11月30日，周五。恒生指數升161.07，收28643.61；成交1164.91億元。12月期指升479點，收28880點高水。平安保險 （2318）升3.3％，收85.95元。但中國遠洋（1919）跌2.3％，見29元，因淡馬錫宣布減持八千萬股，每股26.75至27元。中國財險 （2328）跌2％，見12元，公司宣布汽車保險業務有虧損。不過，中國重汽（3808）回升10％，見12.22元，公司宣布出售二千五百輛貨車去越 南，明年第一季先交五百輛貨車。
油價在11月份首次低於90美元一桶（11月29日最高見99.29美元）；1月期油跌2.7％，成88.52美元，油價逐漸恢復正常，估計會進一步回落。
2008年美國新屋銷售估計再跌13％，即進入第三年回落機會好大，反映美國房產市場繼續惡化。
滬深三百指數跌2.16％，收4737.41。中石油跌4.63％，收31.5元，係上市以來最低水平，11月5日上牌日最高見48.6元後一直下跌。
滬深指數已由高位回落二成
美國聯儲局宣布，今年8月美國各銀行向工商界貸出3.3萬億美元，但到11月中已降至3萬億美元。在不足三個月，美國信貸收縮9％（喺呢段日子聯儲局 已不斷注資及兩次減息）。本周一聯儲局又再注資以抗衡信貸出現過快收縮。今年8月起不但聯儲局注資，歐洲銀行、英倫銀行亦不斷注資以防止全球信貸收縮太快 （本港金管局亦注資，目的係阻止港元滙價太強）。
滬深三百指數由10月17日嘅5891點跌至11月28日嘅4619點，跌幅21.59％。瑞銀投資分析部嘅Sakthi Siva質疑內地股市泡沫係咪已爆破？股市指數如果由最高位回落15％，有機會係方向改變（此乃為何止蝕位訂喺15％嘅理由）。我老曹亦有此擔心，並早响 上周提出呢個質疑；至於內地A股回落會否影響本港國企同紅籌股？需要時間證明。
大部分二線股應已見底
A股回落應影響內地保險股第四季收益，同時影響內地銀行股手續費收入。法巴將招商銀行（3968）評級由買入改為持有，估計2007年每股獲利0.9 元升71.5％；2008年每股獲利1.39元，上升46％；2009年每股獲利1.68元，上升14.9％。內地保險股同銀行股純利由高增長期逐漸過渡 到低增長期，依家高O會否企唔住而走向低O？法巴建議改持內需股如中糧控股（606）或增加馬來西亞投資。花旗集團推介李寧（2331），目標價29元， 認為該股可從奧運概念中受惠。
花旗集團提出股市大波動，應從二線股搵投資價值，建議吸納雅居樂（3383），目標價17.2元及中化化肥（297）。今年8月港股出現deep V後，9月同10月本港炒港股直通車計劃，投資界忽略二線股投資價值，以致二線股大落後，今時今日係咪值得推介？
上周11月22日恒指見25861點時我老曹已指出，由7月26日恒指23557點跌至8月17日19386點係二線股浪A，反彈到10月30日 31958點係二線股浪B，回落到11月22日25861點係二線股浪C；到11月22日即由7月26日開始嘅二線股回落潮（A、B、C）已完成，應進入 上升浪（1、2、3、4、5）；反之，大價股由10月30日開始至11月22日才係回落浪A，依家進入反彈浪B（即聖誕節反彈），未來仲有回落浪C。11 月22日應該係大部分二線股見底日子而非大價股。
下半年股市出現咁大波幅（恒指動輒一天上落超過1000點），並非良好訊號；例如1993年第四季、1997年第三季恒生指數皆出現極大波幅，事後證 明1993年12月及1997年8月係恒生指數重要頂部。2007年7月至今類似情況又出現，的確有點令人擔心，10月30日恒指係咪見頂？本港散戶參與 度已下降，但相較外國，港股散戶參與程度仍高。依家最多散戶參與係內地股市，因此內地A股波幅更能反映散戶情緒，滬深股市今年5月散戶持股日數跌至最低， 指數响10月升至最高（附圖顯示今年5月起內地A股極之波動）；反之，本港已有唔少好似我老曹咁參與投資股市近四十年，訓練出紀律及逐漸成為「趨勢投資 者」（momentum investors）而非憑感覺去投資（intrinsic value investors）。市場上愈來愈多訓練有素嘅投資者，令散戶贏錢機會愈來愈少。例如利用P╱BV分析，可令趨勢投資者响1994、97及2000年及 時離開股市，以及2007年10月大量減持至30％，市價一旦高出賬面值100％以上，風險便急速上升，今年10月國企股市價高出賬面值五倍以上，令人不 得不小心。咁樣做可能錯過賺大錢機會，但個人投資風險可以大幅下降。
美國方面調查顯示，投資者對2008年睇法分歧好大，甚至對2007年12月反彈市，支持者只有48％：認為無力反彈佔52％。50％投資者擔心 2008年美國經濟陷入衰退，認為可避免衰退者不足40％。92％接受調查者睇淡細價股响2008年嘅表現，87％仍睇好增長股（growth stock）而非價值股（valued stock）。以過去經驗嚟睇，經濟增長放緩，二線股表現較遜色，形成投資資金較集中喺大價股身上。2008年新興市場亦較多投資者睇淡。行業方面，能源 股、工業股、原材料股亦被睇淡，金融股估計進一步轉弱，睇好行業只有高科技股及健康護理行業。2007年美國GDP估計可升2.6％（剔除住宅投資，升 3.6％），金融業純利則大幅滑落。估計2008年GDP升幅响2.1％至2.3％之間，並且需要聯儲局進一步減息以抵銷金融業所產生嘅不利影響。估計 2008年聯邦基金利率由4.25厘降至3.5厘（即最少兩次減息）。美國金融股2007年上半年純利上升15％、第三季下降26％，擔心第四季下降 40％（或全年下降10％）。非金融業第四季純利仍可上升12％。美元弱勢令出口回升，估計可令標普五百指數响2008年每股純利上升14％（美元弱勢令 來自海外純利大升）。
債券投資吸引力有限
近日美國十年期債券利率見3.9厘以下，相信已見底。2008年長債利率回升機會好大（短期利率則回落），家吓利率倒掛現象到2008年第三季消除，從這點睇，債券投資吸引力有限。
2008年點樣响高科技項目搵目標對象？其中涉及幾項專業分析。一、毛利率有冇上升空間？二、產品需求係咪進入上升周期？三、該股市價係咪過度低估？四、未來純利增長機會有幾多？
一位喺1976年教曉我老曹睇RSI嘅朋友來電話，今年8月雖然大家同時睇好金價，當9月金價見700美元時因RSI出現超買訊號而沽出，只賺咗40美元一盎斯，點解我老曹可留守至830美元才獲利回吐？
分別係佢炒期金我老曹揸實金。期金買賣方便，實金買賣麻煩而且差價大。過去三十年我老曹從未見過呢位朋友喺金市或股市賺大錢（輸大錢卻有兩、三次）。 有時買賣方便反而害事，以為RSI超買而偷雞賣出，結果金價破700美元卻頭也不回。我老曹1968年入行，當年並冇走勢分析學，因此最先學嘅係基礎分 析，到1971年才學走勢分析，經常發現基本因素與走勢之間嘅矛盾，當年有一位惠嘉證券公司資深分析員（可能佢已忘記我老曹，就係今天獅球嘜花生油公司嘅 老闆）。當年請教佢，佢講咗一句話影響我老曹一生。佢話，一旦兩者有矛盾，短期睇走勢長期睇基本分析，最終走勢必臣服於基本分析。就係呢句話，1973年 1月我老曹同林森池兄响人人睇好港股時夠膽睇淡，夠膽同當年老闆持相反意見。理由係雖然勢好，但基本因素卻淡。今年9月金價係勢淡，但基本因素好！近年响 公開場合我老曹過分強調走勢，極少強調基本因素。近年分析員大部分都係學走勢分析出身而非學基本分析。結果人人都學曉花拳綉腿缺乏基礎分析做後盾，功夫唔 得扎實（一膽、二力、三功夫；打交最先要膽大、力大，最後才講功夫）。
2003年美國只有0.5％貸款者採用ARM貸款方式，今天23％貸款者採用ARM，或有1萬億美元貸款採用ARMs。上述方式貸款2007年起陸續 到期必須重新釐定貸款利率，高潮喺2008年上半年。到底有幾多物業貸款者無力支持較高利率？何況仲有信用卡貸款、汽車貸款？例如通用汽車公司貸出款項 2600億美元，福特汽車公司貸出款項2000億美元。單靠聯儲局減息及注資能否解決大量呆壞賬問題？感恩節後開始嘅美股回升到底係聖誕節前反彈抑或另一 升市開始？點解短期利率仍喺長期利率之上？上述情況唔正常。過去四十年從利率倒掛預測經濟放緩每次皆準確，只有一次失效；反之，從標普五百指數預測經濟衰 退從1960年至今皆失準。
萎縮與反萎縮之戰十分漫長
12月11日減息0.25厘機會高過94％，因信貸市場在萎縮中，有賴聯儲局注資及減息對抗，此乃股市出現大起大落製造唔小深溝嘅理由，最終係信貸萎 縮支配大局抑或係聯儲局成功阻止信貸市場萎縮而重新納入擴張期？要到2008年第三季才清晰。這場萎縮與反萎縮之戰十分漫長，估計唔少銀行、保險公司及美 國地產公司不但純利減少甚至派息減少（或唔派息）。摩根士丹利又攆走Zoe Guz，公司响貸款業務出現賬面損失37億美元，此乃繼美林、花旗集團、貝爾斯登、瑞銀後另一位，亦係唯一嘅一位女性，睇嚟陸續有來。Citadel Investment計劃注資25.5億美元入E*Trade Financial Corp，理由係該公司投資30億美元嘅組合，日前市值只有8億美元。Citadel Investment估計日後可持有20％ E*Trade；加上已持有3％，計劃為E*Trade另找新CEO。周四E*Trade股價仍跌8.7％，收4.82美元。
深圳房價再上升空間有限
深圳及上海將率先開徵城鎮土地使用稅，最少3元╱平方米，最多30元╱平方米，共分六個等級。深圳計稅期由11月1日開始，除特殊豁免外，使用土地所 有單位及個人均需繳納，個人所有非營業用房屋則暫緩徵收。上海由今年1月1日起計，最低1.5元一平方米，最高30元，其中內環線以內嘅地區最貴，外環線 以外最便宜，每年繳納。
目前深圳房價已係香港45％，日後上升空間有限。响內地銀根緊縮、稅收調整等經濟槓桿推動下，深圳房成交量大幅下滑，但價格依然堅挺。最後深圳房價走向何方？分析界指明年「五．一」前後才清晰。
周四財政部決定發行2007年第五期憑證式國債共300億元人民幣。其中三年期240億元，票面利率5.74厘；五年期60億元，票面利率6.34 厘，12月4日至20日接受認購。由購買之日開始計息，到期一次過本利歸還（不計複利），提前兌取者收手續費1％，即內地進一步抽緊銀根。
無證二手房問題逐漸浮現
內地有一批無證二手房，交易唔受國家法律保護，中介行唔操作，只係買賣雙方到律師樓辦理手續便算交易完成。但由於冇房產證，根本上並無法律保障。喺炒 得火熱時，單位一再轉手，理會嘅人唔多，今天二手房交易靜下來；加上銀行唔肯轉按，就只能靠雙方信任了。就係雙方所簽合同，由律師做個公證，但並冇法律保 障，根據中國有關法例係禁止交易嘅。由於冇房產證，有人一房兩賣，亦有人賣後因房價漲而反悔，有D轉售多次連真正賣主係邊個都搵唔到。上述問題喺內地逐漸 浮現，大量糾紛已出現。
各位如欲投資內地物業，先要確保所買房子有房產證才好購買，冇房產證只係買賣雙方私下交易，如前業主持有未滿五年，房屋交易須交納好多稅費，責任又唔知由邊個負責，好麻煩。
沒有留言:
發佈留言