科學化投資策略

　　11月2日，周五。恒指跌1024.54，收30468.34；成交1523.4億多元。11月期指回落824點，收30461點，過去低水現象逐漸消 除。　　三菱UFJ銀行跌6％，見1052日圓；Mizuho財務（日本第二大銀行）跌5.8％，見607000日圓；比利時最大銀行富通跌回落 5.2％、星展銀行跌4.4％、花旗集團跌6.9％。滙控（005）今天跌2.4％，同全世界比較跌幅算溫和。長江實業（001）跌5.6％、新地 （016）跌4.7％、中石化（386）跌3.6％、中海油（883）跌2.4％。太平洋航運（2343）升2.1％，見8.74元。Net Dragon（8288）首天掛牌升25％，見16.52元，證明只要業績好，便無懼跌市。

　　外資銀行QDII額已近用光並申請額外配額，上述現象去年6月推出最先因投資渠道狹窄而唔叫座，自監管機構放寬海外投資渠道後，國內投資者可購買QDII基金而帶動QDII產品銷售，令外資銀行手上QDII配額再用光而申請追加。

　　另一消息係港股直通車即將啟動，不過家吓所有專家一致同意：國企股、紅籌股已不便宜了。建議內地投資者小心。

　　高油價通常都引發衰退，例如1973、1980至81、甚至1990年。點解呢次高油價經濟卻冇事？根據Cambridge Energy Research Associates主席Daniel Yergin解釋，過去高油價係因為供應方面出問題而扯高油價，今次剛相反，係需求強勁而將油價推高所以冇問題。值得注意嘅係，近期油價由70多美元升至 96美元，情況同以前相近係供應方面出問題而扯高油價，例如擔心土耳其入侵伊拉克北部產油區及美國對伊朗態度，令人擔心石油供應可能出問題而扯高油價，因 此近日油價上升係壞消息唔係好消息，投資者應小心。

第三季係經濟擴張末期

　　美國經濟數據顯示，2007年第三季極有可能係擴張末期，第四季起，GDP增長率又再放緩。消費者開始失去信心；耐用品如傢俬、汽車及貴價電子消費品 訂單已連續數月回落，但2008年美國經濟進入衰退嘅機會仍然唔大。2006年2月貝南奇上台後，股市出現唔少Deep V，事後爬升得更高，呢次又係咪咁？美國房地產已無可避免進一步惡化，不但已退休嘅格老咁講，連貝南奇都咁講。至於房價下跌會否引發九十年代日式衰退或 1997年8月港式衰退？如果從九十年代初期嗰次美國房價回落睇，美國經濟只會出現軟着陸（一季GDP負增長）而唔會陷入衰退（連續兩季GDP負增長）。 2000年科網股泡沫爆破，加上2001年「九一一慘劇」，美國經濟亦只係出現軟着陸（2001年第三季GDP負增長）而冇出現衰退，何況貝南奇2006 年2月上任後，已努力去阻止經濟軟着陸出現。佢希望美國經濟連一季GDP負增長亦唔會出現，成功與否此乃後話；換言之，未來美國經濟只會放緩而唔會出現衰 退。今年有幾多人因擔心美國經濟可能出現衰退而錯失投資機會？投資就係找尋明天嘅大贏家；我老曹近十年早已採用呢個投資策略，即Asset and Sector Allocation Model。利用資產分配及行業盛衰去制定自己嘅投資大方向。找尋未來三到六個月表現最出色行業，再利用O高低去決定投入資金比率，利用相對強弱勢模式 （Relative Performance Model）找尋值得投資嘅股份。搵出邊D股份出現一星期強勢、一個月強勢及三個月強勢（一星期強勢可能只係偶發，一個月強勢值得注意，三個月強勢便殊不 簡單）。近年中國股市、印度股市最強，然後香港、美國，最後係日本。下跌就弱勢股先行，如日經平均指數下跌三個月，其他國家股市亦將下跌；反之，中國股市 上升一段日子，港股亦要跟隨……。再以各國GDP增長率、通脹率、利率水平做參考，將投資策略科學化，盡量將人性弱點從投資策略中剔除。

揸美金分擔美樓價下跌損失

　　中東局勢刺激油價向上，連金價亦一併帶上，呢類政治因素可預測性甚低，現階段我老曹唔主張過分介入資源股而同意畢非德嘅投資策略。本港H股仲玩緊追上 A股遊戲，何時告終亦無法預測，只係H股股價愈接近A股，距離結束日子愈近。美股大跌只因為擔心聯儲局停止減息。假設未來美國樓價繼續下跌，第三次減息遲 早出現，相信會喺明年1月。聯儲局今年8月起又再玩Reflation遊戲，透過刺激全球股市上升去抵銷美國樓價回落及次按危機（2001年1月格老利用 刺激美國樓價上升去抵銷科網股泡沫爆破）。利用利率一減再減、美元滙價一跌再跌去阻止美國樓價回落所引發呢次按危機擴散到各行各業（1929年聯儲局所犯 錯誤就係冇及時阻止股市下跌而引發連鎖反應）。1990年日本銀行所犯錯誤亦係冇阻止日本樓價下跌影響擴散到銀行業……。本港金管局所犯錯誤係為咗維持聯 滙制度而唔理會資產膨脹及收縮，係100％技術官僚操作嘅代價（只懂執行職責唔曉靈活變通）。利用減息及美元貶值將美國樓價回落虧損讓全球揸美元嘅人齊齊 負擔，各位揸美元响滙率上嘅損失，就係補貼美國樓價回落嘅部分損失；道理好簡單—如果一個人損失1000萬元，佢可能會破產；如果一百個人每人損失10 萬，就冇咩嘢……。說穿了貝南奇所運用嘅策略，係讓全球揸美金者齊齊分擔美國樓價下跌嘅損失，以阻止危機擴散。

　　中國、日本、台灣、南韓、香港、新加坡等國家或地區揸最多美金，即係貝南奇搵我地老襯，抵銷美國樓價回落嘅損失；點解咁多國家（或地區）又甘於被搵老 襯而唔大量拋售美元資產呢？皆因美國係佢地嘅最大貿易夥伴、最大嘅商品及服務買家！如果美國經濟衰退自己國家或地區亦受害……。一個願打、一個願捱，世界 就係咁有趣。

　　值得思考嘅問題係，美國房地產價格進入回落周期，同時硬商品價格係咪可以出現Supercycle？呢點係我老曹同Jim Rogers最大嘅分歧。中國點解大量吸納原材料？目的只係製造產品賣到美國。如果美國對製成品吸納胃口下降，中國會否繼續大手吸納原材料？今年原材料高 價可能只係反映美元弱勢多於反映原材料需求較去年更強（金價以歐羅計未創新高）。中國近年真正需求嘅係軟商品（農產品），响香港投資又缺乏呢方面投資工 具。

　　今年全球表現最出色嘅係內地A股及印度股市。港股亦唔弱（尤其係國企、紅籌股），美股So So，日股便冇功課交，證明我老曹睇好中國、睇淡日本策略同民族感情無關，完全係理性分析。明年有人質疑A股係咪過度自信而引發情緒上嘅轉向（鐘擺理 論），呢種質疑值得留意但唔好猜測。千祈唔好日日叫狼來了，咁樣下去有一天狼真嚟咗亦冇人信你。A股依家極高嘅估值係存在情緒轉向條件，過早擔心呢個問題 嘅分析員卻錯過咗十一個月嘅大牛市；响牛市中，如果投資者心態係一旦轉向就大件事；即恒生指數如下跌15％，出現大件事機會極大。

鋼材股整固後可以再上升

　　鋼鐵業喺城市化過程中扮演重要角色，任何國家或地區响工業化時期必有一段日子對鋼鐵需求十分大，例如1945至80年嘅日本及歐洲戰後重建，繼後雖然 仲有南韓及台灣等國家，地區大搞城市化，但全球鋼鐵業仍逃唔過供過於求嘅局面。呢次推動鋼鐵業嘅力量係中國，印度亦開始加入；中國同印度加起來嘅力量應大 於當年日本同西歐加起來。上一次鋼鐵業Super Cycle維持咗三十五年，今次由中國同印度加起來嘅力量肯定超過三十五年，上述未計中東國家因素。從呢點睇，最近鋼鐵股股價回落只因2007年7月1日 起中國政府將出口退稅取消後反要徵稅嘅結果，只係短期因素。從Super Cycle角度睇，鋼鐵業經整固後又再培養上升力量，至於幾時重新睇好鋼材股？呢個涉及timing，容後再談。今年1月中國曾宣布動用1萬億元外滙儲備 建立策略性投資，以確保資源供應，11月印度將加強勘探俄羅斯庫頁島，並同意投資開採該島資源。日本政府下月將探訪南非，以確保獲得足夠嘅鐵礦石供 應……。睇嚟各國對天然資源嘅競爭並未停止。過去為咗競爭天然資源而爆發第一次及第二次世界大戰；今天因武器威力太大，相信唔會有第三次世界大戰，何況銀 彈早已成為最有力嘅武器，大家已在互擲。

　　艾克森石油2007年第三季純利較一年前同期減少10％，只有94.1億美元或每股1.7美元（2006年同期104.9億美元或每股1.77美 元），純利下跌理由係下游業務承受唔到高油價壓力；其次係石油產量較去年減少十一萬桶一天。上述情況相信亦喺其他石油企業身上出現。艾克森周四股價跌 3.8％。

　　第三季美國住宅被接管數字較去年同期上升一倍，7月至9月份被接管房屋單位共635159間（即一百九十六間住宅中，有一間被接管）。較第二季上升30％，估計情況一直伸延到2008年年底。美國房地產低潮極有可能响2010年。

兩次減息未能化解壓力

　　美國經濟單單依賴兩次減息能否化解油價升上96美元一桶嘅壓力？或美國住宅售價回落嘅壓力？周四聯儲局向金融體系注資410億美元，係8月以來最大一 次注資行動，但呢次美股仍然下跌，唔似8月17日嗰日咁美股立即止跌回升。止痛藥開始失效抑或係減息0.25厘嘅威力仲未夠？周四道指跌2.6％，係今年 來第四大跌幅。瑞信跌5％，AIG跌6.7％、摩根士丹利跌7.2％、美國銀行跌5.3％，銀行股紛紛被拋售。Radian公布第三季出現虧損，股價跌 14％； Ambac跌19.7％，MBIA跌11.6％。邊個話次按危機已解決？至今已有二百萬家庭延期供款，次按貸款到期再續時必須將利率提升，估計2008年 再有二百萬個家庭供唔起樓，太早開心嘅人通常笑得唔耐（He, who laugh last, laugh best!）。

　　Happy Halloween！貝南奇並冇扮鬼嚇人而宣布減息0.25厘，反而銀行股及次按股就嚇死人，令聯儲局被迫放出救生艇410億美元。美股未能止跌，而且更 擴散到亞太區。8月17日減貼現率半厘後，令金價上升20％、油價上升30％，呢次減0.25厘又會點？油價响96美元受阻，金價响800 美元受困，美元卻跌至1.45兌1歐羅或2.08美元兌1英鎊。然後保爾森喺印度大大聲話─—佢相信「強勢美元」政策。呢個係Halloween最大嘅鬼 話。

　　建行研究部發表最新研究報告，預計第四季中國GDP保持平穩快速發展，全年GDP將上升11.5％。第四季度內央行仍將推出各項緊縮措施及唔排除再加 息嘅可能性。CPI估計全年漲幅4.6％，10月CPI將出現小幅反彈，再次接近8月高點。商業銀行將加大綜合化經營力度，進一步國際化經營，增加海外業 務收入比重及轉型為多元化收入，減少對借貸業務利息收入嘅依賴。美國降息0.25厘而人民幣加息，將加快資金流入。上海、廣州兩地正面臨信貸額接近上限嘅 窘境，部分銀行已無錢可借，理由係政府收緊存款保證金率，令可貸資金減少。幸好3.3萬億元中石油A股申請資金回流，解決資金短期過緊嘅局面。從呢點睇， 第四季內地銀行純利升幅有限（因無錢可借），宜小心。

　　明年中國政府個稅徵收政策不變，炒股收入要申報暫毋須納稅。

　　亞太區股市受美股下跌影響而回落，其中最令人擔心反而係日本。9月份新屋動工數字減少44％（8月份減少43.3％），因批准條例收緊。日本銀行估計 2007╱08年度（3 月後）GDP只升1.8％（之前估計係2.1％），第三季GDP升幅1.8％，美國房地產回落逐漸影響日本。倫敦樓價亦進入回落期，擔心中國亦唔例外。