蜆殼大笨象計劃

　　9月15日，周五。今天係美國期指、期權等結算日。恒生指數升54.2，收17237點；成交二百二十二億二千多萬元。9月期指高水，升41點，收17280點。

　　電盈（008）半年純利唔及分析師預估，股價受壓，收四元九角，後市展望在四元六角至五元之間上落，無大作為。固網用戶流失率雖然穩定下來，寬頻用戶 亦增加，但流動電話市場競爭激烈，now電視台仍在爭取市場佔有率；估計今年全年純利二十一億八千九百萬元，O十五點二倍，同恒指O接近，升降幅度有限。

　　吉利汽車（175）半年純利上升兩倍，達一億二千一百萬元。汽油價上升有利小汽車需求；加上今年4月1日起中國政府下調一至一點五公升發動機小汽車嘅 稅率。吉利4月17日起將四種小汽車售價降低10％，至三萬五千元人民幣一輛；今天股價未見起色，仍係八角七仙，因過去一年股價已上升一倍。

油價阻力區65.5美元

　　美國天然氣儲備上升，令取暖用油價跌至六個月來最低。原油價又再下跌，本月油價回落9.8％，出現嚴重超賣，RSI最低曾見20才反彈；加上二百五十 天線失守，後市展望六十五點五美元成為阻力區【圖】，短期或有反彈。不過，博反彈乃專家行為，散戶最好唔插手，因為博得到亦只賺粒糖，博唔到則大件事。中 長線睇，超賣訊號唔係買入理由。走勢上可見到今年4月至8月油價同RSI背馳，通常乃見頂訊號。有理由相信8月起油價進入一浪低於一浪。

　　蜆殼石油CEO范德偉（Jeroen Van der Veer）接受《新聞周刊》訪問時，強調冇石油短缺呢回事，近月油價回落係估計之中。佢估計，對沖基金在石油市場投資超過一千億美元，一旦拋售足可令油價 回落，至於回落幾多就好難講。蜆殼目前進行嘅項目叫「大笨象計劃」（因情況有如大象，行動既昂貴又緩慢），就係投資油頁岩、油砂及深海鑽油計劃，包括在俄 羅斯嘅Sakhalini、尼日利亞嘅Bonga及中國嘅南海。未來十年上述「大笨象計劃」將擴展至十個，並希望美國政府唔好抽石油暴利稅，以免阻礙上述 計劃進行，令未來新供應量減少；反之，任由油價高企，油公司必能搵到更多新油源，令未來油價回落。油價係咪從此回落？又唔好太肯定，因為來自中國及印度等 需求仍上升。去年9月至12月油價曾下跌十五點五美元，跌幅21.9％，時間長達十二星期；呢次由7月14日開始嘅調整，至今只有九星期。油價最大跌幅係 2003年春季美軍攻入伊拉克後，唔少人相信美國可控制伊拉克油田而令石油供應量上升，油價在三星期內回落37.3％。呢次油價回落，無論在時間上或跌幅 上均未創紀錄，未能肯定乜嘢。

　　1967年至1997年，恒生指數由64點升至16800點，上升二百六十二倍，唔計期間上落市，港人財富理論上增加二百六十二倍。即1967年只有 十萬八萬元嘅家庭，到1997年應擁有二千六百二十萬元。香港經濟奇迹結束，1997年至今係上落市，恒生指數一度跌幅達60％，住宅樓價跌幅約65％， 然後又上升。在上落市中，有人富者更富，亦有人失去所有，甚至成為負資產。換言之，1967年至1997年最重要係如何創富，1997年至今係如何保住自 己所有。

五厘息足以減少投資需求

　　人生亦一樣，最初三十年係如何創富年，其餘日子係保住所有。有人在創富階段十分成功，但最後保唔住；有人一開始便太保守，未完成創富階投便過分保守。 例如二十五歲至五十五歲呢黃金三十年應勇於創富；五十五歲起策略改為持盈保泰，因為財富一旦到某一水平，已有許多專人願意為你效勞，唔使自己操心。

　　五厘息係有吸引力！假設你除咗自住物業外，另擁有二千萬元資金，一旦利率低企，你便被迫做投資以賺取生活費；一旦利率高於五厘，二千萬元存款一年收息 一百萬元，已足夠普通家庭一年開支。此乃利率一旦高於五厘便可令投資活動減少嘅理由。今年5月10日九十天期美元利率重返五厘，令投資需求下降。投資涉及 一定風險，如可安安樂樂享受五厘回報（除非高通脹期），投資需求自然大減。

　　香港由戰後廢墟到今天的成就，唔係香港政府官員特別聰明，而係港府懂得尊重市場經濟。何謂市場經濟？大學教授可以寫一本書去解釋，簡單D講就係政府維 持一個「買家願買、賣家願賣」嘅自由市場。當需求大於供應，價格便上升，政府不應管制價格，而係設法增加供應，供應增加價格自然下跌；反之，如供應大於需 求價格下跌，政府亦不應管制價格，而係讓市場本身將低效率者淘汰出局，供應一旦減少，價格自然穩定下來。上述理論早在二百多年前死鬼亞當史密夫嘅《原富 論》中提出：設法讓市場（無形之手）發揮功能，政府（有形之手）最好少插手。不過，冇一個國家政府真正可做到，美國政府在2001年「九．一一慘劇」後亦 瘋狂減息，係「有形之手」干預市場嘅其中例子，雖然帶來幾年繁榮，但同時帶來今年通脹，令今年第二季起美國經濟增長率又下調。

　　中國改革開放政策就係逐步由計劃經濟轉向市場經濟，讓市場自行決定價格，政府不便干預；隨着市場逐步開放，中國經濟亦繁榮起來。今天內地官員對市場經 濟嘅信心甚至大於港府官員！反之，港府高官嘅干預行為漸多。例如1997年7月1 日「八萬五」政策及2003年9月「孫九招」，都係對地產價格進行干預。干預並非壞事，例如在樓價偏高時抽緊銀根，阻止泡沫進一步擴大（例如1979年底 至1981年雪茄伏嘅做法），但干預係咪做到恰如其分？呢方面智慧便需要極之過人才可。1994年1月上海朱決定人民幣同美元掛鈎，又係另一問題。 1983年香港成立聯滙制度，當年有其需要，最佳取消日子係1991年，如能取消，可減輕日後Boom & Bust嘅破壞力。

香港高地價政策長期化

　　夏鼎基嘅智慧係「積極不干預」（唔係唔干預，而係如非必要，都係唔干預好D）；反觀新加坡政府積極干預，其經濟一樣成功，證明干預唔係壞事，問題係干 預點樣恰到好處？加上做官者通常有智慧者少、喜歡蕭規曹隨者多，例如聯滙制度到咗今天，有邊個夠吉士取消佢？擔心2003年9月起嘅勾地政策亦將變成長期 政策，令本港土地供應極受限制，香港高地價政策再一次長期化。1997年前高地價政策，市民冇選擇權被迫接受；在今天中國政府愈來愈開放環境下，香港再實 行高地價政策，只會加快本港各行各業移入內地。

　　美國2004年6月起開始加息。十分奇怪，過去兩年在利率向上環境下，美國信貸不減反增，去年私人家庭全年收入升1.2％或九百三十八億美元，負債卻 升11.7％或一萬二千零八十六億美元。換言之，2001年11月開始嘅美國經濟復甦主力來自信貸增加，令消費升13.4％、政府開支升10％、商業機構 開支升3.6％、住宅樓建造更升35.6％。美國首七個月CPI升4.8％（去年全年升3.4％）。美國信貸增長率開始放緩係短期利率見五厘二五之後；換 言之，信貸增長放緩嘅影響在美國經濟只係剛剛開始，真正影響係點？目前仍言之過早。

　　美國今年起有七千七百萬人（相當於總人口四分一）開始踏入退休期（美國人六十歲退休），通常習慣遷往生活水平較低嘅城市居住，或早已買咗第二間屋，而 將自住嗰間出租或賣掉。香港人退休年齡係五十五歲，因此更多人早在內地購入第二間屋，香港嗰間留畀子女（子女或會賣掉買新屋，形成二手樓價較新屋便宜許 多）。因此，香港能否繼續執行高地價政策亦成疑問。

新出口退稅利農產品及IT產品

　　中國財政部、國家發改委、商務部、海關、稅務總局五部委聯合發出通知，調整部分出口商品嘅出口退稅率。所有非金屬類礦產品如煤炭、天然氣、石蠟、瀝 青、硅、砷、石料、有色金屬及廢料、二十五種農藥、鉛配蓄電池、氧化汞電池、細山羊毛、密木、軟木製品等取消出口退稅；二是一百四十二個稅號鋼材出口退稅 由11％降至8％；陶瓷、部分成品革、水泥、玻璃出口退稅由13％降至8-11％；有色金屬材料出口退稅由13％降至5％、8％和11％；紡織品、家具、 塑料、打火機出口退稅由13％降至11％；非機械驅動車（手推車）及零部件出口退稅由17％降至13％；IT產品、生物醫藥物品及國家鼓勵高科技產品出口 退稅由13％提升至17％，農產品為原料之加工品出口退稅由5％或11％提升至13％。　　新政策9月15日起執行。出口企業必須在9月31日前持合同到 主管出口退稅機構登記，12月14日前報關者按以前出口退稅計，12月15日以後出口者按新出口退稅計。

　　呢次出口退稅措施，對農產品及IT產品有利，對水泥、鋼材、紡織及低技術含量產品出口不利；至於對個別公司業績影響如何？要逐隻秤也。

　　九龍建業（034）、東方明珠創業（632）停牌。

　　■爪哇控股（251）9月25日；富麗花譜（8176）、老虎科技（8046）、時富投資（1049）、中國星集團（326）、時惠環球（996）、創富生物科技（340）、閩信集團（222）、豊采多媒體（764）26日公布業績。