6月9日，周五。恒生指數反彈178.58，收15628.69；成交三百三十三億八千 多萬元。6月期指升161點，收15575點。國泰（293）升 6.95％，見十三元八角五仙，市場對國泰收購港龍有正面評價。恒隆地產（101）跌3.61％，見十三元三角五仙，主因擔心利率向上，令收租股缺乏吸引 力。
周四紐約期銅跌6.5％，見三點三五美元一磅；倫敦期鋁跌4％，見二千五百一十美元一噸；鋅跌7.8％，至三千三百二十美元；今天上海期銅一度跌停板。美林證券估計，今年鎳、鋅及鋁價格可能進一步下跌，建議吸納煤炭及鐵礦石生產股。
世貿組織認為油價今年見頂
WTI對油價預測：今年平均油價六十六美元、2007年六十美元、2008年五十五美元、2009年五十美元、2010年四十五美元。換言之，世貿組 織認為，油價喺今年見頂！睇好能源股者可參考WTI嘅估計。花旗銀行5月份報告認為依家油價中有二十美元係炒賣因素，如將上述因素剔除，合理油價喺五十美 元一桶水平。
中海油（883）去年每股純利六十一仙人民幣，較2004年升55.6％，相信已係純利增長高潮。今年每股純利估計六十五仙，較去年升6.5％。由於 純利升幅大減，O睇跌；加上明年起純利進入回落期，理論上股價高潮已過。中石油（857）去年每股獲利七十五點四仙，較2004年升27.5％。今年估計 每股純利八十五點七仙，升13.66％，主因內地放寬成品油零售價。明年估計每股獲利八十九點二仙，升4％，問題係純利雖然仍可溫和上升，但O應下降，結 果只能令股價牛皮，炒上落市。
冠捷（903）今年首季營業額升87.23％，純利升32.8％，每股獲利一點九三美仙，升2.11％。主因係顯示器面板價格平均下降10％，三十二 吋或以上電視面板跌幅更大，接近20%。冠捷今年首季營業額大升，但毛利率下降，令純利升幅唔及營業額；加上去年發行新股令股本擴大，結果每股純利升幅有 限。相信亦係大部分廠家面對嘅問題，生意愈做愈大，但每股純利卻未見上升。
隨着樓價停止向上，投資者開始關心地產股純利（唔計物業重估）係咪喺去年見頂？市場開始反映呢個想法。2003年9月特區政府推出孫九招；用勾地代替 定期賣地，令2003年9月後香港土地供應量大減，地價因此上升，2004年曾推高樓價；去年地產商惜售（因地價太貴，賣出物業無法補充同樣土地），令樓 價仍上升。但到咗今年，樓價逐漸到咗用家抗拒水平，出現去年內地鋼鐵股面對嘅現象（礦砂加價70％，但製成品卻跌價30％）。今年香港現象係土地價格因供 應不足而再上升，但樓價因市場抗拒高價而下調（或滯銷）。麵粉漲價，麵包無法加價因缺乏承接力。孫九招有效日期到2007年，明年3月後政府可將未售居屋 分三年推出每年六千多個，進一步吸納買樓人士購買力。地產發展商面對麵粉貴過麵包嘅尷尬形勢，不知如何是好，唔少地產商轉向內地發展。
銅及糖上一個牛市由1968年起步，1974年見頂；其後其他原材料價格上升，但銅及糖無法再見1974年高水平。呢次銅及糖於1999年起步，係咪今年見頂，日後甚至其他原材料格上升，銅及糖皆無法再見今年嘅高價？
過去一百年商品有多個上升周期，例如1906至22年、1933至52年；1968至82年，都係十分長；呢次由1999年起計只有七年。喺上一次商 品上升周期（1968至82年），股票及債券價格表現失色，呢次美股由2000年3月起計表現亦失色。原材料價格上升，最先傷害生產商邊際毛利，最後影響 消費者購買力；加上通脹同利率係孖生兄弟，難免推高利率。
投機唔係犯罪，但必須分辨清楚自己到底係投機抑或投資，千萬唔好將唔成功嘅投機轉為投資。如要投機，先問問自己承受損失能力（因為投機結果係 double or nothing），唔好用輸唔起嘅錢去投機。投機首重時機，你對時機掌握能力係點？唔好借錢投機不然你將風險擴大一倍。通常用作投機嘅錢只佔投資組合中 20％，一旦投機失敗，便嚴守止蝕。
攻守得宜投機者必學技巧
去年10月市場風險好細，你有冇採取進攻策略；反之，今年5月起風險大增，你有冇有轉為防守策略？攻守得宜係所有投機者必學嘅技巧。如果連呢點都唔懂，請不要學人投機。
金磚國（BRIC）巴西、俄羅斯及印度各有各問題，唯一仍可睇好係中國，依家中國唯一問題係經濟過熱。原材料價格回落，巴西、俄羅斯皆受害，印度因資 金不足亦受壓，只有中國受惠。有人話中國冇人權，1900年前美國一樣冇人權（嗰陣時中國人被賣豬仔到美國做苦工不計其數，黑人喺農莊做奴隸）。所謂衣食 足，然後知榮辱。1970年前香港亦係貪官污吏嘅世界；我老曹唔係鼓勵中國冇人權，或者認為貪污係好事；只係認為係社會發展其中一個過程，只要政府努力改 善，便有希望。所謂社會罪行，90％同貧窮有關；一旦社會富裕，90％罪行可自動解決。
有人認為基於中國因素及印度需求推高資源價格。七十年代並冇中國因素及印度因素，但七十年代通脹率較2001年更高；換言之，中國因素及印度因素只係借口，真正原因係美國貨幣政策（今天全球資源有25％以上由美國人消耗，美國人口只佔全球5％）。
十七年前六四事件後，我老曹認為滿街鮮血係入市時機，事後被民主人士抨擊「冇血性」，令我老曹唔開心好一段日子。今天回顧，發現大部分投資成功嘅人士 都係冇感情。金融市場就係需要我地呢批「冇血性」嘅分折員；例如上月叫人Sell in May，又被朋友喺背後話「大淡友」……。金融市場需要嘅係理性，千萬不可感性（上述亦係電影明星、歌星等投資失利嘅理由，因為佢地太感性）。1989年 六四事件後入貨，到1997年7月沽出嘅話，投資回報率係本金六倍，除1970年1月至73年3月嗰段日子外（上升十六倍），港股好少有呢個升幅。
做官者凡事都要數據
過去六星期新興市場股市跌幅超過20％，亞洲四小龍（包括日本）股市跌幅全部超過10％，令博反彈引誘十分大。雖然大量數據指出美國GDP增長率在放緩中，但核心CPI仍在上升，貝南奇相信通脹目標理論，只要核心CPI增長率高於2％仍要加息。
1997年4月我老曹曾游說香港政府官員唔好喺1997年7月1日實施「八萬五」房屋政策，理由係相信1997年7月後樓價會下調，當年高官嘅回應係 「你有冇數據支持？」我老曹無法回應。今天明白做官者凡事都要數據而非前瞻，做股市分析明白等到數據出現時已經太遲！例如2002年10月起美股回升，但 聯儲局仍繼續減息至2003年6月（即大市回升九個月後）；今年5月10日美股回落，不過聯儲局仲會加息，因為數據未轉壞！2002╱03年減息已證明過 分；今年加息相信@樣係過猶不及。十年期債券利率由年初嘅四厘四上升至5月初嘅五厘一九，代表對通脹憂慮，最近又重返五厘之下，代表債券市場對通脹憂慮在 降溫，但無法阻止貝南奇月底再加息，因為冇數據支持。
唔少人希望利率見頂，以為利率見頂係好消息；事實上，最後兩至三次加息嘅殺傷力才大。5月10日加息威力大家已見，相信6月29日加息威力亦無窮；如 貝南奇有智慧，6月29日應係最後一次加息（如智慧不足，8月份仍加多一次息，咁就大件事）。有超過50％機會6月29日係最後一次加息；至於五厘二五息 率可維持幾耐？2003年6月嘅一厘息維持到2004年6月（一年）才改變，高利率維持時間短Ｄ，估計亦需半年或以上，即2007年中才開始減息，第一次 減息更是出貨訊號（2001年1月開始減息，股市繼續回落至2002年10月）！經過5月份浴血，股市元氣大傷，真係有排搞。
周四跌市而成交大，代表已出現恐慌性拋售，大市短期可出現反彈。周五估計中嘅反彈已出現，所謂反彈，通常只升2、3％，最多升4、5％，絕對係富向險 中求嘅遊戲。喺跌市中保持旁觀較入市博反彈聰明，但唔少人樂此不疲。周四跌市成交額大可孕育反彈條件，但唔係轉勢訊號。「寧買當頭起、莫買當頭跌」，5月 份起股市係當頭跌，如果係熊市，必然跌穿250天移動平均線。遲早出現throw-the-baby-out-with the bathwater（連BB都一起倒掉），日後必定好多優質股任擇，最怕到時你冇現金。歐洲央行宣布加息四分一厘後，相信6月29日聯儲局亦唔示弱，全球 性銀根收緊持續，鐘擺往往由一個極端（今年5月）擺向另一極端，代表過去買美元投資新興市場嘅對沖基金必須沽出新興市場股份，買回美元，貝南奇為捍衞美元 信心，6月29日加息絕不手軟！五窮六絕已肯定，擔心7月無法翻身，因為一個跌市通常可維持三至五個月，換言之，見底日子不在眼前。今年首四個月投資市場 一再忽視風險而冒進，此乃見頂之兆（莫名其妙嘅興奮），礦務股早已出現泡沫，5月泡沫爆破，但有幾多人肯止蝕？
各國玩輪流加息遊戲
新興市場股市大幅回落，不過，新興工業國財政狀況已較1997年時好，唔會引發連串貨幣貶值，但各央行輪流加息遊戲，至今仍未停止。過去四十八小時分 別有歐洲央行、丹麥、印度、南非、泰國、土耳其及南韓宣布加息，其中以土耳其加幅最大，一次過加息一厘七五，至十五厘。印尼盾、菲律賓彼索等跌幅已唔細， 6月29日聯儲局如再加息，會令Carry Trade成本上升。
Carry Trade即係以低息借入一種貨幣，然後投資另一種貨幣或資產，其回報率足夠支付低息借入貨幣嘅利息外，仍有盈餘作為Carry Trade人士利潤。1994年我老曹亦玩過，便係喺一百日圓兌一美元時借日圓去英國買樓；當日圓升至八十兌一美元便被銀行追孖展，好彩手上仍有現金補 倉，一於唔平倉（每一百萬美元貸款滙率上損失一度達二十萬美元，都幾傷），捱過之後就財息兼收；一、日圓利率便宜（記得當年只有二厘半）、英國物業租金回 報六厘，即實賺三厘五唔使本。二、英國物業按年升值10％，可賺樓價。三、日圓從七十八兌一美元開始回落，喺滙率上亦有得賺。2001年日本更實施零利率 政策，借日圓只需支付一厘半息……。2004年起我老曹開始賣英國樓還日圓（大約喺一百一十水平）。不但享受十年低息（二厘半至一厘半），喺滙率上獲利 10％，喺英國物業價格上獲利接近100％。2001年起日本政府實施零利率政策，唔少人借日圓買金、借日圓買美政府債券賺息差、借日圓買股票、借日圓買 美國樓、香港樓，相信數目唔細，尤其係對沖基金，過去三年日經平均指數上升80％，唔少投資者利用Carry Trade（借廉價錢買日經平均指數成分股），賺咗唔少。
衍生產品平倉威力極大
今年4月起不但日本銀行威脅今年7月（或9月）取消零利率政策；加上去年11月至今年5月日圓兌美元升值8％，產生追孖展行動，唔少Carry Trade客需要平倉，拋售日股、美股、美債，最後連黃金亦拋售以清還日圓貸款。因為擔心日圓進一步升值；日本銀行結束零利率政策，令資金成本開始上 升。日圓升值往往引發美股拋售，例如1973╱74年、80年、90年及2000年，最近一次係今年，衍生產品unwinding（平倉）威力好大。
再加上貝南奇採用通脹目政策（其實核心CPI上升3.2％並冇乜嘢大不了）而抽緊美元銀根，擔心股市係咁先！喺經濟環球化下，美國唔會出現類似七十年 代嘅惡性通脹，投資者本來唔使太擔心，只係貝南奇刻意將核心CPI增長率拉回只有2％，不惜抽緊銀根，相信冇人可以阻止（1987年10月格蛇亦曾引發股 災）。依家對Carry Trade者最大威脅係日圓升值（貸款利率一厘，如日圓升值6％，即變相利率係八厘），依家美國十年期債券利率係五厘，已產生負回報率三厘，可以引發 unwinding潮。隨着金融技巧普及，過去只有專業人士才玩嘅遊戲，依家已經有唔少人加入，形成金融市場極之波動。例如Carry Trade喺1994年前只係少數人玩嘅遊戲，今天差唔多所有私人銀行已有呢種服務。至於有幾多人玩？相信數字好大。
內蒙發展（279）、國新集團（1215）停牌。
■奧思集團（1161）、昌興國際（8139）、天時軟件（8028）、易貿通（8163）6月20日；北亞策略（><）21日；易盈科技（8299）26日；大誠電訊科技（8003） 28日公布業績。
沒有留言:
發佈留言