會減低

　　美國貿赤擴大嘅理由係美國經濟較其他國家（如日本、歐洲）繁榮。美國擁有全球最大嘅金融市場，無論債市或股市都欣欣向榮，因此美國人消費力仍十分強。 貿赤對一個國家嘅GDP影響如何？日本年年貿易盈餘，過去十五年經濟唔見得好；美國貿赤不斷擴大，經濟亦唔見得差！經濟全球化，全球有75％儲蓄資金流入 美國，再透過美國企業投資各國新興市場，估計美國企業從中賺咗唔少，足夠抵銷貿赤有餘，不然美國經濟點解仍保持繁榮？

　　聯儲局嘅通脹目標係CPI升幅喺1％至2％，但美國核心CPI增長率高出2％已二十九個月，聯儲局都冇符，芝加哥聯儲銀行總裁墨斯克極度關注呢個問 題，明年佢將成為聯儲局嘅投票委員，相信明年如核心CPI升幅大於2％就唔會減息。差唔多人共皆知嘅答案係，美國短期利率停止上升及道指工業平均數創新 高；美國GDP增長率由第一季5.6％下降至第二季2.5％，但唔係走向負增長！樓價已停止上升，油價7月14日起進入回落期，企業純利升幅放緩但唔係停 止上升，消費增長亦只係放緩。美國人口年增長率大約1％，生產力增長率已放緩至1.1％，即美國GDP增長率喺2％左右，才唔會引發通脹率上升。但今年第 二季美國工資（加福利）卻上升4.2％，即勞工成本令CPI最少上升2％，其餘才係油價、商品價格等上升帶來刺激。換言之，如果貝南奇希望將CPI增長率 壓低至2％或以下，理論上係有排等！今年5月開始上落市將一直維持下去，直到另行通告為止。如你由今年5月起投資方面過分小心謹慎，可能一再後悔錯失機 會，因為輪流炒遊戲今年5月至今一直未停止，淡友暫時仍冇市場。美國樓價回落了，但油價同時回落，抵銷咗大部分不良影響，睇落我地應有一個快樂嘅聖誕。

聯儲局仍不能手軟

　　CRB指數雖然已回落兩個多月，但RIND指數（Raw Industrials Index）仍在上升，代表工業用原料價格未因金價同油價回落而下降；換言之，未來通脹壓力頗大，美國聯儲局仍不能手軟！我老曹相信，利率五厘二五將一直 維持到明年第二季，上述形勢不利樓市，但有利股市，形成資金由物業市場流向股票市場玩尋寶遊戲。新興市場股市習慣大跌大起，各位不妨留意1994至 2003年MSCI內嘅股市指數，由1994年墨西哥危機、1997年亞洲金融風暴、2000年土耳其危機、2001年阿根廷危機、2002年委內瑞拉危 機、2003年香港沙士疫症，新興市場股市隨時可失去60％市值，然後又再完全收復失地。因此，鐘擺理論最適合用作分析新興市場股市。全球最大新興市場股 市係中國H股，佢地會否一如其他MSCI內嘅股市，一樣大跌大升？嗰Ｄ被砌低嘅H股，股價會否遲早升番？對付新興市場股市嘅策略係有危才有機。例如本港最 佳投資時刻係1998年同2003年，指數回落60％或以上之時，或向那些股價跌幅大於70％或以上嘅H股尋寶。

　　美國投資顧問情緒指數本周睇好一方升至52.2％（上周為49.5％），睇淡一方只佔30.4％，已好接近今年4月水平；同今年5月睇好佔55％比較 仍差一ＤＤ（60％被視為見頂訊號）。股市則喺憂慮中上升，樓價仍在下調中，但速度好慢及好淺。油價亦在回落中，相信已完成大部分跌幅。根據美國經濟分析 局統計，美國企業第二季稅前純利上升20.5％，係支持股價上升嘅理由，估計今年全年企業純利升幅仍接近20％。2002年起美國企業純利一直保持雙位數 字增長，相信今年係連續第五年保持雙位數增長（美國有五百五十萬間公司，上市者接近一萬間）。能源股及資源股因油價下滑及原料價格回落，第三季純利升幅放 緩，除上述外，明年美國企業純利升幅相信仍不俗。美國樓價停止上升，但唔係大跌，唔好過分誇大呢方面影響。美國樓市唔係1997年8月香港，只係唔再成為 經濟上升動力而已。1997至2006年美國樓價平均只上升80％（香港1984至97年樓價上升五倍），同期澳洲樓價上升126％、英國樓價上升 184％。今天澳洲同英國樓價亦只係冷卻，而非大跌，點解對美國物業要過分憂慮？

油價左右深海探油計劃

　　最近油價由七十八點四美元回落到五十七點五美元，OPEC已宣布減產一百萬桶一天支持油價，如投機熱錢退出，油價可見五十美元，即仍有下跌空間。 Strategic Energy & Economic Research主席估計，今年石油產量可增加二百萬桶一天，明年三百萬桶；而美國石油存量已達二十七億桶無法再增加了，依家有賴中國增加石油存量去支持 油價，以免油價低於五十美元，令嗰Ｄ深海探油計劃嘅資金減少（因為深海石油生產成本接近三十美元一桶，油價必須高於四十美元才有利可圖）。

　　能源股、資源股過去三年都係大贏家，但今年5月起形勢改變，如投資者喺行業形勢改變時仍持有並因此蝕本，怪得邊個。事實上，1997年後市場大贏家都 係嗰Ｄ曉得玩「Sector rotation」嘅投資者，由一個盛極而衰嘅行業跳去另一否極泰來嘅行業。近日美國原油、汽油、天然氣存量皆增加，但油價仍升，主因只係超賣，因為油價 已跌至九個月內低價五十七點五九美元，已冇石油期貨揸家有錢賺矣。

　　11月7日中期選舉結果如何？無論共和黨或民主黨控制國會，美國石油政策都係不變，仍係逐步減少對外國石油依賴，估計更多電廠將以天然氣發電；至於以 煤發電仍有保留，因為空氣污染嚴重。過去三十年香港飽受以煤發電所造成嘅空氣污染（包括嚟自本港兩電同嚟自珠三角一帶電廠），最近佘當奴終於提出「藍天計 劃」，希望個天從此唔會日日灰濛濛也。

　　中銀國際表示，華潤電力（836）今年首九個月發電量上升15.7％，估計全年獲利二十三億元，估計可跑贏大市；華潤電力正在內地興建全國最環保嘅電廠。

網網聯婚發揮協同效應？

　　科網時代响九十年代興起，2000年美國在線（AOL）與時代華納合併，代表新媒體與舊媒體結合，依家已證明失敗。呢次Google收購 YouTube 被視為一個網同另一個網結婚，可否產生一加一等於二點五嘅效果？YouTube為網友提供將拍攝到嘅video上網與其他網友共同欣賞嘅平台，平均每天有 六萬五千段video上網儲存。而YouTube須為一億一千萬段video提供儲存及搜索令虧損一再擴大，出售理由充分；至於Google購入是否明 智？便睇能否以一億一千萬段video招來廣告商賣廣告而定。

　　Google嘅強項在於搜索及整理，YouTube依家手上一億一千多萬段video，雜亂無章，唔易搜索，Google能否將佢整理成為容易搜索嘅 video，而成為極之有用嘅information，同時避過盜版問題（唔少video可能涉及盜版）？YouTube吸引力不在科技，而係有一億一千 萬段video存貨及五千五百萬個網友。決定呢次收購成功或失敗便看一個網（web）收購另一個網後，能否互相迎合而定。

　　上海陳良宇已面對雙規，根本上係毫不出奇嘅事。內地官場雖不致無官不貪，但貪官肯定無所不在。例如國企內濫用公款者就如家常便飯，只要到澳門賭場睇睇 嗰Ｄ驚人賭款數字已可知一二。香港六十年代亦貪污盛行，只係香港政府背後有個英國國會，英國委派來港嘅港督麥理浩，為本港建立廉政文化，但開始對付貪污 時，亦曾引起警廉衝突。有人認為，發展民主政制可防止貪污，我地不妨睇睇菲律賓、印尼、泰國、印度甚至近年台灣，一樣面對貪污問題。或者毛澤東講得咁， 「牛鬼蛇神，你不打它不倒！」今天香港同新加坡係華人社會政府中最廉潔者，證明華人唔係特別貪污，只係許多時由政府取向而定，呢個亦係中國人民今天對胡錦 濤嘅期望。

打大老虎人民才心服

　　中國經濟經過二十多年改革開放後情況有如七十年代嘅香港（或東南亞國家），最終中國擁有廉潔公務員隊伍抑或走上東南亞國家之路？呢十年起着決定性因 素。過去中共亦有反貪污，民間順口溜：「小貪不得了；中貪逃跑了；大貪哈哈笑！」反觀香港廉政公署，成立目標就係打擊集團性貪污，只有打大老虎，人民才心 服，才能樹立權威，才能警戒其他人貪污代價十分大！大舊江、上海朱時代，打擊貪污主力都集中喺福建、廣東省及北京等地，上海都冇大貪污案出現，咁情況下點 叫人心服？未來十年中國政府如不搞好反貪污，中國只會走上東南亞國家或拉丁美洲國家之路，無法達至先進國家水平！

　　禮義廉恥，國之四維；四維不張，國乃滅亡。今天中國人喺外地無禮貌、做生意唔遵守合約、政府官員唔廉潔、唔少中國女性出國賣淫，咁情況下，中國經濟繁 榮能維持幾耐？胡溫嘅任務就係提升國企效率、建立廉政公務員制度，只有如此，中國未來二十五年才係光明嘅，不然只係另一個菲律賓、印尼或泰國而已，中國人 仍抬唔起頭。

　　2002年大舊江唔再係國家主席，2004年唔再係軍委主席，去年胡錦濤已真正掌握權力。佢面對嘅問題：一、貪污；二、污染；三、無序擴建；四、地產 投機；五、國企效率低。部分成因係中央政府對地方政府監管失控，例如陳良宇喺2004年有膽公開批評溫家寶總理嘅宏觀調控，完全係地方政府挑戰中央政府領 導，如不整治，其他地方政府好易當中央政府冇到，出現國民黨時代地方政府當孫中山為「孫大炮」（你有你講、我有我做、當你冇到）。今天已有人講「中央政策 出不了中南海」，雖然未叫胡主席為胡大炮，但溫家寶喺推行政策上已處處受地方政府箝制，例如煤礦災難事件一次又一次，當溫總冇到嘅情況已出現。

　　有人話中國已重返諸侯割據時代，呢次陳良宇事件能否重建中央政府威信？走着瞧。

　　悅達控股（629）、萬佳訊（8279）、聯僑集團控股（8047）停牌。

　　永義國際（1218）以十股合併為一股。

　　力勁科技（558）10月16日上市。

　　■浩倫農科（1073）、羅欣藥業（8058）10月24日公布業績。