缺乏動力上破新高點

　　8月16日，週三。恆生指數升176.96，收17451.03；成交二百八十五億四千 一百多萬元。8月期指高水，升244點，收17462點。長實（001）升一元二角五仙或1.5％，收八十六元八角五仙；平安保險（2318）升 1.5％，收報二十六元六角五仙，今年上半年獲利四十一億元人民幣，較分析員估計嘅三十五億元多；港交所（388）升3.2％，報五十四元一角，第二季獲 利升93％。大摩唱好雅居樂（3383），股價今天升9％。

油價似調整多於大跌

　　OPEC估計，8月份石油需求較7月份每日減八萬桶，其中北美需求每日減四萬桶，上述消息令油價跌至七十四點八美元。依家美國石油存量較一年前多 8.7％、汽油存量較一年前升4.7％，油價7月份升穿七十美元，主因係政治因素刺激，油價中有約十五至三十美元係政治風險溢價。中國去年用咗唔少石油發 電（因發電廠供電不足），今年中國供電情況改善，工廠自行發電量大減。去年內地汽油價格落後世界市場，今年政府逐步放寬汽油價格管制，造成內地汽油價格大 升，消耗量漸受控制。因此，唔排除七十八點五美元係呢次石油最高價嘅可能性，上述消息已經令英美油公司股價回落。

　　油價雖然略為回落，但上升軌未失守，因此未能肯定乜嘢；何況第一個支持位喺六十五美元，第二個支持位喺四十五美元，後市油價似調整大於跌市開始。 CCI（原材料商品指數）最近創二十五年新高，代表原材料價格仍然反覆向上。中國及印度工業化，對原材料需求十分大（包括原油），而油價中有十五至三十美 元係政治風險溢價，一旦政治風險下降，油價由七十八點五美元回落至六十三點五美元甚至四十八點五美元亦唔出奇，但並唔會因此改變油價上升趨勢，除非美國經 濟出現衰退。而油價回落只視作整固，估計六十五美元以上支持力好大。

　　世界黃金協會宣佈，第二季黃金需求減16％，至八百零一點六噸，係連續第三季下滑。其中珠寶商需求下滑24％，至五百六十二點五噸；最大黃金消費國印度需求更下滑38％。不過，投資需求升19％，令第一季金價上升，平均每盎斯六百三十一點一九美元。

W形代表燦爛歸於平淡

　　1971年8月15日起美元唔再兌換黃金，令金價由每盎斯四十五美元升至1980年1月八百五十美元，再回落到1999年嘅二百五十二美元，至今年5 月曾見七百三十五美元，較三十五年前升十五點三倍。1971年8月15日道指係920點，一度升至1973年1月1053點，回落至1982年8月850 點，再升至2000年1月11750點，家嚇仲喺呢個水平上落；三十五年上升十一點七倍，長遠而言跑輸黃金。我地可利用金價同股市嘅高高低低從中獲利；七 十年代投資黃金，八十年代至九十年代投資股票，2000年起又再投資黃金，真係咁嘅話可以話贏曬。過去三十五年美元失去91％購買力，如以購買力計， 1971年8月15日揸金或美國股票，只能保存金錢購買力。恆生指數1971年8月15日係340點，至今係17451點，上升四十九倍，既跑贏黃金（上 升十五點三倍）亦跑贏美股（上升十一點七倍），理由係美國經濟嘅黃金三十年由1932年開始至66年結束（指數上升二十三倍）；香港經濟嘅黃金三十年由 1967年開始到97年結束（恆生指數上升二百五十倍）。由1997年起至今，香港一如美國，投資股市最多只能保存金錢購買力。另一方面，中國經濟嘅黃金 三十年係咪1978年開始？

　　技術走勢上，恆生指數已完成W形走勢，就係由1997年8月16820點回落至98年8月6544點，然後又升至2000年3月18398點，再跌至 2003年4月8331點，今年8月16日恆指見17451點。形成W形走勢後，通常代表燦爛歸於平淡，即香港經濟今年8月後好也好不了，壞也壞不了。 1967至97年喺香港係發達容易、搵食艱難期（唔少今天嘅大企業響1967年仲係好細，包括滙豐銀行），1997年8月後變成搵食容易、發達艱難期，投 資物業一唔小心便變成負資產；加上2000年科網股爆破，又係另一場投資災難；但如果肯做搵份工做並唔難（1967年我老曹初初出嚟社會做事，做銀行工要 五萬元「舖保」，如冇公司肯擔保，冇五萬元都幾難打銀行工）。2000年至今年5月，金價雖然上升186％，只係一次大反彈；2003年7月至05年8月 樓價升56％，亦只係一次大反彈；恆生指數由2003年4月8331點升至依家17451點，亦係一次大反彈。後市展望，連咁巨大嘅反彈都幾難有，留下嘅 發達方法只係如何揀股。

恆指創新高唔值得開心

　　7月份美國PPI只升0.1％，係近五個月內升幅最細；核心PPI（唔包括食物及能源）更下跌0.3％，較分析員事前估計上升0.4％為少，通脹壓力正在下降，包括SUV汽車售價跌3.1％、家用電子消費品跌2％、電腦售價跌1.8％。

　　美國7月份CPI升0.4％（6月份升0.2％），如唔包括食物及能源，核心CPI只升0.2％（6月份升0.3％）。核心CPI升幅放緩，令9月 20日再加息壓力大減。7月份能源價格升2.9％（6月份降0.9％），汽油價格升5.3％（6月份降1％），係7月份CPI只升0.4％嘅最大理由，佔 CPI 40％嘅房租上升亦係另一理由。7月份CPI按年升幅雖然上升4.5％，但因核心CPI升幅放緩，市場即刻鬆一口氣。

　　7月美國房屋建造跌2.5％，達年率一百七十九萬五千間；新批合約更跌6.5％，係1999年9月最少，代表美國樓市進一步放緩，理由係7月樓按息率 三十年期為六釐八，因而產生壓力。估計美國第三季GDP升2.7％（第二季2.5％）；相信九十天期利率五釐二五已見頂（係咪值得買股票又係另一回事）。 過去出現Boom嘅範疇，例如石油股及資源股都在回落中。第二季美國樓市有二十九個州銷量減少，其中跌幅最大係亞里桑那、佛羅里達及加州，分別下跌 26.9％、26.7％及25.3％；超過十七個州銷量下跌達雙位數。只有四個州銷量有雙位數上升，就係阿拉斯加升48.6％，其餘係阿肯色州、德州及卡 羅來納州，都同擁有天然資源有關。

　　CRB商品指數由1999年嘅183點升至最近高點403點，其中升幅最大係原油價，由1998年十點七五美元升至今年七十八點五美元，升幅730％。黃金由1999年嘅二百五十二美元升至今年5月七百三十美元，升幅289％，之後點樣便木宰羊。

　　我老曹從前習慣同朋友交換投資心得，互相比拚「最好嘅投資策略」；近年呢類聚會大量減少，理由係今天股票市場需要嘅再唔係「共同理念」而係「獨立思 考」。例如2000年3月我老曹對科網股嘅態度，發現當時自己幾孤獨；2003年7月對豪宅嘅睇法，亦難得到別人共鳴；至於對黃金嘅睇法，連最好嘅朋友亦 唔支持……。孤身走我路，或者係作為成功投資者必須付出嘅代價。今年6月13日恆生指數15200點，曾跌穿二百五十天移動平均線，唔少分析員認為係熊市 重臨，我老曹卻認為係絕佳入市訊號（響上落市中跌穿二百五十天線不但唔係出貨訊號，反而係入貨訊號）【圖】。至於今天恆指創新高亦唔值得高興。值得注意嘅 係，恆指已拋離二百五十天線11.6％（5月8日恆指17328點時，拋離二百五十天線15.1％），如參考5月8日情況，恆指現水平上升空間好有限。由 6月13日至今，恆指已連續上升八個星期，睇落缺乏動力上破2000年3月18398高點。至於喺邊一點見頂回落，只有事後才知道。上月我老曹分析時曾指 出8月恆指可創近年新高，今天已出現，面對「週期性」睇法（cyclically speaking）未改變，尤其呢次升市集中喺大企業股身上，二線股表現大部分落後恆指，似尋頂大於另一升市開始。

　　金價響1999年8月見二百五十二美元，喺2001年3月見二百五十七美元，形成雙底後所拉出嘅上升軌至今未破。5月份見七百三十美元，因過分拋離上升軌而調整，一度跌至五百三十美元才反彈，但唔代表乜嘢。

　　以下為美國CPI受控制訊號：一、油價跌穿四十五美元；二、金價跌穿五百三十美元；美國CPI升幅才受控制，家嚇言之過早。美國經濟無可避免進入滯脹 期（stagflation），喺滯脹期股市表現缺乏方向，只能玩揀股遊戲，即未來純利可上升嘅股份，純利無法上升嘅股份無投資價值。響9月20日前，值 得擔心嘅數據仲有好多。

　　愈嚟愈肯定經濟進入滯脹期，睇好睇淡兩不宜，但投資要格外小心。大市繼續玩「揀股」遊戲（stock picking）；樓價只會呆滯而非大跌。股市一如超市，裡面乜都有，至於投資成績就睇你嘅揀股成績。股票市場有如戰場，有人名成利就，有人損失慘重。今 年航空股表現及零售股表現令人失望。

　　聯華超市（980）股價回落，因2004年12月放寬外資進入，以履行入世承諾，形成所有零售業皆大幅擴張，結果壓縮咗獲利率，睇嚟內地零售業將有一 番惡鬥。中國移動（941）、中聯通（762）、內地銀行股及保險股則表現不俗。至於資源股，上半年表現唔錯，5月之後表現麻麻。控制土地供應樓價易升難 跌

　　事後孔明咁講，如巧妙地利用衍生工具，例如5月份買認沽期權、6月份買認購期權兼選中對象，8月份已可以開香檳！任何產品都有本身優點同缺點。衍生工 具嘅優點係畀你巨大槓桿比率而同時將風險減至最低（最大損失係一無所有，唔同做孖展炒股票會上身），缺點係時間值對持有者不利，時間一天天過去，如你買入 嘅衍生工具所代表股份唔升，就係咁先。點樣巧妙運用衍生工具？必須充分掌握其優點同缺點。順帶一提係，9月3日研討會第一天已派出二千多張入場券，但仍有 千多張，相信本週內可派曬，多謝各位支持。

　　澳元8月2日加息後，消費信心跌至五年內低點，跌幅係十七年內最大；7月新屋銷售降10.5％，係十七個月內最低。睇嚟澳洲經濟正進入放緩期。

　　中國固定資產投資1月至7月仍升30.5％，達四萬四千八百億元人民幣，較1月至6月升幅31.3％有所放緩；經濟放緩期係咪7月開始？一個月仍未作得準。

　　中國銀監會要求內地銀行進一步收緊房地產貸款，以防投資激增，導致日後供應過剩。

　　我老曹上半年同投資界傾偈，我老曹話「內地房地產除上海外仍可睇好」。朋友話我老曹唔懂中國政策。今年已過咗七個多月，中央調整房地產政策唔少已出 台，但內地房地產又點？假設政府肯大量供應土地，樓價唔跌才怪！1980及81年香港政府大量推出土地，引發1982至84年樓價回落，由於巧遇1982 年9月中國政府宣佈收回1997年7月香港主權，市場分析認為受政治因素影響，而忽視1980、81年香港政府大量賣地嘅客觀因素。反之，1991至97 年港英政府一再宣佈管制香港樓市方法，由於受中英聯合聲明所規限，港府無法增加土地供應，結果香港1991至97年樓價除因1994年利率上升而令樓價下 調外，其餘年份皆上升！今天睇番中國樓市：一、利率上升極之有限；二、政府不但冇增加土地供應，反而控制土地供應。喺上述兩大前提下，內地房地產價格仲係 易升難跌，唔好再話我老曹唔懂內地政策。

　　8月15日國家統計局公佈，今年7月份全國七十個大城市房屋售價較去年同期升5.7％，較6月份升0.1％；新建商品住房升6.7％（較6月份升 0.1％），經濟適用房及高檔住房分別升4.7％及8.9％，普通住房上升5.5％。新建住房樓價升幅，最大係深圳升13.6％、北京升11.1％、廣州 升9％；下降城市有上海、丹東及溫州皆不足1％。二手住房升幅最大係深圳升14.9％、大連升14.55％、鄭州升12.8％。後市展望，唔同城市有唔同 表現。例如1997年4月北京允許外省市人響北京購買及租賃商品房以嚟，申領「外省份個人在京購房批准通知單」由1997年4月嘅三百五十份，增至今年1 月嘅八千五百二十九份；成交套數由一百一十二套，增至六千六百一十三套；由過去市場佔有率不足2％，到今年佔10％。北京每天流動人口三百七十萬以上，長 期留響北京找搵工或建立機構嘅人佔50％，其中一半打算響北京買房子。外省人喺北京買房子以高檔公寓、別墅最多，佔北京已售高檔房50％，一般係買兩套房 或以上，一套自住、一套收租；以朝陽區最多，其次係海淀區。可以話外省人喺北京置業，成為咗支持北京樓價嘅主因。如無意外，類似美國嘅情況會出現，即邊個 城市經濟好，邊個城市房價漲；一旦漲幅太大（例如上海），又會出現調整。

台灣經濟令人擔心

　　台灣第二季GDP升4.5％（第一季升4.93％），主因係台灣銀行減個人信貸，估計全年GDP增長率4.4％，不但落後於中國大陸嘅10.1％，更 落後於香港嘅6.5％，甚至不及新加坡嘅6.1％。台灣人口二千三百萬，第二季信用卡呆壞賬達三百四十六億元新台幣（約八十五億八千萬港元），較一年前升 四倍，台灣銀行只有收緊信貸，令台灣零售市場第二季營業額跌30％，香港喺台灣有零售業務嘅上市公司亦受影響；加上私人投資不足、政府陷入政治危機，下半 年台灣GDP增長率估計只有4％。台灣經濟展望令人擔心。