金價爆炸性上升

4月30日，周日。日圓升穿114兌一美元，令日經平均指數跌1.2％，見 16906.23；南韓股市跌2.61％，因南韓出現第二個月收支赤字。人民幣貸款利率上升零點二七厘，見五厘八五，令恒生指數回落1.9％，見 16661.3；反之，上海綜合指數卻升1.7％，本周上海及深圳因黃金周而冇市。香港點樣演繹呢次人民幣加息？

美元超賣隨時反彈

　　美股仍十分混亂，第一季美國GDP升4.8％，核心通脹率降至只有2％（前為2.4％），美元滙價卻跌至十一個月新低，歐羅一度見1.2634美元， 係去年5月以嚟最高；日圓見113.84兌1美元。金價升至二十五年內高價，4月升幅達11.6％；金價已見654.5美元，到底告訴我地乜嘢？相信唔少 《信報》讀者已從呢次金價上升潮中獲利，或者正在後悔賣得太早……。其實，黃金同2001年前一樣，並不能產生利息，乜嘢力量喺度推動金價上升？揸黃金一 如揸茄殊，不能當作一項投資，只可視為保本保值。黃金價格有如天然資源可升可跌。通常上升日子可維持十年，回落日子二十年；喺上升十年中（例如七十年代金 價可跑贏大部分投資項目，相信2001至2010年情況亦大致相同），存款利率無法對抗通脹（如果利率唔高於通脹二厘，存款便無法保值）。美國政府不斷產 生赤字，全人類終於會有一天拋售美元轉向黃金，上述日子係咪去年11月開始？美國聯儲局因擔心房地產承受唔起較高利率，寧可讓美元滙價回落……。我老曹擔 心5月10日過後，美元與歐羅兩者利率差收窄；加上上周四貝南奇嘅講話，將引發美元淡倉。房地產上升係令美國2002年起經濟出現復甦嘅最大動力，面對房 地產呆滯，令貝南奇喺加息方面不得不小心！以技術分析，依家美元已進入超賣區，隨時可反彈。依家人人假設5月10日係最後一次加息，是耶非耶？反之，黃金 技術走勢係極度超買下再升，已進入爆炸性上升。世事往往由一個極端走向另一個極端。投資者請記住「升市莫估頂，淡市莫估底」。

　　美滙指數嘅貨幣組合係57.6％歐羅、13.6％日圓、11.9％英鎊、9.1％加元、4.2％瑞典克朗及3.6％瑞士法郎。自2001年起美滙指數 回落， 2004年12月反彈至2005年11月，又再進入另一回落潮；由2004年12月嘅80.39升至去年11月嘅92.63，呢次回落如果只係前升幅 61.8％，可見85.07。如美滙喺85.07獲支持再升，去年11月開始嘅美元回落只能被視為技術調整，即美元熊市2004年12月結束嘅睇法不變； 反之，如美滙指數連85.07亦守唔住，後市便no eye see矣！

　　加元出現1971年以嚟最大單月上升。原材料出口佔加國總出口35％，佔GDP 10％，令加元兌美元出現1976年以嚟最高，睇嚟仍有上升空間。

個人電腦售價急跌聯想受壓

　　隨着市場透明度上升，邊際利潤愈嚟愈薄，高盛證券值得投資者學習嘅地方，就係對風險尤其衍生工具嘅態度，唔係逃避而係應付風險，亦係中國人應學習嘅營商態度，唔係薄利多銷追求針鼻削鐵嘅利潤，而係富貴險中求，面對風險便設法對付，把虧損盡量減少，把利潤盡量放大。

　　美國航空去年9月至今股價升咗144％，估計今年第四季恢復獲利。高負債及航空油價上升，對航空股純利產生極大壓力，但美國航空已成功削減開支 10％，並令乘客收入上升12％；雖然今年首季仍虧損九千二百萬美元，相信最惡劣日子已經過去。中國航空股又點？管理層係咪有能力削減開支10％，同時增 加乘客量 12％，並喺今年第四季或明年出現獲利？通常滿街鮮血就係入市時，唔知呢次又點睇。不過，航空股絕對唔適合膽小投資者。

　　自從聯想（992）去年購入IBM個人電腦，代價十二億五千萬美元，成為全球第三大個人電腦生產商，過去一年股價回落19％。聯想1984年由北京科 學院創立，至今仍持有27％，擔心收購IBM個人電腦無法產生協同效益。理由係個人電腦售價不斷下跌，整個市場過去一年需求只升5％，但供應量卻大幅上 升。花旗銀行已一再建議減持聯想，並估計今年個人電腦平均售價八百六十七美元（去年為九百六十美元，四年前一千二百六十美元），而美國進口個人電腦今年首 季只升9.8％（去年同期升15.4％）。個人電腦售價跌幅較生產成本下降仲要快，係聯想嘅致命傷。5月底聯想將公布2005╱06年度業績，花旗估計全 年純利只有五億二千二百萬港元（上年度十一億二千萬港元），加上O仍高達十九點三倍……。今年3月聯想已宣布裁員一千人（佔全部員工5％），股價亦由三元 九角回落至上周嘅二元九角。如花旗銀行對聯想2005╱06年度純利嘅估計正確，恐怕聯想股價將進一步受壓。

　　美國第一季GDP升4.8％，商業開支升14.3％，消費者開支只升5.5％，地產投資升2.6％，核心消費指數升2％（去年第四季升2.4％）。美國經濟一如中國已進入過熱，但全世界政府都一樣，只會積極對付經濟放緩，唔會積極冷卻經濟過熱。

　　即使你唔係含住銀鎖匙出世，亦可持有白銀賺錢。上周五銀價一天之內升9％；5月10日後美元唔再加息，金價唔排除見700美元。柏克萊銀行4月28日 推出嘅白銀ETF已喺美國股票交易所內買賣，手續費只收0.5％，共一百五十萬盎斯，每手十盎斯。上述消息令金價上周升5％（過去十二個月升46％），銀 價見13.2美元，今年內升50％（同期黃金升25％）；銅及鋅繼續創新高價，代表中國人民銀行加息零點二七厘仍無法阻止天然材料價格上升。

　　中國能否喺唔大幅修改滙價下，令經濟安全着陸？中國嘅問題係農村內仍有一億五千人口無所事事，如滙價上升可令失業率上升（非官方估計依家已超過8％），如滙價唔升又點樣阻止天然資源漲價？中國製造業面對嘅客觀形勢係製成品無法加價（甚至跌價），而生產成本卻不斷上升。

經濟方向由貨幣政策決定

　　根據瑞信分析，美國今年第一季喺石油及天然氣開支六百五十億美元，較去年第四季嘅五百二十億美元進一步上升，但經濟仍未見影響，估計油價75.35美元一桶，其中有15美元係伊朗因素。

　　伊朗已回應聯合國原子能委員會，願意透過談判去解決核問題，但唔會停止研究鈾，依家係美國方面決定伊朗喺鈾方面研究會否用作製造核武。今天美國已喺阿富汗及伊拉克駐軍，軍事上負擔沉重，會唔會再發動另一場戰爭？呢場戰爭未來代價肯定較阿富汗及伊拉克大。

　　在高油價下美國GDP仍升4.8％，證明經濟方向由貨幣政策決定，而非油價。展望美國第二季GDP可升3.5％，CPI年增長率3.4％，相信五厘息 仍無法阻止金價進一步上升（依家因過度超買，短期波幅擴大）。今年首季美國家庭破產率較去年同期升72％（去年第四季升38％），即每三百五十八個美國家 庭便有一個破產。上述情況由去年首季開始惡化；過去四季共有一百二十萬個美國家庭破產！

　　日本正逐步走出絲路利率政策，估計年底見半厘，明年見一厘。政府十年期債券孳息率已見二厘，係六年內首次。呢個情況對日本股市影響會點？日本本土競爭 環境仍係割喉式，經營成本上升，產品零售價不變（或減價）仍持續，唔少企業負債十分高，喺扣除利息後純利仲剩番幾多？小型企業（佔日本GDP四分三）負債 率較大企業更高，日圓利率只要升多一厘，已經係沉重負擔。

　　道指2002年10月起回升，恒生指數2003年4月起回升；雖然如此，兩大指數一直跑輸金價。因為呢次上升係由天然資源升值帶動，無論股票、地產、 債券，從2001年起一直跑輸天然資源價（天然資源股例外）。上述情況七十年代曾出現過，年長一Ｄ嘅投資者都曾經歷過，依家似曾相識。

煤產過剩令價格下調

　　國家發改委公布今年煤炭產運需求形勢，預測由過去供不應求進入過剩，煤炭價格將微幅回落，幅度喺5％左右。根據國家發改委能源研究部長韓文科估計，主 因係煤炭開採投資增長迅猛、低水平新建、擴建，令產能大幅提升，需求增長追唔上，庫存量上升，價格自然回落。今年首季煤炭產量四萬三千一百三十八噸，較去 年同期升12％；今年3月產量一萬六千六百二十一噸，較去年3月升16.8％，其中焦炭產量達二千一百二十五萬噸。國家發改委已加強清理小煤礦去減少供 應；另一方面，鐵路運力提高，亦有助釋放過剩產能。2003至05年煤礦投資年增長率達40％以上，令去年12月煤存量達一億四千萬噸，係近五年嚟最高水 平，引發今年起煤價下調。

　　今年1、2月商品煤平均售價不但冇上升，反而小幅下降，平均售價二百九十三元四角七仙一噸，較去年同期減五元四角一仙一噸，下降1.81％；供發電用 煤平均售價二百一十元三角五仙，升三元七角九仙，上升1.8％。商品煤平均售價下跌，已傷及今年首季煤炭行業生產利潤，其中理由係鋼鐵行業今年1、2月利 潤較去年同期下降74.6％，雖然3月份鋼鐵業景氣已回升，但未惠及煤炭業。煤炭開採成本1、2月份為一百八十八元二角五仙一噸，較去年同期升三元一角七 仙，增幅1.74％。其中工資每月一千八百二十八元七角，較去年升1.8％，維簡及井巷費十二元三仙，升八角四仙。成本上升但產品售價下降，中國煤炭行業 今年首季利潤降4.3％。「十一．五」規劃中，仍有十三個大型煤炭基地投產，睇嚟只有寄望煤代油嘅發展，包括合成氨、煤製二甲醚等新型煤化工及煤變油，去 平衡未來煤炭產能過剩。

內地愈來愈多百萬年薪管理層

　　根據上市公司年報披露，去年內地公司高層管理年薪大幅上漲，平均為一百七十八萬七千元，較2004年一百五十七萬九千元，升13.17％。反之，中下 游行業國企等純利大幅下跌，高層管理年薪也被迫下降。從上市公司年報睇，同係高層管理，年薪可相差二百倍。最高如深圳萬科，高層管理年薪總和達二千一百八 十九萬元；其次係深圳發展高層管理，年薪總和達二千一百八十四萬元；但武昌魚年薪只有十三萬元，ST海禮年薪只有十萬元。上市公司董事長最高年薪係深圳發 展，年薪六百零二萬五千元；最低係武昌魚，只有三千六百元。依家高年薪行業有金融及房地產，低年薪行業係處於不景氣，如化工、化纖及農業。換言之，內地亦 有愈嚟愈多年薪幾百萬嘅管理層。

　　北京第一季GDP升13.3％，全市GDP總值一千六百八十一億六千萬元。工業大幅增長17.7％；反之，第三產業只升11.9％；第一產業下降8.9％。北京經濟仍以工業發展為主。

　　廣州地價又再創新高，喺十九個買家競爭下，富力地產（2777）以四億六千萬元人民幣勇奪珠江新城商務地塊，折合樓面價四千五百六十六元一平方米。

　　遠離廣州市中心嘅白雲區種豬場，以五億七千萬元售出，土地面積十三萬四千九百平方米（可建設用地九萬零八百四十六平方米），可建樓面十五萬二千六百平 方米，折合樓面地價三千七百三十五元一平方米。呢次共有十五個買家競投，包括合生（754）、雅居樂（3383）及新加坡凱德置地、廣東觀光集團等。另一 幅住宅用地前為廣東省建材機械廠區用地，五分鐘內以一億四千萬元成交。廣州地價高企，未來樓價又點會回落？

　　今年首季全國七十個大中城市住宅樓價平均升5.5％。大連、呼和浩特、深圳上升超過10％。上周溫和加息，不改牛市基調。

　　深圳市政府關於穩定房價格八項措施已正式出台。一、今後三至五年內政府加快特區內城中村改造，增加住房土地供應。二、出讓土地合同生效後兩年未開發者 收回，嚴打囤積土地行為（閒置第一年則收取地價10％）。三、完善資訊披露制度。四、商品房完工驗收後方可銷售。五、嚴查違法用地。六、抑制投機性購房貸 款需求。七、運用稅收及金融政策調節地產市場。八、不實廣告將受嚴懲。能否收效？木宰羊。