大把人揸住蚊年等入市

　　10月20日，周五。恒生指數升126.58，收18113.55；成交三百七十四億三 千六百多萬元。10月期指略為高水，升203點，收18167 點。港交所（388）升1.9％，報六十元四角五仙，係5月15日以來最高。中石油（857）升1.4％、中石化（386）升2％，11月期油升一點五美 元，見五十九點四美元，OPEC計劃11月起每日減產一百二十萬桶後，考慮12月進一步減產。長實（001）升1％、和黃（013）升0.3％，兩大集團 宣布投資上海金融區陸家嘴地皮。中海發展（1138）升4％。

　　1997年起買入後長揸已唔再係最好嘅策略，取而代之係何時買賣、買賣何種項目及喺乜嘢地方買賣？例如1997年同樣買樓，喺香港同倫敦就係兩個唔同 世界；1990年買日股同買美股，又係兩個唔同世界。2000年持有科網股同投資資源股，又係兩個世界，今年資源股已光芒畢露，相信短期見頂應收斂。近年 利用投資概念去制定投資策略嘅方法已太擠逼，阿媽教落，人多嘅地方唔好企！另一方面，今年6月恒指反彈至今，唔少人喺思想上仍跟唔上，揸住大量資金等入市 （呢點可由工商銀行（1398）上市獲咁多資金認購證明。有咁多人揸住蚊年等入市，個市又點會大跌？

OPEC對油價影響力降

　　喺沙地阿拉伯同意減產嘅消息下，11月期油仍未重返OPEC嘅要求價六十美元【圖一】。11月1日起正式減產一百二十萬桶一天，希望可刺激油價再升一 D。美國存油較去年同期高6-15％，天氣正常及墨西哥灣未形成風暴，令油價較7月14日高價仍低25％；冇人支持嘅天然氣因存貨較去年同期高13％（或 較五年平均數高11％），近月價格漲唔起嚟。1973年石油危機後，各國紛紛發展替代能源，令OPEC對油價影響力漸減。至今OPEC產量只佔全球石油總 產量40％；加上大量替代能源入侵能源市場，近年OPEC既不能阻止油價升穿三十美元，相信亦無法阻止油價低於六十美元，OPEC宣布減產對短期油價或有 影響，但對中長線影響已唔大，因此對OPEC嘅公布唔好太認真，近日油價上升，只係8、9月份過分超賣後嘅反彈。呢次喺多哈卡達嘅會議OPEC同意減產係 2004年12月首次，相信真正減產只有沙地阿拉伯，其他國家只係虛張聲勢。

　　1973年石油危機前，OPEC產量佔全球石油總產量超過50％。由於喺七十年代過分推高油價，令OPEC產量到八十年代只佔全球石油產量30％！基 於OPEC增產去重奪石油市場佔有率，到咗今天才重新佔有40％。近年油價高企令OPEC收入甚豐，但資金卻未用於投資石油增產而用喺其他方面；反之，非 OPEC供應者都大量投資在石油勘探方面，估計未來OPEC佔全球石油產量嘅百分比又再回落。

　　以沙地為例，油價六十美元一桶，令該國每日收入超過四億美元，去年財政盈餘五百七十億美元（估計今年亦一樣），其中唔少用作興建學校、醫院、基建，為 沙地人創造就業，只有小量資金用於開發石油資源。其他OPEC成員亦過分依賴出口石油收入，一旦油價回落，面對嘅財政壓力都幾大。

金價現死亡交叉點

　　金價重返六百美元心理關口，亦係五十天移動平均線阻力位（六百點六二美元）及二百天線阻力六百零三點一九美元。今天金價更出現死亡交叉點（五十天線跌 穿二百天線）【圖二】，確認5月12日嘅七百三十點四美元係近期高點。由去年8月黃金發出買入訊號後（當時只有四百三十美元），至今年10月確認短期高位 係七百三十點四美元。移動平均線缺點係到確認之時已太遲，呢點可用拋離二百天線上下10-15％去輔助，即移動平均線通道。出現死亡交叉點唔代表短期金價 唔會升，只代表金價好難再高出前高位七百三十點四美元。

　　1690年英國國皇威廉三世為咗交易方便，成立咗英倫銀行，並喺1699年委任佢嘅鄰居牛頓爵士出任鑄幣局局長鑄造英鎊（每個含金量零點二三五四盎 斯），並以白銀鑄造先令（Shilling），再以鎳鑄造便士，全國通行。三年後，為方便攜帶大量金錢，英倫銀行開始發行五鎊及十鎊紙幣，持有者可隨時到 英倫銀行兌回黃金。有人認為此一改革係導致大英帝國興起嘅最大原因，直到1933年，由於英倫銀行喺第一次世界大戰期間發行太多英鎊紙幣而無力兌現黃金， 才宣布英鎊兌黃金貶值；反之，美國立國後便以發行鈔票為主，市場上美元金幣流通量唔多， 1862至1879年因內戰令美鈔發行唔多，形成美鈔喺市場上價格低於美金（美國金幣）。1867年國會通過立法，一美元必須含金量一點六一二九毫克，但 1879年美元兌英鎊仍大幅貶值，喺咁嘅形勢下，1879年美國政府只有宣布恢復金本位（即美元可兌回黃金），支持美鈔滙價。到1897年，英國人開始將 美元大量兌回英鎊或黃金運回英國，美國政府無法應付，總統邀請J.摩根協助，聯合全美國各大銀行借出英鎊及黃金畀美國政府，去應付英國人呢次兌換潮。風潮 過後，J.摩根協助美國政府組成今天嘅美國聯邦儲備局，並喺1911年成立，以處理貨幣問題；1913年再通過聯邦儲備局法案，未來所有美元發行必須有 40％黃金儲備，以免再重演美元被擠提事件。1914年第一次世界大戰爆發，英國同德國為支付軍費，雙方都濫發貨幣（當年德國貨幣係唔可以兌換黃金嘅）。 戰後德國貨幣大幅貶值，經濟崩潰，呢一次輪到美國政府收納大量英鎊向英國兌換黃金，令黃金大量流向美國，美國一下子富起來；加上歐洲人逃避戰火紛紛跑去美 國，令美國房地產價格大升。到1920年資金流入股市，引發1929年華爾街危機。第一次世界大戰結束德國戰敗，英國要求德國作巨額賠償，1914年德國 戰前擁有嘅黃金喺1918年全部賠畀英國，令德國貨幣完全冇黃金支持而引發大貶值，到1923年十億馬克只值二點二七美仙，德國經濟全面崩潰，引致半數德 國成年人失業，隨後希特拉興起，最終引發第二次世界大戰。吸收咗第一次世界大戰嘅教訓，呢次戰勝國美國同英國再冇要求戰敗國賠償，反而協助德國重建經濟。 六十年代歐洲各國富起來，將手上英鎊、美元向英國同美國兌回黃金。1966年英國首先支持唔住，其後係美國，兩者先後宣布英鎊及美元貶值，唔再兌換黃金， 到1971年美元最終亦脫離金本位制，從此全球冇一個國家貨幣可以兌換黃金，引發七十年代黃金大牛市。1979年底美國聯儲局主席搵到一條良方，就係如利 率高於CPI增長率二厘，便可令金價從此抬唔起頭。黃金自1980年出現二十年熊市。2001年「九．一一慘劇」後，聯儲局再次瘋狂減息，唔再遵守 1980年雪茄伏訂立嘅守則，金價又再大升。

　　以今天美國CPI增長率計，聯邦基金利率必須企於六厘半以上，才能令金價再受控制，但上述利率水平可引發美國樓市大幅回落，因此聯儲局政策係維持利率 喺五厘二五，讓CPI增長率日後回落到 3.5％或以下。如上述諗法正確，即依家距離未來減息日都幾遠也！換言之，金價有可能喺七百三十五美元見頂，但大跌機會唔大。殊仔上任時金價二百六十六美 元一盎斯，任內最高見七百三十美元，依家係六百美元，較佢上任時升125％。無論以乜嘢角度睇，過去六年多時間黃金投資回報率不俗。一如美元，黃金亦有上 升及回落日子。六百美元金價何去何從？木宰羊。

　　資本主義發展初期都幾開心，因為天空海闊任鳥飛，正是海大好行船，百花爭艷，行行都繁榮昌盛，呢段時間通常可維持二十二至二十八年。然後進入資本主義 發展第二階段，即物競天擇、適者生存，併購活動頻密，大食細環境形成，有效率者淘汰冇效率者，如你不吃掉別人，別人便吃掉你，進入有你冇我嘅市場佔有率遊 戲，通常可維持另一個二十二至二十八年。然後進入資本主義第三階段即寡頭壟斷，任何行業內只有排行第一、第二、第三者才可賺大錢，其餘唔係只獲微利就係生 存機會好細，咁嘅環境下，只有龍頭股才值得投資。中國經濟近年正步入資本主義第二階段，即物競天擇、適者生存期；香港經濟1997年起已進入資本主義第三 階段（即寡頭壟斷期）。

恒指萬八以上宜謹慎

　　恒生指數已重返「泡沫」水平（無論係1997年8月樓市泡沫嘅16800點抑或2000年3月科網股泡沫時嘅18390點），但市場感覺上一D瘋狂迹象都冇，因此我老曹態度保持不變：後市宜小心謹慎，但睇淡仍太早。

　　由1929年至今，美國嘅經驗係如你喺高峰期入市（例如O二十倍或以上），未來十年平均年回報率只有0.6％；反之，如你喺低潮時入市（例如O十倍或 以下），未來十年平均年回報率可達10.6％。依家係高峰期抑或低潮期？喺道指12000點之上（恒指喺18000點之上），宜小心謹慎。

　　美國通脹期由1950年CPI增長率接近零，逐步上升到1980年達年率14％，然後急跌至3％左右。1982年至今美國大部分日子CPI增長率喺3 - 6％之間上落。貝南奇上台後希望未來核心通脹率喺1-2％，過去十多年日本同歐洲已進入呢個水平，香港1998至2004年CPI增長率亦喺1-2％水 平，近年才回升多D，今年9月係2.1％。低通脹率雖然帶來低利率，代價係低GDP增長率及較高失業率（所謂三低一高政策）。

國企民企效率近年大提升

　　中國GDP大幅增長，中國企業效率係點？根據世界銀行北京辦事處兩位研究員所得資料，國企嘅股本回報率（ROE）由1998年嘅2％升至2005年 13％，民營企業股本回報率由1998年嘅7％升至2005年16％。換言之，去年內地民企嘅效率已接近歐洲及美國水平，更超過日本企業水平；國企仍差一 D，但追得好快，相信五年後內地國企效率接近民企，即達到歐洲或美國水平。愈來愈多國企喺海外掛牌，不但引入國際標準，同時引入國際管理方式，係最近五年 國企效率大幅提升嘅理由。

　　詩人席慕容說：十六歲的花只開一次。上海房地產經過十六年發展，開始告別「花樣年華」。上月商品房成交四十六萬六千平方米，較「十．一」前少 22.5％，其中商品住宅房成交三十一萬八千平方米，比「十．一」前少21.3％，成交減少五百三十七套。平均成交價八千零三十元一平方米，較「十．一」 前嘅八千六百二十五元下降8.7％（上述唔代表樓價升降，主因係9月外環路成交比較多，只較8月份少19.5％；內環路成交少，降幅達31.9％）。上海 商品住宅房售價平均較去年同期下降5.2％，今後上海樓市進入平穩發展期，再唔係「花樣年華」了。長實、和黃合作以十七億四千萬港元購入陸家嘴X3-2地 塊，與金茂大廈相鄰，亦係陸家嘴核心地段內最後一塊土地，可建樓面八萬平方米，並由貝聿銘之子擔任設計，採用「變形設計」，底部係一個正方形，以四十五度 角旋轉喺空中變為八邊形，日後將係長實及和黃响上海嘅「形象」大廈！

　　潤迅通信（989）、南華工業（413）、南華集團（265）、資本出版（8155）、精優藥業（858）、裕元（551）、國中控股（202）、勞氏環保（309）、五礦資源（1208）停牌。

　　泛海集團（129）買賣未繳款供股權。

　　萬佳訊（8279）股份拆細。

　　■恒生銀行（011）11月6日；財華社集團（8317）13日公布業績。