8月20日，週日。是日天雨。1978年起嘅中國改革開放政策，加上八十年代美國電訊網 絡發展，引發經濟環球化。喺全球市場開放嘅大環境下，香港經濟迅速由七十年代以製造業為中心，轉型為八十年代以金融為中心，大量紅籌、國企來港上市，令港 交所（388）股價升完可以再升，中環IFC寫字樓租金更升至月租一百二十元一呎……。我老曹從來唔質疑香港嘅金融中心地位，但任何行業都逃唔出盛衰循環 週期。今年上半年係咪香港金融業另一高峰期？港交所第二季純利急升後，第三季表現又點？氾濫嘅資金環境5月開始漸收緊，至今市場資金雖然仍寬鬆，但已經唔 再氾濫。環球化速度及市場開放速度，會否隨著美國消費增長率放緩而減慢？事實上，中國紡織品出口配額制度唔係又重新出現咩？
內地租樓較買樓划算
上週五中國人行宣佈加息零點二七釐，呢次係存款、貸款利率同時加，理由係中國固定資產投資響今年首七個月增長率超過30％，呢次係今年4月加息（十九 個月內首次）後第二次加息。人行過去亦曾兩次要求增加銀行儲備金，減低內地銀行嘅借貸能力，呢點為其他國家央行所冇。中國經濟由1998年進入擴張期後， 至今仍好難停下來，分析家估計未來人行將進一步加息。中國人行雖然4月份起開始加息，至今中國房地產景氣卻連升五個月！7月份為103.51，較6月份升 0.58（3、4、5、6月份分別升0.41、0.15、0.26、1.06），似乎係阿崩叫狗愈叫愈走，或者係滯後效應啩。
內地銀行加息後，一個住宅單位月租五百元，二十年才十二萬元；反之，二十多萬市值嘅房子二十年按揭加息後，利息要四十多萬元。內地房子只有七十年產 權，算起來租房較買房划算。不過，今年首七個月深圳商品房價格已漲至九千四百五十元一平方米，較去年同期升36.3％；廣東省房價平均五千二百元一平方 米，較去年同期升12％；廣州市六千二百六十元平方米，上升18.3％，加息後房貸負擔每月多三十至五十元，對自住房購買者而言唔會造成好大誤傷。
中國「十．五」計劃前，冇人對工業用金屬或資源股感興趣；喺「十．五」計劃，中國政府決定加大投資基建去拉動經濟，全球工業用金屬價自1999年起上 升。2006年「十一．五」規劃政府決定走節約型經濟，種種因素至今令資源及能源價格仍停不了，但今年5月起CRB商品指數同金價已形成下降軌，今年5月 後銅價形成沉重頂，今年7月油價亦開始回落，以上係咪有啟示？
美國三十年期政府債券價格今年5月同7月形成雙底回升，代表債券持有者並唔擔心未來通脹？美滙指數卻形成上升軌，令投資界對前景迷惑及睇唔清；未來美國CPI增長率繼續惡化，係咪已到咗轉角市？
貝南奇想開兩條戰線
美元滙價係咪偏低？2000年一歐羅見82.3美仙，今天美元兌歐羅已貶值50％；2002年美元兌加元亦開始貶值，至今亦跌咗50％；美元兌日圓自 1998年起由147.5至今天嘅115日圓，貶值22％。不過，美國同歐洲、加拿大及日本嘅貿易不但未見改善，而且仲惡化咗。換言之，即使美元兌人民幣 貶值50％，中美之間嘅貿易相信亦唔會改善。
1971年浮動滙率制度開始至今已三十五年，支付最低利息嘅日圓及瑞郎升幅最大。今年8月8日美元加息潮已告一段落；反之，歐羅及日圓仍須加息，上述環境 對美元滙價不利。美國商業部估計，全國樓價自今年1月至7月已回落3％，未售出房屋存量較一年前升39％，擔心樓價進一步回落，引發美國經濟明年進入極度 放緩期，聯儲局真係左右做人難。
美股上週連升五個交易天，表現不俗，投資者對貝南奇表現充滿信心，貝南奇亦希望自己威過拿破崙或希特拉，決定開兩條戰線，既進軍莫斯科亦攻打英國！貝 南奇希望阻止美國通脹率唔再惡化，同時阻止美國樓價下跌以免引發通縮。你話得唔得？打仗最忌腹背受敵，呢次真係睇貝南奇功夫嘞。根據過去紀錄，聯儲局響安 排軟著陸方面大都唔成功，最成功一次只係1994年，呢次又點？油價至今未跌穿六十九美元，金價未低於六百一十美元，唔好咁快以為對付通脹率方面已取得勝 利。美國房地產7 月份銷量較1月份減21％，係2004年11月以嚟最差；7月份新批建造合約減7％，更係四年內最差；美國私人住宅單位超過一億間，平均每間價值二十五萬 美元，如回落10％，即美國人共失去二萬五千億美元財富；如回落20％，便更加不得了！
領先經濟指標過去六個月連續以年率1.4％速度下降，從呢點睇，美國未來情況不妙。CPI仍保持較高增長率，GDP卻保持低增長，即滯脹環境已形成。 美國經濟環境正重返七十年代情況，當時道指喺1000點水平上落，今天改為道指喺11000點水平上落。香港響七十年代係GDP高增長期，當年香港情況係 CPI同GDP同時高速增長；但今時唔同往日，香港經濟已完成經濟上所謂黃金三十年，1997年8月起步入GDP低增長期，再不能用七十年代情況去分析依 家嘅形勢。從擺動指數睇，今年除咗5月份出現超買、6月13日超賣外，港股過去兩個月超買或超賣情況並唔明顯，股市贏家都係嗰Ｄ懂得買入強勢股、拋售弱勢 股者。上升股份由一個行業轉向另一行業，並非人人跟得上。
七十年代美國出現滯脹，理由係利率一升再升，但CPI升幅更大，客觀環境係「負利率」，利率既阻不了CPI增長率進一步上升，但又不致引發美國經濟衰 退。直到1979年雪茄伏出任聯儲局主席，將利率一再推高（最高曾高出CPI增長率六釐）殺死高通脹，代價係1982年嘅經濟衰退。如今年貝南奇將利率推 高至六釐半或以上，必可解決CPI高增長問題，令CPI增長率重返1％至2％水平，代價係明年美國經濟出現衰退。貝南奇如維持利率響五釐二五，未來美國經 濟將唔生唔死，CPI增長率問題亦無法解決。
油價已跌穿五十天移動平均線，回落到兩個月內低價，係咪方向改變？木宰羊（除非六十九美元失守）。由於上週五係8月份石油股期權到期日，近日油價回落 可能只係一次技術調整。通常油股期權到期前十個交易天，可令油價回落3.9％左右，然後又再上升。油價係咪又由上週五低價回升？
中國首家石油現貨交易所8月18日喺上海開業，落址浦東，由上海互聯集團、中國石油、中國石化、中海石化工進出口公司、中化國際等共同組成，註冊資本一億零五百萬元人民幣。
睇淡油價者如Matt Simmons, Ken Deffeyes及Colin Campbell認為，1973年石油危機後，全球資金大量投資勘探石油，呢方面資金支出大升，一直到1982年（共九年，只有1976年例外）。油價自 1980年起回落，黃金再度減少投資；七十年代大量勘探、八十年代進入收成期，帶嚟油價過去二十年供過於求，最低喺1999年曾見十美元一桶。1983年 起勘探石油方面支出大減，係造成二十一世紀另一次石油危機嘅遠因；2002年起勘探石油方面投資又再上升，但新發現嘅大部分深入海底一千呎甚至一萬呎，都 係極難開採，造成今天油價高企。依家大量深海挖鑽機響2008及09年加入服務，可以喺水深八千五百呎之下海底鑽探三萬五千呎深，估計到時將有大量深海油 田被發現，而再次改變未來石油供求關係。
十九世紀石油用作點燈叫做「煤油」，不但生產困難，加上過於易燃（十九世紀芝加哥大火，就係因煤油燈被一隻牛踢翻引發）。洛克菲勒發現，喺提煉石油過程中 加上高溫及高壓，便可生產出我地日用嘅汽油，優點係燃點提高，解決咗煤油太易著火嘅最大缺點；用此方法提煉嘅石油，佢叫做「標準石油」（Standard Oil），1870年起大做廣告推廣呢種新生產方法，令所產煤油可以安全使用，引發全球大量使用安全煤油（即今天嘅汽油）。其後洛克菲勒收購咗美國大部分 煉油廠去生產佢嘅「標準石油」，再收購油井供應原料……。可以講，佢嘅發明（用高溫同高壓去提煉安全石油）不但令佢發達，亦令石油使用從此普及，由此可見 創見嘅重要性。分析界認為未來技術突破在於「煤變油」方面。
有銀士資產升值速度加快
瑞士聯合銀行（UBS）乃全球最大嘅私人銀行，8月15日公佈第二季純利升50％，第二季共吸納客戶新資金達二百五十二億美元（折合一千九百六十五億 港元）或年率12％。另一瑞士大銀行瑞信公佈喺中東及新加坡業務迅速擴張。JP摩根大通、滙豐財富管理、高盛證券等喺歐洲及亞洲區業務亦快速發展，計劃未 來五年將員工數目增加一倍，去服務嗰Ｄ擁有一千萬歐羅（一億港元）或以上嘅客戶。美林證券調查所得，過去五年擁有一百萬美元或以上財資（唔包括自住物業及 退休金）人數上升20％，大部分嚟自中國、印度同中東，而且都係創業成功者，而非承繼上一代財產者。佢地要求嘅服務較進取，再非投資債券或地產，最大興趣 反而係對沖基金及私人配售方面，甚至衍生工具及外滙買賣。
美亞證券指出，UBS同美林收入三分一稅前純利來自財富管理，其他金融機構嚟自財富管理收入亦大幅上升。有銀士響財務機構嘅協助下，資產升值速度加快，造成社會進一步分成20/80（20％人口愈嚟愈富有，80％人口財富唔係停滯不前便是倒退）。
「炒」可以興家，但不可以致富。唔少人第一桶金皆嚟自「炒」，響獲得第一桶金後，日後財富嚟自如何運用呢桶金。如果仲係炒上炒落，遲早輸番曬；反之，利用賺返嚟嘅第一桶金作為資本按年上升，二、三十年後便可發達。
今年5月起股市十分波動，更加證明做功課嘅重要性。投資策略係「少」就要博、「大」就要守。錢少之時不妨炒嚇博大生死，一旦銀碼達某一水平，便應利用 長期增長辦法，毋須再追求高風險、高回報。投資成功與否在乎你買乜嘢及賣乜嘢，唔在乎你對後市點睇。創業難，守業更難。賺取第一桶金當然困難，如何令財富 保持增長就更難，喺今日唔知明日事嘅環境下，一唔小心便可將辛苦賺返嚟嘅財富失去。即使投資中國，過去二十八年改革開放政策下唔少人發達，但亦有大量人因 投資中國而失去所有。我地強調高回報率嘅同時，亦必須留意高風險，例如1997年前嘅紅籌股，至今有幾多隻能重返高位？2000年中移動（941）股價係 八十元，今天亦只係五十一元七角五仙！1997年8月北京控股（392）股價六十五元，今天係十二元四角二仙，仍跌80％！當大部分人睇好某一行業時而入 市，事後皆證明睇錯。
1997年至今恆生指數已完成大W型走勢，上述走勢代表一個地區（或國家）經濟由燦爛趨於平淡，未來香港股市更難炒。
新加坡股市或有投資價值
呢期《Bank Credit Analyst》發表咗兩個有趣圖表。一、亞洲房地產價格與英國、美國、澳洲、加拿大等英語區房地產價格比較，證明1997年亞洲金融風暴後，亞洲區房地 產價格大部分日子落後英語區國家！英語區國家今天樓價可能偏高，但唔代表亞洲區地區同樣偏高。英語區國家樓價1995至2000年以年率5％速度上升， 2000至05年更變成以年率10％速度上升，主要受2001年起聯儲局嘅低利率政策影響；雖然2004年6月起利率止跌回升，但樓價仍然上升。去年第四 季開始，英語區樓價停止上升，英國及澳洲更略為回落，好大機會已進入調整期，但亞洲區可能例外。
二、2000年至今新加坡股市一直落後亞太區新興市場。今年5月起亞太區新興市場開始調整，並唔代表新加坡股市同樣受壓。今年5月對沖基金開始沽售新 興市場股，其中科技股所受壓力最大；另一拋售理由係擔心日圓加息及日圓滙價轉強。不過，6月份起分析員認為上述擔心有Ｄ過慮，雖然資金唔再氾濫但仍然充 沛，令股市又再反彈；加上8月8日聯儲局停止加息，新加坡股市係咪有投資價值？
沒有留言:
發佈留言