中國樓價愈管愈升

　　8月10日，週四。恆生指數走勢上形成雙頂回落，今天跌124.44，收17222.14；成交二百六十三億七千多萬元。期指跌141點，收17186點。

　　英國警方連夜逮捕數人，表示嫌犯目標有可能係響英國至美國嘅客機上放炸彈，上述消息公佈後金價急升，美元滙價則回落。英國航空股價跌5.6％、德國漢 莎航空跌3.8％，因英國政府將該國安全威脅警戒等級提高至「嚴重」，形成英國機場航班嚴重誤點，部分航班更被取消。去年7月7日倫敦地鐵和一輛巴士曾出 現自殺式炸彈襲擊，今年又再面對恐怖事件，如非及時阻止，由倫敦飛往波士頓嘅美國航空公司客機可能已遇到空難。

港交所停牌機制存在問題

　　歐洲央行表示繼續加息去打擊通脹，因7月份CPI升2.5％，超過目標通脹率2％；估計12月底歐羅利率見三釐二五。日圓過去五天兌歐羅下跌，雖然日 圓上月加息四分一釐，但同歐羅息差正在拉闊中，令資金流向歐羅。6月份日本生產商價格指數升3.4％，係1981年3月以嚟最大升幅；收支盈餘降 7.3％，至一萬零二百億日圓（折合八十八億美元），估計日本第二季GDP升2％（第一季3.1％），相信日本亦好快出現另一次加息。南韓宣佈加息四分一 釐，至四釐半，主因係6月份生產價格指數升3.2％，7月份CPI升2.3％。南韓經濟連續上升十三季，係戰後最長嘅一次上升。

　　港股方面，中聯通（762）升1.67％，見七元三角二仙；華潤創業（291）跌2.5％，見十七元零八仙。後市仍係個別發展。

　　永隆銀行（096）宣佈並冇收到任何有意收購嘅消息，投資者宜審慎行事。

　　7月25日東方海外（316）出售海外貨櫃碼頭嘅消息，香港時間上午九時三十六分已喺道瓊斯嘅newswire出現，當日東方海外並冇要求停牌，如常 開市，股價由開市二十八元升至三十元三角，上升9.4％，共五百二十四萬股易手；到晚上九時三十七分，東方海外才通知聯交所有關上述出售事件已委託UBS 處理。連東方海外亦係咁，港交所嘅停牌機制係咪有問題？點解見到道瓊斯newswire新聞後唔採取行動？從海域化工（2882）事件到細經紀行連番出 事，都喺動搖投資者對香港監管機制嘅信心。信心呢樣嘢，摧毀容易建立難，值得大家關心。

伊朗食毒藥打老虎嚇唔倒美國

　　以黎戰事並未引發美國人改為親民主黨，共和黨估計，11月中期選舉損失選票唔多，美國政府響支持以色列入侵南黎事件上立場不變。

　　至於伊朗發展核事件嘅立場堅定，到8月31日相信唔會改變。伊朗無法發動石油禁運，因為石油出口係伊朗最重要嘅外滙收益來源，一旦禁運可能令全球油價上升25％，但伊朗經濟卻面對崩潰！伊朗「食毒藥打老虎」嘅招數嚇唔倒美國政府，9月1日相信冇事發生！

　　美國通脹率估計第三季繼續上升，美國非農業生產力提升年率已下降至1.1％（過去四季為2.4％）；而工資升幅今年第二季達4.2％，其中部分工資上 升必轉化為CPI增長率。貝南奇希望GDP增長率放緩最終可減慢CPI上升速度，如睇數據，人人都知道過去十七次加息未足夠阻止美國CPI進一步上升，但 貝南奇屬於鴿派，願意停一停、等一等，因為美國樓市放緩已有一年！1950至95年美國物業升幅同通脹率接近，但1995至2005年美國物業上升速度跑 贏 CPI升幅50％，為物業擁有者帶嚟接近五萬億美元賬面利潤，支持美國呢幾年消費。但去年8月起美國物業價格停止上升，今年7月美國一手同二手樓銷售較去 年同期減10％，如果扣除通脹，去年8月至今美國樓價已回落，而待售樓宇量正在增加。根據穆廸資料，約四千億美元樓按喺今年內將以新按揭利率計息，明年更 有二萬億美元樓按以新按揭利率計息。兩年前樓按利率四釐，今天已超過六釐，改為以新按揭利率計息嘅話，供樓負擔將一下子上升50％；反之，2000至05 年美國中產階級收入扣除通脹係減少4％而非上升，但負債卻升咗唔少。

貝南奇安排樓價軟著陸

　　停止加息係咪代表美國經濟增長率今年首季見頂？聯儲局認為樓價回落壓力最終將令CPI升幅重返1％至2％水平，至於結果係咪咁？走著瞧。

　　戰後至今，美國經濟只成功出現一次軟著陸，就係1990年。貝南奇唔再加息，正係努力為美國樓價安排另一次軟著陸。　　有盛必有衰，一如有日必有夜。 依家美國企業股息回報率只有一釐九，代表投資界仲係樂觀（指長期而言），因為資金氾濫期今年5月剛結束，至今市場流動資金仍然充沛。8月8日已立秋，但天 氣仍然炎炎未有秋意，有幾多人知道秋天今天已開始咗？道瓊斯工業平均指數走勢向上，但道瓊斯交通平均指數方向向下，上述背馳現象代表投資者心裡十五十六。 最後係工業平均指數跟交通平均指數走抑或交通平均指數跟工業平均指數走？等市場話你知！通常大部分人猜測嘅方向都會出錯。

　　潮起潮落，既帶來財富，亦帶走財富。1984至97年樓價狂潮，令唔少人富起來；1997年8月至2003年7月樓價暴跌，亦帶走唔少人嘅財富。九十 年代開始嘅科網熱到 2000年3月達到高潮，亦為唔少人帶嚟財富；2000年3月科網股泡沫爆破，今天災戶一大籮。2001年起（或1999年起）嘅資源上升潮，係咪響今年 5月見頂？暫時未能確認。發達容易搵食艱難，全世界所有富人都係潮流捕捉者，當潮起之時加入、潮退之前退出。剛形成嘅資源上升週期，唔少人已急不及待問 「下一浪係乜嘢？」，太冇耐性嘅投資者永遠賺唔到大錢！我老曹只知道，上升嘅浪愈大，回落嘅浪愈急！大氣候與小氣候不因人嘅主觀願望而轉移。

　　阿媽教落，學就學有錢人點樣賺大錢，唔好學討飯嘅人要碎銀！所以我唔識教你點樣喺股市中賺取10％利潤，如果要賺便賺100％利潤！尋找滔天巨浪而非 微風細雨。作為投資者，通常睇錯嘅時候較睇啱嘅日子多，一般都係六四分（即60％時間睇錯、40％時間睇對），不過冇問題，只要識處理便可，就係止蝕唔止 賺。睇錯時最多損失15％便止蝕離場；反之，睇啱唔賺100％利潤又點捨得走？只有咁樣，40％睇啱項目嘅回報才可抵銷60％睇錯項目外，仲帶嚟可觀利 潤。

　　人行話下半年經濟仍然過熱，因外資繼續大量流入，繼續推動投資快速增長，汽車、通訊產品、住房繼續拉動經濟，城市居民提高最低工資標準、公務員加薪等，亦繼續刺激下半年經濟增長。

　　清華大學EMBA特聘教授梁小民話，雖然央行已採取一系列緊縮措施，但相比拉動經濟力量而言仲喺好有限。

　　7月份中國外貿盈餘一百四十六億美元，連續第三個月上升（6月份一百四十五億美元）；出口升22.6％，入口升19.7％。今年首五個月外貿盈餘達七百六十億美元，較去年同期升51％。

內地住宅租務回報達7%

　　國美電器華北區總經理王輝文揚言，要把家電產品零售價全線拉低40％，三十二吋液晶電視將以三千元人民幣低價出售及三十四英吋CRT（顯像管）彩電售價接近，相信液晶電視將全面攻佔顯像管電視市場！擔心日後顯像管電視生產商未來冇好日子過。

　　7月份廣州新建商品房住宅售價平均六千八百四十八元人民幣一平方米，較6月漲四百六十八元或7.34％。「國六條」限制外資炒樓，公佈後深圳普通商品 住宅樓依家售價七千一百一十九人民幣一平方米，較公佈前上升18.94％；豪宅每平方米售價一萬三千二百六十三元，漲53.57％！未來70％土地將用作 興建九十平方米以下住宅，令日後豪宅供應更緊張！分析家話，下半年廣州及深圳商品住宅房樓價下跌機會唔大。

　　8月1日起二手房徵個人所得稅20％後，二手房買賣一片淡靜，賣家唔願賣，買家亦抱觀望態度；反之，國際地產公司（包括香港地產公司）繼續進駐中國地 產市場，主因係內地住宅物業租務回報達7％（工業樓更達10％），長揸無妨。連美國地產公司普洛斯亦響內地收購收租物業，並喺十二個城市有投資，計劃五年 內再投入二十億美元，其他仲有新加坡騰飛基金管理公司、麥格理亞洲基金。睇嚟中國樓價愈管愈升。