8月7日，周一。恒生指數升65.75，收16953.55；成交額一百九十九億五千萬元。8月期指收16956點，升106點。上海期銅上升，因全球最 大銅礦智利Escondida工會發言人話，工人將進行罷工爭取加薪，10月期銅升3.1％，見六萬九千七百一十元人民幣一噸；倫敦期銅亦升2.2％，見 八千零三十美元一噸。Escondida 工會除要求加薪13％外，另每個工人發放一千六百萬披索（二萬九千四百九十六美元）獎金。江西銅業（358）宣布8月9日起喺倫敦掛牌，令股價升 1.7％，見七元九角三仙。紫金礦業（2899）半年獲利上升一倍，見六億六千二百萬元人民幣，理由係上半年金價升41％；今天股價升1.7％，見四元一 角九仙。
分析員這個星期真太忙
美元兌日圓第二個交易天看跌，市場推測8月8日聯儲局停止加息，因美國經濟增長率放緩，令美元滙價加速下跌。今年日圓只升2.9％。根據美林證券研究 所得，自1991年起，每年8月都係投資日圓嘅最佳月份，平均升幅3％！今年8月升幅可能更大一D（如美元8月8日唔加息）；日本人已開始拋售海外債券， 回購日圓債券。雷曼兄弟8月3日已建議投資者沽美元買日圓，博美國唔加息！喺紐約嘅德國銀行外滙分析員估計，第三季美國GDP將放緩到只有1.5％增長， 亦建議沽美元買日圓。
經過兩年加息期後，本周二（美國時間）極可能出現首次停止加息，之後股票市場相信仍係吵吵鬧鬧，一樣冇方向感。到底利率係止於五厘二五或五厘半已唔重 要；反之，零售額增長率正在放緩，美國GDP進入低增長期及連續四個月就業數據轉弱，漸受分析界關注。美國周二公布生產數字，估計第二季只升1.2％（第 一季升3.7％）；周三公布批發方面存貨數字；7月份財赤則在周四公布；入口價格指數周五公布。一連串數據令分析界好忙，忙完一輪之後，下周前景展望相信 一樣唔清晰。至於博取短期升降，最好只用10％投資資金炒賣衍生工具，勝在上落大兼上落快。响牛皮市用十萬元玩衍生工具，隨時可上落五萬元，較用一百萬元 去買股票賺五萬元容易。衍生工具不但給你槓桿作用，同時簡單、直接兼風險唔大（唔似期指要上身），係賺取本金50％或失去本金50％嘅最快方法。
美元轉弱，但未能刺激金價有出色表現！反之，歐羅短期睇漲，估計可見1.3美元。甚至油價亦未能進一步上升，主因係擔心美國經濟放緩情況惡化。後市展望仍係嗰句老話：「大好好不了，大淡淡不了。」
燕京華僑大學校長華生教授認為，房地產係一個特殊嘅市場，供求變化周期好長，同時涉及低收入階層生活權利嘅保障問題，因此冇一個國家政府唔干預及調控 樓市，問題係政府調控嘅力度、方法及範圍如何？佢認為，中國問題出喺經濟適用房及廉租房供應缺失，但政府卻去打擊商品房！政府亦不宜參與居室面積及價格限 制，干擾和扭曲市場正常運行。
中國城市化發展中嘅大拆大建，形成二手房市場供應極度不足，係近年房地產價格飆升嘅主要原因之一。喺成熟市場，二手房交易才係主力，唔係新樓一手市 場，因此宜簡化二手房交易、建立中介機構良好制度，向從業員提供在職培訓、降低二手房交易營業稅、促進二手房交易活躍，唔係要打擊投機活動，而係令二手房 供需兩方面都增加。徵二手房個人稅20％大大提升交易成本，可令二手房需求短期內減少，係平抑房地產價格短期最有效嘅手段之一，但如果日後二手房供應量唔 上升，亦將成為日後二手房漲價嘅因素。
華生教授亦列出自己喺英國嘅經驗。佢响八十年代後期喺英國求學，眼見英國房價連續下跌七、八年；1995年佢離開英國後，英國房價又出現連續十年上 升，普遍升幅達一倍，個別地區更達兩倍。世上冇只升不跌嘅樓市，依家中國房產市場仍處發展初階，仲未經過市場風浪洗禮，對於房產市場嘅長周期性質及特點， 仍未有人深入研究和探討。
二手房個人稅日後將取消
近年中國樓價急升，係工業化過程中城市化嚴重滯後嘅結果。响八、九十年代政府過分着重工業方面投資，漠視居民住屋需要，進入2000年問題一下子便爆發出嚟，亦具有不可持續性。家吓問題係點樣解決及改革，以免中國房地產價出現狂升暴跌周期。
8月1日起開始徵收二手房個人稅，令市場恢復以往嘅平靜，上述政策逼使一部分炒房者喺政府未實施前退出市場，形成7月份嘅拋售。其實二手戶交易徵稅早 喺 2004年1月响杭州率先實行，但九個月後又暫停，其後喺南京、青島等地亦曾實施，結果無疾而終。國稅總局呢次實施，目的係進一步抑制房價，相信樓價穩定 後，日後取消機會甚大。估計响實施期間，「虛假贈予、陰陽合約、票據丟失」等方法避稅將大量出現，正是「上有政策，下有對策」，最後係「冇政策」！
有人認為房價大幅上升，消費者唔開心、政府好擔心，只有開發商最開心。不過，萬科董事長王石早已喺去年講過，房價過快上升，冇人開心，連開發商亦唔例 外。過於亢奮嘅市場，絕非地產開發商之福，只有平穩發展才係行業之福。因為房價過快上升，投機成分重，地產商見銷售情況理想而加快買地建樓，但房子唔似電 視機，由土地變成住宅需要好長時間，買地之時地產一片興旺，物業完成之時可能泡沫爆破，令地產發展商成為最大受害者！萬科响1984年前身係深圳現代科教 儀器展銷中心，1988年開始投資房地產，依家業務已遍及中國二十個大中城市，去年底公司總資產二百二十億元，資產淨值八十三億七千萬元。王石認為，今天 中國房地產已到咗十字路口，一旦做得唔好，風險十分大。 深圳已成為全球手機生產之都，今年生產量達一億部，成為全球手機最大嘅生產基地。深圳手機生產 企業有二十多家，佔全國30％，全國每三部手機有一部喺深圳生產，全球每八部手機中有一部喺深圳生產。例如富士康（2038）為諾基亞、摩托羅拉代工生產 手機一千五百萬部一年，飛利浦深圳生產基地年產量亦達一千萬部；奧克斯今年年底投資過億美元，員工三千名，明年年產量一千萬部。依家喺深圳生產手機組裝零 件公司超過一百家，生產商响深圳打幾個電話，已可獲充足手機配件供應！例如南太電子（2633）供應線路板、創維數碼（751）供應液晶板、比亞迪 （1211）供應充電池、賽爾廉供應充電器……。除晶片外，一切手機附件深圳都可供應。
中國今年5至7月轎車出口價已跌至每輛七千零三十九美元（五萬五千港元），係連續第三年下滑。轎車出口一如中國其他產品出口，已陷入低價競爭市場嘅漩 渦而不能自拔。中國汽車產品正一步步踏入出口家電、紡織品、電視機、空調之路，所謂同質化競爭（產品技術含量大家差唔多，被迫以低價搶訂單），結果汽車企 業之間互相殺價引發大出血嘅現象！
缺乏維修中心難拓出口品牌
今年7月中國海關公布上半年轎車出口三萬四千四百五十六輛，已超過去年全年出口量！其中自主品牌出口總量達二萬零二十輛，較去年同期升466.8％； 但出口價卻一跌再跌，如扣除廣州本田Jazz轎車出口單價每輛一萬三千美元（十萬港元），即中國品牌汽車出口平均單價每輛只售五千美元（三萬九千港元）， 較 2003年全年平均出口價七千八百四十四美元（六萬一千二百港元）跌幅達36％！即中國自有品牌汽車出口價以年率12％速度下降。中國汽車企業之間互相殺 價，例如上海華普汽車出口二千輛汽車到利比亞，奇瑞汽車公司便主動搵華普汽車嘅買家，並以每輛低華普汽車三百美元搶單（兩者汽車响國內售價只差一百九十九 元人民幣）！上述情況一再出現，內地汽車企業為爭取出口訂單互相殺價，最後訂單搶到手，到底有冇利潤都成問題。結果俄羅斯入口商索性唔落訂單，因為落咗單 後轎車未運到，另一家汽車公司已願意減價20％出售性能差唔多嘅轎車，令俄羅斯入口商擔心入咗貨賣唔出去；有D汽車去到進口國海關，對方遲遲唔去提貨，因 為第二批售價更廉嘅汽車就快運到！
中國汽車出口重要市場係亞洲、非洲、俄羅斯、中東及南美呢D發展中國家；反之，高銷售量嘅國家如日本、歐洲及北美洲仲未入得去。中國汽車出口有86％ 去咗非洲及中東地區，盲目殺價結果令人擔心中國汽車業重演電視機、電冰箱及空調嘅命運。中國自主品牌汽車無法喺發達國家打開市場，主要係缺乏售後服務；反 觀日本豐田汽車用二十年時間响北美洲建立維修中心，儲備所需配件，令豐田汽車喺美國壞咗立即獲得維修服務，而非以價格低取勝。中國汽車出口一味靠便宜，但 冇修理中心支援，恐怕大方向已錯，情況可能較電視機、電冰箱及空調更壞（上述產品冇維修中心支援，售後服務問題唔大；但汽車冇維修中心支援或支援不足，市 場點可以打開？）！家吓大家殺價，令中國汽車企業冇足夠利潤喺海外建立維修中心支援售後服務，最後只會將中國品牌搞垮！
去年中國整車出口企業共一千零二十五家，其中六百多家全年出口汽車不足十輛，一百六十家全年汽車出口一輛！咁搞落去，中國品牌遲早冇人信。中國汽車企 業太多仍未完成整合，去年12月全國汽車企業共六千三百一十五家，但全行利潤較2004年下降24.33％或減一百六十九億二千二百萬元，其中一千一百五 十五家汽車企業進入虧損期，共虧損九十六億五千七百萬元。今年上半年內地汽車銷量升26.7％，至三百五十三萬輛；同期產量升27.8％，至三百八十八萬 輛，仍供過於求。國家對汽車消費一向唔特別鼓勵，這從一直以嚟採取高消費稅可證明。不過，汽車工業上、下游產業非常廣泛，所以政府亦唔會採取打壓手段，只 會謹慎處理。至於出口市場，所面對嘅壁壘亦好大，唔少國家都有保護本土汽車產業嘅措施，中國汽車業一味以價廉去強攻別國市場，相信收效有限，短期國內汽車 以本銷為主。中國汽車業四頂帽子：一、未擺脫粗放模式，存在散亂差問題。二、自主創新能力差。三、內銷市場已面對產能過剩，出口市場不易打開。四、全球汽 車生產方面，更多地方採用當今世界燃油經濟效益最佳嘅發動機：直噴式柴油機，喺呢方面中國汽車技術仍然大落後，其次係環保汽車生產技術亦一直落後於別國。 中國所產汽車仍屬耗油量大，環保條件唔及歐洲同日本。如放棄自主品牌，中國汽車業將淪為別國汽車品牌嘅加工業；如發展自主品牌，喺出口方面缺乏後勤支援嘅 維修中心服務，好難同別國競爭，因為汽車唔係一次性消耗品，必須有總代理負責提供維修服務。日本响北美洲建立維修服務共用咗二十年、喺南韓用十年，中國要 幾多年才建立後勤服務支援汽車產品出口？如以為中國汽車企業可透過出口解決國內產能過剩問題，未免太天真，只係環保一關已有排搞。歐美國家可能入口幾千輛 中國汽車，作為產品「展示」，欲真正打入歐美市場並唔容易。
中國遲遲未開徵燃油附加稅
抽汽車登記稅係「有車付費」，開徵燃油稅係「開車付費」，如加入電子道路收費計劃係「多用路者付費」！上述三種都係打擊消費者擁有汽車欲望、開車欲望 及喺繁忙時間將汽車駛入交通擠塞地區嘅方法，各國政府都採用。中國汽車登記稅唔平，即中國政府早已實施「有車者付費」，但對開徵燃油稅卻年年不了了之，形 成國際油價昂貴但內地汽油仍然便宜嘅現象。反之，日本同歐洲早已徵收燃油附加稅（香港呢方面稅率亦十分高），中國燃油附加稅遲遲未出台，部分理由係內地公 路及過橋收費唔少，一旦徵燃油附加稅，擔心令公路及過橋使用量減少，影響呢方面收益；日後政府再難以收費方式批出公路及橋樑興建權畀私人機構代發展。
上海市嘅汽車牌照依家每個人已值三萬八千元人民幣（即買入一部汽車後，希望獲得登記便要多付三萬八千元買汽車牌照），上述政策造成上海登記汽車都係排放量嘅大汽車，亦係慳油小汽車唔受歡迎嘅理由。
沒有留言:
發佈留言